MUWONELELI—WA GONDO Maio wa 2020
Direvhista diya di ni misungo ya timhaka ti ti no gondwa kukhukhela ngu 6 ka Julho kala 2 ka Agosto wa 2020.
I mani “mfumeli wa Wuphemba” ka masiku awa o gwita
Gondo 19: 6-12 ka Julho wa 2020. Konkuwa ha kuwona kuhetiseka ka wuprofeti wa Dhaniyeli mayelano ni “mfumeli wa Wuphemba” ni “mfumeli wa Wulambwe.” Hi ti zivisa kutxani? Ni ku ngu kutxani ti txi lava hi ziva to tala mayelano ni wuprofeti wuwa?
Vafumeli ava va lwisanako ka masiku a magwito
Wuprofeti wa “mfumeli wa Wuphemba” ni “mfumeli wa Wulambwe” wu tsimbitisana ni wuprofeti wumwani. Wuprofeti wonewo wu ti kombisisa kutxani ti to mafu awa ma na pinda i si nga kale?
I mani wu i ku “mfumeli wa Wuphemba” konkuwa?
Gondo 20: 13-19 ka Julho wa 2020. I mani wu i ku “mfumeli wa Wuphemba” konkuwa? A na gwitelwa ngu nzila muni? Kuziva tixamulo ta siwotiso siya ti na tsanisa likholo lathu ni ku hi lulamisela ku ta wonisana ni xanisa ya hombe ayi yi no khata i si nga kale.
Bonga sihiwa si Txizimu txi nga hi ninga!
Gondo 21: 20-26 ka Julho wa 2020. Gondo yiya yi na vhuna kuziva kubonga Jehovha ni sihiwa siraru asi a nga hi ninga. Yi na tshumela hi vhuna kukota kubhulisana ni va va lambako to Txizimu txiho.
Tsakela tithomba ti ti si wonwiko ngu maso
Gondo 22: 27 ka Julho kala 2 ka Agosto wa 2020. Ka msungo wu wu nga pinda, hi bhute ngu tithomba ati Jehovha a nga hi ninga ati hi ti wonako ngu maso. Ka wuwa hi na bhula ngu tithomba ati ti si yi woniko ngu maso ni tinzila to kombisa kubonga thomba yoneyo. Eto ti na tshumela ti kulisa kubonga kwathu Jehovha Txizimu i ku txisima txa tithomba toneto.
