Ngako u txi lera matimu yawa ngu txi kuluveta u nga ti maha txiwotiso txonetxo. Kambe, kuwomba ditshuri i si nga Mefibhosete wa mmweyo a nga ti tiho, kambe hi nga gonda txo kari ngako hi txi xolisisa kwati.

Mkoma wa Israyeli Sawule a ti ni 7 wa vanana ni mahorana mambidi. Matiwula wakwe i ti Jonathani. Ngu kutsimbila ka mbimo Mkoma Sawule a velekile mwanana wa dijaha a nga ti rayilwe ku i Mefibhosete. Kuveti Jonathani nene a ti ni mwanana wa dijaha a nga ti dhanwa ku i Mefibhosete. Se hi nga womba ti to Mkoma Sawule a ti ni mwanana ni mtukulo va nga ti dhanwa ku i Mefibhosete.

Ku vile ni mbimo Mkoma Sawule a nga sunga makungo o ya lwisa Vagibheyoni ava va nga ti hanya hagari ka Vaisrayeli ngu txikongomelo txo va fuvisa. Ti woneka nga kudatwe vo tala. Eto ti di bihile ngutu. Ngu kutxani? Ka mbimo ya Joxuwa tinduna ta Israyeli ti ti mahile txitumelelano txa kudikha ni va ka Gibheyoni.—Jox. 9:3-27.

Txitumelelano txonetxo txi txi ngadi txi txi thuma. Hahanze ko tsimbitisana ni txitumelelano txa kudikha ene a txi lava ku va fuvisa. Ngu toneto, Jehovha a txi wona nyumba ya Sawule i di ya “wudayi.” (2 Sam. 21:1) Mbimo yi Dhavhidha a nga va Mkoma, Vagibheyoni va womba-wombile ni Dhavhidha mayelano ni wubihi awu Sawule a nga ti mahile. Se Dhavhidha a to va wotisa ti to ku nga mahwa txani ti to ditiko di basiswa ka mnoha wonewo wu nga theketwa kasi ku Jehovha e katekisa ditiko. Hahanze ko kombela male ya mterulo, vona va kombete ti to 7 wa vanana va wamwamna wule a nga maha ‘makungo o va fuvisa’ ti to ni vona ve ta tsayiswa ngu kudawa. (Mit. 35:30, 31) Dhavhidha a tumete txikombelo txawe.—2 Sam. 21:2-6.

Ka mbimo yoneyo Sawule ni Jonathani va ti fite, kambe mwanana wa Jonathani Mefibhosete a txi hanya. Ene i ti txilima kukhukhela wuwananani kwakwe, se ti ha kubasani ti to ene kha pateka ka mhaka yiya yo lava kufuvisa Vagibheyoni. Dhavhidha a ti mahile txitumelelano ni Jonathani kumweko ni va nyumbani kwakwe kupata ni Mefibhosete mwana Jonathani. (1 Sam. 18:1; 20:42) Bhiblia yi womba ti to: “Mfumeli [Dhavhidha] a to felela Mefibhosete mwana Jonatani, mwana Sawule, ngu mhaka ya txixambanyo txa MKOMA.”—2 Sam. 21:7.

Hambiketo, Dhavhidha a mahile ati Vagibheyoni va nga ti ti kombete. Ene a ningete vanana vambidi va Sawule mmweyo wawe a ti dhanwa ku hi Mefibhosete kumweko ni 5 wa vatukulo va Sawule. (2 Sam. 21:8, 9) Atiya ti mahile ti to ditiko di thuseka ka mnando wa mnoha.

Ayawa hi nga matimu dwe. Hi nga gonda to kari ka mhaka yiya. Khumbula ti to Jehovha a ti ningile vathu vakwe txirumo txiya: “Vanana kha va na kudawa ngu mhaka ya vaveleki.” (Dhewut. 24:16) Jehovha a sa tumelela ti to kudawa vavamna vale va 7 i di ku va si na mnando. Jehovha a tshumete e womba tiya ka mlayo: “M’thu ni m’thu a na dawa ngu mhaka ya txionho txakwe ene nyamne.” Se ti woneka nga vavamna vale va 7 va nga tsayiswa ngu lifo va patekile ko makungo yale o fuvisa Vagibheyoni. Kota wuyela va hakete sionho sawe.

Matimu yawa ma hi gondisa ti to m’thu e nge sikoti ku tiemelela ngu wubihi awu a wu mahako a txi pimisa ti to ene kha zivi txilo, ene to maha ti a nga rumwa basi. Bhiblia yi khene: “Xayisisa nzila ya mikondo yako, ni totshe tinzila tako ti na mahe to longoloka kha kwati!”—Mav. 4:24-27; Vaef. 5:15.