1. Jesu a ti khene txani ngu kusengeleta tithomba?

HI NGA yotshe thomba hi nga kotako ku yi wona ngu maso. Thomba ya lisima ngutu ngu yi hi si yi woniko. Ka Gondo ya Mmangoni, Jesu a womba-wombile ngu kusengeleta thomba nzumani ayi i ku ya lisima ngutu kupinda tithomba ta ha mafuni. A tshumete a txi khene: “Ahawa yi ku kona thomba yako, ni mbilu yako yi na va konaho.” (Mat. 6:19-21) Ngako hi txi wona silo so kari i di sa lisima mbilu yathu yi na va ka silo soneso. Hi nga ‘sengeleta thomba nzumani’ ngu ku ti lavela nduma ya yinene masoni ka Jehovha. Jesu a wombile ti to thomba yoneyo kha yi na mbi bhirela mwendo kupiwa.

2. a) Ngu kuya ngu 2 Vakorinto 4:17, 18, mpostoli Paulo a hi kuzetile ku hi va ni mhaka ni txani? b) Hi na bhula ngu txani ka msungo wuwa?

² Mpostoli Paulo a hi kuzetile ku hi va “ni mhaka ni si si si wonekiko.” (Lera 2 Vakorinto 4:17, 18.) Thomba yi yi si wonekiko yi pata sotshe silo asi Jehovha a no ta hi ninga ka mafu a maphya. Ka msungo wuwa hi na bhula ngu mune wa tithomba ati ti si wonekiko ati hi ti dilako ngu tona konkuwa, i ku wungana wathu ni Jehovha, ningo ya mkombelo, moya wo sawuleka ni txivhuno atxi Jehovha ni Jesu kumweko ni tingelozi va hi ningako hi di kutxhumayelani. Hi na tshumela hi wona to hi nga kombisisa kutxani kubonga tithomba yoneyo.

3. Ngu yihi thomba ya lisima ngutu yi hi ku nayo? Ti kotekisa kutxani?

³ Wungana wathu ni Jehovha, i thomba ya lisima ngutu. (Mas. 25:14) Aku Jehovha a nga sawuleka, ti kotikisa kutxani  ti to e maha wungana ni vathu ava va ku ni sionho? Eto ta koteka nguko mtirulo wa digandelo da Jesu wu ‘kuwute sionho sa ditiko.’ (Joh. 1:29) Jehovha a ti ti ziva nem Jesu a si se ta ti to makungo akwe o khulula vathu ma na humelela. Ngu toneto, ku ve ni vathu ava va nga va vangana va Jehovha nem Jesu a si se ta.—Var. 3:25.

4. Mba mani ava va nga va vangana va Jehovha ava va nga hanya Jesu a si se ta?

⁴ He bhule ngu vangana va Txizimu ava va nga hanya Jesu a si se ta. Abrahamu a kombisile likholo la hombe ngutu. Ku di pindile 1.000 wa malembe a di fite, Jehovha a wombile a txi khene: Abrahamu “mngana wangu.” (Isaya 41:8) U ti woni to hambi lifo kha la si kota kuhambanisa wungana wakwe ni Jehovha. Ka mialakanyo ya Jehovha, Abrahamu wa hanya. (Luka 20:37, 38) Txikombiso tximwani nja Jobe. Ditshiku dimwani tingelozi ti di ka mtshangano nzumani, Jehovha a ndunduzete Jobe. Jehovha a ti khene Jobe, ‘mbwa mmwamna wa ditshuri, ni kululama, wo thava Txizimu, wo vayilela to biha.’ (Jobe 1:6-8) Jehovha a ti khene txani ngu Dhaniyeli awu a nga hanya 80 wa malembe ka ditiko di vathu va kona va nga ti si thumeli Txizimu? A getwe ngu ngelozi makhambi mararu ti to mbwo “randeka ngutu” ka Txizimu. (Dhan. 9:23; 10:11, 19) Hi nga tsaniseka ti to Jehovha a rinzete ngu o bhilivila ditshiku di a no ta wusa vangana vakwe ka va kufa.—Jobe 14:15.

5. Ku laveka txani ti to hi tidila ngu wungana ni Jehovha?

⁵ Ku ni timiliyoni ta vathu va kwa mbi hetiseka ava va ti dilako ngu wungana ni Jehovha. Eto ha tiziva nguko vavamna vo tala, vavasikati, ni vanana ha mafuni kotshe va kombisa ngu mahanyelo awe to va ti lava kuva vangana va Jehovha. Phela “txihunja txakwe txi ni va vo lulama.” (Mav. 3:32) Ti to hi va vangana va Jehovha ti lava hi va ni likholo ka mtirulo wa digandelo da Jesu. Wona wu maha ti koteka ku hi ti ningetela ka Jehovha ni kubhabhatiswa. Ngako hi txi teka mazambo awa, hi tipata ni timiliyoni ta Makristu aya ma nga ti ningetela ka Jehovha ni kubhabhatiswa aya ma ti dilako ngu wungana ni Jehovha, i ku Mngana wa hombe ngutu kupala votshe ha mafuni ni nzumani!

6. Hi nga kombisisa kutxani ti to ha ninga lisima wungana wathu ni Jehovha?

⁶ Hi nga kombisisa kutxani ti to ha ninga lisima wuxaka wathu ni Jehovha? Kufana ni Abrahamu ni Jobe va nga simama va di thembekile malembe o tala, nathu hi nga simama hi di thembekile ku si na mhaka ni ti to hi ni malembe mangahi hi txi thumela Jehovha ka mafu awa o biha. Kufana ni Dhaniyeli, hi fanete kuteka wungana wathu ni Jehovha i di wa lisima ngutu kupinda wutomi wathu. (Dhan. 6:7, 10, 16, 22) Ngu kuvhunwa ngu Jehovha hi nga tsanisela txikatarato txihi ni txihi hi simama hi di vangana va vakwe.—Vaf. 4:13.

7. a) Ngu kuya ngu Mavingu 15:8 Jehovha a ti pfisa kutxani ngu mikombelo yathu? b) Jehovha a xamulisa kutxani mikombelo yathu?

⁷ Thomba yimwani yi hi si yi woniko ngu maso i mkombelo. Ava i ku vangana va hombe va tidhunda kubhula ve gelana ta mbiluni. Ina ta koteka kumaha ti ti fananko ni mngana wathu Jehovha? Ina ta koteka! Jehovha a womba-womba ni nathu ngu kuthumisa Bhiblia, se wa hi gela ati a tipimisako ni ti a tipfisako tona. Nathu hi nga bhula nayo ngu mkombelo hi mu gela ta mbiluni kwathu ni matipfelo athu. Jehovha wa titsakela kuengisela mikombelo yathu. (Lera Mavingu 15:8.) Kota ku i ku Mngana wa lirando Jehovha kha engiseli mikombelo yathu dwe kambe  wa tshumela e hi xamula. Mbimo yimwani hi mana xamulo ya mikombelo yathu ngu txikuluveta. Kambe mbimo yimwani ti lava hi simama hi kombela. Hambi ti di ngeto, hi nga tsaniseka ti to ene a na xamula mikombelo yathu ngu mbimo ni ngu nzila ya yinene. Ditshuri ti to Jehovha a nga xamula mikombelo yathu ngu nzila yi hi nga mbi yi emela. Ngu txikombiso, hahanze ko thavisa txiduko, ene a nga hi ninga wutxhari ni mtamo wo “txi rwala.”—1 Vak. 10:13.

8. Hi nga kombisisa kutxani kubonga txihiwa txa mkombelo?

⁸ Hi nga kombisisa kutxani kubonga txihiwa txiya txa mkombelo? Yimweyo ya tinzila ngu engisa txialakanyiso txa Jehovha txo ‘khongela hi si karali.’ (1 Vat. 5:17) Jehovha kha hi sinzisi kumaha mkombelo. Hahanze keto, ene wa xonipha mkhululeko wathu ni ku hi kuzeta ku hi “simama kukhongelani.” (Var. 12:12) Se hi nga kombisa kubonga kwathu mkombelo ngu kukhongela makhambi o tala ditshiku ni ditshiku. Ka mikombelo yathu kha ha fanela kudivala kubonga ni kudhumisa Jehovha.—Mas. 145:2, 3.

9. Mwanathu Chris a ti pfisa kutxani ngu mkombelo? Awe ko u ti pfisa kutxani?

⁹ Ka malembe ya hi ma hetako hi txi thumela Jehovha, hi na wona tinzila to tala ati Jehovha a xamulako ngu tona mikombelo yathu. Eto ti na hi vhuna kubonga ngutu txihiwa txiya txa mkombelo. Wona txikombiso txa mwanathu Chris, awu aku ni 47 wa malembe a di ka mthumo wa mbimo yotshe. Ene a khene: “Nipfa ni matshanza kuwuka ni mixo ni ti ninga mbimo yo maha mkombelo ka Jehovha. Ta tsakisa kubhula ni Jehovha mbimo yi kuhumako masani. Eto ti ni maha ni bonga Jehovha ngu sotshe sihiwa asi a nga hi ninga, kupata ni mkombelo. Ni txi gwita kumaha mkombelo ni wusiku ni tsula ni ya otela ni di ni livhalo lo basa.”

10. Ngu kutxani hi di fanete kuninga lisima moya wo sawuleka?

¹⁰ Moya wo sawuleka i ku mtamo wa Txizimu,  i ningo yimwani ayi ti si kotekiko ku yi wona ayi hi fanelako ku yi ninga lisima. Jesu a hi kuzetile kusimama hi kom bela moya wo sawuleka. (Luka 11:9, 13) Jehovha wa hi ninga “mtamo . . . wa hombe” ngu kuthumisa moya wo sawuleka. (2 Vak. 4:7; Mith. 1:8) Ngu kuvhunwa ngu moya wo sawuleka hi nga timisela txikarato txihi ni txihi txi hi nga mananako natxo.

11. Moya wo sawuleka wu nga hi vhunisa kutxani?

¹¹ Moya wo sawuleka wu nga hi vhuna hi kota kuhetisisa txiavelo ka mthumo wa Jehovha. Wu nga hi vhuna hi tshukwatisa wusikoti wathu. Wa hi vhuna hi hetisisa mthumo wathu wa Wukristu. Mbimo yi hi humelelako ka mthumo wathu, ha tiziva ti to kha ha sikota ngu wusikoti wathu, hi to vhunwa ngu moya wo sawuleka.

12. Nga ha ti nga kombiswa ka Masalmo 139:23, 24, hi nga kombela moya wo sawuleka ti to wu hi vhuna kumaha txani?

¹² Nzila yimwani yo kombisa to ha ninga lisima moya wo sawuleka, ngu kombela ti to wu hi vhuna hi ziva aha hi ku ni txikarato ni kuziva minavelo ya mbilu yathu. (Lera Masalmo 139:23, 24.) Hi txi maha mkombelo wonewo Jehovha a na hi vhuna hi hi tumbula to hi ni minavelo mwendo mialakanyo ya walo. Se mbimo yi hi tumbulako ti to hi ni minavelo ni mialakanyo yoneyo ya walo, hi fanete kukombela Jehovha e hi vhuna hi yi xula. Hi txi maha toneto hi na kombisa ti to hi tiemisete kuvayilela ati ti nga mahako Jehovha e hi tona moya wakwe wo sawuleka.—Vaef. 4:30.

13. Hi nga kombisisa kutxani ti to ha ninga lisima la hombe moya wo sawuleka?

¹³ Hi nga kombisa kubonga ningo yiya ya moya wo sawuleka ngu kualakanyisisa ngu ti wu ti hetisisako ka masiku a ngweno. Na Jesu a si se ya nzumani a gete tiya vagondiswa vakwe: “Mi na amukela mtamo wa Moya wo Sawuleka, wu no txhika txitimwi kwanu, se mi na va mi di tifakazi tangu . . . kala magemeta-mitshi ka ditiko.” (Mith. 1:8) Mapwsi yawa ma hetiseka ngu nzila yo xamalisa nyamsi. Ngu kuvhunwa ngu moya wo sawuleka, ku ni 8.5 wa timiliyoni ta vathu ava  va khozelako Jehovha ha mafuni kotshe. Hi tshumela hi tidila ngu paradhise ya moya nguko moya wo sawuleka wu hi vhunako hi sakulela tifanelo ta tinene to fana ni lirando, litsako, kudikha, kutimisela, wunene, kutshambisa, likholo, kuthutha ni ku tiñola. Tifanelo tiya “mihando ya Moya” wo sawuleka. (Gal. 5:22, 23) Ngu ditshuri moya wo sawuleka txihiwa txa lisima!

14. Ngu txihi txivhuno atxi hi si txi woniko ngu maso atxi hi txi manako hi di kutxhumayelani?

¹⁴ Ku va “vavhuneteli” va Jehovha, ni sengeletano yakwe ya nzumani, i thomba yi hi si yi woniko ngu maso. (2 Vak. 6:1) Hi maha toneto mbimo yi hi ku ka mthumo wo txhumayela. Paulo a ti khene ene ni Makristu kulowe, mba “vavhuneteli va Txizimu.” (1 Vak. 3:9) Mbimo yi hi ku ka mthumo wo txhumayela hi tshumela hi va vavhuneteli va Jesu. Mbimo yi Jesu a nga gela valondeteli vakwe ku khene: “Tsulani mi txi ya phindula vamatiko votshe ve maha vagondiswa vangu,” a gwitile a txi khene: “Ni ni nanu.” (Mat. 28:19, 20) Ina tingelozi ni tona ta hi vhuna? Phela hi mana makatekwa o kongomiswa ngu tona mbimo yi hi txhumayelako “evhangeli yo mbi na makhato ni magwito, . . . ka vaaki va ha mafuni.”—Mtu. 14:6.

15. Ngu txihi txikombiso txa mu ka Bhiblia atxi txi kombako ti to Jehovha ngene a ndindako vathu?

¹⁵ Ngu tihi hi ti kotako ku ti hokelela ngu kuvhunwa ngu Jehovha ni Jesu kumweko ni tingelozi? Mbimo yi hi phayako mbewu ya Mfumo, timbewu timwani ta wela ka timbilu ta tinene se ti kula. (Mat. 13:18, 23) I mani a mahako ti to timbewu ti kula ni kuveleka mihando? Jesu a wombile ti to a walo wu a nga vako mlondiseli wakwe “ngako a sa dhanwa ngu Tate.” (Joh. 6:44) Bhiblia yi ni sikombiso sa mhaka yiya. Dikhambi dimwani Paulo a txhumayete vavasikati vo kari hafuhi ni didhoropa da Filipiya. Wona ati ti nga maheka ngu mmweyo wa vona awu a dhanwako ku i Lidhiya, Bhiblia yi womba tiya: “Mkoma a to tula mbilu yakwe, kasiku e engisa mapswi awa Paulo a nga ti womba-womba ona.” (Mith. 16:13-15) Kufana ni Lidhiya, timiliyoni ta vathu va tumela ditshuri ngu kudhanwa ngu Jehovha.

16. I mani wu a fanelwako kudhumiswa mbimo yi hi manako mihando ka mthumo wo txhumayela?

¹⁶ I mani wu a mahako ti to hi mana mihando ka mthumo wo txhumayela? Xamulo hi yi mana ka mapswi ya Paulo a nga womba mayelano ni dibanza da Korinto. Ene a wombile tiya: “Ani ni phayile, Apolosi a si theletete mati, aniko Txizimu ngu txona txi nga si kulisa. Ngu konaho, hambi wu a phayako, hambi wu a theletelako mati hi nga txilo. Txizimu ngu txona txi si kulisako.” (1 Vak. 3:6, 7) Kufana ni Paulo mbimo yotshe hi fanete kudhumisa Jehovha mbimo yi hi humelelako ka mthumo wo txhumayela.

17. Hi nga kombisisa kutxani kubonga lungelo yo va “vavhuneteli” va Jehovha ni Jesu kumweko ni tingelozi?

¹⁷ Hi nga kombisisa kutxani kubonga lungelo yi hi ku nayo yo va “vavhuneteli” va Jehovha ni Jesu kumweko ni tingelozi? Hi nga kombisa kubonga ngu kuhisekela kutxhumayela mahungu a manene. Hi maha toneto ngu tinzila to hambana-hambana, to fana ni kutxhumayela ‘masoni ka vathu ni tinyumbani kwawe.’ (Mith. 20:20) Vanathu vo tala va ti dhunda kutxhumayela ngu txitshuketi. Va txi manana ni vathu va va losa ni kuduketa kukhata mabhulo ngu nzila ya txingana. Ngako m’thu a txi tsakela kubhula, va mu txhumayela.

18-19. a) Hi nga theletelisa kutxani timbewu ta Mfumo? b) Jehovha a mu vhunisile kutxani mwanathu Raphalalani?

 ¹⁸ Kota “vavhuneteli va Txizimu” kha ha fanela kugwitela ko phaya mbewu basi kambe hi fanete kutheletela. Ngako m’thu a di kombisile kutsakela hi fanete kutshumela hi mu endela, mwendo kukombela mmwani ti to e mu endela ngu txikongomelo txo khata gondo. Mbimo yi gondo yi yako masoni ha tsaka ngu kuwona nzila yi Jehovha a vhunako ngu yona m’thu e txitxa dihanyo dakwe ti to e va m’gondiswa.

¹⁹ Wona txikombiso txa Raphalalani wa Joni a wu i nga ti ñanga. Ene a khatile kugonda Bhiblia e tshumela e tsakela ti a nga ti ti gonda. Kambe a vite ni txikarato mbimo yi a nga ziva ati Bhiblia yi ti wombako mayelano ni kuwomba-womba ni vafi. (Dhewut. 18:10-12) Kambe kudotho-kudotho a tumelete Bhiblia yi txitxa wutomi wakwe. Ene a zile e ti kota kuleka wuñanga hambiku i nga ti wonewo dwe mthumo wu a nga ti maha. Konkuwa Raphalalani a ni 60 wa malembe, ene a womba tiya: “Na tibonga ngutu Tifakazi ta Jehovha ngu ku ti nga ni vhuna ngu tinzila to hambana-hambana to fana ni ku ni vhuna ni mana mthumo. Kambe ni bonga ngutu Jehovha ngu ku a nga ni vhuna ni txitxa wutomi wangu. Konkuwa se ni Fakazi ya Jehovha.”

20. U ti emisete kumaha txani?

²⁰ Ka msungo wuwa hi bhute ngu mune wa tithomba ati hi si ti woniko ngu maso. Ka totshe, ya lisima ngutu ngu va mngana wa Jehovha. Yona yi maha ti to hi mana tithomba timwani to fana ni kutshuketa kwakwe ngu mkombelo, kumana txivhuno txa moya wakwe wo sawuleka ni kumana txivhuno txo ta ngu nzumani hi di kutxhumayelani. Ti lava hi simama hi kombisa kubonga tithomba tiya hi si ti woniko ngu maso. He simameni hi bonga Jehovha mbimo yotshe ngu kuva i di Mngana wathu wa hombe.