1-2. Nga ha ti nga kombiswa ngu kona ka Mithumo 8:27-31, 35-38, nji txani txi nga kuzeta Muetiyopiya ti to e bhabhatiswa?

INA wa tilava kubhabhatiswa kota dilanda da Kristu? Lirando ni kulava kukombisa kubonga, ti mahile vathu vo tala ve maha txisungo txonetxo. Wona txikombiso txa mthangeli awu a nga ti thumela mkoma wa txisikati wa Muetiyopiya.

² Muetiyopiya a bhabhatisilwe msana kova adi gondile ka Mibhalo to a fanete kumaha toneto. (Lera Mithumo 8:27-31, 35-38.) Nji txani txi nga mkuzeta? Ti ha kubasani ti to ati dhunda Dipswi da Txizimu; ene a ti lera tindimana to kari ta dibhuku da Isaya mbimo yi a nga ti ka txikotxikani. Mbimo yi Filipi a nga womba-womba nayo, a kombisile kubonga ngu ti Jesu a nga ti m’mahete. Kambe ngu kutxani mthangeli wuwa a di endile eya Jerusalema? Nguko a ti kulisile lirando lakwe ngu Jehovha. Hi ti zivisa kutxani? Nguko a ti wuya ngu ku kukhozelani Jerusalema. Ti woneka nga wamwamna wuwa a ti lekile wukhongeli wakwe se e ti tshanganisa ni vathu va va nga ti ti ningetete ka Txizimu txa ditshuri. Lirando lakwe ngu Jehovha ngu lona li nga mu kuzeta kuteka txisungo txo bhabhatiswa kota dilanda da Kristu.—Mat. 28:19.

3. Nji txani txi txi mahako vathu va si bhabhatiswi? (Wona dibhokiso di di ku “ Mbilu yako yi fana ni lixaka lihi la mafu?”)

³ Lirando lako ngu Jehovha li nga kukuzeta kubhabhatiswa. Kambe lirando li nga tshumela li kutsivela. Ngu kutxani? Wona tiya: Ku ti lava u randa ngutu maxaka ni vangana  vako ava i si nga ku Makristu, se u karateka ngu ti to u txo bhabhatiswa va na kuvengela. (Mat. 10:37) Mwendo ti nga maha u txi randa mikhuwo yi Txizimu txi yi vengako, se ti kukaratela ku yi leka. (Mas. 97:10) Mwendo ti nga maha u di kute u txi ya ka mibuso yi yi yelanako ni wukhongeli wa makuho. Ti nga maha u txi khumbula to tsakisa ngutu ati ti mahekako ka mikhuwo yoneyo. Ngu mhaka yeto u ti wona ti txi karata kuleka mikhuwo yi Jehovha a si yi tsakeliko. (1 Vak. 10:20, 21) Se txiwotiso ngu txiya: “U randa ngutu mani mwendo txani?”

4. Nji txani txa lisima ngutu atxi txi no kususumetela kubhabhatiswa?

⁴ Ku ni silo so tala asi u nga si dhundako ni kutsaka ngu sona. Phela ku ti lava u ti yi tsakela Bhiblia hambi mbimo yi u nga ti si se khata kugonda ni Tifakazi ta Jehovha. Ku ti lava u ti mu randa Jesu. Akuwa se u zivanako ni Tifakazi ta Jehovha, ti nga maha u txi tsaka u di nato. Kambe kuranda totsheleleto, hi nga ti to o va tona ti no kumaha u sawula ku tiningetela ka Jehovha ni kubhabhatiswa. Txa lisima ngutu atxi txi no kususumetela kubhabhatiswa, ngu randa Jehovha Txizimu. U txi randa ngutu Jehovha kupala sotshe, u na mbi leka txilo txi kutsivela kuthumela Jehovha. Lirando lako ngu Jehovha li na kususumetela kubhabhatiswa ni kutshumela li kuvhuna kuzumba u di thembekile msana ko bhabhatiswa.

5. Ngu tihi ti hi no bhula ngu tona ka msungo wuwa?

⁵ Jesu a wombile to hi fanete kuranda Jehovha ngu yotshe mbilu, ngu wotshe muhefemulo, ngu otshe mapimo ni wotshe mtamo wathu. (Marku 12:30) U nga gondisa kutxani kuranda Jehovha ni ku mxonipha ngu nzila yoneyo? Kualakanyisisa ngu nzila yi Jehovha a hi randako ngu yona ti nga hi vhuna ku m’randa. (1 Joh. 4:19) Ka msungo wuwa hi na bhula ngu matipfelo ni mithumo yi yi no londisela ngako hi txi sakulelela kuvani lirando lonelo. *

6. Ngu kuya ngu Varoma 1:20, ngu yihi nzila yimwani yo gonda ngu Jehovha?

⁶ Gonda ngu Jehovha ka mtumbuluko. (Lera Varoma 1:20; Mtu. 4:11) Alakanyisisa ngu mindonga ni sihari asi Jehovha a nga si maha, se u wona wuzivi awu a ku nawo. Wona ati mmidi wako wu nga mahiswa tona. (Mas. 139:14) Alakanya ngu mtamo wu Jehovha a nga ninga ditambo, u txi khumbula ti to ku ngadi ni tibhiliyoni ta tinyeleti. * (Isaya 40:26) U txi maha toneto, u na mu xonipha ngutu Jehovha. Hambi keto, kuziva to Jehovha a ni mtamo ni wutxhari hi nga tona dwe ti lavekako ti to u va ni wuxaka ni Jehovha. Kambe ti to u tsanisa lirando lako ngu Jehovha, ti lava u ziva to engeteleka ngu ngene.

7. Ti to u randa ngutu Jehovha, ti lava u kholwa to txani?

⁷ Ti lava u kholwa to ngu ditshuri Jehovha wa kudhunda. Ina ta kukaratela kukholwa to Mvangi wa nzuma ni mafu wa kukhatalela? I di toneto, khumbula ti to Jehovha kha “nga kule ka mmweyo ni mmweyo wathu.” (Mith. 17:26-28) Ene “wa xola totshe timbilu,” ni ku a kuthembisa  ati a nga khala kuthembisa Solomoni a txi khene: “Ngako u txo mlava, u na mmana.” (1 Mak. 28:9) Phela, awe u gonda Bhiblia nguko Jehovha a nga khene “ni kutshuketisile kwangu.” (Jer. 31:3, NM) Mbimo yi u yako u txi pfisisa ati Jehovha a nga ku mahela, lirando lako ngu ngene li na kula.

8. U nga kombisisa kutxani to nawe wa m’randa Jehovha?

⁸ Nzila yimwani yo kombisa to nawe wa m’randa Jehovha ngu bhula nayo ngu mkombelo. Lirando lako ngu Txizimu li na kula mbimo yi u txi gelako ati u ti tsakelako ni kubonga totshe ati txi nga kumahela. Se wungana wanu wu na tsana mbimo yi Txizimu txi xamulako mikombelo yako. (Mas. 116:1) U na kholwa to Jehovha wa kupfisisa. Kambe ti to u tshuketa ka Jehovha, ti lava u pfisisa to ngu kutxani a txi dhunda timhaka to kari. Ni ku tilava u ziva ati ene a ti lavako kwako. Toneto u no tiziva ngako u txi gonda Dipswi dakwe, i ku Bhiblia.

9. U nga kombisisa kutxani to u wona Bhiblia i di ya lisima?

⁹ Gonda kuwona Bhiblia i di ya lisima. Bhiblia ngu yona dwe yi ku ni ditshuri mayelano ni Jehovha ni sikongomelo sakwe ngu ngawe. Awe u nga kombisa to Bhiblia yi ni lisima kwako ngu ku yi lera ditshiku ni ditshiku, ngu kululamisela ha mi no ta gonda kona ni wu a kugondelako, ni kuthumisa ati u ti gondako. (Mas. 119:97, 99; Joh. 17:17) Ina u natxo txiemiso txo lera Bhiblia wekha? Ina wa txi thumisa kwati, u lera Bhiblia ditshiku ni ditshiku?

10. Ngu yihi mhaka yimwani ayi yi mahako to Bhiblia yi va ya lisima?

¹⁰ Mhaka yimwani ayi yi mahako to Bhiblia yi va ya lisima ngu ti to yi womba-womba ngu vathu ava va nga wona Jesu ngu maso. Futhi ngu yona dwe yi txhamuselako ati Jesu a nga ku mahela. Mbimo yi u lerako ati Jesu a nga maha ni ku ti womba, u na tsakela kumaha mngana wakwe.

11. U nga gondisa kutxani kuranda Jehovha?

 ¹¹ Gondela kuranda Jesu, se lirando lako ngu Jehovha li na kula. Ngu kutxani? Nguko Jesu a tekelete totshe tifanelo ta Tate wakwe. (Joh. 14:9) Ngu toneto, u txi gonda ngutu ngu Jesu, u na mziva kwati Jehovha ni ku mu randa. Alakanya ngu wuxinji wu Jesu a nga wukombisa ka va va nga ti wonelwa hahatshi ngu vathu vamwani nguko i nga ti sisiwana, vo lwala ni vo mbi na nyamne. Tshumela u alakanyisisa ngu siletelo si Jesu a kuningako ni nzila yi si kuvhanako ngu yona ngako u txi si engisa.—Mat. 5:1-11; 7:24-27.

12. U txi gonda ngu Jesu, u na lava kumaha txani?

¹² Lirando lako ngu Jehovha la kula ngako u txi alakanyisisa ngu mtirulo awu ene a nga wu ningela ti to sionho sathu si divalelwa. (Mat. 20:28) U txi tipfisisa ti to Jesu a kufete, ti nga kumaha u tisola, se u kombela kudivalelwa ngu Jehovha. (Mith. 3:19, 20; 1 Joh. 1:9) Se mbimo yi u randako Jehovha ni Jesu, u na lava ku va hafuhi ni vathu ava Txizimu txi va tsakelako.

13. Jehovha a na kuvhunisa kutxani?

¹³ Gonda kuranda ava va randako Jehovha. Ti nga maha maxaka ni va i nga ti vangana vako va si ti pfisisi to ngu kutxani u txi lava ku tiningetela ka Jehovha. Ti nga maha ve kukuwukela. Jehovha a na kuvhuna ngu kumaha ti to u mana maxaka dibanzani. U txi zumba hafuhi ni va va m’randako, u na mana lirando ni txivhuno atxi u txi lavako. (Marku 10:29, 30; Vaheb. 10:24, 25) Ngu kutsimbila ka mbimo, ti nga maha maxaka ako ni ona me thumela Jehovha ni kuhanya ngu milayo yakwe.—1 Pedro 2:12.

14. Nga ha 1 Johani 5:3 yi wombako ngu kona, u yi wonisa kutxani milayo ya Jehovha?

¹⁴ Gonda kuxonipha ni kuthumisa milayo ya Jehovha. Na u si se ziva Jehovha ti nga maha u txo maha kuranda kwako, kambe konkuwa se wa ti wona to milayo ya Jehovha ngu yona ya yinene. (Mas. 1:1-3; lera 1 Johani 5:3.) Alakanya ngu milayo ayi Bhiblia yi ningako vavamna, vavasikati ni vanana. (Vaef. 5:22–6:4) Ina wa ti wona to mwaya wako wa tshukwala wu txi londisa milayo yoneyo? Ngako u txi engisa Jehovha mayelano ni kusawula vangana ngu wutxhari, ina wa ti wona to mahanyelo ako ma tshukwala? Ina wa ti wona to wa mana litsako? (Mav. 13:20; 1 Vak. 15:33) Ti nga maha u xamula ngu ina.

15. U nga vhunwa ngu txani ngako u txi lava kuziva mathumiselo a matshina a milayo ya Bhiblia?

¹⁵ Yimwani mbimo ti nga kukaratela kuziva mathumiselo a matshina a milayo ya Bhiblia aya u ma gondako. U nga thave, Jehovha a thumisa sengeletano yakwe ti to yi kuninga mabhuku aya ma txhamuselako ati ti ku ka Bhiblia ni kukuvhuna u ziva ta tinene ni to biha. (Vaheb. 5:13, 14) U txi gonda mabhuku onewo, u na wona nzila ayi ma kuvhunako ngu yona ka timhaka to kari, ni ku u na lava kulumba sengeletano ya Jehovha.

16. Sengeletano ya Jehovha yi zumbisile kutxani?

¹⁶ Gonda kuranda ni kuseketela sengeletano ya Jehovha. Jehovha a sengeleta vathu vakwe ngu kuthumisa mabanza; Mwanana wakwe Jesu, i msungo wa votshe. (Vaef. 1:22; 5:23) Jehovha a sawute vathu va vadotho hagari ka vasawuleki ti to ve thangela mthumo awu ene a lavako wu mahwa nyamsi.  Jesu a ti khene vathu vonevo i ‘txithumi txo thembeka na txi di ni wutxhari,’ se vona kha va wu tekeli hahatshi wutixamuleli awu va nga ningwa wo kudyisa ni ku kuvhikela ngu didhawa da moya. (Mat. 24:45-47) Txithumi txo thembeka txi kukhatalela ngu kuthumisa madhota o vitwa ti to me kukongomisa ni ku kuvhikela. (Isaya 32:1, 2; Vaheb. 13:17; 1 Pedro 5:2, 3) Madhota ma tiemisete kumaha ati ma tikotako, ti to me kutsanisa, ni ku kuvhuna u tshuketa hafuhi ni Jehovha. Kambe txa lisima ngutu atxi ma nga kumahelako ngu kuvhuna u gondisa vamwani ngu Jehovha.—Vaef. 4:11-13.

17. Ngu kuya ngu Varoma 10:10, 13, 14, ngu kutxani hi txi txhumayela vamwani?

¹⁷ Vhuna vamwani ve randa Jehovha. Jesu a gete valondeteli vakwe ti to ve gondisa vamwani ngu Jehovha. (Mat. 28:19, 20) Ti nga maha hi londisa txirumo txonetxo ngu ku hi ko rumwa. Kambe mbimo yi lirando lako ngu Jehovha li kulako, u na ti pfa nga mpostoli Pedro ni Johani va nga womba tiya: “Athu kha hi na ku si kota kumalala ni ti hi nga ti wona ni ti hi nga ti engisa.” (Mith. 4:20) Ta tisa litsako la hombe ngutu kuvhuna m’thu e randa Jehovha. Alakanya ati Filipi a nga tsakisa tona mbimo yi a nga vhuna Muetiyopiya e gonda ditshuri e tshumela e bhabhatiswa! U txi etetela Filipi u engisa txirumo txa Jesu txo txhumayela, u kombisa to wa ti lava ku va Fakazi ya Jehovha. (Lera Varoma 10:10, 13, 14.) Ngu toneto, nawe u na nga wo wotisa txiwotiso atxile Muetiyopiya a nga wotisa a txi khene: “Ni nga tsivelwa ngu txani kubhabhatiswa kani?”—Mith. 8:36.

18. Hi na gonda ngu txani ka msungo wu wu londiselako?

¹⁸ U na maha txisungo txa lisima ngutu ka wutomi ngako u txi sawula kubhabhatiswa. Aku i ku txisungo txa lisima, ti lava u alakanyisisa kwati ngu ti ti wombako tona kubhabhatiswa. Ngu tihi ti u fanelako ku ti ziva ngu bhabhatiso? Ngu tihi ti u fanelako kumaha na u si se bhabhatiswa ni loko se u di bhabhatisilwe? Hi na ta mana tixamulo ta siwotiso siya ka msungo wu wu londiselako.