1. Ngu kutxani Jehovha a txi fanelwa ngu lotshe lirando lathu?

JEHOVHA a fanelwa ngu lotshe lirando lathu nguko ngene i ku M’vangi wathu ni Mningi wa wutomi. (Mtu. 4:11) Kambe ku ni txikarato. Hambiku Jehovha hi mu randako ni ku mu xonipha, hi nga thuka hi jikiswa hi si mu randi ngati ti lavekisako tona. Ti nga mahisa kutxani toneto? A hi khati ngu kuwona to tipata txani kukhozela Jehovha ekha.

2. Ngu kuya ngu Matewu 4:10, hi na maha txani ngako hi txi randa ngutu Jehovha?

² Amu ka Bhiblia, kuranda ngutu Jehovha ti tsimbitisana kwati ni kukhozela ene dwe. Ngako hi txi mu randa ngutu, hi na khozela ene ekha. Hi na mbi tumelela m’thu mwendo txo kari txi va txo khata ka mbilu yathu.—Lera Matewu 4:10.

3. Ngu sihi sivangelo asi hi ku naso so tiningetela ka Jehovha?

³ Hi ni sivangelo so tiningetela ka Jehovha. Ngu sihi? Kutiningetela kwathu ku seketetwe ka ti hi nga ti gonda ngu ngene. Ha xamatiswa ngu tifanelo takwe ta tinene. Ha tiziva ati a ti dhundako ni ti a ti nyenyako, kha hi lwisani nato. Ha txi pfisisa txikongomelo txakwe ngu vathu hi tshumela hi txi seketela. Hi wona i di lungelo aku Jehovha a hi dhundako. (Mas. 25:14) Totshe ati hi ti gondako ngu M’vangi wathu, ti hi tshuketisa hafuhi nayo.—Jak. 4:8.

4. a) Sathani a thumisa txani ti to e dayisa lirando lathu ka Jehovha? b) Hi na gonda ngu txani ka msungo wuwa?

 ⁴ Sathani ngene a fumako mafu awa, se a thumisa silo asi vathu va si lavako ka wutomi ti to e nemetisa wutomi ni ku ti hi karatela kuxula minavelo yo biha. (Vaef. 2:1-3; 1 Joh. 5:19) Ene a lava ti to hi abanisa lirando lathu, hi si randi Jehovha ekha. He woni tinzila timbidi ta tipulani ati Sathani a ti thumisako. Yo khata, ene a hi duka ngu tithomba; ya wumbidi, a duketa ku hi kuzetela ti to hi sawula misakano yo biha.

5. Ngu kutxani hi di fanete ku tiwonela ka kuranda male?

⁵ Hotshethu ha ti lava kuva ni sakudya so enela, siambalo sa sinene, ni wukhalo wa wunene wo zumba. Kambe, hi fanete hi tiwonela ka kuranda male. Vathu vo tala nyamsi mbo “randa male” ni silo asi male yi si xavako. (2 Tim. 3:2, NM) Jesu a ti zivile to valondeteli vakwe va na nda ve manana ni txiduko txo randa ngutu male. Ene a ti khene: “Ku walo m’thu wu a si kotako kuthumela vakoma vambidi, nguko mwendo a na vengela mmweyo e dhunda mmwani, mwendo a na namarela ka mmweyo e kanyisa mmwani. Kha mi na ku si kota kuthumela Txizimu ni thomba ya mafu.” (Mat. 6:24) M’thu wu a khozelako Jehovha kambe a txi tikaratela kumana tithomba, ngu ditshuri a duketa kuthumela vakoma vambidi. Ene kha tiningeteli ka Jehovha dwe.

6. Hi gonda txani ka mapswi a Jesu ka dibanza da Laodhikheya?

⁶ Kuya magwito ka dilembe dizana do khata E.C., ka dibanza da Laodhikheya ku ni va va nga ti tigela tiya: “Ni nyatithombe, ni humelete, kha ni pwati txilo.” Kambe masoni ka Jehovha i ti ‘nyantshanzale, txisiwana, dibhofu, kha ambala txilo!’ Jesu a va layile,  i si nga ngu mhaka ya ku va nga ti ganyile, kambe nguko kuranda kwawe male se ti nga ti daya wuxaka wawe ni Jehovha. (Mtu. 3:14-17) Ngako hi txi tumbula to se ha khata kuranda male, hi nga sweleni kululamisa mialakanyo yathu. (1 Tim. 6:7, 8) Ngako hi si lulamisi, mbilu yathu yi na mbi randa Jehovha dwe, se ene a na mbi amukela wukhozeli wathu. Jehovha a lava hi mu randa “ngu yotshe mbilu.” (Marku 12:30) Ti nga mahisa kutxani to hi khata kuranda male?

7-9. U gondile txani ka txikombiso txa mwanathu David?

⁷ Wona txikombiso txa didhota dimwani da Estados Unidos di dhanwako ku i David. A khene a si tifeleli aha a nga txi thuma kona. Koponi yi a nga ti thuma ka yona yi mu ningile mthumo wa wunene ni muholo wa wunene, ditikoni kotshe a ti ziwa ngu mthumo wakwe. David a khene: “Ku ni mbimo yi ni nga pimisa to a tiya i Jehovha a ni katekisako.” Kambe ina ngu ditshuri i ti makatekwa a Jehovha?

⁸ Kudotho-kudotho, David a ti tumbute to wuxaka wakwe ni Jehovha wu ka phango ngu mhaka ya mthumo wakwe. A khene: “Hambi ni di mitshanganoni mwendo kutxhumayelani, ni ti pimisa ngu sikarato sa mthumoni. Yona male ni ti yi mana, kambe ni ti khata kujujeka msungo, futhi se ni ti ni sikarato ni msikati wangu.”

⁹ David a ti woni ti to a ti fanete e wona to ngu tihi ati i ku ta lisima kwakwe. A khene: “Ni mahile txisungo txo karata ti to ni lulamisa txiemo txangu.” Ti lavile e txitxa mathumelo akwe, e gwita e ya gela mlungu wakwe. A ti khene txani? A hingilwe mthumoni! Se ene a mahile txani? David a khene: “Mangwana ka kona, ni tatisete petisawu ya  wunyaphandule wo vhuneta.” Ti to ve mana txo dya, David a ti ya tholwa ha kuthumako msikati wakwe ka mthumo wo hiyela. Mbimo yi a nga teka wunyaphandule wo vhuneta, msikati wakwe nene a tekile. Mpatwa wuwa, wu sawute mthumo awu vo tala va wu wonelako hahatshi, kambe kwawe mthumo hi nga wona wu ku ni lisima ngutu ka wutomi. Hambiku muholo wawe wu nga txhika ngutu ta tinene, mtxima ni mtxima male ya enela ti to ve hanya. Vona va lava kuthangetisa Jehovha, se va ti woni vapuni ti to ene wa khatalela ava va thangetisako Mfumo kukhata.—Mat. 6:31-33.

10. Hi nga yi vhikelisa kutxani mbilu yathu?

¹⁰ Ti si nga ni mhaka ni ti to hi ganyile mwendo hi si siwana, ti lava hi vhikela mbilu yathu. Ngu nzila yihi? Ngu kwa mbi kulisa lirando lathu ngu tithomba. Kha ha fanela kutumelela mthumo wo tihanyisa wu va wa lisima kupinda mthumo wa Jehovha. U nga tizivisa kutxani to eto ta maheka kwako? Ngu ku ti mahela siwotiso siya: ‘Ina ni di mitshanganoni mwendo kutxhumayelani, ni pimisa ngutu ngu mthumo wangu? Ina na karateka ngutu ngu kusengeletela tithomba ta mbimo yi yi tako? Ina tithomba ni male ngu sona si ni vangelako sikarato ni msikati mwendo mwamna wangu? Ina ni ndina tumela mthumo wu vamwani va wu wonelako hahatshi kasi ku ni mana mbimo yo thumela Jehovha?’ (1 Tim. 6:9-12) Mbimo yi hi alakanyisisako ngu siwotiso siya, khumbula to Jehovha wa hi randa ni ku a hi thembisa tiya: “Kha ni na mbi thuka ni ku leka, kha ni na mbi nga va ni ku kutshotsha.” Ngu toneto mpostoli Paulo a nga bhala a txi khene: “Mi nga fumweni ngu male kuhanyani kwanu.”—Vaheb. 13:5, 6.

11. Ngu yihi phango ya misakano?

¹¹ Jehovha a lava ti to hi tsaka ngu wutomi, se kusakananyana ti nga hi tisela litsako. Phela Bhiblia yi womba ti to kuwalo ‘ta tinene ka m’thu kupala kudya, e sela ni kutsakisa mbilu yakwe ngu mthumo.’ (Ekl. 2:24) Misakano yo tala ya mafu awa yi nga va ni mkuzetelo wo biha kwathu. Yi nga hoxota mahanyelo a manene a vathu, yi va maha ve khata kudhunda silo si Bhiblia yi si vengelako.

12. Ngu kuya ngu 1 Vakorinto 10:21, 22, ngu kutxani hi di fanete ku tiwonela hi txi sawula misakano?

¹² Aku hi lavako kuranda Jehovha ngu mbilu yathu yotshe, hi na mbi dya “mezani ka Mkoma” ni “mezani  ka madhimoni.” (Lera 1 Vakorinto 10:21, 22.) Kusengela sakudya ni m’thu ti kombisa wungana. Ngako hi txi sawula misakano ayi yi kuzetelako mazunga, wuñanga, wugelegele mwendo timhaka timwani ta nyama, ngu ditshuri hi va hi txo dya sakudya asi si nga bhikwa ngu valala va Txizimu. Kota wuyelo, hi na tivangela sikarato, hi tshumela hi daya wuxaka wathu ni Jehovha.

13-14. a) Ti mahisa kutxani ti to misakano yi fana ni sakudya? b) Ngu kuya ngu Jakobe 1:14, 15, ngu kutxani hi di fanete kutiwonela hi txi sawula misakano?

¹³ Ti mahisa kutxani ti to misakano yi fana ni sakudya? Mbimo yi hi dyako, hi nga langa to ngu sihi asi hi no kovela. Kambe hi txoza hi si kovela hi mita, hi nge sikoti kulanga to si na tsimbilisa kutxani mndani kwathu. Sakudya sa sinene si nga hi ninga dihanyo da dinene; kambe sakudya so mbi i si nga sa sinene si nga hi lwalisa. Ti nga maha hi si tekeli kuwona wuyelo ya kona, kambe yi na woneka ngu kutsimbila ka mbimo.

¹⁴ Ngu kufana, hi txi sawula misakano, hi nga sawula to hi lava yihi. Kambe msana keto, msakano wu hi nga wu sawula wu nga gwesa matipfelo ni mialakanyo yathu kumweko ni mbilu yathu. Msakano wa wunene wu nga hi tangalisa; kasi wo biha wu nga hi dayisa. (Lera Jakobe 1:14, 15.) Ti nga maha hi si tekeli kuwona wuyelo ya misakano yo biha, kambe yi na woneka ngu kutsimbila ka mbimo. Ngu toneto Bhiblia yi ku khene: “Mi nga ti xengeni. Txizimu kha txi sakanelwi. M’thu ni m’thu a na elula asi a phayako. Awule a phayako so tsakisa mtumbuluko wakwe wa nyama, a na elula so sina si humako ka mtumbuluko wakwe wonewo.” (Vag. 6:7, 8) Wa li wona lisima lo vayilela misakano ayi yi kuzetelako ati Jehovha a ti nyenyako!—Mas. 97:10.

15. Ngu yihi ningo ayi Jehovha a nga hi ninga yona?

¹⁵ Vathu vo tala va Jehovha va tidila ngu kuxalela JW Broadcasting^®, i ku txitxhi txa TV ya internet. Mwanathu wu a dhanwako ku i Mariliyn a khene: “JW Broadcasting ya ni vhuna kumana litsako, ni nga xalela o va txi ni txi lavako nguko sotshe nzinene. Ni di ni dikhodho, ni xalela miwomba-wombo. Eto ti ni maha ni ti wona ni di hafuhi ni Jehovha ni sengeletano yakwe. JW Broadcasting yi txitxile ngutu wutomi wangu.” Ina awe wa xalela ningo yiya ya Jehovha? Kuleka mlongoloko wa mtxima ni mtxima, ka JW Broadcasting ku ni so engisela ni tindando ati u nga ti engiselako ngu mbimo yi u yi lavako.

16-17. Ngu kutxani hi di fanete hi ti wonela ka mbimo yi hi yi hetako hi txi sakana? Hi nga mahisa kutxani toneto?

¹⁶ Hi na tiwonela to hi sawula misakano yihi, kambe hi na tshumela hi wona to hi heta mbimo muni ka yona. Hi si ti woneli, hi nga heta mbimo yo tala hi txi sakana kupinda yo thumela Jehovha. Timhaka to wona mbimo ayi va yi hetako va txi sakana, vamwani ta va peka. Abigail a ku ni 18 wa malembe a khene: “Kuxalela Broadcast ta ni vhuna magwito ka ditshiku loko ni di karate. Kambe ngako ni si tiwoneli, ni nga heta mawora ni txi xalela.” Mphya mmwani i ku Samuel a khene: “Yimwani mbimo ni xalela tivhidhiyo to koma ka internet. Ni khatisa ti to na nga xalela yimweyo dwe, se ni gwita ni xalela ya wumbidi, ya wuraru ndiyole na tsula.”

¹⁷ Hi nga si kotisa kutxani ku tiwonela ka mbimo yi hi yi hetako ka misakano? Txo khata, hi fanete hi wona to i mbimo muni hi yi hetako hi txi sakana. Ngu kutxani u si duketi  kubhala ati ti humelelako ngu divhiki? Bhala ti to u heta mawora mangahi u txi xalela TV, u di ka internet, ni kusakana ngu fone yako. U txi wona to mbimo yi u yi hetako njingi ngutu, zama kumaha txiemiso. Sawula mbimo yo maha ta tinene ngutu, u gwita u tivekela mbimo yo sakana. Kombela Jehovha e kuvhuna to u maha ati u nga bhala. U txi maha toneto u na mana mbimo ya gondo ya Bhiblia ya m’thu apune, wukhozeli wa mwaya, kululamisela mitshangano ni kutxhumayela ni kugondisa. U na tshumela u tikhulula ko tiwona mnando wo sakana ni mbimo.

18-19. Hi nga tikombisisa kutxani ti to hi tiningetete ka Jehovha?

¹⁸ Msana ko bhala mayelano ni magwito a ditiko da Sathani ni ngu ta mafu a maphya aya ma tako, mpostoli Pedro a ti khene: “Vo randeka, na mi txi rinzela simaha siya, ti karateni kufela ku ene a txi ta mi mana mi di basile, mi singa ni txisolo, kambe a ne ta mi mana mi di ni kudikha.” (2 Pedro 3:14) Ngako hi txi engisa txialakanyiso txonetxo, hi tikaratela kuhanya ni kukhozela Jehovha ngu nzila yi a yi lavako, hi kombisa to ha mu randa ngu mbilu yotshe.

¹⁹ Sathani ni ditiko dakwe va na simama ve zama ku hi tsulupeta kasi ku hi si thangetisi timhaka ta Jehovha. (Luka 4:13) Kambe, hi na mbi leka txilo mwendo m’thu e maneka masoni ka Jehovha ka wutomi wathu. Hi tiemisete ku tiningetela ka Jehovha dwe, hi m’randa ngu mbilu yathu yotshe!