Wuprofeti awu wu ku ka grafiko yiya wu kombisa simahakalo si humelelako ngu mbimo yimweyo. Wotshe wu kombisa to hi ka “mbimo yo gwita.”—Dhan. 12:4.

• Mibhalo Mtu. 11:7; 12:13, 17; 13:1-8, 12

  Wuprofeti “Txikalani” txi fuma vathu ha mafuni kudingana mazana a malembe. Ka masiku a magwito, msungo wa wu 7 wu dawiswa. Ngu msana, msungo wu hanya se “dotshe ditiko” di londisela txikalani. Sathani e thumisa txikalani ti to e “lwa ni va va nga ti sate.”

  Kuhetiseka Msana ka ndambi ya Nowa, kukhatile mifumo ya vathu ayi yi lwisanako ni Jehovha. Ku di gumile malembe o tala, ku va ni Yimbi yo Khata ya Mafu, ka yimbi yoneyo mfumo wa Grã-Bretanha wu guma mtamo, kambe wu tshumela wu tsana mbimo yi wu nga patana ni Estados Unidos. Sathani a thumisa politika ti to e xanisa vathu va Txizimu, ngutu-ngutu ka masiku a magwito.

• Mibhalo Dhan. 11:25-45

  Wuprofeti Ngu mbimo ya masiku a magwito, mfumeli wa Wuphemba ni mfumeli wa Wulambwe ve lwa ngu mhaka ya wukoma.

  Kuhetiseka Jarmani ni Anglo Americano ve lwa ngu mhaka ya wukoma. Ngu 1945 União Soviética e va mfumeli wa Wuphemba. Ngu 1991, União Soviética e wa, se ku di pindile mbimo, Rússia ni va va emako nayo ve va mfumeli wa Wuphemba.

• Mibhalo Isaya 61:1; Mal. 3:1; Luka 4:18

  Wuprofeti Jehovha e rumela mtumi ti to wu ‘lulamisa nzila’ na Mfumo wa Mesiya wu si se simekwa. Mtxawa wonewo wu khata “kutxhumayela mahungu a manene.”

  Kuhetiseka Kukhukhela ngu 1870 kuya masoni, Charles Russel ni vamwani ve khata kugonda Bhiblia ti to ve wona ati yi ti gondisako. Se ngu ma 1880 ve kombisa to malanda a Txizimu ma fanete me txhumayela. Va humisile misungo ya timhaka yo fana ni wu wu ku: “Kulaveka 1.000” ni “Ve sawulelwa kutxhumayela.”

• Mibhalo Mat. 13:24-30, 36-43

  Wuprofeti Mlala e phaya nyasavari ka thembwe ya vani ya fulaho. Nyamne e leka nyasavari e kula e vhalela fulaho kala ka mbimo yo elula. Mbimo yi kuelulwako, nyasavari e hambaniswa ni fulaho.

  Kuhetiseka Kukhukhela ngu 1870, kukhata kuketikela kuhambana ka Makristu a ditshuri ni a makuhu. Ka mbimo ya magwito, Makristu a ditshuri me sengeletwa ni kuhambaniswa ni Makristu a makuhu.

• Mibhalo Dhan. 2:31-33, 41-43

  Wuprofeti Minenge ya simbi ni ndope nja txithombe txo mahwa ngu tisimbi to hambana-hambana.

  Kuhetiseka Ndope, ngu va va fumwako ngu Wukoma wa mafu wa Anglo-Americano ava va wu wukelako. Vona va dekadekisa wukoma wuwa, hambiku i ku simbi.

• Mibhalo Mat. 13:30; 24:14, 45; 28:19, 20

  Wuprofeti “Fulaho” yi sengeletwa “txisangalani” se ‘txithumi txo thembeka na txi di ni wutxhari’ txi vekwa kasi kuninga sakudya “sithumi” sa Jesu. Mthumo wo txhumayela “mahungu a manene a Mfumo” wu hangalaka ka “dotshe ditiko.”

  Kuhetiseka Ngu 1919 txithumi txo thembeka txi vekwa ti to txi dyisa vathu va Txizimu. Kukhukhela ka mbimo yoneyo, Vagondi va Bhiblia va hisekela mthumo wo txhumayela. Nyamsi, Tifakazi ta Jehovha ti txhumayela ka matiko ya ma pindako 200 ni kuhumisa mabhuku ya ma nga seketelwa ka Bhiblia ngu tidimi ti ti pindako 1.000.

• Mibhalo Dhan. 12:11; Mtu. 13:11, 14, 15

  Wuprofeti Txikalani txa titxheho timbidi txi kuzeta vathu va va hanyako ha mafuni kumaha “txithombe txa txikalani.” Txi gwita txi “wuleta moya mndani ka txithombe.”

  Kuhetiseka Wukoma wa mafu wa Anglo-Americano wu thangela ku txi wumbwa Liga das Nações. Mtshangano wuwa wu seketelwa ngu matiko mamwani. Mfumeli wa Wuphemba a ti patile ni mtshangano wawu ngu 1926 kala 1933 basi. Vathu va ti themba ti to Liga das Nações a ndi na tisa kudikha ha mafuni ve tshumela ve themba ni Nações Unidas, kambe o va Mfumo wa Txizimu dwe awu wu nga tisako kudikha.

• Mibhalo Dhan. 8:23, 24

  Wuprofeti Kuhumelela mfumeli wa khohe yo thisa e “haxula ngu kuxamalisa.”

  Kuhetiseka Wukoma wa mafu wa Anglo-Americano wu haxute ngutu. Ngu txikombiso, ngu mbimo ya Yimbi ya Wumbidi ya Mafu, Estados Unidos a rukutile ngutu mmweyo wa valala va Wukoma wa mafu wa Anglo-Americano mbimo yi a nga rinza mabhomba mambidi a hombe.

• Mibhalo Dhan. 11:31; Mtu. 17:3, 7-11

  Wuprofeti “Txikalani txo bhilivila” txa digumi da titxheho txi huma ngu diphalani ko hokoma ni ku txona i mkoma wa wu 8. Dibhuku da Dhaniyeli di womba ti to mkoma eneyo ‘njimaha txa kudhukisela ka hombe.’

  Kuhetiseka Ngu mbimo ya Yimbi ya Wumbidi ya Mafu, Liga das Nações a tsivate. Msana ka yimbi, Nações Unidas e ‘vekwa.’ Kufana ni Liga das Nações, Nações Unidas a thembisa kutisa kudhikha, kuve i Mfumo wa Txizimu dwe wu no ku tisa. Nações Unidas a na wukela wukhongeli.

• Mibhalo 1 Vat. 5:3; Mtu. 17:16

  Wuprofeti Matiko me huwelela “kudikha ni kukhaliseka,” ni ku “titxheho ti ta digumi” ni “txikalani,” si wukela “digelegele” ni ku di lovisa. Ngu magwito matiko me loviswa.

  Kuhetiseka Matiko ma na ti gela ku ma sikoti kutisa kudikha ni kukhaliseka ha mafuni. Se, matiko aya ma emako ni Nações Unidas ma na lovisa wukhongeli wa makuhu. Atiya ku na va makhato ya xanisa ya hombe. Magwito ka xanisa ya hombe ngu kuloviswa ka dotshe ditiko da Sathani ngu Armagedhoni.

• Mibhalo Eze. 38:11, 14-17; Mat. 24:31

  Wuprofeti Goge e wukela vathu va Txizimu. Se tingelozi ti sengeleta “vasawuleki vakwe.”

  Kuhetiseka Mfumeli wa Wuphemba kumweko ni vakoma vamwani va mafu va na wukela vathu va Txizimu. Neti ku khata vhuku-vhuku yoneyo, vasawuleki ava va no tava va di ngadi ha mafuni va na sengeletwa ve ya nzumani.

• Mibhalo Eze. 38:18-23; Dhan. 2:34, 35, 44, 45; Mtu. 6:2; 16:14, 16; 17:14; 19:20

  Wuprofeti “Mgadhi” wa “dihanxi do basa” e hetisa ‘kuxula’ kwakwe ngu kulovisa Goge ni mabutho akwe. “Txikalani” txi “to rinzwa” digovani ka mndilo se txithombe txi phwaraswa da magwito.

  Kuhetiseka Jesu Mkoma wa Mfumo wa Txizimu a na ta hulukisa vathu va Txizimu. Ene ni va va 144.000 ni tingelozi va na ta lovisa Goge ve fuvisa mafu yawa a Sathani.