ALAKANYA ngako awu a thumisanako ni mitxhini yo wona matxelo a txi wona to aha ka mtxhini ku woneka mfota. Mfota ewo mbwa txihuhuri txa hombe txi wonekako nga txi hafuhi ni wukhalo wu ku ku ni miti yo tala. Ngu txikuluveta e ningela txiziviso ka vathu aku a khatalako ngutu ngu vona.

Ngu kufana, Jehovha a bhasopisa vathu ha mafuni ka “txihuhuri” txa hombe ngutu kupinda sotshe asi si tumbulwako ngu vawoni va ta matxelo. A mahisa kutxani toneto? Ni ku hi nga tsaniseka ngu nzila yihi to ene kha jumi vathu? Ti to hi mana xamulo, he khati ngu kuwona sialakanyiso sa Jehovha ka mbimo ya kale.

Ka mbimo ya kale, Jehovha a bhasopisile vathu mayelano ni “txihuhuri,” mwendo wulamuli wakwe, awu wu ndi no tela ava kudotho-kudotho va si engisiko milayo yakwe. (Jer. 30:23) Ka makhambi otshe, ene a zivisile ava va ku ha ka phango ku di ngadi ni mbimo e tshumela e va gela ati va fanelako ku ti maha ngu kutsimbitisana ni kudhunda kwakwe. (2 Vafu. 17:12-15; Neh. 9:29, 30) Ene a thumisile malanda akwe o thembeka ti to me zivisa wulamuli wa Txizimu ti to vathu ve huluka ni ku wona to mbimo se yi tsute.—Amosi 3:7.

Nowa i ti mmweyo wa malanda o thembeka a Txizimu. Ene a bhasopisile vathu ava va nga ti ni mahanyelo a nzambwa ni mazunga mayelano ni Ndambi ayi yi nga txi ta. (Gen. 6:9-13, 17) Ene a va gete ati va nga ti fanete ve maha ti to ve huluka, eto ngu ti ti nga maha e dhanwa ku “mruruteli wa wululami.”—2 Pedro 2:5.

Ku si nga ni mhaka ni mizamo ya Nowa, vathu va mbimo yile va kanyisile txialakanyiso txa Txizimu. Va kombisile to va si nga ni likholo. Ngu toneto mbimo yi ku nga “hoka ndambi, yi nga khukhula votshe.” (Mat. 24:39; Vaheb. 11:7) Mbimo yi magwito awe ma nga hoka, va si na kuwomba to Txizimu txo va juma.

Ka yimwani mbimo, Jehovha a bhasopisile vathu ku ti sate kudotho ti to kuhoka “txihuhuri” txa wulamuli wakwe. Hambi keto, ene a mahile to vathu ve mana mbimo yo enela yo wona to va na maha txani. Ka mbimo yi a nga tisa Digumi da Mitungo ditikoni ka Egipta, Jehovha a va bhasopisile. Ngu txikombiso, Jehovha a rumete Mosi ni Aroni ti to veya bhasopisa Faro ni malanda akwe mayelano ni dikhombo da maralala. Aku maralala ma ndi no khata mangwanani ka kona, Txizimu txi va ningile mbimo yo ve mana wukhalo wo ya barama. Bhiblia yi kha yona: “Hagari ka mahalamu a Faro, avale va nga thava dipswi da MKOMA, va to kuluveta ve wuyisa tinyumbani sithumi sawe kumweko ni mitxhambi yawe ya sifuyo. Aniko, avale va nga mbi khatala ngu dipswi da MKOMA, va to leka sithumi sawe ni mitxhambi yawe ya sifuyo hahanze.” (Eks. 9:18-21) Ti ha kubasani to Jehovha a va bhasopisile kha kwati, kasi ku ava va nga engisa ngu txikuluveta ve huluka ka phango ya hombe ngutu.

Ka mtungo wa wugumi, Faro ni malanda akwe va zivisilwe. Ngu wuphukuphuku va kanyisile txialakanyiso. (Eks. 4:22, 23) Ngu toneto, vanana vawe va matiwula va fite. Hi nga wona dikhombo da kona! (Eks. 11:4-10; 12:29) Ina va di engisile na mbimo yi si se tsula? Ina! Ngu txikuluveta Mosi a zivisile Vaisrayeli ngu dikhombo da mtungo wonewo ni kuva gela ati va nga ti fanete kumaha kasi kuhulukisa timwaya tawe. (Eks. 12:21-28) Mbathu vangahi va nga engisa txialakanyiso? Kualakanywa to, timiliyoni tiraru ta vathu, kupata ni Vaisrayeli ni ‘vathu va tixaka to hambana-hambana’ i ku Vaegipta ni vamwani  ava i si ngako Vaisrayeli, va humile Egipta ve huluka wulamuli wa Txizimu.—Eks. 12:38.

Nga ha hi ti wonako ka sikombiso siya, mbimo yotshe Jehovha a mahile to vathu ve va ni mbimo yo enela ti to ve engisa sialakanyiso sakwe. (Dhewut. 32:4) Nji txani txi nga ti maha to Jehovha e va bhasopisa? Mpostoli Pedro a ti khene Jehovha “kha ti lavi ti to ni wammweyo a txi lova, aniko a lava ti to votshe ve hunduluka.” (2 Pedro 3:9) Ngu ditshuri, Jehovha a ti khatala ngu vathu. Ene a ti lava to vona ve tilaya ve engisa txilayo txakwe na ku si se bwaka wulamuli wakwe.—Isaya 48:17, 18; Var. 2:4.

Ni nyamsi, vathu votshe va fanete ve engisa bhasopa ya txikuluveta ayi yi huwelelwako ha mafuni kotshe. Mbimo yi a nga ti ha mafuni, Jesu a bhasopisile ti to matsimbitiselo awa a sa mafu ma ndi na loviswa ngu mbimo ya ‘xanisa ya hombe.’ (Mat. 24:21) Mayelano ni kulamula koneko ka mbimo yi yi tako, ene a txhamusete to tala mayelano ni ti valondeteli vakwe va ndi no manana nato ni ku ti wona ngako mbimo yoneyo yi txi tshuketela. Jesu a womba-wombile ngu simahakalo asi hi si wonako si txi humelela nyamsi wa ditshiku ha mafuni kotshe.—Mat. 24:3-12; Luka 21:10-13.

Ngu kutsimbitisana ni wuprofeti wonewo, Jehovha a alakanyisa vathu to ve sawula ku mu thumela. Ene a navela to vathu va va engisako ve hanya wutomi wa wunene konkuwa ve tshumela ve mana makatekwa a mbimo yi yi tako ka mafu a maphya o lulama. (2 Pedro 3:13) Ti to hi kota ku va ni likholo ka sithembiso sakwe, Jehovha a ningete madungula aya ma hanyisako, i ku “Evhangeli ya Mfumo,” ayi Jesu a nga khene yi ndi na “huwelelwa ka dotshe ditiko, kasi kumahwa wufakazi ka yotshe mifumo.” (Mat. 24:14) Txizimu txi vekile vakhozeli va txona va ditshuri kasi kuningela “wufakazi” wuwa, mwendo kutxhumayela madungula awa a Txizimu, kona mu ka 240 wa matiko. Jehovha a lava to vathu vo tala ve tumela txialakanyiso se ve huluka ka “kukhundumusela” ka wulamuli wakwe wo lulama.—Zef. 1:14, 15; 2:2, 3.

Mhaka ya lisima hi nga ti to Jehovha ina wa ninga mbimo yo enela ti to vathu ve kombisa kuengisa sialakanyiso sakwe. Se hi ti woni ti to mbimo yotshe ene wa ningela mbimo. Se txiwotiso txa lisima ngu txiya: Ina vathu vana tumela bhasopa ya Txizimu ku di ngadi ni mbimo kani? Kota vawombi va madungula a Txizimu, he simameni hi vhuna vathu vo tala nga ha hi nga kotako ngu kona ti to ve huluka magwito a matsimbitiselo awa a sa mafu.