1. Ngu tihi ati ti nga maheka mbimo yi u nga khata kutxhumayela Bhiblia vamwani? Ngu tihi ti nga vako ti di kuxamalisile?

INA wa khumbula mbimo yi u nga tumbula ti to u mani ditshuri? Tigondo ta Bhiblia ati u nga ti mana ti ta so junya ni kupfisiseka! Awe u navete ti to vathu vamwani ve kholwa ati u nga ti gonda. U tshumete u kholwa ti to tigondo ta Bhiblia ti nga va ninga wutomi wa tsakisa kona kuwa ni themba yo tsakisa ya mbimo ayi yi tako. (Mas. 119:105) Se ngu kuhiseka u txhumayete ditshuri donedo u nga di mana ka vangana vako ni maxaka ako. Kambe ngu tihi ti nga maheka? Ti nga maha u di xamate ngutu nguko vathu vo tala ava u nga va txhumayela kha va tsakela.

2-3. Vathu va txi mu wonisa kutxani Jesu?

² Athu kha ha fanela kuxamala ngako vathu ava hi va txhumayelako va si engisi. Ka timbimo ta Jesu, vo tala va si kholwi kwakwe hambi ku a nga ti maha sidiwukiso asi si nga txi kombisa ti to ene a ti seketelwa ngu Txizimu. Ngu txikombiso, Jesu a wusile Lazaro i ku txidiwukiso atxi ava va nga ti mu kaneta va si na ku txi lamba. Hambi keto, vathangeli va Vajudha kha va kholwa ti to Jesu, i ti ene Mesiya. Kuhambana ni eto, vona va lavile kudaya Jesu kumweko ni Lazaro!—Joh. 11:47, 48, 53; 12:9-11.

³ Jesu ati ti ziva ti to vathu vo tala va ndina lamba ti to Jesu i ti Mesiya. (Joh. 5:39-44) Ene a gete tiya vagondiswa va Johani M’bhabhatisi: “Se a katekile awule a no mbi mana txikhuvekiso kwangu.” (Mat. 11:2, 3, 6) Ngu kutxani vathu vo tala va di lambile Jesu?

4. Hi na bhula ngu txani ka gondo yiya?

⁴ Ka gondo yiya ni ayi yi londiselako, hi na xolisisa sivangelo  asi si nga maha vathu vo tala ka timbimo ta Jesu va si kholwi kwakwe. Hi na tshumela hi wona ti to ngu kutxani vathu vo tala nyamsi va txi lamba mbimo yi hi va txhumayelako. Txa lisima ngutu, hi na gonda ti to ngu kutxani hi nga vako ni likholo lo tsana ka Jesu ti to hi si khuvekiswi.

5. Ngu kutxani vathu vo tala va sa kholwa ti to Jesu i ti ene Mesiya awu a nga wombwa?

⁵ Vo tala va txi lamba Jesu ngu mhaka ya mu a nga velekelwa kona. Vona va txi kholwa ti to Jesu i ti m’gondisi wa hombe, ni ku atxi maha sidiwukiso, kambe kwawe ene a txi woneka kota mwanana wa karpinteru dwe. Ene a txi ta ngu ka didhoropa da Nazareta i ku didhoropa adi di nga ti wonwa i si nga da txilo. Hambi Nataniyeli awu a nga gwita eva m’gondiswa wa Jesu makhatoni a wombile tiya: “Ina txilo txa txinene txi nga huma ngu Nazareta kani?” (Joh. 1:46) Ti nga maha Nataniyeli a txi wona didhorapa adi Jesu a nga kula ka dona i si nga da txilo. Kumbe ti nga maha a di khumbute wuprofeti awu wu ku ka Mika 5:2, awu wu wombako ti to Mesiya a ndi na velekelwa Bhetelehema i si nga Nazareta.

6. Nji txani txi ndi nova txi di vhuni vathu ve wona to Jesu ngene Mesiya?

⁶ Mibhalo yi womba txani? Mprofeti Isaya a wombile ti to valala va Jesu va si na ‘kuxawutela ta kuhanya’ ka Mesiya. (Isaya 53:8) Ku ni wuprofeti wo tala mayelano ni mhaka yiya. I di ti to vona va to xolisisa dotshe ditshuri va di zivile ti to Jesu a ndi na velekelwa Bhetelehema ni ku a ndi nava lihunzu la mkoma Dhavhidha. (Luka 2:4-7) Se amu Jesu a nga velekelwa kona ku ti wombilwe ka wuprofeti awu wu ku ka dibhuku da Mika 5:2. Se txikarato i ti txihi txa kona? Vathu va txi kuluveta kulamula kambe va si na dotshe ditshuri. Ngu mhaka ya tona tiya vona va txi khuvekiswa.

7. Ngu kutxani vathu vo tala nyamsi va txi lamba kuamukela Tifakazi ta Jehovha?

⁷ Ina atiya ta maheka nyamsi? Ina! Kota mtxawa vathu va Jehovha mbathu va kwa mbi manela ni kwa mbi gonda ngutu, vona va wonwa kota “vathu dwe.” (Mith. 4:13) Vamwani va pimisa ti to vathu va Txizimu va nge sikoti kugondisa Bhiblia nguko kha va gonda ka sikolwa sa hombe sa wukhongeli. Vamwani va lamba Tifakazi ta Jehovha ngu kupimisa ti to mbukhongeli wa Tximerika, kuveti mtalo wa Tifakazi ta Jehovha ti maneka hahanze ka ditiko da Estados Unidos. Vamwani va gelwa ti to Tifakazi ta Jehovha kha ti kholwi ka Jesu. Kukhukhela kale vathu va womba ti to Tifakazi ta Jehovha ti seketela politika yo kari ya mafumelo, ni ku sipiyawu ni ti to va nemeta milayo ka totshe ti va ti mahako. Ngu toneto ava va gelwako sitoriya siya kha va di zivi ditshuri mwendo kha va di tumeli ngu toneto va khuvekiswa.

8. Ngu kuya ngu Mithumo 17:11, m’thu a nga maha txani ngako a txi lava kuziva ti to mba mani ava va thumelako Txizimu nyamsi?

⁸ Hi nga maha txani ti to hi si khuvekiswi? Ti lava hi xolisisa dotshe ditshuri. Eto ngu ti m’bhali wa Bhiblia Luka a nga ti ti emisete ku timaha. Ene a mahile totshe ti a nga ti kota ti to e setxha totshe khakwati ‘kukhukhela makhatoni ka tona.’ Ene a ti lava ti to vaengiseli ve “ziva ditshuri do tsana” da ti va nga tipfa mayelano ni Jesu. (Luka 1:1-4) Vajudha ava va nga ti zumba ka didhoropa da Bheriya va ti fana ni Luka. Mbimo yi va nga engisa mahungu a manene mayelano ni Jesu, vona va xolisisile mibhalo ya Txihemberu kasi kutsaniseka ka ti va nga ti ti engisile. (Lera Mithumo 17:11.) Ngu ha kufanako, vathu va fanete kuxolisisa dotshe ditshuri. Va fanete  kufananisa totshe ati va ti gondako ka vathu va Txizimu ni ti Mibhalo yi ti wombako. Va fanete ve gonda ngu matimu a vathu va Txizimu va timbimo ta ngweno. Ngako va txi xolisisa khakwati va na mbi tumelela txisawu-sawu mwendo siwomba-womba sa vathu si va khuvekisa.

9. Ngu tihi ti nga maheka mbimo yi Jesu a nga lamba kumaha txidiwukiso txo ta ngu nzumani?

⁹ Ka timbimo ta Jesu vathu vamwani va si tumeli ka tigondo takwe to xamalisa. Vona va txi lava to pinda eto. Vona va lavile ti to Jesu e kombisa ti to ngu ditshuri ene i Mesiya awu a nga thembiswa ngu kumaha “txidiwukiso txa kuta ngu nzumani.” (Mat. 16:1) Ti nga maha va di lavile txidiwukiso txonetxo nguko va si pfisisi ati ti ku ka dibhuku da Dhaniyeli 7:13, 14. Kambe eyo i si nga mbimo ya ti to wuprofeti wonewo wu hetiseka. Ati Jesu a nga txi ti gondisa ti txi enela kasi ku ve tsaniseka ti to ene i ti Mesiya. Kambe mbimo yi a nga lamba kumaha txidiwukiso atxi va nga ti txi lava vona va khuvekile.—Mat. 16:4.

10. Jesu a hetisisile kutxani wuprofeti wa Isaya mayelano ni Mesiya?

¹⁰ Mibhalo yi womba txani? Mprofeti Isaya a bhate tiya mayelano ni Mesiya: “Kha na mbi dila, kha na mbi henya, hambi dipswi dakwe kha na mbi di pfaliswa ha mitendelani.” (Isaya 42:1, 2) Mbimo yi Jesu a nga ti txhumayela a si peki mpundu ni ku i ti wo tiveka hahatshi. Ene kha aka, matepele o xamatisa, ene kha ambala siambalo sa wukhongeli wo kari ni ku kha kombela ku ve mu dhana ngu sithopo sa wukhongeli. Mbimo yi a nga ti kuxuxiswani Jesu kha lava kukomba mkoma Herodha ngu kumaha sidiwukiso. (Luka 23:8-11) Ditshuri ti to Jesu a mahile sidiwukiso so kari kambe ene a ti veka mapimo ka mthumo wo txhumayela. Ene a gete tiya vagondiswa vakwe: “Ni tete toneto.”—Marku 1:38.

11. Ngu tihi ati vathu vo tala va ti lavako ka titxhetxhe nyamsi?

¹¹ Ina atiya ta maheka nyamsi? Ina. Nyamsi vathu vo tala va dhanetwa ngu titxhetxhe ta  hombe ati ti nga tshuriselwa ngu midhezenyu yo dhula ni ngu vathangeli va wukhongeli ava va ku ni sithopo so xamalisa ni kutshumela ve dhanetwa ngu mikhuva ya kale ayi makhato a kona ma si pfisisekiko. Kambe vathu va va yako ka titxhetxhe toneto kha va gondi txilo ngu Txizimu ni ngu sikongomelo sa txona. Kuhambana nito ava va ku ka wukhozeli wa ditshuri va gonda ngu ti Jehovha a ti lavako kwathu ni kuhanya ngu kupfana ni kudhunda kwakwe. Tinyumba tathu ta Mfumo ti basile ni kuxayiseka, kambe hi nga to xamatisa. Ava va thangelako dibanzani kha va ambali siambalo so xamatisa, mwendo kudhanwa ngu sithopo so guleka. Athu hi seketela ati hi ti gondisako ni ti hi ti kholwako amu ka Bhiblia. Hambi keto vathu vo tala va khuvekiswa nguko va pimisa ti to nzila yi hi khozelako ngu yona kha yi dhaneti ni ku ati hi ti gondisako hi nga tona ati va tsakelako ku tipfa.

12. Nga ha ti nga txamuselwa ngu kona ka Vahebheru 11:1, 6, likholo lathu li fanete li akwa ka txani?

¹² Hi nga maha txani ti to hi si khuvekiswi? Mpostoli Paulo a gete tiya Makristu aya ma nga ti hanya Roma: “Kukholwa kuta ngu kuengisa ti ti txhumayelwako, kutxhumayela ngu kuzivisa dipswi da Kristu.” (Var. 10:17) Se hi nga aka likholo lathu ngu kugonda Mibhalo i si nga ku ti pata ni mikhuva ya wukhongeli ayi yi nga mbi seketelwa amu ka Bhiblia hambi i di ti to mikhuva yoneyo ya tsakisa ngutu. Hi fanete kukulisa likholo lathu ali li nga seketelwa ka wuzivi wa ditshuri nguko “hahanze ka likholo kha ti koteki ku txi tsakisa Txizimu.” (Lera Vahebheru 11:1, 6.) Ngu toneto athu hi na mbi rinzela kuwona txidiwukiso txi txi khukhela nzumani kasi hi tsaniseka ti to hi mani ditshuri. Ngako hi txi xolisisa tigondo ta Bhiblia ti na enela kasi hi tsaniseka ti to hi mani ditshuri ni kuxula kotshe kukana-kana.

13. Nji txani txi nga maha ti to vathu vo tala ve nyenya Jesu?

¹³ Ka timbimo ta Jesu vagondiswa va Johani m’bhabhatisi va txi xamala mbimo yi vagondiswa va Jesu va nga si ti toni sakudya. Jesu a  txhamusete ti to vona va si na txivangelo txo ti tona sakudya nguko a ti ngadi a txi hanya. (Mat. 9:14-17) Hambiketo Vafarisi ni vamwani vakaneti va Jesu va txi mu sola nguko ene a ti si londisi sihena ni mikhuva ya vathu. Vona va henyile mbimo yi a nga hanyisa m’thu wo kari ngu Sabbata. (Marku 3:1-6; Joh. 9:16) Vona va txi ti gela ti to va xayisa ditshiku da Sabbata, kambe vona va txi tumela ku di mahwa dibhindu Dithepeleni. Vona va henyile ngutu mbimo yi Jesu a nga txi va kawuka ngu toneto. (Mat. 21:12, 13, 15) Ni ku ava Jesu a nga ti va txhumayela disinagogani khe Nazareta va txi henya ngutu mbimo yi Jesu a nga ti va maha ve pfisisa ti to vona va txo lwela dawe dwe ni ku va si na likholo. (Luka 4:16, 25-30) Eto ti mahile ti to vathu vo tala ve khuvekiswa.—Mat. 11:16-19.

14. Ngu kutxani Jesu a di lambile kuema ni sihena sa vathu asi si lwisanako ni Mibhalo?

¹⁴ Mibhalo yi womba txani? Jehovha ngu kuthumisa mprofeti Isaya a wombile tiya: “Vathu vava koko va tshuketa hafuhi ni nani, se va ni dhumisa ngu sisofu, aniko timbilu tawe ti kule ni nani, ni txithavo txawe kwangu nja kulondeta milayo ya vathu dwe, ayi va nga gondiswa yona.” (Isaya 29:13) Jesu a mahile tona ngu kwa mbi ema ni sihena sa vathu asi si nga ti si pfani ni Mibhalo. Ava va thangetisako milayo ya vathu, ni sihena sa kona masoni ka Mibhalo, va lamba Jehovha kumweko ni wule a nga mu ruma, i ku Mesiya.

15. Ngu kutxani vathu vo tala va txi nyenya Tifakazi ta Jehovha?

¹⁵ Ina atiya ta maheka nyamsi? Ina. Vathu vo tala va nyenyezeka nguko Tifakazi ta Jehovha kha ti pateki ka mikhuva ayi yi nga mbi seketelwa amu ka Bhiblia yo fana ni kukulungela ditshiku da kuvelekwa ka m’thu. Vamwani va henya ngu ku Tifakazi ta Jehovha ti si kulungeliko maferiyadhu mwendo kulondisa mikhuva yo kari ya matshotshelo ayi yi lwisanako ni Bhiblia. Ava va khuvekiswako ngu nzila yiya ti nga maha va txi kholwa ti to vona va khozela Jehovha ngu nzila ayi a yi tsakelako. Kambe vona va nge tsakisi Txizimu ngako va txi sawula kulondisa mikhuva ya vathu ve leka kulondisa ati ti ku mu ka Bhiblia.—Marku 7:7-9.

16. Ngu kuya ngu Masalmo 119:97, 113, 163-165, hi fanete hi maha txani? Ngu tihi ati hi fanelako ku ti vayilela?

¹⁶ Hi nga maha txani ti to hi si khuvekiswi? Hi fanete kukulisa lirando lathu ngu milayo ya Jehovha kumweko ni matshina a milayo a Bhiblia. (Lera Masalmo 119:97, 113, 163-165.) Ngako hi txi randa Jehovha, hi na vayilela sotshe sihena asi si mu henyisako. Ni ku hi na mbi tumelela txilo txi kavanyeta lirando lathu ngu Jehovha.

17. Ngu tihi ati vathu vo tala va nga ti ti rinzete ku Jesu e ti maha?

¹⁷ Vamwani ka timbimo ta Jesu va txi lava ti to kuva ni kutxitxa ka mafumelo. Vona va ti emela ti to Mesiya a ndi na va khulula ka wukoma wa Varoma awu wu nga txi va dyisa khayi-khayi. Kambe mbimo yi va nga zama ku mu mmaha mkoma, Jesu a lambile. (Joh. 6:14, 15) Vaphaxeli ni vamwani va ti thava ngu kupimisa ti to Jesu a ndi na tisa mafumelo a maphya. Se Varoma va ndi na henya ve teka wukoma awu va nga ti ningile vaphaxeli vale. Kukarateka koneko ngu ta mafumelo ku mahile ti to Vajudha vo tala ve khuvekiswa.

18. Ngu wuhi wuprofeti mayelano ni Mesiya awu vathu vo tala va nga ti si veki mapimo ka wona?

¹⁸ Mibhalo yi womba txani? Hambi ku wuprofeti wo tala mayelano ni Mesiya wu wombako ti to ene a ndi nava Ndena ayi yi xulako, wuprofeti wumwani wu kombisa ti to kukhata ti ndi na lava e fa ngu kona ha ka sionho sathu. (Isaya 53:9, 12) Se ngu kutxani vathu vo tala  va di khuvekisilwe ngu kona ha ka Jesu? Nguko ka timbimo ta Jesu vathu vo tala va si veki mapimo ka wuprofeti awu wu wombako ti to sikarato sa mafu si ngo ta gumiswa dwe mbimo yi yi tako i si nga ngu mbimo yile.—Joh. 6:26, 27.

19. Ngu tihi ati Tifakazi ta Jehovha ti si ti mahiko ati ti khuvekisako vathu?

¹⁹ Ina atiya ta maheka nyamsi? Ina! Vathu vo tala nyamsi va khuvekiswa ngu ku hi si beleliko timhaka ta politika. Vona va rinzela ti to hi ya vhota kufana ni vona. Kambe athu ha pfisisa ti to ngu kuya ngu mawonelo a Jehovha ngako hi txi vhota m’thu ti to e hi fuma ti fana ni loko hi txo tsukula Jehovha. (1 Sam. 8:4-7) Vathu vamwani va pimisa ti to athu hi fanete kuaka sikolwa, sibhejela, ni kumaha mithumo yimwani yo vhuneta vathu. Se vona va khuvekiswa nguko athu hi veka mapimo ka mthumo wo txhumayela dwe i singa kululamisa sikarato sa mafu awa.

20. Ngu kuya ngu mapswi a Jesu aya ma ku ka Matewu 7:21-23, ngu tihi ati hi fanelako kuveka mapimo ka tona?

²⁰ Hi nga maha txani ti to hi si khuvekiswi? (Lera Matewu 7:21-23.) Athu hi fanete kuveka mapimo ko maha m’thumo awu Jesu a nga hi ruma wona. (Mat. 28:19, 20) Athu kha hi lavi kutsulupetwa ngu timhaka ta politika, mwendo kuzumba hi di bhisi ngu kuzama kululamisa sikarato sa mafu awa. Athu ha va dhunda vathu kambe ha tiziva ti to nzila ya yinene yo va vhuna ngu va gondisa mayelano ni Mfumo wa Txizimu ni ku va vhuna ti to ve sakulela wuxaka ni Jehovha.

21. Ngu tihi ati hi fanelako ku ti emisela kumaha?

²¹ Ka gondo yiya, hi bhute ngu mune wa sikhuvekiso asi si nga maha ti to vathu vo tala ve lamba Jesu, i ku asi si mahako vathu ve lamba kulondetela Jesu nyamsi. Kambe ina ngu soneso sikhuvekiso asi hi fanelako ku si vayilela? Ahim-him. Ka gondo ayi yi londiselako hi na xolisisa mune wa sona. Hotshethu a hi ti emiseleni kuvayilela sikhuvekiso soneso ni kusimama hi va ni likholo lo tsana.