1. Ngu txihi txikombiso atxi Jesu a nga vekela valondiseli vakwe? Va mahile txani? (Wona mfota wa kapa.)

MBIMO yi Jesu a nga ti ngadi ha mafuni ene a simamile eva ni mawonelo a manene ngu m’thumo wo txhumayela, ni ku a lava ti to vagondiswa vakwe ni vona ve maha toneto. (Joh. 4:35, 36) Mbimo yi Jesu a nga ti ni vagondiswa vakwe vona va ti hiseka ngu m’thumo wo txhumayela. (Luka 10:1, 5-11, 17) Kambe mbimo yi Jesu a nga ñolwa e tshumela e dawa vagondiswa vakwe va ve ni dikhodho do txhumayela. (Joh. 16:32) Msana ko va Jesu a di wusilwe a kuzetile vagondiswa vakwe ti to ve veka mapimo ka m’thumo wo txhumayela. Mbimo yi a nga kwela e ya nzumani, vona va simamile ve hiseka ko txhumayela aha koza valala vawe ve womba tiya: “Mi tatile Jerusalema ngu kugondisa kwanu.”—Mith. 5:28.

2. Jehovha a katekisile m’thumo wo txhumayeli ngu nzila yihi?

² Jesu a kongomisile m’thumo wo txhumayela awu wu nga txi mahwa ngu Makristu o khata ni ku Jehovha a wu katekisile se vathu vo tala va tsakete. Ngu txikombiso, ngu Pentekoste ya 33, kona mu ka 3.000 wa vathu va bhabhatisilwe. (Mith. 2:41) Ngu toneto, m’tengo wa vagondiswa wu engetelekile ngu nzila yo xamalisa. (Mith. 6:7) Hambiketo Jesu a profetile ti to mthumo wo txhumayela wu ndi na engeteleka ngutu ka masiku yawa a magwito.—Joh. 14:12; Mith. 1:8.

3-4. Ngu kutxani vanathu vamwani va nga wonako m’thumo wo txhumayela wu txi karata? Hi na bhula ngu txani ka gondo yiya?

³ Hotshethu hi lava kuva ni mawonelo a manene ngu m’thumo wo txhumayela. Ka makhalo mamwani eto ta hehuka. Ngu kutxani? Nguko vathu vo tala va tsakela kugonda Bhiblia aha koza vamwani ve maha ngu kurinzela Fakazi yo kari kasi yi ta va gondela Bhiblia. Kambe ka makhalo mamwani vahuweleli va  ti wona ti txi karata kutxhumayela mahungu a manene. Ngu kutxani? Nguko vathu kha va maneki mitini kwawe ni ku vona ava va manwako kha va kombisi kutsakela.

⁴ Ngako u txi hanya ka makhalo ya ti karatako kutxhumayela, tinzila ati hi no bhula ngu tona ka gondo yiya ti na kuvhuna. Hi na wona ati vanathu vamwani va ti mahako ti to ve txhumayela ka makhalo oneyo. Hi na tshumela hi wona ti to ngu kutxani hi fanelako kusimama hi va ni mawonelo a manene ku si nga ni mhaka ni ti to vathu va tumela mwendo nem.

5. Ngu sihi sikarato asi vanathu va mananako naso?

⁵ Vanathu vo tala ta va karatela kumana vathu mitini kwawe. Vahuweleli vamwani va hanya ka makhalo aya ku ku ni tinyumba ta hombe ati ti karatako kubela ka tona. Ti nga maha ka tinyumba toneto ku di ni tigwardha ati ti si tumetisiko m’thu ku e bela a sa rambwa. Vahuweleli vamwani va txhumayela ngu mti ni mti ku si na txikarato, kambe va txi bela ka miti yimwani kha va mani m’thu. Vahuweleli vamwani va hanya kule ni didhoropa mwendo makhalo mamwani a kule aya ku si ngako ni vathu vo tala. Vahuweleli vamwani ti nga maha va txi tsimbila mipfuka yo laaphoo va txi ya kutxhumayelani kambe va nga hoka ka mti wo kari va si mani m’thu. Ngako hi txi manana ni sikarato so fana ni siya kha ha fanela kugodhola. Hi nga maha txani ti to hi xula sikarato soneso ni ku hi humelela ka mthumo wathu?

6. Vatxhumayeli va fanisa kutxani ni vadoti?

⁶ Jesu a fananisile mthumo wo txhumayela ni wa m’doti. (Marku 1:17) Vadoti vamwani va nga heta masiku a mangi va si mani sihaka. Kambe vona kha va rereki va tsimbitisana ni siemo. Kambe vona kha va rereki, va tsimbitisana ni siemo. Vona va nga txitxa mbimo wukhalo ni madotelo. Nathu hi nga maha ati ti fanako ka m’thumo wathu wo txhumayela. He wone tinzila to kari.

7. Ngu yihi wuyelo ayi yi manekako ngako hi txi txhumayela ngu tinzila to hambana-hambana?

⁷ Zama kutxhumayela ngu timbimo to hambana. Hi nga mana vathu mitini kwawe ngako hi txi txhumayela ngu mbimo yi va manekako va di mtini nguko hambi va txo pwateka ngu mbimo yo kari, ngu magwito votshe va tshumela ve ya mitini kwawe. Vanathu vo tala va ti wona i di tshuko kutxhumayela ni mitshikari mwendo ni minova nguko ngu yona mbimo yi va tolovelako kumana vathu. I singa eto dwe ka timbimo toneto vathu vo tala vo humula ni ku va ngava va di tiemisete kubhula. Ti nga maha u tsakela mawonelo a mwanathu a wu a dhanwako ku i David, awu a thumako kota didhota. Ene a womba ti to msana kova a di txhumayete, ene ni mngana wakwe va txhumayela ka miti ayile va nga pwata vathu ka dikhambi do khata. Ene a womba tiya: “Na xamala kuwona ti to vathu vo tala va maneka mbimo yi hi tshumelako ka dikhambi da wumbidi.” *

8. Hi nga thumisisa kutxani Ekleziyaste 11:6 ka mthumo wo txhumayela?

⁸ Athu kha ha fanela kurereka. M’bhalo awu wu nga ñola msungo mhaka wa gondo wu hi kuzeta kumaha toneto. (Lera Ekleziyaste 11:6.) David awu a nga wombwa makhatoni kha rereka. Ka m’ti wumwani awu a nga wuyelela a si mani m’thu, a gwitisile ku ya mmana. Dijaha donedo di tsakete ngutu kubhula ngu ta Bhiblia, di tshumela di womba tiya: “Kupinda malembe o tala ni txi hanya ahawa, kambe ni si khali kumanana ni Tifakazi ta Jehovha.” David a womba tiya: “Ni tumbute ti to ngako u txi  gwitisa ku ya mana vathu mitini kwawe ta tolovela ku ve tsakela didungula.”

9. Vahuweleli vamwani va maha txani ti to ve mana kutxhumayela vathu ava ti karatako ku va mana?

⁹ Zama kutxhumayela ka makhalo mamwani. Ti to ve mana kubhula ni vathu ava ti karatako ku va mana vahuweleli vamwani va woni ti to itshuko kutxhumayela ka makhalo mamwani. Ngu txikombiso kutxhumayela mu sitaratoni ni kuthumisa sikarinyana ta vhuna ti to ve mana kutxhumayela vathu ava va zumbako ka tinyumba ta hombe ati ti karatako ku ti hokelela amu m’thumo wo txhumayela ngu mti ni mti wu si tumetiswiko. Atiya ti maha ti to kutxhumayelwa vathu ava ti si kotekiko ku va mana. Vahuweleli vamwani va tumbute to vathu ava va va txhumayelako ka majaradhi, mamerkadhu ni kumwani ko tala ngutu vathu va tolovela kutsakela kubhula hambi kuteka mabhuku athu. Muwoneleli mmwani wa txigava khe Bolívia a womba tiya: “Hi tolovela kutxhumayela merkadhu kukhukhela ma 13 hora kala ma 15 i ku mbimo yi vaxavisi va vako va si nga bhisi. Hi tolovela kuva ni mabhulo a manene a Bhiblia hambi kukhata sigondo sa Bhiblia.”

10. Ngu txihi tximwani hi nga txi mahako kasi kutxhumayela ava ti karatako ku va mana?

¹⁰ Zama kuthumisa tinzila timwani. Ti nga maha u di zamile kubhula ni m’thu wo kara makhambi o tala, u mu endete mtini kwakwe makhambi o tala ni ngu ti mbimo to hambana kambe khu ya nga mmana. Ina ku ni tinzila timwani to u kota ku mmana? Mwanathu awu a dhanwako ku i Katarina a womba tiya: “Ni bhalela mapasi vathu ava ni si va maniko mitini kwawe ni womba ati ni ndi no womba ni ti ko mmana khohe ngu khohe.” Hi gonda txani?  Mbimo yi hi txhumayelako, he maheni totshe ati hi nga ti kotako ngu kuthumisa tinzila to hambana-hambana kasi ku hi txhumayela votshe vathu.

11. Ngu kutxani vathu vamwani va si tsakeli didungula adi hi di txhumayelako?

¹¹ Vathu vamwani kha va tsakeli didungula adi hi di txhumayelako. Vona kha va li woni lisima lo ziva Txizimu mwendo kugonda Bhiblia. Vona kha va kholwi ka Txizimu ngu mhaka ya kuxaniseka aku va kuwonako ha mafuni. Vona kha va kholwi ka Bhiblia ngu mhaka ya wukanganyisi, awu va wu wonako ka vathangeli va wukhongeli ava va tigelako ngu ku khona va hanya ngu ti Bhiblia yi tiwombako. Vamwani va bhisi ngu kona ha ka mthumo wawe timwaya tawe ni sikarato asi va mananako naso ka wutomi, se va si woni lisima la ti to Bhiblia yi nga va vhunisa kutxani. Se ina hi nga simama hi va ni litsako hambi i di ti to vathu ava hi va txhumayelako kha va tsakeli didungula dathu?

12. Hi nga ma thumisisa kutxani mapswi ya ma ku ka Vafilipiya 2:4 hi di ka mthumo wo txhumayela?

¹² Kombisa kukhatala. Vathu vo tala ava va nga mbi kombisa kukhatala ka dikhambi do khata va gwita ve ta tsakela ka dikhambi dimwani mbimo yi va wonako ti to vahuweleli va khatala ngu vona. (Lera Vafilipiya 2:4.) Ngu txikombiso, David awu hi nga bhula ngu nge makhatoni a womba tiya: “Ngako m’thu a txi khene kha ni tilavi, ho teka Bhiblia ni mabhuku hi ma veka didhawa hi womba tiya, ‘ina u nga hi gela ati ti ku mahako u tipfa ngu nzila yiya?’” Vathu va na tipfisisa ti to ha khatala ngu vona. Ti nga maha ve divala ati hi nga womba, kambe va na khumbula nzila yi hi nga va ñola ngu yona. Ngako nyamne wa mti a si tumeli kubhula ni nathu hi nga kombisa ngu mamahelo ni khohe yathu ti to ha khatala ngu vona.

13. Hi nga mahisa kutxani ti to hi yelanisa didungula dathu ni silaveko sa va hi va txhumayelako?

¹³ Hi nga kombisa kukhatala ngu vathu ngako hi txi yelanisa didungula dathu ni silaveko sa va hi va txhumayelako. Ngu txikombiso, ina nyamne wa mti awu hi lavako ku mtxhumayela a ni vanana? Ti nga maha vaveleki va txi lava kuziva sileleto mayelano ni ku kulisa vanana ni sileleto simwani mayelano ni kuva ni mwaya wo tsakisa. Ina mti wonewo wu ni sikhoto so tala? Hi nga sawula kuwomba-womba ngu wugevenga awu wu nga tala ha mafuni. Ti nga maha nyamne wa mti e tsakela kuziva ti to wugevenga wonewo wu na guma. Ti si nga ni mhaka ni txiemo zama kuvhuna vaengiseli ve wona ti to Bhiblia yi nga va vhunisa kutxani ka  wutomi. Katarína awu a nga wombwa msana a womba tiya: “Ani ni khumbula nzila ayi ditshuri di nga txitxa ngu yona wutomi wangu.” Ngu toneto mbimo yi a txhumayelako Katarína a womba-womba a txi kombisa kukholwa. Se vathu ava a va txhumayelako va tiwona toneto.

14. Ngu kuya ngu dibhuku da Mavingu 27:17, NM, kuthuma ni vamwani ti nga hi vhunisa kutxani?

¹⁴ Tumela txivhuno txa vamwani. Ka timbimo ta Makristu o khata Paulo a gondisile Timoti nzila yo txhumayela ni kugondisa e tshumela e mu kuzeta ku e vhuna vamwani kumaha toneto. (1 Vak. 4:17) Kufana ni Timoti nathu hi nga wuyelwa ngu txivhuno txa vanathu ava va ku ni wusikoti dibanzani. (Lera Mavingu 27:17, NM.) Wona txikombiso txa mwanathu awu a dhanwako ku i Shawn. Ene a thumile ngu mbimo yo kari kota nyaphandule ka wukhalo awu ti karatako kumana vathu ni ku vathu va kona kha va lavi kupfa txilo ngu ta wukhongeli wumwani. Ene a simamisile kutxani eva ni litsako? Ene a womba tiya: “Ngako ti txi koteka ni txi thuma ni m’thu mmwani. Hi txi txhumayela votshe ngu mti ni mti kasi ku hi tshukwatisa wusikoti wathu wo gondisa. Ngu txikombiso, hi txi bhula ngu nzila yi nyamne wa mti a nga angula ngu yona ni nzila yo tshukwatisa mathumelo athu ka makhambi mamwani.”

15. Ngu kutxani ti di ni lisima kumaha mkombelo hi si se ya kutxhumayelani?

¹⁵ Kombela Jehovha e kuvhuna. Kombela mkongomiso wa Jehovha mbimo yotshe ayi u lavako kuya kutxhumayelani. Athu hi nge sikoti kumaha txilo i si nga ngu kuvhunwa ngu moya wo sawuleka. (Mas. 127:1; Luka 11:13) Ngako u txi maha mkombelo ka Jehovha u nga jika-jike, womba ati u ti lavako. Ngu txikombiso u nga mu kombela ku e kuvhuna u mana m’thu awu a tsakelako kuengisa mahungu a manene. Se awe maha ati u nga tikotako ngu kutxhumayela votshe vathu ava u va manako.

16. Gondo ya m’thu a pune yi nga hi vhunisa kutxani ti to hi tshukwatisa wusikoti wathu wo txhumayela?

¹⁶ Tihe mbimo yo va ni gondo yako upune. Bhiblia yi womba tiya: “Ziva kuranda ka Txizimu: Ati i ku tatinene, a ti ti m’tsakisako, ni ti i ku ta kuhetiseka.” (Var. 12:2) Ngako hi txi gonda Bhiblia hi na mu ziva kwati Jehovha. Se mbimo yi hi txhumayelako, vathu va na tiwona ti to ha kholwa ka ti hi ti wombako. Katarína awu hi nga womba-womba ngu ngene a womba tiya: “Mbimonyana msana ni tumbute ti to ni ti fanete ni tsanisa likholo langu mayelano ni tigondo to kari ta mu ka Bhiblia. Ngu toneto ni ti hite mbimo yo gonda kasi kutsaniseka ti to ku ni M’vangi ni ti to Bhiblia, Dipswi da Txizimu ni ti to Jehovha a ni sengeletano yakwe ayi yi mu emelako nyamsi.” Katarína a tshumela e womba ti to gondo ya m’thu a pune yi mu vhuni kutsanisa likholo lakwe ni ku mu engetela litsako ka mthumo wo txhumayela.

17. Ngu kutxani Jesu a di simamile eva ni mawonelo a manene?

¹⁷ Jesu a simamile eva ni mawonelo a manene ni kusimama e txhumayela hambiku vathu va nga ti si tsakeli. Ngu kutxani? Ene a ti ti ziva ti to mtalo wa vathu va ti fanete ve pfa mahungu a manene ni ku a ti lava ku va ninga lungelo yo ve tumela mahungu aya a nga ti ma txhumayela. Ene a ti ti ziva ti to hambiku vathu va nga lambako dikhambi do khata va gwita ve txitxa. Wona ati ti nga maheka ka mwaya wakwe. Jesu a txhumayela kudingana malembe mararu ni hafu, kambe ni wa mmweyo ka vananda vakwe va nga va mgondiswa. (Joh. 7:5) Kambe msana kova a di wusilwe vananda vakwe va vite Makristu.—Mith. 1:14.

18. Ngu kutxani hi di fanete kusimama hi txhumayela?

¹⁸ Athu kha hi tizivi ti to mba mani ava va no  engisa mahungu a manene. Vamwani ta teka mbimo ti to ve engisa mahungu a manene. Hambi ava va sawulako kwa mbi hi engisa vona va ma wona mahanyelo athu a manene, se eto ti nga va maha ku ve khata ku “dhumisa Txizimu.”—1 Pedro 2:12.

19. Ngu kuya ngu 1 Vakorinto 3:6, 7, ngu tihi ati hi fanelako ku ti khumbula?

¹⁹ Athu ha phaya ni kuregara kambe ha tiziva ti to Txizimu ngu txona txi si kulisako. (Lera 1 Vakorinto 3:6, 7.) Getahun, mwanathu awu a thumelako khe Etiópia a womba tiya: “Kupinda 20 wa malembe i ti ani nokha Fakazi ka wukhalo awu wu si txhumayelwiko ngutu. Kambe konkuwa ku ni 14 wa vahuweleli. 13 wa vona va bhabhatisilwe kupata ni msikati wangu ni vanana vathu va vararu. Kona mu ka 32 wa vathu va xalela mitshangano.” Getahun wa tsaka kuva a di simamile e timisela e rinzela ku Jehovha e ndindela vathu ka sengeletano yakwe!—Joh. 6:44.

20. Ngu kutxani hi nga wombako ti to athu hi fana ni mtxawa wa vahulukisi?

²⁰ Jehovha a wona votshe vathu i di va lisima. Ene a hi ningile lungelo yo thuma kumweko ni Mwanana wakwe ti to hi sengeleta vathu va matiko otshe ku si se hoka magwito. (Hag. 2:7) Mthumo wathu wo txhumayela wu fananiswa ni wo hulukisa. Athu hi fana ni mtxawa wa vathu ava va nga rumelwa ku ya hulukisa vathu ava va nga dhilikelwa ngu m’godhi. Ti nga maha ka mtxawa wonewo ti ya koteka ku ya hulukisa m’thu wa mmweyo dwe, kambe votshe va mahile mthumo wa lisima. Atiya ta fana ni mthumo wathu wo txhumayela. Athu kha hi tizivi ti to mbathu vangahi va nga sala ti to ve hulukiswa ka mafu awa a Sathani. Kambe Jehovha a nga thumisa mmwani ni mmwani wathu kasi ku va vhuna. Andreas awu a zumbako Bolívia a womba tiya: “Ani ni wona m’thu mmwani ni mmwani awu a gondako Bhiblia ni kutshumela e bhabhatiswa kota wiyelo ya m’thumo awu hi wu mahako kota mtxawa.” He simameni hi va ni mawonelo a manene ngu mthumo wo txhumayela. Hi txi maha toneto Jehovha a na hi katekisa ni ku hi na mana litsako ka mthumo wo txhumayela.