1, 2. a) Ngu kutxani vaphya va i ku Makristu va txi sikota kuxula Sathani ni madhimoni? (Wona mfota wu wu ku makhatoni.) b) Hi na bhula ngu txani?

MPOSTOLI Paulo a fananisile Makristu ni masotxhwa. Athu hi ni valala ava hi lwako navo! Kha hi lwi ni vathu, kambe hi lwa ni Sathani ni madhimoni. Vona va sikota kulwa, se va ni malembe o tala va txi lwa ni vathu. Se ti nga woneka nga hi na xulwa, ngutu-ngutu hi di ngadi vaphya. Ina vaphya va nga vaxula valala vonevo va mtamo? Ina, futhi hambi konkuwa va xula! Ngu kutxani? Va ningwa mtamo ngu Jehovha. Kufana ni disotxhwa di di nga gonda kwati kulwa yimbi, vona va ‘tivhikela ngu matxhari a Txizimu,’ ti to ve maneka va di emekile kulwa.​—Lera Vaefesu 6:10-12.

² Ti nga maha mbimo yi Paulo a nga womba-womba ngu txikombiso txiya, a ti khumbula txivhikelo atxi masotxhwa a Varoma ma nga ti ambala. (Mithumo 28:16) Ka msungo wuwa hi na bhula ngu txivhikelo txonetxo. Hi na tshumela hi bhula  ngu ti vaphya vamwani va ti wombako ngu sikarato sawe ni wuyelo yo ambala txilo tximwani ni tximwani txa txivhikelo txhathu txa moya.

3, 4. Ditshuri da mu ka Bhiblia di fana ni libhande ngu nzila yihi?

³ Lera Vaefesu 6:14. Masotxhwa a Varoma ma ti thumisa libhande li li nga ti ni tisimbi ati ti nga ti vhikela txiwunu. Tibhande timwani ti ti ni sihariketo so banga asi ku nga ti txhomwa ditxhari ni mmesa. Ngako libhande li di sungilwe kwati, disotxhwa di txi tipfa di di emekile ku ya lwa.

⁴ Kufana ni libhande, ditshuri adi hi di gondako a mu ka Bhiblia da hi vhikela ka tigondo ta makuhu. (Johani 8:31, 32; 1 Johani 4:1) Se ngako hi txi randa ngutu ditshuri da mu ka Bhiblia, ti na hi hehukela kuhanya ngu milayo ya Txizimu, mwendo kuambala “libhande” lathu. (Masalmo 111:7, 8; 1 Johani 5:3) Hi na sikota kwati kulwela ditshuri ka valala vathu ngako hi txi di pfisisa kwati.​—1 Pedro 3:15.

5. Ngu kutxani hi di fanete kuwomba ditshuri mbimo yotshe?

⁵ Kukhukhela mbimo yi ditshuri da Dipswi da Txizimu di nga va da lisima kwathu, ha engisa ati Bhiblia yi ti wombako ni ku mbimo yotshe hi womba-womba ditshuri. Phela makuhu ndimwani da matxhari aya Sathani a ma thumisako. Makuhu ma dayisa awu a ma wombako ni wu a ma pfako. (Johani 8:44) Se, hambiku hi nga mbi hetiseka, hi zama kwa mbi thuka hi hemba. (Vaefesu 4:25) Eto kha ti hehuki. Abigail wa 18 wa malembe a khene: “Hi nga mbimo yotshe kuwomba ditshuri ti wonekako i di tinene, ngutu-ngutu i di ti to u txi hemba u na huluka ka to kari.” Se ngu kutxani ene a txi zama kuwomba ditshuri mbimo yotshe? A khene: “Ngako ni si hembi, ni ni livhalo lo basa ka Jehovha, futhi vaveleki vangu ni vangana vangu va ni themba.” Victoria wa 23 wa malembe, a khene: “U txi womba ditshuri ni ku tsana ka ti u ti kholwako, u nga thuka u dyisetwa. Kambe wa wuyelwa: Wa thembwa, u tipfa u di hafuhi ni Jehovha, u tshumela u xoniphwa ngu va va kudhundako.” Ina wa tiwona ti to ngu kutxani ti di ni lisima kuambala ‘libhande la ditshuri’ mbimo yotshe?

6, 7. Ngu kutxani kululama ti txi fananiswa ni txivhikelo?

⁶ Txivhikelo txa masotxhwa a Varoma txi ti mahwa ngu tisimbi to hingamiselwa, ti nga ti tshanziketani. Ti ti mahwa ti kota kuzumbiseka ti ñola khana ni txiwunu. Ti ti ñolana ngu madhawa mamwani ngu sihariketo ni tifivhela. Makata ma ti vhikelwa ngu tisimbi ati ti nga ti ñolani ni timwani ta khe masoni. Txivhikelo txi ti maha ti to ditsotxhwa di si tikoti kutshemberekisa mmindi nga ti di ti lavisako tona, futhi disotxhwa di ti fanete di zumba di txi wona ti to sihariketo si nga di zumbisekile kani.  Kambe txivhikelo txi ti vhikela mbilu ni sihango simwani ti to di si tholwi ngu matxhari ni tingove!

⁷ Milayo yo lulama ya Jehovha yi nga faniswa ni txivhikelo, yona yi vhikela “mbilu” yathu, mwendo m’thu wa mndani. (Mavingu 4:23) Phela disotxhwa di si na kutumela kutxitxisa txivhikelo txa dona txa simbi ngu tximwani txo mbi banga. Ngu kufana, kha hi na kutxitxa milayo ya Jehovha ngu ti athu hi ti wonako i di ta tinene. Kha hi nga nawo wutxhari wo vhikela mbilu yathu. (Mavingu 3:5, 6) Ngu toneto, ti lava hi zumba hi txi xola ti to “txivhikelo” txi ngadi txi txi yi vhikela mbilu yathu kani.

8. Ngu kutxani hi di fanete kuengisa milayo ya Jehovha?

⁸ Ina awe wa thuka u pfa nga milayo ya Jehovha yi ku vhalela mkhululeko mwendo ku kutsivela kumaha ati u ti lavako? Daniel wa 21 wa malembe a khene: “Vagondisi ni vagondi kulothi va ni seka nguko ni hanyako ngu milayo ya Bhiblia. Ni ta ni va ni dikhodho ni ku tipfa ni si nga wa txilo.” Kambe konkuwa a ti pfisa kutxani? A khene: “Ni gwitisete ku yi wona wuyelo yo hanya ngu milayo ya Jehovha. Vamwani va ni nga ti gonda navo, va khatile kudhaha timbangi; vamwani va lekile txikolwa. Ta panda kuwona ati wutomi wawe wu nga gwitisa tona. Ngu ditshuri Jehovha wa hi vhikela.” Madison, wa 15 wa malembe a khene: “Ti lava ni lwa yimbi kasiku ni hanya ngu milayo ya Jehovha, ni si londiseli ati vangana vangu va wombako ti to ndinene futhi ta kensa.” Se a maha txani? A khene: “Ni ti khumbutisa nipune ti to ni dhanwa ngu ditina da Jehovha, se txiduko i nzila yi Sathani ayi thumisako ti to e ni bzweta. Se ngako ni txi xula na tsaka.”

9-11. a) Ngu tihi tikathula ati Makristu ma ambalako? b) Nji txani txi no kuvhuna ti to u si thavi kutxhumayela?

⁹ Lera Vaefesu 6:15. Disotxhwa da Muroma di si tsuli yimbidi di si na tikhathula. Tikhatula ta kona ti ti mahwa ngu sigabhata siraru sa didhowo so banga kambe si ti zumbisekile. Se disotxhwa di ndina tsimbila di si thavi txilo, di si rithiki.

¹⁰ Aku tikhatula ta ditsotxhwa da Muroma ti nga ti di vhuna kuxula yimbi, tikhathula to fanekisela ati hi ambalako ti hi vhuna “kuzivisa mahungu a manene a kudikha.” (Isaya 52:7; Varoma 10:15) Hambi keto, yimwani mbimo kutxhumayela ti lava txibindi txa hombe. Roberto, wa 20 wa malembe a khene: “Ni ti thava kutxhumayela vagondi kulothi. Ni alakanya ti to ni si ti zivi ku na khatisa kutxani. Kambe, ni txi wona msana, kha ni tipfisisi ti to ni ti thava txani. Konkuwa na tsaka nguko na si kota ku va txhumayela.”

¹¹ Vaphya vo tala va i ku Makristu va wona ti txi va hehukela kutxhumayela ngako va txi khata ngu kululamisela. Awe u maha txani ti to u txhumayela? Julia wa 16  wa malembe a khene: “Amu ka mkwama wa mabhuku a txikolwani ni veka mabhuku o txhumayela ngu ona, se ni engisela ati va ti alakanyako ni ti va ti kholwako. Se ta ni hehukela kuziva ti to va na vhunwa ngu txani. Ni ti tilungisete, na bhula navo ngu ti ti nga va vhunako.” Maria wa 23 wa malembe a khene: “Ngako u di ni wumbilu u engisela kwati, u na ziva ti to vangana vako va humelelwa ngu txani. Ni zama kulera otshe mabhuku aya ma humiselwako vaphya. Ngu nzila yoneyo ni kota kukongomisa vangondi kulothi ka Bhiblia mwendo ka jw.org ti to ve mana ati ti nga va vhunako.” Kutilungisela kwati ti to u txhumayela ti fana ni kuambala “tikathula” ti to u tsana.

12, 13. Ngu sihi simwani “siholoma sa mndilo” sa Sathani?

¹² Lera Vaefesu 6:16. Disotxhwa da Muroma di ti ñola txitxhavangu txa hombe txo lapha. Txi ti di vhikela ka tingove ni matxhari kukhukhela ka mazolo kala ka makata.

 ¹³ Nji txani “siholoma sa mndilo” asi Sathani a ku zamako ngu sona? Ti nga maha a txi kuzama ngu makuho ngu Jehovha. Sathani a lava u wona nga Jehovha kha kurandi ni ti to a walo a ku ni mhaka ni nawe. Aida wa 19 wa malembe a khene: “Ni tipfa nga Jehovha a kule ni nani, ni ku ene kha ti lavi ku va mngana wangu.” A maha txani a txi tipfisa toneto? A khene: “Mitshangano yi tsanisile likholo langu. Ni ti tolovela kwa mbi xamula mitshanganoni, ni txi pimisa ti to awalo a no tsakela xamulo yangu. Kambe konkuwa, ni lulamisela mitshangano, ni ku duketa kuxamula makhambi mambidi mwendo mararu. Ta karata, kambe na tsaka ni txi tikota. Vanathu va ni tsanisa. Mbimo yotshe ni wuya ngu mitshanganoni ni txi ziva ti to Jehovha wa ni dhunda.”

14. Hi gonda txani ka txikombiso txa Aida?

¹⁴ Phela txitxhavangu txa disotxhwa txi si kuli. Kambe txikombiso txa Aida txi hi kombile ti to likholo lathu la hambana ni txitxhavangu. Likholo lathu li nga kula mwendo li koma, li banga mwendo li si bangi. Ngathu hi sawulako. (Matewu 14:31; 2 Vatesalonika 1:3) Ngu toneto, ti to hi vhikelwa ngu “txitxhavangu txa likholo,” hi fanete hi li xayisa li kula ni kutsana!

15, 16. Themba yi fanisa kutxani ni txigoko?

¹⁵ Lera Vaefesu 6:17. Disotxhwa da Muroma di ti ambala txigoko atxi txi nga ti vhikela msungo, mkolo ni khohe. Yimwani mbimo disotxhwa di ti ambula txigoko di ñola ngu manza.

¹⁶ Aku txigoko txi nga ti vhikela wuluvi wa disotxhwa, ‘txigoko txa kuhanyiswa’ kwathu txi vhikela mialakanyo yathu. (1 Vatesalonika 5:8; Mavingu 3:21) Themba yi hi vhuna kuveka mapimo athu ka sithembiso sa Txizimu ni kwa mbi godholiswa ngu sikarato sathu. (Masalmo 27:1, 14; Mithumo 24:15) Kambe ngako hi txi lava ti to themba yathu yi hi vhikela, ti lava i va ya ditshuri kwathu. Hi fanete hi ambala “txigoko” txathu ka msungo, hi si txi ñoli ngu manza!

17, 18. a) Sathani a nga hi ambulisa kutxani txigoko? b) Hi nga ti kombisisa kutxani ti to kha hi kanganyiswi ngu Sathani?

¹⁷ Sathani a nga hi ambulisa kutxani txigoko? Alakanya ngu ti a nga duketa kumahela Jesu. Sathani a txi tiziva ti to Jesu a ndina maha mkoma wa vathu votshe. Kambe, Jesu a ndina khata ngu kuxaniseka ni kufa. A ndina tshumela e ema, kala Jehovha e tilava. Kambe Sathani a mningile mkhanjo wo kuluveta e fuma. Sathani a ti khene ngako Jesu a txi m’khozela, a ndina fuma mafu ngu txikuluveta. (Luka 4:5-7) Sathani wa ti ziva ti to Jehovha a hi thembisile ku hi ninga silo sa sinene ka mafu a maphya. Kambe hi fanete hi ema kala kuza ti humelela, ni ku hi na manana ni sikarato so tala hi txi ngadi hi emela mbimo yoneyo. Se, Sathani a hi ninga mkhanjo wo mana wutomi wo zumbiseka konkuwa. A lava ti to hi teka Mfumo wa Txizimu hi wu veka ka wukhalo wa wumbidi ka wutomi wathu.​—Matewu 6:31-33.

¹⁸ Vaphya vo tala va i ku Makristu kha va tumeli kukanganyiswa ngu Sathani. Ngu txikombiso, Karina wa 20 wa malembe a khene: “Na tiziva ti to txilo tximwetxo atxi  txi no gumisa sikarato sathu i Mfumo wa Txizimu.” Themba yakwe yi yi gwesisa kutxani nzila yi a pimisako ngu yona ni ti a hanyisako tona? Yi mu vhuna kukhumbula ti to silo sa mafu awa nza mbimoanyana. Hahanze ko zama kulava mthumo wa nduma ka mafu awa, Karina a thumisa mbimo ni mtamo wakwe ti to e thumela Jehovha.

19, 20. Hi nga wu mana hani wusikoti wa hombe wo thumisa Bhiblia?

¹⁹ Ditxhari da masotxhwa a Varoma di ti laphile konamu ka 50 wa masentimetro. Masotxhwa onewo ma si sakani ngu matxhari awe nguko va txi ma thumisa ditshiku ni ditshiku.

²⁰ Mpostoli Paulo a ti khene Dipswi da Txizimu di fana ni ditxhari. Jehovha a hi ningile Dipswi dakwe. Se hi fanete hi gonda ku di thumisa kwati ti to hi lwela likholo lathu mwendo kululamisa nzila yi hi pimisako ngu yona.(2 Vakorinto 10:4, 5; 2 Timoti 2:15) Hi nga tshukwatisa ngu nzila yihi? Sebastian wa 21 wa malembe a khene: “Ka ndima yimwani ni yimwani ya Bhiblia yi ni yi gondako, ni bhala ndimana yimweyo. Ni maha xaxamelo ya tindimana ati ni tidhundako.” Atiya ti mu vhuna kupfisisa nzila yi Jehovha a pimisako ngu yona. Daniel a khene: “Mbimo yi ni lerako Bhiblia, ni teka tindimana totshe ati ni wonako ti to ti na vhuna vathu ava ni va manako thembweni. Ni woni ti to vathu va tsakela ngako va txi wona ti to wa yi dhunda Bhiblia ni ti u ti mahako ti to u va vhuna.”

21. Ngu kutxani hi sa fanela kuthava Sathani ni madhimoni?

²¹ Nga ha hi nga gonda ngu kona ka sikombiso sa vaphya ka msungo wuwa, kha ti lavi hi m’thava Sathani ni madhimoni. Ditshuri ti to va ni mtamo ku hi pinda, kambe ka Jehovha kha va lungi. Ni ku vona va na mbi hanya kala kupinduka. Vona va na betwa jele, se kudingana Digumi da Mazana a Mfumo wa Kristu, se ve gwitwa ve loviswa. (Mtuletelo 20:1-3, 7-10) Ha m’ziva mlala wathu, marindi akwe ni makungo akwe. Hi nga sikota kuema hi tsana hi txi vhunwa ngu Jehovha!