1-2. a) Nji txani txi hi vhunako kuwonisana ni sikarato? Txhamusela. b)  Hi na bhula ngu txani ka gondo yiya?

“Ni txi alakanya ngu sikarato si ni nga wonisana naso, na ti wona to ni sa si xula nokha.” Ina u khala kuwomba to fana ni toneto? Wungi wathu hi khala ku tipfisa toneto. Ti nga maha u ti wombile eto msana kova u di pindile ngu ka sikarato sa malwati mwendo kufelwa ngu m’thu wu u m’dhundako. U txi alakanya ngu sikarato soneso, wa ti wona ti to u si koti ku si xula ngu mhaka ya ku moya wo sawuleka wa Jehovha wu nga kuninga “mtamo wuwa wa hombe.”—2 Vak. 4:7-9.

² Hi tshumela hi lava moya wo sawuleka ti to hi kota kulwisana ni mkuzetelo wa mafu awa o biha. (1 Joh. 5:19) Hahanze keto, ti lava hi lwa ni “mimoya yo biha.” (Vaef. 6:12) Hi txi nga di hi txi pimisa ngu yotshe mikuzetelo yoneyo, hi na wona tinzila timbidi ati moya wo sawuleka wu nga hi vhunako ngu tona. Ngu msana hi na bhula ngu ti hi nga ti mahako kasi ku hi wuyelwa ngu wona.

3. Ngu yihi nzila yi moya wo sawuleka wu hi vhunako ngu yona ti to hi wonisana ni sikarato?

³ Moya wo sawuleka wa Jehovha wa hi vhuna ngu ku hi ninga mtamo ti to hi kota kuhetisisa wutixamuleli wathu ku si nga ni mhaka ni sikarato. Mpostoli Paulo a tipfile ti to a ti sikota kusimama e thumela Jehovha nguko a nga ti themba “mtamo wa Kristu.” (2 Vak. 12:9) Ngu mbimo ya liendo lakwe la wumbidi, Paulo a ti thuma ngutu ti to e kota kutxhumayela ni kumaha mthumo wo tihanyisa. A ti ya zumba Korinto mtini ka Aquila ni Prisila. Vona i ti vamahi va matenda. Aku Paulo a nga ti wuziva mthumo wuwa, a ti thuma navo masiku mamwani. (Mith. 18:1-4) Moya wo sawuleka wu ningile Paulo mtamo ti to e  txhumayela kumweko ni kumaha mthumo wo tihanyisa.

4. Ngu kuya ngu 2 Vakorinto 12:7b-9, i ti txihi txikarato txa Paulo?

⁴ Lera 2 Vakorinto 12:7b-9. Ka ndimana yiya, Paulo a la kuwomba txani atxi a lwite ni “m’pa ha mmidini”? Kha ti kana-kanisi to i ti ku wo va ni m’pa ha mmidini u ndi napfa kupanda ngutu. Se Paulo a ti womba ti to a ti wonisana ni sikarato so kari asi si nga ti m’xupha. A wombile to sikarato soneso si ti fana ni “txirumwa txa Sathani” atxi txi “mpeketelako.” Ti nga maha Sathani ni madhimoni akwe va sa vangela Paulo sikarato si si nga ti fana ni m’pa ha mmidini. Kambe mbimo yi mimoya yo biha yi nga wona to a ni “m’pa,” ti nga maha yi di wu txikile ngutu kasi ku e pfa kupanda ko pindisa. Se Paulo a mahile txani?

5. Jehovha a xamulisile kutxani mikombelo wa Paulo?

⁵ Paulo a ti lava kuthaviswa m’pa wule. A wombile tiya: “Ni kombete kuraru ka Mkoma ti to a txi ni thavisa m’pa wuwa.” Hambi ku Paulo a nga maha mkombelo, m’pa wu simamile ha mmidini kwakwe. Ina eto ti la kuwomba to Jehovha kha xamula mikombelo ya Paulo? Ahim-him. Jehovha a m’xamute. Jehovha kha thavisa m’pa wa Paulo, kambe a mningile mtamo wo kota kulwisana nawo. Jehovha ati khene: “Mtamo wangu wu ti komba ngu kuhetiseka ahawa ku ku ni kutandeka.” (2 Vak. 12:8, 9) Ngu kona ha ka txivhuno txa Txizimu, Paulo a simamile a di tsakile mbiluni!—Vaf. 4:4-7.

6. a) I ngu nzila yihi Jehovha a nga xamulako ngu yona mikombelo yathu? b) Mibhalo yi yi nga kombiswa yi nga kuvhunisa kutxani ti to u mana mtamo?

⁶ Kufana ni Paulo, ina u khala kukombela Jehovha ti to e thavisa txikarato txako? Ti nga maha hambi u di mahile mikombelo ngu kuphinda-phinda, kambe sikarato sako si simama, ku ti lava si engeteleka, se u alakanya to Jehovha kha xamuli. I di ti to u khala ku ti pfisa eto, alakanya txikombiso txa Paulo. Aku Jehovha a nga xamula mikombelo ya Paulo, a na xamula ni yako! Ti nga maha Jehovha a si thavise txikarato. Kambe ngu kuthumisa moya wo sawuleka, ene a na kuninga mtamo wu u wu lavako ti to u kota kutsanisela txikarato txako. (Mas. 61:3, 4) Ti nga maha u “vengelwa [ginyalatwa, NM]” kambe Jehovha kha na mbi kuleka.—2 Vak. 4:8, 9; Vaf. 4:13.

7-8. a) Moya wo sawuleka wu fanisa kutxani ni moya wu wu pekako wu ya mu dibhoti di yako kona? b) Pedro a txhamuselisile kutxani mathumelo a moya wo sawuleka?

⁷ Ngu yihi nzila yimwani ayi moya wo sawuleka wu nga hi vhunako ngu yona? Kufana ni moya wu wu pekako wu txiya mu dibhoti di yako kona hagari ka linene li li ku ni mavimbi a hombe, moya wo sawuleka wa hi susumeta ti to hi kota ku ya masoni hi lwa ni sikarato kasi ku hi hoka ka mafu a maphya.

⁸ Aku mpostoli Pedro i nga ti m’dayi wa sihaka, a ti yi ziva kwati mhaka ya matini. Ngu toneto, kasi ku e womba a ti moya wo sawuleka wu thumisako tona, a thumisile dipswi di di yelanako ni ta matini. A bhate tiya: “Nguko, kuwalo dipswi ni da dimwedo da wuprofeti adi di nga wombwa ngu kuranda ka m’thu. Aniko vathu vo sawuleka va va nga susumetwa ngu Moya wo sawuleka, ngu vona va va nga womba-womba ngu ditina da Txizimu.” Dipswi da Txigriki adi di nga hunduluxelwa di va “susumetwa,” ngu kukongoma di womba “kutsimbitiswa; kususumetelwa.”—2 Pedro 1:21.

9. Ngu tihi ati hi ti alakanyako ka dipswi “susumetwa” adi mpostoli Pedro a nga di thumisa?

⁹ Ngu tihi ati hi ti alakanyako ka dipswi “susumetwa” adi mpostoli Pedro a nga di thumisa? Luka, mbhali wa dibhuku da Mithumo nene a thumisile dipswi donedo da Txigriki  a txi txhamusela dibhoti di di “nga ti susumetwa” ngu diphuho. (Mith. 27:15) Txigondi tximwani txa Bhiblia txi womba to mbimo yi Pedro a nga thumisa dipswi “susumetwa,” a thumisile “mapswi o tsakisa o fananisela a timhaka ta matini.” Pedro a ti womba to kufana ni dibhoti adi di txhovhwako ngu moya kasi ku di hoka mu di yako kona, moya wo sawuleka ni wona wu kongomisile vabhali va Bhiblia ti to ve maha mthumo wawe. Txigondi txile txi wombile ti to vabhali va Bhiblia ti txi fana ni ku nga va to “tula maseyila a ngalava” kasi ku yi kota kususumetwa ngu moya. Jehovha a mahile ati ti mu lumbako. Ene a humesile “moya,” i ku moya wo sawuleka. Vabhali va Bhiblia va mahile ati ti va lumbako. Va londisete mkongomiso wa moya wonewo.

10-11. Ngu tihi timhaka timbidi ati hi fanelako ku ti maha ti to moya wo sawuleka wu hi kongomisa? Womba txikombiso.

¹⁰ Nyamsi wa ditshiku, kha ku swi ku txi bhalwa mabhuku a Bhiblia. Hambi keto, moya wo sawuleka wu ngadi wu txi ninga mtamo vathu va Txizimu. Jehovha wa maha ati ti mu lumbako. Hi nga tsanisekisa kutxani to moya wo sawuleka wa hi kongomisa? Ti lava hi tsaniseka to nathu ha maha ati ti hi lumbako. Hi nga mahisa kutxani?

¹¹ Wona txikombiso txiya. Ngako awu a tsimbitisako dibhoti a txi lava kuvhunwa ngu moya, ti lava e maha timhaka timbidi. Yo khata, dibhoti dakwe a fanete e divekela akhe moya wu tako ngu kona. Phela, ngako mtsimbitisi wa dibhoti a txi ema kule ni ha moya wu pekelako kona dibhoti di nge tsimbile. Ya wumbidi, ene a fanete e gwimba diseyila da dibhoti nga ti a ti kotisako tona. Ti ha kubasani to hambi moya wu txo peka, dibhoti dakwe di no tsimbila dwe ngako diseyila di di tate ngu moya. Ngu ha kufanako, kasi ku hi tsanisela ka mthumo wa Jehovha, ti lava hi di ni moya wo sawuleka. Ti to wu hi vhuna ti lava hi maha timhaka  timbidi. Yo khata, hi fanete hi maha ati moya wa Txizimu wu kongomisako malanda a txona to me maha. Ya wumbidi, ti lava hi “gwimba maseyila athu” nga ti hi ti kotisako tona hi pateka ngutu ka mithumo yoneyo. (Mas. 119:32) Hi txi maha toneto, moya wo sawuleka wu na hi txhovha hi ndaka mavimbi ya sikarato ni ku hi vhuna hi tsanisela kwati hi txi kongoma ka mafu a maphya.

12. Hi na bhula ngu txani konkuwa?

¹² Se hi bhute ngu tinzila timbidi ati moya wo sawuleka wu hi vhunako ngu tona. Wona wu hi ninga mtamo ni ku hi vhuna ti to hi zumba hi di thembekile hi txi manana ni sikarato. Moya wo sawuleka wu tshumela wu hi kongomisa ni ku hi vhuna kusimama ka nzila ya wutomi wo mbi na magwito. Konkuwa hi na bhula ngu mune wa timhaka ati hi fanelako ku ti maha ti to hi vhunwa ngu moya wo sawuleka.

13. Ngu kuya ngu 2 Timoti 3:16, 17, Bhiblia yi nga hi vhunisa kutxani? Ni ku hi fanete kumaha txani?

¹³ Txo khata, gonda Dipswi da Txizimu. (Lera 2 Timoti 3:16, 17.) Dipswi da Txigriki adi di nga hunduluxelwa di va “pimisilwe ngu Txizimu” ngu kukongoma di womba to “futetilwe ngu Txizimu.” Txizimu txi thumisile moya wa txona ti to txi “futeta” mapimo a txona ka vabhali va Bhiblia. Mbimo yi hi lerako Bhiblia ni kualakanyisisa ngu ti hi nga lera, hi tumelela sileletelo sa Txizimu si bela ka mialakanyo ni mbilu yathu. Sona si hi maha hi txitxa to kari ka wutomi wathu ti to hi tsakisa Jehovha. (Vaheb. 4:12) Kambe ti to hi wuyelwa ngutu ngu moya wo sawuleka, hi fanete hi tininga mbimo yo gonda Bhiblia mbimo yotshe ni kualakanyisisa kwati ngu ti hi nga gonda. Se hi txi maha toneto, Bhiblia yi na kongomisa simaho ni mapswi athu.

14. a) Ngu kutxani hi nga wombako ti to “moya” wuho mitshanganoni? b) Hi nga mahisa kutxani ti to hi tsula mitshanganoni ni maseyila o tuleka?

¹⁴ Ya wumbidi, khozela Txizimu mitshanganoni. (Mas. 22:22) Moya wa Jehovha wuho mitshanganoni. (Mtu. 2:29) Ngu kutxani? Nguko hi di mitshanganoni ha wu kombela, ha embelela tindando ati ti nga seketelwa ka Bhiblia, ha engisela tigondo ta Bhiblia ati hi gondiswako ngu vanathu va va nga sawulwa ngu moya wo sawuleka. Futhi moya wonewo wo sawuleka wa vhuna vanathu va txisikati ti to ve maha mikombiso. Ti to hi vhuneka ngutu ngu moya wo sawuleka, ti lava hi ya mitshanganoni hi di lulamisete. Hi txi maha toneto, hi na xalela mitshangano ni maseyila o tuleka.

15. Moya wo sawuleka wu hi vhunisa kutxani hi txi txhumayela?

¹⁵ Ya wuraru, txhumayela. Ngako hi txi thumisa Bhiblia hi txi txhumayela ni kugondisa, hi tumelela moya wo sawuleka ti to wu hi vhuna. (Var. 15:18, 19) Kambe, ti to hi vhunwa ngu moya wo sawuleka, ti lava hi txhumayela mbimo yotshe ni kuthumisa Bhiblia mbimo yotshe. Nzila yimwani ayi hi nga tshukwatisako mabhulo athu hi txi txhumayela, ngu thumisa sikombiso sa mabhulo si ku ka Txibhukwana txa mitshangano ya Mahanyelo a Wukristu.

16. Ngu yihi nzila yo kongoma yo mana moya wo sawuleka?

¹⁶ Ya wumune, maha mkombelo ka Jehovha. (Mat. 7:7-11; Luka 11:13) Nzila yo kongoma yo mana moya wo sawuleka ngu wu kombela ka Jehovha ngu mkombelo. Txiwalo txi txi nga vhalelako mikombelo yathu ti to yi si hoki ka Jehovha mwendo ku hi si amukeli moya wakwe, nem jele mwendo Sathani. (Jak. 1:17) Hi nga mahisa kutxani mkombelo kasi ku hi vhunwa ngutu ngu moya wo sawuleka? Kasi ku hi mana xamulo, he xolisise mhaka ya lisima  mayelano ni mkombelo ka txikombiso txi txi ku ka evhangeli ya Luka. *

17. Txidinganiso txa Jesu txi ku ka Luka 11:5-9, 13 txi hi gondisa txani mayelano ni mkombelo?

¹⁷ Lera Luka 11:5-9, 13. Txidinganiso txa Jesu txi kombisa nzila yi hi fanelako kukombela ngu yona moya wo sawuleka. Ka txidinganiso txonetxo, wule wamwamna a mani asi a nga ti si lava “ngu mhaka ya kusimamisa kwakwe.” Ene a si thavi kukombela txivhuno ka mndoni wakwe hambiku i nga ti wusiku ngutu. Txidinganiso txiya txi hi gondisa txani mayelano ni mkombelo? Jesu a ti khene: “Kombelani, mi na ningwa ngu Txizimu, lavani, mi na si mana; gogotani ditimba, mi na tulelwa.” Hi gonda txani? Ti to hi mana moya wo sawuleka, hi fanete hi wu khongelela ngu kusimamisa.

18. Ngu kuya ngu txidinganiso txa Jesu, ngu kutxani hi nga tsanisekako ti to Jehovha a na hi ninga moya wakwe wo sawuleka?

¹⁸ Txidinganiso txa Jesu txi tshumela txi hi vhuna kuwona to ngu kutxani Jehovha a no hi ninga moya wo sawuleka. Wule wamwamna a ti tsakela kuamukela kwati mpfhumba. A woni txilaveko txo phamela sakudya mpfhumba wakwe hambiku i nga ti wusiku. Jesu a ti khene muakelani a ningile sakudya wule wamwamna nguko a nga simamisa e kombela. Ngu yihi gondo? Ngako m’thu wo mbi hetiseka a txi vhuna mmwani wu a simamisako e kombela, Tate wathu wa wunene wa nzumani a na vhuna wu a simamisako e kombela moya wo sawuleka! Ngu toneto, hi nga kombela ngu kutsaniseka ti to Jehovha a na xamula mikombelo yathu ya txikuluveta yo kombela moya wo sawuleka.—Mas. 10:17; 66:19.

19. Hi nga tsaniseka ngu nzila yihi ti to hi nga tsanisela?

¹⁹ Hi nga tsaniseka ti to hambi Sathani a si emi ku hi xanisa, hi nga sikota kusimama hi tsanisela. Ngu kutxani? Nguko moya wo sawuleka wa hi vhuna ngu tinzila timbidi. Yo khata, wu hi ninga mtamo wu hi wu lavako ti to hi xula sikarato. Ya wumbidi, wona mtamo awu wu “tatako maseyila athu,” wu hi vhuna ku ya masoni hi thumela Jehovha kala hi hoka ka mafu a maphya. He tiemiseleni kumana txivhuno txa moya wo sawuleka!