1. Ngu kutxani hi di fanete kuva ni wusikoti wo ruma mipimiso yathu?

 TI SINGA ni mhaka ni ti to hi ngadi kubhabhatiswa mwendo se kale i di bhabhatisilwe, hotshethu hi fanete kusakulela kuva ni wuthu awu Jehovha awu tsakelako. Ti to hi sikota kuva ni wuthu wonewo hi fanete kuva ni wusikoti wo lamula mapimiselo athu. Ngu kutxani? Nguko mipimiso yathu ngu yona yi hi mahako ti to hi va m’thu wo kari. Ngako hi txi zumbela kupimisa ngu ti ti tsakisako nyama, hi na gwitela kuwomba mwendo kumaha timhaka to biha. (Vaef. 4:17-19) Kuhambana ni eto, ngako hi txi tata mialakanyo yathu ngu timhaka ta tinene hi na womba-womba ni kumaha ati ti tsakisako Tate wathu Jehovha.—Vag. 5:16.

2. Ngu sihi siwotiso asi hi no bhula ngu sona ka gondo yiya?

² Nga ha hi nga tiwona ngu kona ka gondo ayi yi nga pinda, hi nge sikoti kuvhalela mialakanyo yo biha ti to yi hi belela. Kambe hi nga sikota kusawula ti to hi si fumwi ngu yona. Na hi si se kubhabhatiswa, hi fanete kuleka kuwomba ni kumaha ti Jehovha a ti nyenyako. Edo ngu dona dizambo do khata kasi kuxivila m’thu wa kale. Ti to hi tsakisa Jehovha hi fanete kuengisa txirumo atxi txi ku: ‘Ambalani m’thu wamphya.’ (Vakl. 3:10) Ka gondo yiya hi na xamula siwotiso siya: Nji txani ‘m’thu wamphya’? Ni ku hi nga maha txani ti to hi ambala m’thu wamphya ni kusimama nayo?

3. Ngu kuya ngu dibhuku da Vagalatiya 5:22, 23, nji txani “m’thu wamphya” ni ku a nga maha txani ti to e ambala wuthu wonewo?

³ “M’thu wamphya” ti womba kupimisa ni kuhanya ngu nzila yi yi kombisako wuthu wa Jehovha. M’thu a nga kombisa ti to  wa ambala m’thu wamphya ngu kutumelela ti to mihando ya moya wa Txizimu yi woneka kwakwe, ni kutumelela ti to mipimiso yakwe, matipfelo awe, ni simaho sakwe si kongomiswa ngu moya wo sawuleka. (Lera Vagalatiya 5:22, 23.) Ngu txikombiso m’thu awu a ku ni mahanyelo a m’thu wamphya wa randa Jehovha ni vathu Vakwe. (Mat. 22:36-39) M’thu eneyo wa simama eva ni litsako hambi a txi manana ni sikarato. (Jak. 1:2-4) Ene a dhunda kudikha. (Mat. 5:9) Ene wa kombisa kutimisela ka vamwani. (Vakl. 3:13) Ene wa randa ta tinene ni kutshumela e ti maha. (Luka 6:35) Ene wa kombisa ngu simaho sakwe ti to a ni likholo lo tsana ka Jehovha. (Jak. 2:18) Ene wa simama e ti veka hahatshi hambi a txi vhukwa ni ku wa ti ñola mbimo yi a dukwako.—1 Vak. 9:25, 27; Tit. 3:2.

4. Ina kuambala m’thu wamphya ti womba ti to hi fanete hi va ni tifanelo ati ti ku va Vagalatiya 5:22, 23 yimweyo ngu yimweyo? Txhamusela.

⁴ Ti to hi ambala m’thu wamphya hi fanete hi sakulela kuva ni totshe tifanelo ati ti wombwako ka Vagalatiya 5:22, 23 ni timwani tifanelo ati ti ku mu ka Bhiblia. * Tifanelo toneto kha ti fani ni siambalo asi hi ambalako tximwetxo ngu tximwetxo. Kambe mahanyelo aya ma tiswako ngu tifanelo toneto hi nga ma mana ka tifanelo timwani. Ngu txikombiso, ngako hi txi randa vaakelani vathu ngu ditshuri, hi na va ni kutimisela ni wunene navo. Ni ku ngako hi txi dhunda ta tinene ngu ditshuri hi fanete hi va ni moya wo thutha ni kuziva kutiñola.

5. Ti womba txani kuva ni “mialakanyo ya Kristu” ni ku ngu kutxani hi di fanete kugonda ku Jesu? (1 Vakorinto 2:16)

⁵ Lera 1 Vakorinto 2:16. Ti to hi ambala m’thu wamphya hi fanete kuva ni “mialakanyo ya Kristu.” I ku ti to hi fanete kugonda nzila yi Jesu a pimisako ngu yona ni ku mu etetela. Jesu a kombisa tifanelo ati ti tiswako ngu mihando ya moya wa Txizimu ngu kuhetisa. Kufana ni txibuko atxi txi wonako kwati, tifanelo ta Jehovha ta woneka ka Jesu nga ti ti ku ngu tona. (Vaheb. 1:3) Ngako hi txi ti karatela kupimisa kufana ni Jesu ni kutshumela hi hanya nga ti ha hanyisako tona, tifanelo takwe ti na woneka kwathu.—Vaf. 2:5.

6. Ngu tihi ati hi fanelako ku ti khumbula mbimo yi hi zamako kuambala m’thu wamphya?

⁶ Ina ti nga koteka kulondeta txikombiso txa Jesu? Ti nga maha hi pimisa tiya: ‘Jesu m’thu  wo hetiseka, se ani ni nge sikoti ku mueteta ngu nzila yo hetiseka.’ Ngako u txi tipfa ngu nzila yoneyo, khumbula timhaka tiya. Yo khata, awe u vangilwe ngu txifananiso txa Txizimu ni Jesu. Se u nga sikota kusawula ku va etetela ni ku u nga humelela. (Gen. 1:26) Txa wumbidi, moya wo sawuleka wa Txizimu ngu wona wa mtamo ngutu ka wuako wotshe. Wona wu nga kuvhuna ti to u maha ati u nga si na kutikota ku timaha ngu kuthemba mtamo wako. Txa wuraru, Jehovha kha rinzeli ti to u kombisa tifanelo tiya ta mihando ya moya wa Txizimu ngu kuhetiseka konakuwa. Phela Jehovha a vekile 1.000 wa malembe kasi ku vathu ve va vo hetiseka. (Mtu. 20:1-3) Ati Jehovha a ti lavako kwako konakuwa ngu maha totshe ti u ti kotako ni kuthemba txivhuno a txi txi tako ngu ka Jehovha.

7. Hi na bhula ngu txani konkuwa?

⁷ U nga mu etetelisa kutxani Jesu? Konkuwa hi na xolisisa mahanyelo aya ma tiswako ngu mihando ya moya wa Txizimu. Ka mhaka yimwani ni yimwani hi na wona nzila Jesu a nga kombisa ngu yona tifanelo tiya. Mbimo yi hi mahako toneto; hi na bhula ngu siwotiso asi si no hi vhuna kuwona ti to hi ambate m’thu wamphya kuhokela hani.

8. Jesu a kombisile lirando lakwe ngu nzila muni?

⁸ Ngu kona ha ka lirando ali Jesu a nga ti nalo ngu Jehovha a tumete kurumwa ngu ngene ni ku tshumela e ta hi fela. (Joh. 14:31; 15:13) Jesu a kombisile ti to wa randa vathu ngu nzila yi a nga hanya ngu yona ha mafuni. Mbimo yotshe a txi kombisa lirando, wuxinji hambiku vathu va nga txi mu kaneta. Yimweyo ya tinzila a nga kombisa ngu yona ti to wa randa vathu ngu ku a nga txi va gondisa ngu ta Mfumo wa Txizimu. (Luka 4:43, 44) Jesu a kombisile kambe lirando la hombe ngu Jehovha ni ngu vathu ngu kutumela kuxaniswa ni kutshumela e dawa ngu vaonhi. Ngu nzila yoneyo, ti kotekile ti to hotshethu hi mana mkhanjo wo mana wutomi wo mbi guma.

9. Hi nga maha txani ti to hi kombisa lirando kufana ni Jesu?

⁹ Hi ti ningetete ka Jehovha ni kubhabhatiswa nguko hi mu randako. Nanathu kufana ni Jesu hi nga kombisa lirando lathu ngu Jehovha ngu nzila yi hi ñolako ngu yona vathu. Mpostoli Johani a bhate tiya: “Awu a si randiko mwanawe, awu a mu wonako, kha na kusikota kuranda Txizimu txi a si txi woniko.” (1 Joh. 4:20) Se hi fanete kutiwotisa tiya: ‘Ina na sakulela kuranda vathu? Ina na kombisa wuxinji va vathu hambi va si ni xoniphi? Ina lirando la ni susumetela ku ni thumisa mtamo wangu, mbimo yangu ni silo sangu kasi kuvhuna vamwani ve gonda ngu Jehovha? Ina ni tiemisete kumaha tiya hambi vathu vo tala va si ningi lisima ati ni ti mahako mwendo ku ni kaneta? Ina na xota tinzila to engetela mbimo yi ni hetako ka mthumo wo txhumayela?’—Vaef. 5:15, 16.

10. I ngu nzila muni Jesu hi nga ti m’thu wo dhunda kudikha?

¹⁰ Jesu i ti m’thu wo dhunda kudikha. Mbimo yi a nga txi ñolwa ngu nzila yo biha ene a si tshumeteli wubihi ngu wubihi. Kambe ene a si gwiteli eho. Ene a txi teka dizambo do maha kudikha ni ku txi kuzeta vamwani ti to ve maha toneto. Ngu txikombiso ene a gondisile vagondiswa vakwe ti to vona va ti fanete kumaha kudikha ni vamwani kasi ku Jehovha e tumela wukhozeli wawe. (Mat. 5:9, 23, 24) Ene a va vhuni makhambi o tala kasi ku ve maha kudikha mbimo yi va nga txi kanetisana ngu ti to i mani i nga ti wa hombe.—Luka 9:46-48; 22:24-27.

11. Hi nga maha txani kasi kukombisa ti to hi vathu vo dhunda kudikha?

¹¹ Kuva m’thu wo dhunda kudikha kha ti gwiteli  ko vayilela mazunga dwe. Kambe hi fanete kuteka dizambo do maha kudikha ni vamwani ni kutshumela hi kuzeta vanathu ti to ni vona ve maha toneto. (Vaf. 4:2, 3; Jak. 3:17, 18) Se hi nga ti wotisa tiya: ‘Ina ani ni tiemisete kumaha totshe ti ni nga tikotako ti to ni maha kudikha ni vamwani? Ngako mwanathu a txi ni henyisa ina na zumba ni txiviti? Ina na rinzela ti to e va ene a tako e maha kudikha, mwendo na khata ani ni maha kudikha, hambi i di ti to ngene a nga ni mahela txikarato? Ina na kuzeta ava va nga tsondana ti to ve maha kudikha ngako ni txi mana mkhanjo?’

12. I ngu nzila muni Jesu a nga kombisa wunene ngu yona?

¹² Jesu a ti ni wunene. (Mat. 11:28-30) Ene a kombisile wunene ngu kwa mbi ti karatisela, hambi ka timbimo to karata. Ngu txikombiso, mbimo yi wamsikati mmwani wa Mufenekiya a nga kombela ti to e hanyisa mwanana wakwe ene a womba-wombile ngu nzila ya yinene ni wamsikati wule. Hambiku a nga lamba makhatoni, aku a nga kombisa likholo a hanyisile mwanana wakwe. (Mat. 15:22-28) Hambiku Jesu a nga ti ni wunene, ene asi yi ngu khohe. Mbimo yimwani a txi kombisa wunene wonewo ngu kukawuka ava a nga ti va randa. Ngu txikombiso, mbimo yi Pedro a nga zama kuvhalela Jesu ti to asi mahi kuranda ka Txizimu ene a mu kawukile masoni ka vagondiswa vamwani. (Marku 8:32, 33) Ene kha maha tiya kasi kuthela tingana Pedro, kambe a mahile tiya kasi ku mu trenera ni kuvhuna vamwani ti to va si mahi phazamo yi yi fanako. Ditshuri ti to Pedro a pfite tingana ngu toneto kambe, ngu msana gondo yoneyo yi vile ya lisima ngutu kwakwe.

13. Hi nga maha txani kasi kukombisa ti to hi na ni wunene ngu ditshuri?

¹³ Kasi kukombisa wunene ka va hi va randako mbimo yimwani ti na lava hi va kawuka. Mbimo yi u mahako toneto etetela Jesu, u seketela silayelo sako ka matshina a milayo a Bhiblia. Themba ti to vona va ti lava kumaha ati i ku ta tinene, ni ku aku va randako Jehovha va na tumela txivhuno txako. Se ti wotise tiya: ‘Ina ni na txibindi txo kawuka m’thu ngako a txi maha ta walo? Ngako ni txi lava kuningela txivhuno, ina ni womba-womba ngu nzila ya yinene, mwendo no bhonga-bhonga? Ngu kutxani ni txi ningela txivhuno? Ina ni ningela txivhuno ngu ku ni nga henya, mwendo nguko ni lavako ku mvhuna?’

14. Jesu a kombisile kutxani ti to wa khatala ngu vamwani?

¹⁴ Jesu hi nga a txo ziva ati i ku tatinene dwe, kambe a txi tshumela e ti maha. Mbimo yotshe a txi maha ta tinene ngu txikongomelo txa txinene. M’thu wu a khatalako ngu vamwani mbimo yotshe a lava tinzila to va vhuna ni kumaha ati ti no va wuyelisa. Kha ta enela kuziva ati i ku ta tinene ni kutimaha dwe, kambe hi fanete kutimaha ngu txikongomelo txa txinene. Se ti nga maha hi ti wotisa tiya: ‘Ina ti nga koteka kumaha ati ku tatinene ngu txikongomelo txa walo?’ Ina! Ngu txikombiso, Jesu a womba-wombile ngu vale va nga txi ningela sihiwa ka sisiwana, kambe va txi tshumela ve peka mpundo. Hambiku toneto va nga txi ti maha hi ngati ta tinene, Jehovha a si ti tsakeli nguko va txi ti maha ngu txikongomelo txa walo.—Mat. 6:1-4.

15. Hi nga kombisisa kutxani ti to ngu ditshuri ha khatala ngu vamwani?

¹⁵ Hi nga kombisa ti to ngu ditshuri ha khatala ngu vamwani, ngako hi txi kombisa wunene wathu ngu txikongomelo txa txinene. Hi fanete ku ti mahela siwotiso siya: ‘Ngako ni txi tiziva ta tinene ti ni fanelo kutimaha, ina na gwitisa kutimaha kani? Ngu tihi ti ni susumetelako kumaha timhaka ta tinene?’

16. Ngu tihi ati hi fanelako ku timaha ditshiku ni ditshiku?

¹⁶ Kha ha fanela kupimisa ti to mthumo wo ambala m’thu wamphya wu gwita msana ko va hi di bhabhatisilwe dwe. Hi fanete kusimama hi tshurisela m’thu wuya wamphya hi nga mu ambala. Hi nga maha toneto ngu ku ditshiku ni ditshiku hi lava tinzila to tshurisa m’thu wuwa wamphya. Ngu txani? Nguko Jehovha Njizimu atxi txi ti kombisako ngu mithumo ya txona ya yinene, ni ku moya wakwe wo sawuleka wa ninga mtamo. (Gen. 1:2) Se otshe mahanyelo ma tiswako ngu moya wo sawuleka ma fanete ku hi susumetela ku hi maha txo kari. Ngu txikombiso, mgondiswa Jakobe a bhate tiya: “Likholo li fite ngako li si nga ni mithumo.” (Jak. 2:26) Ti ngu ha kufanako ni mahanyelo mamwani aya ma tiswako ngu moya wo sawuleka, ma fanete ku hi susumetela kumaha to kari. Se dikhambi dimwani ni dimwani hi kombisako mahanyelo a moya wo sawuleka, hi ti veka hakubasani ti to moya wa Txizimu wa thuma kwathu.

17. Hi fanete kumaha txani ngako hi txi thuka hi tandeka kukombisa mihando ya moya?

¹⁷ Hambi Makristu aya se i ku kale ma di bhabhatisilwe mbimo yimwani, ma nga thuka me tandeka kukombisa mihando ya moya. Kambe khumbula ti to ta lisima ngu kwa mbi rereka. Alakanyisisa ngu txikombiso txiya, ngako u txi vharula txiambalo txako txa lisima ngutu, ina awe wa tekela ku txi tshotsha? Ahim-him! Awe u nga maha totshe ti to u txi rungeta ngako ti txi koteka. Se kukhukhela koneho u na ti wonela ti to u si txi vharuli. Ngu ha kufanako, ngako u txi thuka u tandeka kukombisa lirando, kutimisela mwendo wunene ka vamwani u nga gumi mtamo. U nga kombela divalelo kasi kululamisa txikarato, u nga womba-womba ni mwanathu eneyo kasi kumaha kudikha. Kukhukhela koneho tiemisela kutshukwatisa mamahelo ako.

18. Nji txani txi nga hi vhunako kuambala m’thu wamphya?

¹⁸ Ha bonga ngutu kuva ni txikombiso txa Jesu ti to hi txi londisa. Ngako hi txi tekelela mapimiselo ni mamahelo a Jesu, ti na hi hehukela kuhanya ngu nzila yo kombisa ti to ha mu eteta. Ngako hi txi maha mizamo yo mu tekelela hi na va hi txi ambala kwati m’thu wamphya. Ka gondo yiya hi to wona basi mune wa mahanyelo aya ma tiswako ngu moya wo sawuleka wa Txizimu. Se ti ngo txani u gonda ngu mahanyelo mamwani aya ma tiswako ngu moya wo sawuleka wa Txizimu, ni kutshumela u wona amu u nga tshukwatisako kona? Ka “Guia de Pesquisa para Testemunhas de Jeová” u na maha lista ya timhaka yi womba-wombako ngu mhaka yiya. Bela aha ku: “Vida cristã” u ya aha ku ku “Fruto do espírito.” Ngako u txi maha totshe ati u ti kotako, tsaniseka ti to Jehovha a na kuvhuna kuambala m’thu wamphya ni kutshumela u mu xayisa.