1. Ngu tihi ati dibutho da hombe di nga gelwa ku di timaha khe Jerusalema?

DIBUTHO da hombe da vathu vo ta ngu ka matiko o hambana-hambana ni tidimi to hambana-hambana va tshanganile Jerusalema. Ka ditshiku donedo ku mahekile timhaka to xamalisa ngutu. Makristu ya i ngati Majudha, kunukunuko a khatile ku womba-womba ngu tidimi to hambana-hambana. Kambe ati ti nga txi xamatisa ngutu ngu ti Vajuda vonevo va nga txi ti womba ni ti mpostoli Pedro a nga txi ti womba. Timhaka toneto ti txi pata didungula da ti to vona va nga sikota kuhanyiswa ngu ku kombisa likholo ka Jesu Kristu. Dibutho di tsakile ngutu ngu kuva di di engisile didungula donedo ha koza di wotisa tiya: “Nji txani hi fanelako ku maha?” Xamulo va nga yi mana ngu yiya: “Hundulukani, se mmwani ni mmwani a na kombele kubhabhatiswa.”—Mith. 2:37, 38.

2. Hi na bhula ngu txani ka gondo yiya? (Wona mfota wa kapa.)

² Msana keto ku mahekile timhaka to tsakisa ngutu. Kubhabhatisilwe 3.000 wa vathu ka ditshiku donedo ava va nga va valondeteli va Jesu. Aya i ti makhato a mthumo awu Jesu Kristu a nga ti ningile vagondiswa vakwe wo maha vagondiswa. Mthumo wuwa hi nga di hi txi wu maha ni nyamsi. Kambe ka timbimo tathu kha ti nge koteki ku vhuna m’thu e bhabhatiswa ngu maoranyana. Ti nga lava mtxima, dilembe ni ku pinda kasi ku m’thu e bhabhatiswa. Nga ha hi ti zivako ngu kona ti lava mizamo ya hombe kasi ku m’thu e bhabhatiswa ti to a txi va mlondeteli wa Kristu. Ka gondo yiya hi na xolisisa ati hi nga vhunisako tona sigondiana sathu sa Bhiblia ti to si hokelela ko bhabhatiswa.

3. Ngu kuya ngu dibhuku da Matewu 28:19, 20 ngu tihi ati sigondiana si fanelako kumaha ti to si hokelela ko bhabhatiswa?

³ Ti to txi bhabhatiswa txigondiana txi fanete kuthumisa ati txi ti gondako amu ka Bhiblia. (Lera Matewu 28:19, 20.) Ngako txigondiana txi txi thumisa ati txi ti gondako txi na fana ni “m’thu wo txhariha” awu a wombwako ka txidinganiso txa Jesu awu a akako nyumba txitimwi ka dirigwi. (Mat. 7:24, 25; Luka 6:47, 48) Hi nga txi vhunisa kutxani txigondiana ti to txi thumisa ati txi ti gondako? He wone tinzila tiraru.

4. U nga txi vhunisa kutxani txigondiana txako kasi ku txi kula kudotho-kudotho ti to txi hokelela ko bhabhatiswa? (Wona dibhokiso adi di ku: “ Vhuna sigondiana sako si ti vekela makungo ni ku ma hokelela.”)

⁴ Vhuna txigondiana txako txi ti vekela makungo a moya. Ngu kutxani i di ta lisima? Alakanya u di ka liendo lo lapha ngutu. Ka liendo lonelo ti nga maha u mana makhalo o tshura u ema u humula. U txi maha toneto mpfhuka wu na mba woneka wu di laphile ngutu. Ngu ha ku fanako txigondiana txa Bhiblia txi nga ti vekela makungo a moya aya ma si karati ku ma hokelela, se txona txi na ti pfisisa ti to txi nga sikota ku hokelela ko bhabhatiswa. Ti to u vhuna txigondiana txako thumisa txienge atxi txi ku “U nga maha tiya” ka dibhuku adi di ko Hanya wutomi wo tsakisa kala kupinduka. Vhuna txigondiana txako txi pfisisa ti to ati txi ti gondako ti yelanisa kutxani ni makungo aya txi ti vekelako. Ngako ku di ni makungo mamwani aya u ma tsakelako ku txigondiana txako txi ma hokelela bala aha ku ku “Timwani.” Thumisa txienge txiya kasi kubhula ni txigondiana txako ngu makungo aya txi lavako ku ma hokelela nga madotho mwendo a hombe.

5. Nga ha ti nga kombiswa ngu kona ka Marku 10:17-22 ngu tihi ati Jesu a nga gela dijaha dile do ganya ti to di timaha? Ngu kutxani?

⁵ Vhuna txigondiana txako ti to txi maha  kutxitxa ka hombe ka wutomi. (Lera Marku 10:17-22.) Jesu a txi tiziva ti to ti ndi na karata ku dijaha dile do ganya ku di xavisa sotshe silo sa dona. (Marku 10:23) Hambiketo Jesu a di gete ti to di maha kutxitxa koneko ka wutomi wa dona. Ngu kutxani? Nguko a txi di dhunda ngutu. Mbimo yimwani hi nga tshumelela msana hi leka ku kuzeta txigondiana ti to txi thumisa ati txi ti gondako ngu kupimisa ti to kha txi se lungekela kumaha kutxitxa koneko. Ti nga teka mbimo ti to m’thu e ambula wuthu wakwe wa kale ni mahanyelo a wona ti to e ambala wuthu wa wuphya. (Vakl. 3:9, 10) Kambe nga ku u txi kuluveta u bhula ni txigondiana txako mayelano ni mhaka yiya ti na txi vhuna ku txi kuluveta txi maha kutxitxa koneko. Ngako mu txi tolovela kuva ni mabhulo o nga yawa u kombisa ti to awe wa khatala ngu txigondiana txako.—Mas. 141:5; Mav. 27:17.

6. Ngu kutxani hi di fanete kuthumisa siwotiso a si txigondiana txi no womba mawonelo a txona?

⁶ Siwotiso so lava kuziva mawonelo a m’thu ngu si hi si thumisako ku hi ziva mawonelo a txigondiana ka mhaka yo kari. Thumisa siwotiso soneso kasi ku wona ati txigondiana txi ti kholwako ni ku ti pfisisa. Ngako u txi maha tiya ti na ku hehukela ku kubhula ngu timhaka to karata mbimo ayi yi tako. Dibhuku adi di ku Hanya wutomi wo tsakisa kala kupinduka! di na ni siwotiso so nga siya. Ngu txikombiso: Gondo 4 yi ni txiwotiso txiya: “U pimisa ti to Jehovha a tipfisa kutxani ngako hi txi thumisa ditina dakwe?” Gondo 9 yi ni txiwotiso txiya: “Ngu tihi ati u nga ti kombelako ka Jehovha?” Makhatoni ti nga maha txigondiana txako txi lava mbimo ya ti to txi alakanyisisa ngo siwotiso soneso. Kambe u nga txi vhuna ngu ku txi trenara ku txi ziva ku alakanyisisa ngu mibhalo ni ngu mifota ayi yi nga kombiswa.

7. Hi nga thumisisa kutxani sikombiso sa vamwani ngu nzila ya yinene?

⁷ Mbimo yi txigondiana txi pfisisako ati txi fanelako kumaha thumisa sikombiso sa vanathu vamwani kasi ku txi kuzeta. Ngu txikombiso ngako txigondiana txako txi txi tipfa ti txi karata kuya mitshanganoni u nga mu kombisa vhidhio ayi yi ku: Jehovha wa ni khatalela ka txienge atxi txi ku “Xota timwani” ka gondo 14. Ka tigondo to tala ka dibhuku adi di ku Hanya wutomi wo tsakisa kala kupinduka! u na mana sikombiso sa vathu vamwani ka sienge asi si ku “Engetela wuzivi wako” ni atxi txi ku “Xota timwani.” * Ti wonele ti to u si fananisi txigondiana txako ni vamwani ngu kuwomba to fana ni tiya: “Aku ene a nga tikota, nanawe u nga ti kota.” Leka txigondiana txi tipfisisa txipune timhaka toneto. Timwani u nga ti mahako ngu junyatisa maponto a lisima mwendo timwani ti nga vhuna mwanthu wule ka vhidhio ti to e thumisa ati Bhiblia yi ti gondisako. Ngu txikombiso u nga bhula ngu m’bhalo wo kari mwendo to kari a ti a nga ti maha ti nga mvhuna. Ngako ti txi koteka junyatisa nzila ayi Jehovha a nga mu vhuna ngu yona.

8. U nga mahisa kutxani ti to u vhuna txigondiana txako txi randa Jehovha?

⁸ Vhuna txigondiana txi randa Jehovha. U nga mahisa kutxani? Lava tinzila to txi vhuna ku txi tsakela tifanelo ta Jehovha. Vhuna txigondiana txako txi wona Jehovha kota Txizimu atxi txi nga tsaka atxi txi vhunako ava va txi randako. (1 Tim. 1:11; Vaheb. 11:6) Txi kombe nzila ayi txi nga wuyelwako ngu yona ngu kuthumisa ati txi ti gondako, ni ku tshumela u txhamusela ti to atiya ti kombisa ti to Jehovha  wa hi randa. (Isaya 48:17, 18) Txigondiana txako txi na kuzeteka kumaha kutxitxa aku ku lavekako mbimo yi lirando la txona ngu Jehovha li yako li txi kula.—1 Joh. 5:3.

9. Ngu kuya ngu Marku 10:29, 30, nji txani atxi m’thu ti nga lavako e txi luza ti to e va m’gondiswa wa Kristu awu a nga bhabhatiswa?

⁹ Ti to txigondiana txi kula txi hokelela ko bhabhatiswa ti nga lava txi luza so kari. Kufana ni dijaha dile do ganya hi nga womba-womba ngu dona, txigondiana txi nga lava txi luza so kari. Ngako mthumo wakwe wu txi lwisana ni ti Bhiblia ti yi gondisako ti nga lava txi wu leka. Vo tala ti nga lava ve leka vangana vawe ava va si randiko Jehovha. Vamwani va nga tsukulwa ngu maxaka awe aya ma si randiko Jehovha. Jesu a wombile ti to ka vamwani ti na va karatela kumaha toneto. Kambe ene a thembisile ti to ava va mu londetako kha va na mbi thelwa tingana. Hahanze keto, vona va na katekiswa ngutu, ngu kuva ni mwaya awu wu randanako. (Lera Marku 10:29, 30.) U nga vhunisa kutxani txigondiana txako txi wuyelwa ngu ningo yiya yo tshura?

10. Hi gonda txani ka ati ti nga maheka ni Manuel?

¹⁰ Sakulela wungana ni txigondiana txako. Ti ni lisima kukombisa ti to awe wa khatala ngu txigondiana txako. Ngu kutxani? Wona ti mwanathu mmwani awu a dhanwako ku i Manuel wa México a ti wombako. A txi khumbula mbimo a nga ti ngadi txigondiana ene a womba tiya: “Na ni se kugonda m’gondisi wangu a txi ni wotisa ti to ni njani. Ene a txi ni vhuna ku ni si karateki, ni ku a txi ni tumelela ku ni womba a ti ni karatako. Ni txi tipfa ngu ditshuri ti to ene wa khatala ngu ngani.”

11. Sigondiana sathu si nga wuyeliswa kutxani ngako si txi heta mbimo ni nathu?

¹¹ Jesu a txi heta mbimo ni valondeteli vakwe, nanathu hi fanete kuheta mbimo ni sigondiana sathu! (Joh. 3:22) Ngako ti txi koteka, u nga ramba txigondiana txako atxi txi kulako  ngu didhawa da moya ti to mi ta va motshe mi txi peka txaya, mi susula motshe hambi kuxalela Broadcasting ayi yi humiswako mtxima ni mtxima. Txigondiana txako txi nga ti tsakela eto ngutu-ngutu ka masiku ya i ku maferiyadhu. Kazibwe wa Uganda a womba tiya: “Ni gondile ngutu ngu Jehovha ka mbimo yi ni nga txi heta ni m’gondisi wangu kupinda mbimo yi ni nga txi gonda nayo. Ni woni ti to Jehovha ngu ditshuri wa khatala ngu vathu vakwe ni ku va zumba va di tsakile. Ati ngu ni nga txi ti lava ka wutomi wangu.”

12. Ngu kutxani hi di fanete hi teka vahuweleli vo hambana-hambana ka txigondiana txathu?

¹² Ramba vahuweleli wo hambana-hambana ka txigondiana txako. Mbimo yimwani hi nga tipfa ti txi hehuka ku ya tsimbitisa txigondo hi ti hokha, mwendo ku hi tsula ni muhuweleli eneyo wa mmweyo. Hambiku ti nga wonekako nga ndinene, sigondiana sathu si na wuyelwa ngutu ngako hi txi tsula ni vahuweleli vo hambana-hambana. Dmitrii wa Moldávia a womba tiya: “M’huweleli mmwani ni mmwani a nga txi ta ni m’gondisi wangu a txi ta txhamusela timhaka ngu nzila yo hambana. Atiya ti ni vhuni kuwona timhaka ngu tinzila to hambana-hambana. Ni ku ni mbimo yi ni nga khata kuxalela mitshangano kha na thava nguko se ni txi ziva vanathu vamwani.”

13. Ngu kutxani hi di fanete kuvhuna txigondiana txi xalela mitshangano?

¹³ Vhuna txigondiana txako txi xalela mitshangano. Ngu kutxani? Nguko Jehovha a ningile vakhozeli vakwe txirumo txo ve tshangana wukhalo wumwewo, etxo timaha parte ya wukhozeli wathu. (Vaheb. 10:24, 25) I si ngeto dwe, vanathu i mwaya wathu wa moya. Ngako hi txi tshangana wukhalo wumwewo, ti fana ni ku hi to ko tshangana mtini kumweko hi dya sakudya hotshethu. Ngako u txi vhuna txigondiana txako txi xalela mitshangano u txi vhuna ti to txi maha timhaka ta lisima ati ti no txi vhuna txi hokelela bhabhatiso. Mbimo yimwani ti nga karata ka txigondiana ku txi maha toneto. Dibhuku adi di ku Hanya wutomi wo tsakisa kala kupinduka! di nga vhunisa kutxani txigondiana txako txi xula txikarato txonetxo?

14. U nga maha txani ti to u vhuna txigondiana txi xalela mitshangano?

¹⁴ Thumisa gondo 10 ya dibhuku da Hanya wutomi wo tsakisa kala kupinduka! ti to u vhuna txigondiana txako txi tsakela mitshangano. Vanathu ava va nga kombelwa ti to ve testara gondo yiya, na dibhuku diya di si se humeswa va wombile ti to va humelete ko vhuna sigondiana sawe ti to si xalela mitshangano. Maji eto kha ti wombi ti to hi na rinzela ku hi hoka ka gondo 10 i di kona hi no ramba txigondiana mitshanganoni. U nga mu ramba ngu txikuluveta ngako ti txi koteka. Sigondiana si hambanete, ngu toneto sa manana ni sikarato so hambanelana. Se veka mapimo ka silaveko sa sigondiana sako se u zama kuwona ti to u nga si vhunisa kutxani. U nga godholi ngako a txi swela kukhata kuxalela mitshangano. Timisela, u nga godholi ku txi ramba.

15. Sigondiana si nga va di dizowa da txani?

¹⁵ Ina wa khumbula mbimo yi u nga txi thava ngu kupimisa ku va Fakazi ya Jehovha? Ti nga maha u di pimisile ti to u si na kusikota kutxhumayela vathu. Mwendo ti nga maha u di thavile ku maxaka ako mwendo vangana vako va na kuwukela. I di toneto, awe wa tipfisisa ati txigondiana txi ti pfisako tona. Jesu a wombile ti to kha ta biha ku hi tipfisa eto. Kambe a tshumete e kuzeta valondeteli vakwe ti to va si leki dizowa di va vhalela kuthumela Jehovha. (Mat. 10:16, 17, 27, 28) Jesu a vhunisile kutxani valondeteli vakwe ti to ve xula dizowa? Athu hi mu etetelisa kutxani Jesu ka mhaka yiya?

16. Hi nga maha txani ti to hi vhuna txigondiana txi txhumayela?

 ¹⁶ Kudotho-kudotho trenara txigondiana txako txi gondela kutxhumayela. Vagondiswa va Jesu ti nga maha va di thavile mbimo yi a nga va ruma ku ve ya txhumayela. Kambe Jesu a va vhunile ngu ku vagela ti to va ndi na txhumayela, hani ka kona ni didungula da kona. (Mat. 10:5-7) Hi nga etetelisa kutxani Jesu ka mhaka yiya? Vhuna txigondiana txako ngu ku txigela ti to txi nga ya txhumayela hani. Ngu txikombiso, u nga mu wotisa ti to ina ku ni m’thu awu a nga tsakelako to kari ta mu ka Bhiblia. Se u nga mu vhuna kululamisela ati a no ya wombisa tona, ngu ku mu komba nzila yo hehuka yo txhumayela. Ngako ti txi koteka mi nga thumisa txienge atxi txi ku “Ngako vathu va txi khona” ni txi txi ku “Ngako vamwani va txi wotisa va txi” ka dibhuku adi di ku Hanya wutomi wo tsakisa kala kupinduka! Mbimo yi u mahako toneto, zama kutrenara txigondiana txako txi ziva kuthumisa Bhiblia ti to txi ningela tixamulo to hehuka ngu txixonipho.

17. Hi nga thumisisa kutxani ati ti ku ka Matewu 10:19, 20, 29-31 mbimo yi hi vhunako txigondiana txi themba Jehovha?

¹⁷ Vhuna txigondiana txako txi themba Jehovha. Jesu a thembisile vagondiswa vakwe ti to Jehovha a na va vhuna nguko wa va randa. (Lera Matewu 10:19, 20, 29-31.) Khumbuxeta sigondiana sako ti to Jehovha a na si vhuna ni sona. U nga si vhuna ku si themba Jehovha ngu ku maha mkombela naso u womba makungo ya si lavako ku ma hokelela ka mkombelo wonewo. Franciszek wa Polónia a womba tiya: “M’gondisi wangu a txi maha mkombelo a txi pata ni makungo angu. Mbimo yi ni nga wona ti to Jehovha wa xamula mikombelo ya m’gondisi wangu, nani ni khatile kukhongela. Ni ti woni ti to ngu ditshuri Jehovha wa ni vhuna mbimo yi ni nga txi kombela masiku o kari mthumoni ti to ni ya xalela mitshangano ya hombe ni ya dibanza.”

18. Jehovha a tipfisa kutxani ngu mthumo awu Makristu ma wu mahako wo gondisa?

¹⁸ Jehovha wa si randa sigondiana sa Bhiblia. Ene wa randa Makristu ni ku wa khatala ngutu ngu mthumo awu va wu mahako wo vhuna vathu ve maha kuranda kwakwe. (Isaya 52:7) Ngako konkuwa u si tsimbitisi sigondo, u nga vhuna sigondiana simwani ti to si kula si hokelela ko bhabhatiswa ngu kuhuma ni vahuweleli vamwani ka sigondo sawe.