1-2. Ngu sihi sikarato asi vanathu va mananako naso?

MPOSTOLI Paulo a kuzetile Timoti ti to e hiseka ka m’thumo wo txhumayela. (2 Tim. 4:5) Hotshethu hi lava ku txitekela hamsungo txialakanyiso txiya. Hambiketo ha manana ni sikarato. Vanathu vo tala ti lava ve kombisa txibindi va di ka m’thumo wo txhumayela. (2 Tim. 4:2) Ngu txikombiso, vanathu vamwani va hanya ka makhalo aya mthumo wathu wu tsimbiswako mwendo wu nga emiswa. Kambe vona va txhumayela hambiku va zivako ti to eto ti na va veka ha phangoni!

² Vathu va Jehovha va wonisana ni sikarato so hambana-hambana asi si va tiselako dikhodho. Ngu txikombiso, vo tala ti lava ve thuma maora o lapha kasi ku ve mana sakudya ha mwayani. Vona va ti tsakela kumaha to tala ka mthumo wo txhumayela, kambe ngu magwito ka divhiki va ta maneka va di karate ni kwa mbi na mtamo. Vamwani va tandeka ngu kona ha ka malwati a hombe mwendo kukumba; vamwani kha va sikoti ni kuhuma ni mtini. I singeto dwe vamwani va karateka ngu kutipfa i si nga va txilo. Mwanathu mmwani a dhanwako ku i Mary, * wa Oriente Médio a womba tiya: “Ti lava mizamo ya hombe kuxula mialakanyo ya kutipfa ni si nga wa txilo ayi yi ni mahako ni va ni dikhodho. Ni gwita ni tipfa mnando nguko ti ni maha ni heta mbimo ni mtamo awu ni ndi no wu thumisa kasi ku ni txhumayela.”

3. Hi na bhula ngu txani ka gondo yiya?

³ Ti singa ni mhaka ni siemo sathu, Jehovha a nga hi ninga mtamo wo wonisana naso ni ku hi simama hi mu thumela ngu ha hi nga ti kotako ngu kona ngu kuya ngu siemo sathu. Kambe hi si se bhula ngu nzila ayi a hi vhunako ngu yona kukhata he xolisise nzila a yi a nga vhuna ngu yona Paulo ni Timoti ti to ve  hetisisa mthumo wawe wo txhumayela ti si nga ni mhaka ni sikarato sawe.

4. Ngu sihi sikarato asi Paulo a nga ti manana naso?

⁴ Paulo a txi wonisana ni sikarato so tala. Ene a txi lava mtamo ti to e wonisana ni kupekwa, kubaliselwa ngu marigwi ni ku a nga txi betwa jele. (2 Vak. 11:23-25) Paulo a tumete ti to mbimo yimwani atxi tipfa i si nga wa txilo. (Var. 7:18, 19, 24) Ene ti lavile e tsanisela “m’pa ha mmidini” awu a nga ti kombela Txizimu ti to txi wu thavisa.—2 Vak. 12:7, 8.

5. Ngu tihi ati Paulo a nga kota ku ti hokelela ku si nga ni mhaka ni sikarato asi a nga ti manana naso?

⁵ Jehovha a vhuni Paulo ti to e hetisisa mthumo wakwe ku singa ni mhaka ni sikarato asi a nga ti manana naso. Hi nga wona ati Paulo a nga ti hokelela. Ngu txikombiso, mbimo yi a nga ti khotetwe khe Roma, ngu kuhiseka ene a txhumayete vakoma. (Mith. 28:17; Vaf. 4:21, 22) Ene a tshumete e txhumayela tigwardha ni va va nga txi ta mu pfuxela. (Mith. 28:30, 31; Vaf. 1:13) Ngu mbimo yoneyo, Paulo a thumisilwe ngu Jehovha ti to e bhala mapapilo aya ma nga vhuna Makristu a ditshuri a timbimo takwe. I singa eto dwe, txikombiso txa Paulo txi tsanisile mabanza aya ma nga ti Roma ati ti nga maha ti to Makristu onewo me ‘engetelwa kutsana ngutu me huwelela Dipswi, na ma si thavi txilo.’ (Vaf. 1:14) Ditshuri ti to Paulo a si na ku tikota kumaha to tala kambe ene a londote txiemo txi a nga ti ka txona ni ku eto “ti vhuni ngutu kutsimbitisa Evangeli yi ya masoni.”—Vaf. 1:12.

6. Ngu kuya ngu 2 Vakorinto 12:9, 10, ngu tihi ati ti nga vhuna Paulo ti to e hetisisa mthumo wakwe wa txhumayela?

⁶ Paulo atxi tiziva ti to totshe ati a nga txi ti maha a ti ko vhunwa ngu mtamo wa Jehovha i si nga mtamo wakwe. Ene a txi tiziva ti to mtamo wa Txizimu wu txi “ti komba ngu kuhetiseka ahawa ku ku ni kutandeka.” (Lera 2 Vakorinto 12:9, 10.) Ngu kuthumisa moya wakwe wo sawuleka, Jehovha a ningile Paulo mtamo wa ti to e hetisisa mthumo wakwe wo txhumayela. Ti si nga ni mhaka ni kuxaniswa, kukhotelwa jele ni simwani sikarato.

7. Ngu sihi sikarato asi Timoti ti nga lava ku e si xula kasi ku e hetisisa mthumo wakwe wo txhumayela?

⁷ Hambi ku Timoti i nga ti m’dotho ka Paulo, nene ti ti lava e themba mtamo wa Txizimu ti to e hetisisa mthumo wakwe wo txhumayela. Timoti a ti tsimbila kumweko ni Paulo ka maendo awe a wurumiwa. I si nga eto dwe, Paulo a  ti ruma Timoti ti to e endela mabanza kasi ku ya ma tsanisa. (1 Vak. 4:17) Ti nga maha Timoti a di ti pfite i si nga wa txilo. Ti nga maha i di toneto ti nga maha Paulo e womba tiya: “Ku nga ve ni m’thu wo dhelela wuzambi wako.” (1 Tim. 4:12) I si nga eto dwe ku vite ngu yona mbimo yiya Timoti a nga ti ni txikarato txo ‘lwalalwala.’ (1 Tim. 5:23) Kambe Timoti a txi tiziva ti to a ti fanete kuthemba mtamo wa Jehovha awu wu ndi no m’vhuna ti to eva ni mtamo kasi e hetisisa mthumo wakwe wo txhumayela mahungu a manene ni kuthumela vanawe.—2 Tim. 1:7.

8. Jehovha a maha txani ti to e tsanisa vathu vakwe nyamsi?

⁸ Nyamsi Jehovha wa ninga vathu vakwe “mtamo wuwa wa hombe” ngutu ti to ve simama va di thembekile. (2 Vak. 4:7) Konkuwa he wone silo siya sa mune asi Jehovha a hi ningako kasiku hi tsanisa ni ku hi kota kusimama hi di thembekile kwakwe i ku siya: Mkombelo, Bhiblia, vanathu ni mthumo wo txhumayela.

9. Mkombelo wu nga hi vhunisa kutxani?

⁹ Mkombelo wu nga hi vhuna ti to hi tsanisela. Nga ha ti nga bhalwa ngu kona ka dibhuku da Vaefesu 6:18, Paulo a hi kuzeta ti to hi khongela ka Txizimu “yotshe mbimo.” Hi txi maha eto Txizimu txa xamula mikombelo yathu. Jonnie awu a zumbako Bolívia a ti woni ti to eto ditshuri mbimo yi a nga manana ni sikarato. Ene ni msikati wakwe ni vaveleki vakwe votshe va lwate ngu mbimo ya yimweyo. Jonnie ti txi mu karatela kukhatalela vathu vararu ngu mbimo ya yimweyo. Mame wakwe a gwitile e luza ni ku ti tekile mbimo yo lapha ti to msikati wakwe e kalamuka ka malwati ya a nga ti nawo. A txi khumbula ati ti nga maheka, Jonnie a womba tiya: “Mbimo yi ni karatekako ngutu ati ti ni vhunako ngu maha mkombelo ka Jehovha ni womba ngu kukongoma ati ti ni karatako.” Jehovha a ningile Jonnie mtamo awu a nga ti wu lava ti to e timisela. Ronald, awu a thumako kota didhota khe Bolívia a mani txiziviso txa ti to mame wakwe wa lwala ngu malwati a hombe se e gwitisa kuluza mtxima awu wu nga londisela. Ngu tihi ati ti nga m’vhuna e kota kutsanisela? Ene a womba tiya: “Kumaha mkombelo ka Jehovha ti ni mahile ni womba totshe ta mbiluni kwangu ni ti ni ti pfisako tona. Ani na tiziva ti to Jehovha wa ni pfisisa ngutu kupinda mmwani m’thu hambi kupinda ani ni pune.” Mbimo yimwani hi nga guma mtamo hambi kugumelwa ngu mapswi hi si tizivi ti to hi na womba txani ka mkombelo. Kambe Jehovha wa hi ramba ku hi maha mkombelo kwakwe hambi ti txi hi karatela kuwomba ati ti hi tipfisako tona.—Var. 8:26, 27.

10. Nga ha ti nga kombiswa ngu kona ka Vahebheru 4:12, ngu kutxani kulera Bhiblia ni kualakanyisisa ngu yona i di ta lisima?

¹⁰ Hi nga tsaniswa ngu kulera Bhiblia. Kufana ni Mpostoli Paulo a nga ti thavelelwa ni ku tsaniswa ngu Mibhalo, nathu hi nga maha toneto. (Var. 15:4) Ngako hi txi lera Bhiblia ni kualakanyisisa ngu yona Jehovha a na thumisa moya wakwe wo sawuleka ti to e hi vhuna hi pfisisa kwati Mibhalo ni ku yi thumisa ka txiemo txathu. (Lera Vahebheru 4:12.) Ronald awu hi nga woma-womba ngu ngene a womba tiya: “Na bonga ngutu kuva ni di sakulete mkhuva wo lera Bhiblia ditshiku ni ditshiku. Konkuwa na alakanyisisa ngutu ngu tifanelo ta Jehovha ni nzila ya lirando ayi a ñolako ngu yona malanda akwe. Atiya ta ni vhuna kuwuseta mtamo wangu.”

11. Bhiblia yi m’vhunisile kutxani mwanathu mmwani awu a nga felwa ngu mwamna wakwe?

¹¹ Ngako hi txi gonda Bhiblia ni ku alakanyisisa ngu yona hi na sikota kuva ni mawonelo a manene ngu sikarato asi hi mananako naso.  Wona nzila yi Bhiblia yi nga vhuna ngu yona mwanathu awu a nga felwa ngu mwamna wakwe. Didhota dimwani di mu kuzetile ti to e ya gonda ngu matimu a Jobe kasiku e mana tigondo to kari. Mbimo yi a nga maha toneto a to wona ti to Jobe a si nga ni mawonelo a manene ngu sikarato sakwe. Ene a to pimisa tiya: “Jobe, u nga za u ya karateka ngu nzila yiya!” Kambe ngu magwito a tumbute ti to nene a ti ni mawonelo o fana ni a Jobe. Matimu a Jobe ma mu vhuni kululamisa mawonelo akwe ngu sikarato sakwe ni ku tshumela me mu tsanisa e kota kuwonisana ni txikarato txo felwa ngu mwamna wakwe.

12. Jehovha a thumisisa kutxani vanathu ti to ve hi tsanisa?

¹² Hi nga tsaniswa ngu vanathu. Nzila yimwani ayi Jehovha a yi thumisako ti to e hi tsanisa ngu thumisa vanathu. Paulo a wombile ti to ene a ti lava ku “thavelelana” ni vanawe. (Var. 1:11, 12) Mary awu hi nga womba-womba ngu ngene a wona vanathu i di va lisima. Ene a womba tiya: “Jehovha wa thumisa vanathu ava va si tiziviko ati ti ni humelelako ti to ve ni tsanisa. Vona va womba to kari ti to ve ni tsanisa hambi ku ni bhalela dipasi. Atiya ta ni vhuna ku nanani ni tsanisa vanathu vamwani ava va mananako ni sikarato so fana ni kutshumela ni gonda ka sikombiso sawe. Madhota ni ona ma ni maha ni tipfa ni di wa lisima dibanzani.”

13. Hi nga tsanisisa kutxani vanathu hi di mitshanganoni?

¹³ Wumwewo wa makhalo a ya hi nga tsanisako ka ona vanathu, mitshanganoni. Mbimo yi u ku mitshanganoni, ina wa teka dizambo do tsanisa vanathu ngu ku va gela mapswi o tsakisa mwendo o kombisa kubonga? Ngu txikombiso na yi sise kukhata mitshangano didhota dimwani di dhanwako ku i Peter di wombile tiya ka mwanathu wa txisikati awu mwamna wa kona i si ngako Fakazi: “Phela kuvaho kwako hawa ta hi tsanisa ngutu mwanathu. Awe mbimo yotshe u ta vanana vako va di lulamekile ku ta ningela tixamulo.” Mwanathu wule a to humisa mirongo ya litsako e womba tiya: “Phela ati u nga womba ta ni tsanisa ngutu mwanathu.”

14. Kuzumba hi di bhisi ngu mthumo wo txhumayela ti nga hi vhunisa kutxani?

¹⁴ Hi nga tsaniswa ngu kuzumba hi di bhisi ka mthumo wo txhumayela. Mbimo yi hi txhumayelako vamwani hi tipfa hi txi wuseta mtamo ti si nga ni mhaka ni ti to va tumela mwendo nem. (Mav. 11:25) Mwanathu mmwani a dhanwako ku i Stacy a ti woni ti to eto ditshuri. Mbimo yi txiro txa mwaya wakwe txi nga wilwa dibanzani ene a karatekile ngutu e tshumela e ti wotisa tiya: ‘Ina tiho ati ni nga ti fanete kumaha kasi ku ni m’vhuna?’ Ti txi mu karatela Stacy kuthavisa eto ka mapimo akwe. Nji txani txi nga m’vhuna e xula txikarato txiya? Mthumo wo txhumayela! Aku a nga ti zumba a di bhisi ngu mthumo wo txhumayela ene a txi veka mapimo ka vathu ava a nga txi va txhumayela ava va nga ti lava txivhuno. Ene a womba tiya: “Ka mbimo yoneyo Jehovha a ni ningile txigondo atxi txi nga kuluveta txi kula ngu didhawa da moya. Eto ti ni tsanisile ngutu. Atxi txi ni tiyisako ngutu ka wutomi wangu, ngu zumba ni di bhisi ngu mthumo wo txhumayela.”

15. Hi gonda txani ka txikombiso txa Mary?

¹⁵ Ngu kona ha ka siemo si hambanako vamwani va nga tipfa nga kha va mahi ta boti ka mthumo wo txhumayela. I di ti to awe u tipfisa toneto, khumbula ti to Jehovha a tsakiswa ngu ti u ti kotako ku ti maha. Wona txikombiso txa mwanathu Mary. Mbimo y a nga rura e ya thumela ka wukhalo wumwani kuwomba-wombwako lidimi lo hambana ene a txi tiwona a si mahi ta boti. Ene a womba tiya: “Ni hetile mbimo yo kari ni txo gwitela kuwomba mapswinyana o koma, kulera M’bhalo mwendo  kuningela txiphephana dwe ni di ka mthumo wo txhumayela.” Atiya ti mahile e tipfa a si mahi ta boti kufana ni vale va womba-wombako kwati lidimi. Kambe ene a lulamisile mawonelo akwe. Ene a khatile kupfisisa ti to Jehovha a nga mu thumisa hambi ku a si womba-wombiko kwati lidimi lonelo. Ene a womba tiya: “Ditshuri da mu ka Bhiblia kha di karati ni ku dona di nga hulukisa wutomi wa vathu.”

16. Ava va si si kotiko kuhuma mtini ngu kona ha ka malwati, va nga wu manisa kutxani mtamo?

¹⁶ Jehovha wa wona ni ku wa bonga mixuvo yi hi ku nayo yo lava kutxhumayela hambi i di ti to kha hi tikoti kuhuma mtini ngu kona ha ka malwati. Ene a nga tula mkhanjo wa ti to hi ta txhumayela ava va tako ve ta hi pfuxela vo fana ni vadhokodhela. Ngako hi txo dinganisa ati hi ti mahako kona kuwa ni ti hi nga txi ti maha kale, hi nga godhola. Kambe ngako hi txi tsaniseka ti to Jehovha wa hi vhuna kona kuwa ti na hi ninga mtamo awu hi wu lavako ti to hi tsanisela siduko ngu litsako.

17. Ngu kuya ngu Ekleziyaste 11:6, ngu kutxani hi di fanete kusimama ka mthumo wo txhumayela hambi i di ti to kha hi woni mihando ngu txikuluveta?

¹⁷ Athu kha hi tizivi ti to ngu yihi mbewu ya ditshuri ayi yi no mila ni kutshumela yi kula. (Lera Ekleziyaste 11:6.) Ngu txikombiso, Barbara awu i ku mwanathu wa kona mu ka 80 wa malembe a txhumayela ngu kuthumisa telefone ni kubhala mapasi. Ka dimwedo da mapapilo ene a betile direvhista da A Sentinela da 1 ka Março wa 2014 adi di nga ti ni msungo mhaka awu wu ku khene: “O que Deus tem feito por você?” Na a si zivi txilo ene a rumete dipapilo dile ka mpatwa awu wu nga ti thavisilwe dibanzani. Wona wu lerile direvhista dile ngu kuwuyeletela. Mwamna wa kona a ti pfite nga Jehovha a ti ko womba-womba nayo ngu kukongoma. Mpatwa wule wu khatile kuxalela mitshangano. Ngu kutsimbila ka mbimo wu tshumete wu wuyela dibanzani msana ka 27 wa malembe. Alakanya nzila yi a nga kuzetwa ngu yona ni ku ningwa mtamo mwanathu Barbara mbimo yi a nga wona wuyelo ya ninene ya kuva a di bhate dipasi dile!

18. Hi nga maha txani ti to hi wuyelwa ngu mtamo wa Txizimu?

¹⁸ Jehovha wa hi ninga mikhanjo yo tala ya ti to hi mana mtamo wakwe wa hombe. Ene wa hi ninga mkombelo, Bhiblia vanathu ni mthumo wo txhumayela. Athu hi nga kombisa ti to J ha themba Jehovha ngako hi txi thumisa khakwati tiningo toneto. He simameni hi kombisa kuthemba Tate wathu wa nzumani awu a lavako “kutsanisa ava i ku vakwe ngu timbilu tawe totshe.”—2 Mak. 16:9.