GONDO 41
Ina u na zumba u di thembekile ngu mbimo ya “xanisa ya hombe”?
“Randani MKOMA, anu motshenu mi ku sirandwa sakwe [vo thembeka kwakwe, NM]! MKOMA a vhikela avale va mthembako.”—MAS. 31:23.
NDANDO 129 Hi na simama hi timisela
ATI HI NO TI GONDA *
1-2. a) Ngu tihi ati vakoma va no huwelela i si nga kale? b) Ngu sihi siwotiso sa lisima mayelano ni mbimo yi yi tako?
NGA ha ti nga wombwa ngu kona mu ka Bhiblia, alakanya ngu tiya: Vakoma va matiko se va di huwelete to ku ni “kudikha ni kukhaliseka.” Va veka ni kutsaka, ve ti gela to mafu mo khata kuva ni kurula. Va na lava ku hi kholwisa to va sikota kululamisa sikarato sa ditiko. Kambe, va nge mahi txilo ka ti ti no gwita ti humelela! Ngu kutxani? Bhiblia yi khene ku na va ni “dikhombo ngu txidhukisa hagari kwawe, . . . kha va nambi si kota kupona.”—1 Vat. 5:3.
2 Ku ni siwotiso sa lisima mayelano ni mbimo yi yi tako: Ku na maheka txani ngu mbimo ya “xanisa ya hombe”? Jehovha a na lava hi maha txani ngu mbimo yoneyo? Hi nga ti lulamiselisa kutxani ti to hi ta zumba hi di thembekile ngu mbimo ya xanisa ya hombe?—Mat. 24:21.
KU NA HUMELELA TXANI NGU MBIMO YA “XANISA YA HOMBE”?
3. Ngu kuya ngu Mtuletelo 17:5, 15-18, Txizimu txi na mu lovisisa kutxani “Bhabhilona wa Hombe”?
3 Lera Mtuletelo 17:5, 15-18. “Bhabhilona wa Hombe” a na loviswa! Nga ha se ti nga wombwa ngu kona, vakoma va matiko kha ku nga ni ti va nga mahako ka ti ti no humelela. Ngu kutxani? Nguko ‘Txizimu txi [na] va ninga mbilu ya kumaha makungo a txona.’ Ngu yahi makungo a kona? Ngo lovisa wotshe wukhongeli wa makuhu, kupata ni va va tigelako ku Makristu. * Txizimu txi na beta makungo a txona ka timbilu ta “titxheho ta digumi” ta “txikalani txo bhilivila.” Titxheho toneto ti emela wotshe wukoma wu wu seketelako “txikalani txo bhilivila,” i ku Nações Unidas. (Mtu. 17:3, 11-13; 18:8) Mbimo yi vakoma vonevo va no wukela wukhongeli wa makuhu, i na va makhato a xanisa ya hombe. I na va mhaka yo thisa ngutu ta tinene.
4. a) Nji txani txi no maha ku vakoma ve za ve wukela wukhongeli wa makuhu? b) Ku na maheka txani ngu va va nga ti ka wona?
4 Nji txani txi no maha ku vakoma ve za ve wukela Bhabhilona wa Hombe? Kha hi tizivi. Ti nga maha ve womba to wukhongeli wu khulumetela kudikha ni ku wu dhunda kubelela ka tipolitika. Mwendo va na kha vona wukhongeli wu sengeleta tithomba ta tingi. (Mtu. 18:3, 7) Hi nga ti to kuxasela kuwa ku no heta votshe va va lumbako wukhongeli wa makuhu. Ti woneka nga wukoma wu no thavisa tisengeletano ta wukhongeli. Neti tisengeletano toneto ti txi bhi, ava va nga ti ka tona va na ti wona to vathangeli vawe va wukhongeli va va kanganyisile, ngu toneto va na mbi lava kupfa txilo kambe ngu tawe.
5. Ina xanisa ya hombe yi na teka mbimo yo lapha? Ngu kutxani?
5 Bhiblia kha yi wombi to kuxaselwa koneko ka Bhabhilona wa Hombe ku na teka mbimo muni, kambe ha ti ziva to i na va mbimo yo kari yo koma. (Mtu. 18:10, 21) Jehovha a thembisile to a na “komisa masikuyo” ya sixaniso ti to “ava a nga va sawula” kumweko ni wukhongeli wa ditshuri ve kota kuhuluka. (Marku 13:19, 20) Kambe, Jehovha a na emela ku hi maha txani hagari ka makhato a xanisa ya hombe ni Armagedhoni?
SIMAMA U SEKTELA WUKHOZELI WA JEHOVHA
6. Ngu tihi ti ti patekako ko tihambanisa ni wukhongeli wa makuhu?
6 Nga ha hi nga ti wona ka msungo wu wu nga pinda, Jehovha a emete ti to vakhozeli vakwe ve ti hambanisa ni Bhabhilona wa Hombe. Hambi keto, kha ta enela kuwila wuxaka nayo. Hi fanete hi ti emisela kuseketela wukhongeli wa ditshuri i ku kukhozela Jehovha. Ndite tinzila timbidi ati ti nga hi vhunako kumaha toneto.
Hi nga lekeni ku ya mitshanganoni, hambi ku di ni sikarato (Wona ndimana 7) *
7. a) Hi nga simamisa kutxani hi seketela milayo ya Jehovha ya mahanyelo? b) Vahebheru 10:24, 25 yi li kombisisa kutxani lisima la mitshangano, ngutu-ngutu konkuwa?
7 Yo khata, kha ha fanela kuseketela wubhemba wa ditiko. Kha hi lavi kutumelela mahanyelo a ditiko. Ngu txikombiso, kwathu, wugelegele hi nga wa wunene, kupata ni mitxhadho ya vathu va limbewu limwelo ni mamwani mahanyelo o u txi wona m’thu u si ti zivi to mbwa msikati mwendo dijaha. (Mat. 19:4, 5; Var. 1:26, 27) Ya wumbidi, hi fanete hi simama hi ya mitshanganoni ya Wukristu. Hi maha toneto hani ni hani ti kotekako kona, Nyumbani ya Mfumo, mitini mwendo ka makhalo mamwani ngako ti txi sunga. Hambi ku txo humelela txani ni txani, kha hi na kuleka kuya mitshanganoni. Phela, ti lava hi tshangana “ngutu-ngutu akuwa [hi] wonako ditshiku da Mkoma di txi tshuketela.”—Lera Vahebheru 10:24, 25.
8. Ku na maheka txani ngu madungula ya hi txhumayelako?
8 Ngu mbimo ya xanisa ya hombe, madungula ya hi txhumayelako ma na txitxanyana. Konkuwa, hi txhumayela mahungu a manene a Mfumo ni kuzama kumaha vagondiswa. Kambe ka mbimo yoneyo, hi na nda ta txhumayela madungula o panda ku nga maralala. (Mtu. 16:21) Kutilava hi na ta txhumayela to mafu a Sathani ma na loviswa. Ngu mbimo ya kona, hi na tiziva to hi na txhumayela txani ni ku hi na mahisa kutxani. Ina hi na mahisa tonti hi txhumayelisako tona kukhukhela kale? Mwendo hi no thumisa tinzila timwani? Txa lisima wutomi, hi na ti wona. Ku si nga ni mhaka ni matxhumayelelo ya kona, ti woneka nga hi na va ni lungelo yo txhumayela wulamuli wa Jehovha!—Eze. 2:3-5.
9. Ngu tihi ati vakoma va nga thukako ve ta timaha ngu mhaka ya madungula athu? Athu hi nga tsaniseka ka ti to txani?
9 Ngu ditshuri ti nga maha madungula athu me ta maha to vakoma ve zama ku hi vhala sisofu. Aku konkuwa hi thembako Jehovha ku e hi vhuna hi txi txhumayela, hi na mahisa toneto ni mbimo yi yi tako. He tsanisekeni ti to Txizimu txathu txi na hi tata ngu mtamo kasi ku hi hetisisa kuranda ka txona.—Mika 3:8.
LUNGEKELA KU TA WONISANA NI KUXASELWA KA VATHU VA JEHOVHA
10. Nga ha ti nga wombwa ngu kona ka Luka 21:25-28, ku na maheka txani ka vathu vo tala ngu mbimo ya xanisa ya hombe?
10 Lera Luka 21:25-28. Ngu mbimo ya xanisa ya hombe, vathu va na pandiseka ngu kuwona ti to sotshe asi va nga ti themba ku si na va sa kala kupinduka, hi nga sa txilo. Va na ‘pandiseka,’ ve thava to va na nda dawa ka mbimo yiya yo karata yo nem kha yi khali kuhumelela kukhukhela kale. (Zef. 1:14, 15) Ka mbimo yoneyo, ka vathu va Jehovha, wutomi wu na ta bava ngutu. Ti nga maha hi ta xaniswa nguko hi ko mbi pateka ka timhaka ta ditiko. Ti nga maha silo simwani hi ta si pwata.
11. a) Ngu kutxani votshe va no wonetela Tifakazi ta Jehovha? b) Ngu kutxani ti si lavi hi thava xanisa ya hombe?
11 Ngu mbimo yoneyo, ti nga maha vathu ava wukhongeli wawe wu nga loviswa ve ta henya va txi wona to Tifakazi ta Jehovha ti nga diho. Va na vanga diguwa, ti nga maha hambi ni ka internet. Matiko ni mkoma wawe Sathani, va na hi nyenya ngutu aku wukhongeli wathu wu no huluka. Vona va nava va di tandekile kugumisa wotshe wukhongeli ha mafuni. Phela votshe va na wonetela athu. Ngu toneto, matiko ma na maha Goge wa Magoge. * Ma na patana me va nyanda yimweyo kasi kulwisa vathu va Txizimu. (Eze. 38:2, 14-16) Ti nga maha hi khata kuthava ngu ti ti no humelela ngu mbimo ya xanisa ya hombe, ngutu-ngutu aku hi si ziviko totshe. Hambi keto, hi nga tsaniseka ka tiya: Kha ti lavi hi ñola masembe ngu mhaka ya xanisa ya hombe. Jehovha a na hi vhikela ngu mkongomiso wakwe. (Mas. 34:19) Hi na sikota ‘kugula maso hi txi wona txitimwi,’ nguko hi na tiziva to ‘ku hafuhi kuhanyiswa kwathu.’ *
12. Ngu tihi ti ‘txithumi txo thembeka na txi di ni wutxhari’ txi ti mahako kasi ku hi lulamisela ka xanisa ya hombe?
12 ‘Txithumi txo thembeka na txi di ni wutxhari’ txa hi lulamisela i di ngadi mbimo ti to hi ta thembeka ngu mbimo ya xanisa ya hombe. (Mat. 24:45) Txi maha toneto ngu tinzila to tala, kambe konkuwa he xolisisi txikombiso tximwetxo: Mitshangano ya m’ganga ya 2016-2018. Ka mtshangano wumwewo ngu wumwewo hi kuzetilwe kukulisa tifanelo ti hi ti lavako kota ku ditshiku da Jehovha di ku hafuhi. Ngu txikuluveta, he wusetinyana tifanelo toneto.
TSANISA WUTHEMBEKI WAKO, KUTIMISELA NI TXIBINDI
Tilulamisele konkuwa ti to u ta huluka ka “xanisa ya hombe” (Wona tindimana 13-16) *
13. Hi nga wu tsanisisa kutxani wuthembeki wathu? Ngu kutxani hi di fanete hi tsanisa wuthembeki wathu?
13 Wuthembeki: Msungo wa mhaka wa mtshangano wa 2016 wu ti khene: “Simama u thembeka ka Jehovha!” Mtshangano wuwa wu hi gondisile ti to ngako hi di ni wuxaka wo tsana ni Jehovha, hi na thembeka kwakwe. Hi khumbutisilwe ti to hi nga tshuketa ka Jehovha ngu mkombelo wo ta ngu mbiluni ni kugonda kha kwati Bhiblia. Kumaha toneto, ti hi ninga mtamo wo xula sikarato sa hombe. Aku ditiko diya da Sathani di ku hafuhi ni kuguma, hi na manana ni sikarato so duka wuthembeki wathu ka Txizimu ni ka Mfumo wakwe. Vathu va na simama ve hi nyenya. (2 Pedro 3:3, 4) Txivangelo txa hombe txa toneto, nguko hi si seketeliko txilo ka mafu a Sathani. Hi fanete hi tsanisa wuthembeki wathu konkuwa, ti to ngu mbimo ya xanisa ya hombe, hi ta simama hi thembeka.
14. a) Ngu kuhi kutxitxa ku no va ho mayelano ni vanathu va va thangelako ha mafuni hawa? b) Ngu kutxani ti txi na ta lava ku hi thembeka?
14 Ngu mbimo ya xanisa ya hombe, ku na va ni kutxitxa ko kari mayelano ni vanathu va va thangelako ha mafuni. Votshe vasawuleki va na va va di tshanganisilwe ve ya nzumani ti to ve ta maneka ka yimbi ya Armagedhoni. (Mat. 24:31; Mtu. 2:26, 27) Eto ti womba to Mmidi wu wu Fumako wu na ta va wu si nga ho ha mafuni. Hambi keto, dibutho da hombe di na simama di di zumbisekile. Vanathu va va fanelekako va na thangela. Ti na lava hi ta simama hi thembeka ngu ku va engisa ni kulondisela mkongomiso wu Txizimu txi va ningako. Eto ngu tona ti no hi hulukisa!
15. Hi nga kutsanisisa kutxani kutimisela kwathu? Ngu kutxani ti di ni lisima kumaha toneto konkuwa?
15 Kutimisela. Msungo wa mtshangano wa 2017 wu ti ti khene: “U nga karali!” Mtshangano wuwa wu hi vhuni kutsanisa wusikoti wathu wo tsanisela sikarato. Hi gondile ti to kutimisela kwathu kha ka seketelwa ka loko timhaka ti txi hi tsimbilela kwati. Hi nga tsanisa kutimisela kwathu ngu kuthemba Jehovha. (Var. 12:12) Hi nga divaleni ati Jesu a nga hi thembisa tona: “Aniko awule a no zumba a di tsani kala magwito, a na hanyiswa.” (Mat. 24:13) Txithembiso txiya txi kombisa ti to hi fanete hi zumba hi di thembekile ku si nga ni mhaka ni sikarato asi hi mananako naso. Hi txi timisela sikarato sotshe konkuwa, hi nga va ni mtamo na xanisa ya hombe yi si se bwaka.
16. Nji txani txi kombisako ti to hi ni txibindi? Hi nga txi tsanisisa kutxani txibindi konkuwa?
16 Txibindi: Msungo wa mtshangano wa 2018 wu ti ti khene: “Vana ni txibindi!” Mtshangano wuwa wu hi khumbutisile ti to wusikoti wathu hi nga wona wu kombisako ti to hi ni txibindi mwendo ahim-him. Kufana ni kutimisela, txibindi txa ditshuri txi ta ngu kuthemba Jehovha. Hi nga mahisa kutxani to hi themba ngutu Jehovha? Ngu kulera Bhiblia ditshiku ni ditshiku ni kualakanyisisa ngu nzila yi Jehovha a nga hulukisa ngu yona vathu vakwe ka masiku a kale. (Mas. 68:20; 2 Pedro 2:9) Mbimo yi matiko ma no hi xasela ngu mbimo ya xanisa ya hombe, ti na lava hi va ni txibindi ni ku mthemba Jehovha kupinda kale. (Mas. 112:7, 8; Vaheb. 13:6) Hi txi veka themba yathu ka Jehovha, hi na va ni txibindi txo wonisana ni kuxasela ka Goge. *
TIEMISELE KU TA KUHULUKA
Mpostoli Johani a woni “dibutho da hombe” da vathu va di ambate siambalo so basa va di nõte mijindo manzani kwawe (Wona ndimana 17)
17. Ngu kutxani hi sa fanela kuthava yimbi ya Armagedhoni? (Wona mfota wa kapa.)
17 Nga ha ti nga wombwa ngu kona ka msungo wu wu nga pinda, kutala kwathu ho ziva kuhanya ka masiku a magwito dwe. Kambe, hi nga di emete xanisa ya hombe. Yimbi ya Armagedhoni ngu yona yi no vhala masiku awa a magwito. Hambi keto, hi nga thaveni txilo. Ngu kutxani? Nguko i Jehovha a no lwa. (Mav. 1:33; Eze. 38:18-20; Zak. 14:3) Neti Jehovha a no womba dipswi ka Jesu, ene a na thangela mabutho a nzumani ve ya yimbini. A na va ni vasawuleki kumweko ni tingelozi to tala ngutu. Va na lwa ni Sathani, madhimoni ni votshe vandoni vakwe va ha mafuni.
18. a) Ngu tihi ati Jehovha a nga hi thembisa? b) Ngu yihi themba ayi yi ku ka Mtuletelo 7:9, 13-17 mayelano ni mbimo yi yi tako?
18 Jehovha a hi thembisile: “Otshe matxhari ale ma longiselwako ku kuwukela, kha ma na mbi humelela.” (Isaya 54:17) “Dibutho da hombe” da vakhozeli va Jehovha vo thembeka di na huma “ngu kuxanisekani ka hombe” di txi hanya! Vona va na gwita ve simama ve mahela Jehovha mthumo wo sawuleka. (Lera Mtuletelo 7:9, 13-17.) Ngu ditshuri Bhiblia yi hi ninga themba yo tsana ya mbimo yi yi tako! Ha tiziva ti to “MKOMA a vhikela avale va mthembako.” (Mas. 31:23) Votshe va va randako Jehovha, va na tsaka ngutu va txi mu wona a txi basisa ditina dakwe do sawuleka.—Eze. 38:23.
19. Ngu yihi themba yo tsakisa ayi hi yi emelako mbimo yi yi tako?
19 Alakanya ngu nzila yi dibhuku da 2 Timoti 3:2-5 di nga phenduketiswako tona kasiku di kombisa vathu ava va ku ka mafu a maphya, va di khululekile ka Sathani. (Wona dibhokiso di di ku “ Vathu va na i di vo zumbisa kutxani?”) Mwanathu George Gangas, * i nga ti txiro txa Mmidi wu wu Fumako, a wombisile tiya: “Mafu ma na tsakisa ngutu mbimo yi votshe vathu va no khozela Jehovha! Na i si nga kale hi na va ni lungelo yo hanya ka matsimbitiselo a maphya a silo. Aku Jehovha a no mbi fa, nawe u na mbi fa. Hi na hanya kala kupinduka.” Hi nga wona themba yo tsakisa!
NDANDO 122 Zumbani mi di tsani, mi si xulwi ngu txilo!
^ par. 5 Ha ti ziva to na i si nga kale, vathu votshe va na manana ni “xanisa ya hombe.” Ku na maheka txani ka malanda a Jehovha ngu mbimo yoneyo? Jehovha a na emela ku athu hi maha txani? Ngu tihi tifanelo ati hi fanelako ku ti kulisa ti to hi zumba hi di thembekile? Msungo wuwa wu na hi ninga tixamulo.
^ par. 3 TITXHAMUSELO TA MAPSWI O KARATA: Ava va tigelako ku Makristu mbakhongeli vale vo kha va gondisi vathu kukhozela Txizimu ngu nzila yi txi yi lavako.
^ par. 11 TITXHAMUSELO TA MAPSWI O KARATA: Mapswi o Goge wa Magoge (mwendo ku Goge) ma womba kupatana ka matiko ti to me lwisa vathu va Jehovha ngu mbimo ya xanisa ya hombe.
^ par. 11 Kasi ku u mana madungula o engeteleka mayelano ni simahakalo sotshe asi si no humelela Armagedhoni yi si se hoka, wona ndima 12 ya dibhuku di di ku O Reino de Deus já Governa! U txi lava kumana to tala mayelano ni ti Jehovha a no vhikelisa tona vathu vakwe ngu mbimo ya Armagedhoni, wona tindima 17 ni 18 ta dibhuku di di ku A Adoração Pura de Jeová É Restaurada!
^ par. 16 Mtshangano wa 2019 awu wu ku khene “Lirando kha li na mbi va ni magwito!” wu hi tsanisekisa ti to hi nga simama hi khaliseka hi txi vhikelwa ngu Jehovha.—1 Vak. 13:8.
^ par. 19 Wona msungo wu wu ku “Suas obras o seguirão”, ka A Sentinela ya 1 ka Dezembro wa 1994.
