1. Nji txani atxi Jehovha a hi tumelelako kumaha?

JEHOVHA wa hi tumelela ti to hi sawula ati hi ti lavako ka wutomi. Ene a hi gondisa kumaha sisungo sa sinene ni ku tshumela e hi vhuna to hi humelela ngako hi txi maha sisungo asi si mu tsakisako. (Mas. 119:173) Ngako hi txi thumisa wutxhari wu hi wu manako ka Bhiblia, hi na maha sisungo sa sinene.—Vaheb. 5:14.

2. Ngu txihi txikarato hi nga vako natxo ngako hi di mahile txisungo?

² Kambe hambi i di ti to hi mahile txisungo txa txinene hi tshumela hi khata kumaha ati hi nga sunga tona, ti nga thuka ti hi karatela ku ti heta. Wona sikombiso siya: Mphya mmwani a sunga kulera Bhiblia yotshe. Se e khata kulera, kambe msana ka mavhikinyana e ema. Mwanathu wa txisikati a sunga kuteka wunyaphandule, kambe wa kana-kana to a na khata ditshiku muni. Ngu wumwewo, mmidi wa madhota wu maha txisungo txo maha maendo a wudyisi, kambe kuguma mitxima yo tala va si se khata. Siemo siya sa hambana, kambe ku ni ha si fanako kona. Sona kha sa mahwa si hetwa. Dibanza da Korinto di ti ni txikarato txo fana. He bhule ngu ti hi nga ti gondako kwawe.

3. Ngu txihi txisungo a txi txi nga ti mahilwe ngu Vakorinto? Kambe ku humelete txani?

³ Kona mu ka dilembe da 55 E.C., dibanza da Korinto di mahile txisungo txa lisima. Va mani thenga yo vanawe va Jerusalema ni Judheya va txi xaniswa ngu vathu ni wusiwana, se mabanza mamwani ma ti maha misengo yo va vhuna. Ngu kususumetwa  ngu wunene ni wuha, Vakorinto va sungile kumaha miningelo ni vona, se va wotisile Paulo to va nga mahisa kutxani. Ene a va rumelete sileletelo sa kona e tshumela e rumela Tito kasi ku va vhuna. (1 Vak. 16:1; 2 Vak. 8:6) Ku di gumile mitximanyana, Paulo a getwe to Vakorinto va si se maha txilo. Ngu toneto, miningelo yawe yi ndi na va yi si se lunga ka mbimo yi yi nga ti fanete kutekwa kumweko ni ya mabanza mamwani kasi ku yi yiswa Jerusalema.—2 Vak. 9:4, 5.

4. Nga ha ti nga kombiswa ngu kona ka 2 Vakorinto 8:7, 10, 11, Paulo a kuzetile Vakorinto kumaha txani?

⁴ Vakorinto va ti mahile txisungo txa txinene, se Paulo a va ndunduzete ngu kuva ni likholo lo tsana ni ku va nga txi ti navela kuvhuna vamwani. Kambe a tshumete e va kuzeta ti to ve hetisisa ati va nga ti khatile kumaha. (Lera 2 Vakorinto 8:7, 10, 11.) Ati ti nga humelela Vakorinto ti hi gondisa ti to hambi Makristu o thembeka ma nga va natxo txikarato txo hetisisa ati ma nga ti khata.

5. Ngu sihi siwotiso asi hi no si xamula?

⁵ Kufana ni Vakorinto, ti nga maha ti hi karatela kumaha ati hi nga sunga. Ngu kutxani? Aku hi nga mbi hetiseka, ti nga maha hi txo thumela kuthindekisela. Mwendo hi nga thuka hi manwa ngu thanga ngani se hi si ti koti kuheta ati se hi nga khata kumaha. (Ekl. 9:11; Var. 7:18) Hi nga maha txani hi txi lava kuxolisisa sisungo sathu hi wona to mwendo hi nga txitxa to kari? Hi nga si kotisa kutxani kuheta ati se hi nga ti khata kumaha?

6. Ngu kutxani mbimo yimwani ti txi lava hi txitxa sisungo sathu?

⁶ Sisungo simwani hi nga sona so si txitxa. Ngu txikombiso, txisungo txo thumela Jehovha ni txa wukati, eso hi nge si txitxi. (Mat. 16:24; 19:6) Kambe simwani hi nga txitxa hi txi tilava. Ngu kutxani? Nguko siemo ni sona sa txitxa. Ngu tihi tinzila ati ti nga hi vhunako kutshukwatisa sisungo sathu?

7. Hi nga kombela txani ka Jehovha? Ngu kutxani?

⁷ Kombela wutxhari ka Jehovha. Mapswi a Jehovha ka dibhuku da Jakobe ngu awa: “Se ngako mmweyo wanu a txi pwata wutxhari a na wu kombele ka Txizimu, atxi txi ningako votshe vathu ngu wunene.” (Jak. 1:5) A walo wo mbi “pwata wutxhari.” Ngu toneto, kombela Jehovha e kuvhuna mbimo yi u mahako txisungo ni mbimo yi u lavako ku txi txitxa. Jehovha a na kuvhuna kumaha txisungo txa txinene.

8. Ngu wuhi wuxolisisi awu u nga wu mahako na u si se maha txisungo?

⁸ Maha wuxolisisi. Wona ati Bhiblia ni mabhuku a sengeletano ma ti wombako, u tshumela u kombela txivhuno ka vathu va u va thembako. (Mav. 20:18) Wuxolisisi wonewo mbwa lisima u txi lava kumaha txisungo txo txitxa mthumo, kurura mwendo kusawula tigondo ati ti no kuvhuna ku ti khatalela u txi thumela Jehovha.

9. Kuthembeka ku hi vhunisa kutxani?

⁹ Xolisisa txivangelo. Ka Jehovha eto nda lisima. (Mav. 16:2) Ene a lava hi thembeka ka totshe. Mbimo yi hi mahako sisungo, kha hi lavi ku tixenga hipuni mwendo kusisela vamwani minavelo yathu. Ngako hi txo mbi thembeka, ti nga thuka ti hi karatela kumaha ati hi nga sunga tona. Ngu txikombiso, mphya wo kari a nga sunga kuva nyaphandule wa mbimo yotshe. Hambi keto, msana ka mbimo yo kari, e khata kutandeka kueneta mawora aya ma lavekako e tshumela a si tsaki ngu mthumo wakwe. Ti nga maha a di alakanyile ti to ene  a vite nyaphandule ngu kulava kutsakisa Jehovha. Kambe, ngu ditshuri ti nga maha a txo lava kutsakisa vaveleki mwendo vamwani.

10. Nji txani txi nga vhunako m’thu ti to e maha kutxitxa ko kari?

¹⁰ Alakanya ngu m’thu wu a gondako Bhiblia awu a nga sunga kuleka kudhaha. Makhatoni a si koti kuzumba a si dhahi kudingana divhiki mwendo mambidi hambi ku ti nga txi karata. Kambe ngu magwito a so leka kudhaha. Lirando lakwe ngu Jehovha ni minavelo yakwe yo mu engisa ti mu vhunile kuleka kudhaha.—Vakl. 1:10; 3:23.

11. Ngu kutxani u di fanete kuva ni makungo o kongoma?

¹¹ Vana ni makungo o kongoma. Ngako makungo ako i di o kongoma, ti nga hehuka ku ma hetisisa. Ngu txikombiso, ti nga maha u ti ni makungo o lera ngutu Bhiblia. Kambe ngako u si nga ni txiemiso, ti nga kukaratela kumaha toneto. * Mwendo ti nga maha madhota ma ti sungile kumaha ngutu maendo a wudyisi, kambe ngu kutsimbila ka mbimo, va nga leka kumaha a ti va nga sunga. Kasi ku me hokelela makungo onewo, ma nga tiwotisa tiya: “Ina ku ni vanathu va hi nga va mahelako maendo a wudyisi? Ina se hi vekisile mbimo yo va endela?”

12. Ngu tihi ti hi nga thukako hi ti maha? Ngu kutxani?

¹² Tumela txiemo txako. Kha hi nga ni mbimo, male, mwendo mtamo wo maha totshe ti hi ti lavako. Se u fanete kutumela txiemo txako ni kudinganisela. Ngako ti txi sunga, u nga txitxa txisungo txako, atxi se u si txi kotiko ku txi hetisisa. (Ekl. 3:6) Se tiwoni u ti txitxile txisungo txako, u tshumela u alakanya ngu ti u nga ti mahako. Konku wona mtxhanu wa tinzila ati ti nga kuvhunako ku u si emi ati u nga khata ku ti maha.

13. Hi nga wu manisa kutxani mtamo wo hetisisa ati hi nga ti sunga?

¹³ Kombela mtamo wo ti maha. Txizimu txi nga hi maha hi ‘thuma’ ati hi nga ti sunga. (Vaf. 2:13) Se kombela moya wo sawuleka wa Jehovha ti to wu kuninga mtamo wu u wu lavako. Simama u khongela hambi ti txi woneka nga mikombelo yako kha yi xamulwi. Nga ha Jesu a nga womba atxi: “Kombelani [moya wo sawuleka], mi na ningwa.”—Luka 11:9, 13.

14. Ditshina da mlayo adi di ku ka Mavingu 21:5, di nga kuvhunisa kutxani kuhetisisa txisungo txako?

¹⁴ Maha txiemiso. (Lera Mavingu 21:5.) Kasi ku u hetisisa mthumo wu u nga wu khata, ti lava u maha txiemiso. Ngu msana u fanete kuthuma ngu kuya ngu txiemiso txonetxo. Ngu ha kufanako, ngako u ti mahile txisungo txo kari, bhaletela totshe ti u lavako ku ti maha kasi ku u hetisisa txisungo txako. Ngako u txo abanisa mithumo ya hombe ngu sigava, ti nga kuvhuna kuwona to mwendo wa hetisisa txisungo txako. Ngu txikombiso, Paulo a kuzetile Vakorinto ti to ve sengeleta misengo ya miningelo “ngu ditshiku do khata ka divhiki,” kasi ku va si mahe toneto se a di hokile. (1 Vak. 16:2) Ku abanisela mithumo ti na kumaha u si nemelelwi.

15. Msana ko maha txiemiso, u nga maha txani?

¹⁵ U txi bhala ati u lavako ku ti maha, ti nga kuhehukela ku ti hetisisa. (1 Vak. 14:40) Ngu txikombiso, madhota ma ningilwe mkongomiso wo me sawula didhota adi di no bhala sisungo asi mmidi wa madhota wu si mahako. Mwanathu eneyo, a tshumela e bhala awu a  no maha txienge txo kari ni mbimo yi txi fanelako ku hetisiswa ngu yona. Ngako madhota ma txi maha toneto, ma kota kumaha sisungo sa ona si thuma. (1 Vak. 9:26) Nawe u nga zama kumaha ti ti fanako ditshiku ni ditshiku. Ngu txikombiso, u nga bhala totshe ti u no timaha ditshiku donedo, u khukhela ka ti u no khata ngu tona kala ka ti u no ya gwitisa ngu tona. Eto kha ti nge kuvhuni basi ku u hetisisa txisungo txako, kambe ti na kuvhuna kumaha mthumo ngu mbimo ya yidotho.

16. Nji txani txi lavekako ti to u hetisisa txisungo txako? Dibhuku da Varoma 12:11 di li kombisisa kutxani lisima la kona?

¹⁶ Maha ti u nga tikotako. Ti lava mizamo ya hombe ti to u hetisa ati u nga ti khata. (Lera Varoma 12:11.) Paulo a gete Timoti atxi a na “tiningetele” ni ku “tsana” mu ko gondisa. Txialakanyiso txonetxo hi nga txi thumisa ka totshe ti hi lavako kumahela Jehovha.

17. Hi nga di thumisisa kutxani dibhuku da Vaefesu 5:15, 16 hi txi hetisisa ati hi nga ti sunga?

¹⁷ Thumisa kwati mbimo yako. (Lera Vaefesu 5:15, 16.) Veka ditshiku ni mbimo yi u no khata kumaha ti u nga ti sunga u tshumela u londisa kwati ati u nga bhala. U nga emele mbimo yo sawuleka ti to u khata kumaha ti se u nga ti sunga, nguko ti nga maha u si yi mani. (Ekl. 11:4) U nga tumeleli timhaka ti i si ngako ta lisima ti kudyela mbimo ni mtamo wo maha ti i ku ta lisima. (Vaf. 1:10) Ti txi koteka, maha txiemiso txo maha mithumo yo kari ngu mbimo yi u no mbi khulumetwa. Gela vamwani ti to ngu mbimo yoneyo khu lavi kutsulupetwa. U nga tima foni yako ni kuwona ma mesaji ngu mbimo yimwani. *

18-19. Nji txani txi nga kuvhunako kusimama u hetisisa ati u nga ti sunga hambi ti txi karata?

¹⁸ Veka mapimo ka wuyelo. Wuyelo ya txisungo txako yi fana ni kuhoka mu u endelako kona. Se u txi lava kuhoka mu u yako kona, u na simama u tsula hambi ti txo lava u txitxa nzila. Ngu toneto, hi txi veka mapimo ka wuyelo ya sisungo sathu, kha hi na mbi godhola mbimo yi hi mananako ni sikarato, hambi ti txi lava ku hi txitxa mamahelo.—Vag. 6:9.

¹⁹ Kumaha sisungo sa sinene ni ku si hetisisa kha ti hehuki. Kambe ngu kuvhunwa ngu Jehovha, u nga si kota kumana wuzivi ni mtamo wu u wu lavako ti to u hetisa ati u nga ti khata.