1. Jehovha a nga maha txani ti to e hetisisa txikongomelo txakwe?

JEHOVHA a nga txitxa e ti maha ova ti a ti lavako ti to e hetisisa txikongomelo txakwe. Ku ni mbimo yi Jehovha a nga ti maha Mgondisi, Mthaveleli ni Mtxhumayeli wa mahungu a manene, kambe ku ngadi ni timwani to tala. (Isaya 48:17; 2 Vak. 7:6; Vag. 3:8) Hambi keto, mbimo yo tala a thumisa vathu ti to e maha ati a ti lavako. (Mat. 24:14; 28:19, 20; 2 Vak. 1:3, 4) Jehovha a nga hi ninga wutxhari ni mtamo awu hi wu lavako ti to hi va ati ti lavekako kasi kuhetisisa kuranda kwakwe. Sigondi simwani si pfisisile ti to, kupatanisa totsheleleto ti tsimbitisana kwati ni txhamuselo ya ditina dakwe.

2. a) Nji txani txi nga hi mahako hi kana-kana ti to Jehovha wa hi thumisa? b) Hi na gonda ngu txani ka gondo yiya?

² Hotshethu ha tilava kuthumiswa ngu Jehovha, kambe vamwani va nga kana-kana ti to Jehovha wa va thumisa. Ngu kutxani? Nguko va pimisa to va nge sikoti kumaha to tala ngu mhaka ya tanga, siemo mwendo wusikoti. Kasi vamwani va nga wona to ati va mahako konkuwa ti lungile, va si khatali ngu txilaveko txo maha to tala. Ka gondo yiya, hi na bhula ngu nzila yi Jehovha a hi longelelako ngu yona mmweyo ngu mmweyo kasi ku hi kota kuhetisisa txikongomelo txakwe. Hi na gwita hi xolisisa sikombiso sa mu ka Bhiblia sa nzila yi Jehovha a nga ninga malanda akwe a majaha ni vavasikati minavelo yo xuva kuthuma. Ngu magwito hi na wona to hi nga mu lekisa kutxani Jehovha e hi thumisa.

3. Ngu kuya ngu Vafilipiya 2:13, Jehovha a nga hi ningisa kutxani kuxuva kuthuma?

³ Lera Vafilipiya 2:13. * Jehovha a nga maha to hi xuva kuthuma. A nga ti mahisa kutxani? Ti nga maha hi wona to ku ni to kari ti lavako kumahwa dibanzani, mwendo ku di ni mwanathu wo kari a lavako txivhuno. Mwendo ku nga lerwa dipasi mitshanganoni di txi ta ngu Bhetele di txi womba to ku ni mu ku ku ni txilaveko. Hi txi pfa toneto, hi nga tiwotisa tiya: ‘Ni nga vhunetisa kutxani?’ Mwendo ti nga maha hi di ningilwe mthumo wo karata, se hi si tizivi to hi na sikota ku wu maha ngu nzila ya yinene. Wumwani mkama hi nga lera ndimana yo kari amu ka Bhiblia, se hi gwita hi tiwotisa tiya: ‘Ni nga ti thumisisa kutxani tiya ti to ni vhuna vamwani?’ Jehovha a na mbi hi sungelela ti to hi maha to kari. Kambe a txi wona ti to ha navela kumaha to kari, Jehovha a nga hi ninga minavelo yo xuva kuthuma.

4. Jehovha a nga hi ningisa kutxani mtamo wo thuma?

⁴ Jehovha a nga tshumela e hi ninga mtamo wo thuma. (Isaya 40:29) A nga hi ninga moya wo sawuleka ti to hi tshukwatisa wusikoti awu hi ku nawo. (Eksodha 35:30-35) Ngu kuthumisa sengeletano yakwe, Jehovha a nga hi gondisa kumaha mthumo wo kari. Loko u di ningilwe mthumo awu wu kukana-kanisako, kombela txivhuno. U nga thave kukombela “mtamo . . . wa hombe” ka Tate wathu wa nzumani awu a ku ni wuha. (2 Vak. 4:7; Luka 11:13) Bhiblia yi ni sikombiso so tala sa vavamna ni vavasikati ava Jehovha a nga va longelela ngu kuva ninga minavelo ni mtamo wo thuma. Mbimo yi hi gondako ngu sikombiso soneso, duketa kualakanya ngu tinzila ti nawe Jehovha a nga kuthumisako ngu tona.

5. Hi gonda txani ka nzila yi Jehovha a nga thumisa ngu yona Mosi ti to e khulula vathu vakwe?

⁵ Jehovha a mahile ti to Mosi e va mkhululi wa Vaisrayeli. Kambe a mu thumisile ngu mbimo muni? Ina ive ngu mbimo yi Mosi a nga tipfa a txi faneleka msana ko a di “gondisilwe wotshe wuzivi wa Vaegipta”? (Mith. 7:22-25) Ahim-him, a mu thumisile msana ko va a di m’vhuni kuva wo tiveka hahatshi ni kutiñola. (Mith. 7:30, 34-36) Jehovha a ningile Mosi txibindi txo ya womba-womba ni mkoma wa hombe wa Egipta. (Eks. 9:13-19) Hi gonda txani ka nzila yi Jehovha a nga thumisa Mosi ngu yona? Hi gonda to Jehovha a thumisa ava va zamako kuetetela tifanelo takwe ni va va thembako kuningwa mtamo ngu ngene.—Vaf. 4:13.

6. Hi gonda txani ka nzila yi Jehovha a nga vhuna ngu yona Bharzilayi ti to e vhuna Mkoma Dhavhidha?

⁶ Ku di gumile malembe o tala, Jehovha a thumisile Madhala mmwani a nga ti dhanwa ku i Bharzilayi ti to e vhuna Mkoma Dhavhidha. Davhidha ni vathu vakwe va ti ni ‘nzala, va ti karate ni ditora’ mbimo yi va nga ti tutuma Abhisalome mwana Dhavhidha. Madhala eneyo a tiningetete ti to e vhuna Dhavhidha ni vathu vakwe. Bharzilayi kha pimisa ti to aku a nga kumba, asi ngadi ni txivhuno ka Jehovha. Kuhambana ni toneto ene a thumisile asi a nga ti naso ti to e vhuna vathu va Txizimu. (2 Sam. 17:27-29) Hi gonda txani? Ku si nga ni mhaka ni tanga yathu, Jehovha a nga hi thumisa ti to hi vhuna  mwanathu awu a ku ka txilaveko, wa kule mwendo wa hafuhi, awu a ku ni txilaveko txo kari. (Mav. 3:27, 28; 19:17) Hambi i di ti to hi nge sikoti ku va khatalela ngu mbimo ni wukhalo awu wu fanelako.—2 Vak. 8:14, 15; 9:11.

7. Jehovha a mu thumisile ngu nzila yihi madhala Simiyoni? Matimu onewo ma hi tsanisa ngu nzila yihi?

⁷ Jehovha a thembisile Simiyoni i nga ti madhala mmwani wa Jerusalema, to a na mbi fa a si se wona Mesiya. Txithembiso txonetxo txi mu tsakisile ngutu Simiyoni, ngako a nga ti ti emete i di kale kuwona Mesiya. Jehovha a hakete likholo ni kutimisela ka Simiyoni. Ditshiku dimwani “a to yiswa Dithepeleni ngu moya wo sawuleka.” Ene a to wona mwanana Jesu, se Jehovha a thumisile Simiyoni ti to e womba wuprofeti mayelano ni mwanana awu a ndi no va Kristu. (Luka 2:25-35) Hambiku ti wonekako nga Simiyoni a fite na Jesu a si se khata kutxhumayela, ene a ti tsakile ngu nzila yi Jehovha a nga mu thumisa ngu yona, ni ku mbimo yi yi tako a na ta hi gela matimu o tala! Ka mafu a maphya, Simiyoni a na ta wona nzila yi wukoma wa Jesu wu no katekisa ngu yona vathu ha mafuni kotshe. (Gen. 22:18) Nanathu, hi nga tsaka ngu lungelo yihi ni yihi ayi Jehovha a hi ningako ka mthumo wakwe.

8. Jehovha a nga hi thumisisa kutxani kufana ni Bharnabhasi?

⁸ Ka mbimo yile ya vapostoli, ku ti ni dijaha dimwani da wuha di nga ti dhanwa ku i Josefa di nga tiningela ti to di thumiswa ngu Jehovha. (Mith. 4:36, 37) Aku Josefa a nga ti ti karatela kutsanisa vamwani, vapostoli va ti m’dhana ku i Bharnabhasi, ti wombako ku “mwanana wu i ku Mthaveleli.” Ngu txikombiso, mbimo yi Sawule a nga va Mkristu, vanathu va vangi va ti ngadi va txi m’thava ngu mhaka ya mahanyelo akwe a kale o xanisa dibanza. Kambe Bharnabhasi a tsanisile Paulo ni ku m’vhuna, Paulo a bongile ngu toneto. (Mith. 9:21, 26-28) Ku ni mbimo yi madhota a Jerusalema ma nga wona txilaveko txo tsanisa vanathu va Antiyokiya wa Siriya. Va nga va va di rumete mani? Ene Bharnabhasi! Va ti sikoti kusawula. Bhiblia yi khene Bharnabhasi a to “va laya votshe ti to ve tsanisela ka Mkoma ngu timbilu to khutala.” (Mith. 11:22-24) Ngu kufana, nyamsi Jehovha a nga hi vhuna ti to hi va “mwanana wu i ku Mthaveleli” ka vanathu. Ngu txikombiso, a nga hi thumisa ti to hi thavelela ava va nga felwa. Mwendo e hi maha hi endela mwendo kufonela m’thu wu a lwalako, mwendo aku ni dikhodho ti to hi mthavelela. Ina awe u na tumela kuthumiswa ngu Jehovha kufana ni Bharnabhasi?—1 Vat. 5:14.

9. Hi gonda txani ka nzila yi Jehovha a nga vhuna ngu yona Vasily?

⁹ Jehovha a vhuni mwanathu wu a dhanwako ku i Vasily ti to e va didhota di di ku ni wusikoti. Vasily a sawutwe ku e va didhota a di ni 26 wa malembe, ti mu dhukisile ngu kuthava to a nge sikoti kuvhuna dibanza ngu didhawa da moya, ngutu-ngutu ku e vhuna vanathu ka siemo so karata. Hambi keto, a vhunilwe ngutu ngu mwanathu awu i ku kale i di didhota kumweko ni kuya ka Txikolwa txa Wuthumeli wa Mfumo. Vasily a ti karatete kutshukwatisa. Ku ni mbimo yi a nga bhaletela mxaxamelo wa makungo akwe. Mbimo yi a nga ti ma kota ku ma hetisisa, dizowa di ti ya di tsula. Konkuwa a khene: “Ati kale ti nga ti ni dhukisa, konkuwa ti ni ninga litsako. Ngako Jehovha a txi ni vhuna kumana m’bhalo wa wunene wo vhuna mwanathu dibanzani, ti ni tisela litsako.”  Vanathu va txiwamna, ngako mi txi tiningela kufana ni Vasily ti to mi thumiswa ngu Jehovha, ene a nga mi ninga wusikoti wo maha to tala dibanzani.

10. Abhigayeli a mahile txani? U gondile txani ka txikombiso txakwe?

¹⁰ Ku ni mbimo yi Dhavhidha ni majaha akwe va nga ti si wu dyi wu relela ngu Sawule. Va ti lava txivhuno. Va kombete sakudyanyana ka dijaha dimwani do ganya di nga ti dhanwa ku i Nabhali. Kha va thava kukombela nguko va ti vhikete sifuyo sa Nabhali txitingani. Aku a nga ti ni likungo, Nabhali a to lamba. Eto ti henyisile ngutu Dhavhidha ha koza e lava ku ya daya Nabhali ni majaha akwe otshe. (1 Sam. 25:3-13, 22) Kambe msikati wa Nabhali i ti wo tshura ni ku va ni mapimo. Ngu txibindi, a to khizama mikondoni ka Dhavhidha e mu kombela ku a si ti laveli mnando wa mnoha ngu daya Nabhali ni majaha akwe. Kha kwati a layile Dhavhidha ti to e leka timhaka manzani ka Jehovha. Mapswi a Abhigayeli a kutiveka hahatshi ma gwesile mbilu ya Dhavhidha. A tekete ku ti wona to wule wamsikati a to rumelwa ngu Jehovha. (1 Sam. 25:23-28, 32-34) Abhigayeli a ti kulisile tifanelo ati ti nga maha to e thumiswa ngu Jehovha. Ngu kufana, Vanathu va txisikati ava va ku ni mapimo va nga thumiswa ngu Jehovha ti to ve tsanisa timwaya tawe ni vamwani dibanzani.—Mav. 24:3; Tit. 2:3-5.

11. Vanana va mahorana va Salumi va mahile txani? Nyamsi mba mani va etetelako txikombiso txawe?

¹¹ Msana ka malembe o tala, vanana va mahorana va Salumi va ti hagari ka vathu ava Jehovha a nga va thumisa ti to ve vhuneta ka kuwuseta maguma a Jerusalema. (Neh. 2:20; 3:12) Hambiku tate wawe i nga ti nduna, vanana va Salumi va tiningetile ku ya vhuneta ka mthumo wo karata. (Neh. 4:15-18) Vona va si fani ni vafumeli va Tekowa, nguko vona “kha va wuleta tithamo tawe ka mthumo”! (Neh. 4:15-18) Alakanya ati vanana va mahorana va Salumi va nga tsakisa tona mbimo yi mthumo wu nga guma ngu 52 wa masiku dwe! (Neh. 6:15) Ka masiku a ngweno, ku ni vavasikati va va tsakelako kuvhuneta ka mthumo wo sawuleka, i ku mthumo wo aka ni kululamisa makhalo ya ma nga ningetelwa ka Jehovha. Wusikoti wawe, litsako lawe ni wuthembeki wawe nza lisima ti to ve humelela ka mthumo wawe.

12. Jehovha a nga hi thumisisa kutxani nga ti a nga mahisa tona ka Tabhita?

¹² Jehovha a mahile ti to Tabhita e talelwa “ngu mithumo ya wumbilu ni wuha,” ngutu-ngutu ka tinoni. (Mith. 9:36) Ngu toneto, mbimo yi a nga fa, va vangi va dite. Kambe va tsakile ngutu mbimo yi mpostoli Pedro a nga mu wusa. (Mith. 9:39-41) Hi gonda txani ka Tabhita? Ngu tiya: Mwendo hi vanana, mwendo hi vahombe, hi vavamna mwendo vavasikati, hotshethu hi nga maha to kari ti to hi vhuna vanathu.—Vaheb. 13:16.

13. Jehovha a mu thumisisile kutxani mwanathu mmwani awu a nga ti ni dizowa? A gwitile e womba txani?

¹³ Ruth i ku mwanathu mmwani wa txisikati a nga ti ni dizowa a ti lava kumaha murumiwa. Mbimo i nga ti ngadi mwanana, a ti tutuma-tuma ngu mti ni mti a txi ningela siphephana. A khene: “Mthumo wuwa wu ti ni tsakisa.” Kambe, kubela mtini ka m’thu ni mu gela ngu ta Mfumo wa Txizimu ti txi ni karatela. Hambiku a nga ti thava, Ruth a vite nyaphandule wa mbimo yotshe a di ni 18 wa malembe. Ngu 1946, a yite ka Txikolwa txa  Giliyadhi se e gwita e thumela Hawaii ni Japão. Jehovha a mu thumisile ngu nzila ya hombe ti to e txhumayela mahungu a manene ka matiko onewo. Mbimo yi a nga ti ni kona mu ka 80 wa malembe a txi thumela Jehovha, Ruth a ti khene: “Mbimo yotshe Jehovha wa ni tsanisa. A ni vhunile kuxula dizowa dangu. Ngu ditshuri na tsaniseka ti to a nga thumisa mani ni mani awu a mthembako.”

14. Ngu kuya ngu Vakolosa 1:29, u fanete u maha txani ti to u thumiswa ngu Jehovha?

¹⁴ Kukhukhela kale, Jehovha a thumisile malanda akwe ngu tinzila to hambana-hambana. Awe a na kuthumisisa kutxani? Ti na ya ngu ti u tiningelisako tona. (Lera Vakolosa 1:29.) Ngako u si ti lambiseli, Jehovha a nga maha to u va mtxhumayeli wo hiseka, mwendo timwani ati ene a ti lavako ku kuthumisa ka tona.

15. Ngu kuya ngu 1 Timoti 4:12, 15, vaphya va fanete ve kombela Jehovha e va vhuna kumaha txani?

¹⁵ Se anu ko mazambi mi nga bhabhatiswa se mi ku va hombiyana? Ku ni txilaveko txa hombe txa mazambi ti to me khatalela silaveko sa dibanza kota malanda a wuthumeli. Ka mabanza o tala, madhota mangi kupinda malanda a wuthumeli. Ina anu vaphya, kha mi ti lavi kuthuma to tala dibanzani? Vamwani vanathu va tolovela kuwomba tiya: “Aku ni ku muhuweleli, kwangu ti enete.” Ngako nawe u txi womba toneto, kombela Jehovha e kuvhuna ti to u sakulela minavelo yo va dilanda da wuthumeli, u thumisa mtamo wako wotshe ti to u thumela Jehovha. (Ekl. 12:1) Hi lava kuvhunwa ngu nganu!—Lera 1 Timoti 4:12, 15.

16. U nga kobela txani ka Jehovha? Ngu kutxani?

¹⁶ Jehovha a nga kuthumisa ka totshe ati ene a ti lavako. Ngu toneto, mkombele ti to e kuninga kuxuva kumaha mthumo wakwe, ni ku e kuninga mtamo awu u wu lavako. Mwendo u mphya mwendo u wa hombe, thumisa mbimo yako, mtamo, wusikoti ni si u ku naso ti to u dhumisa Jehovha. (Ekl. 9:10) U txi thuka u ningwa mkhanjo wo maha to tala ka mthumo wa Jehovha, u nga tekeli kulamba ngu kuthava to u na mbi sikota. I lungelo ya hombe ka hotshethu kuthumela Jehovha ku si nga ni mhaka ni ku hi maha to tala mwendo ta tidotho!