1. Nji txani txi hi kholwisako ti to hi hanya ka “masiku a kugwitisa”?

INA awe u velekilwe ku di pindile 1914? I di ina, ti womba to kukhukhela u velekwa u hanya ka mbimo ya “masiku a kugwitisa” a matsimbitiselo a sa mafu. (2 Tim. 3:1) Hotshethu ti nga maha se hi di pfite simahakalo si Jesu a nga si womba mayelano ni mbimo yiya. Sona si pata tiyimbi, tinzala, kuzinginikela ka hombe ka mafu, mitungu, kupwateka ka wululami ni kuxaniswa ka vathu va Jehovha. (Mat. 24:3, 7-9, 12; Luka 21:10-12) Hi tshumela hi wona vathu va txi tiñola ngu nzila yi yi nga wombwa ngu mpostoli Paulo. (Wona dibhokiso di di ku “ Ati vathu va nga zumbisa tona konkuwa.”) Kota vakhozeli va Jehovha, ha kholwa ti to hi hanya magwito ka “masiku o gwitisa.”—Mika 4:1.

2. Ngu sihi siwotiso sa lisima asi hi lavako tixamulo ta sona?

² A ku se kupindako malembe o tala ku di pindile 1914, ti komba to konkuwa hi hanya magwito ka “masiku a kugwitisa.” Aku se magwito ma ku hafuhi, ti lava hi ziva tixamulo ta siwotiso siya sa lisima: Ku na humelela txani magwito ka “masiku a kugwitisa”? Nji txani atxi Jehovha a emelako ku hi maha hi txi ngadi hi txi emela simahakalo soneso?

3. Ngu kuya ngu 1 Vatesalonika 5:1-3 matiko ma na huwelela txani?

³ Lera 1 Vatesalonika 5:1-3. Ahawa, Paulo a womba-womba ngu “ditshiku da Mkoma.” Ka ndimana yiya, kuwomba mbimo yi “Bhabhilona wa Hombe,” i ku wukoma wa wukhongeli wa makuhu a no khata kuxaselwa, ku gwita ngu Armagedhoni. (Mtu. 16:14, 16; 17:5) Na ku si se khata “ditshiku”  donedo, matiko ma na huwelela “Kudikha ni kukhaliseka.” Vathangeli va matiko va thuka ve thumisa mapswi o nga onewo ngako va txi womba-womba ngu kuwuyetela kupfana hagari ka matiko. * Hambi keto, kuhuwelelwa kuwa ka “kudikha ni kukhaliseka” aku Bhiblia yi ku wombako ku na va ku di hambanile. Ngu kutxani? Mbimo yi toneto ti humelelako, ti nga maha vathu ve pimisa to vathangeli va ditiko va sikotile kumaha to ku va ni kukhaliseka ni kuzumbiseka ha ditikoni. Kambe ngu ditshuri, ku na gwita ku va ni “dikhombo da txidhukisa” i ku kukhata ka “kuxaniseka ka hombe.”—Mat. 24:21.

4. a) Ngu tihi ati hi emelako ku ti wona ngu kuhuwelelwa ka “kudikha ni kukhaliseka”? b) Ngu tihi ati hi ti zivako ngu toneto?

⁴ Ka mhaka ya kuhuwelelwa ka “kudikha ni kukhaliseka” timwani ta kona ha tiziva. Kambe, timwani kha hi tizivi. Kha hi tizivi to nji txani txi no maha to vakoma ve za ve womba mhaka yiya ni ti va no huwelelisa tona. Nem kha hi tizivi to va no huwelela kumweko dwe mwendo va no maha siziviso so tala. Hambi keto, ati hi tizivako ngu tiya: Kha ha fanela kuxengwa hi pimisa to ngu ditshuri vakoma se va tisile kudikha ha mafuni. Hahanze keto, etxo ku no va tximahakalo atxi hi nga zumba hi di txi rinzete. Njikombiso txo “ditshiku da Mkoma” se di lava kukhata!

5. Dibhuku da 1 Vatesalonika 5:4-6 di hi vhunisa kutxani ti to hi lungekela “ditshiku da Mkoma”?

⁵ Lera 1 Vatesalonika 5:4-6. Txialakanyiso txa Paulo txi hi komba to hi nga tsaniseka ngu nzila yihi to hi lungekela kwati kuta ka “ditshiku da Mkoma.” Kha ha fanela hi ‘otela nga vamwanyani.’ Hi fanete ‘ti wonela’ hi zumba hi di tute maso. Ngu txikombiso, ti lava hi tiwonela ka phango yo funya wuthembeki wathu ngu kupateka ka tipolitika ta ditiko. Se hi txo ti beta ka timhaka toneto, hi na va hi txi ti maha “va ditiko.” (Joh. 15:19) Athu ha tiziva to i Mfumo wa Txizimu basi wu no tisa kudikha ha mafuni kotshe.

6. Ngu txihi txivhuno txi hi nga ningako vamwani? Ngu kutxani?

⁶ Kha ta enela kuzumba basi hi di ma tute. Ti lava hi vhuna vamwani ti to ve ma tula ka ti Bhiblia yi ti wombako mayelano ni mbimo yi yi tako. Hi nga divaleni to yi txi khata xanisa ya hombe, hi nga ngadi mbimo yo vathu ve khata kuthumela Jehovha. Se ngu toneto mthumo wathu mbwa txikuluveta ngutu! *

7. Jehovha a emete ku hi maha txani ka mbimo yi yi nga sala?

⁷ Ka yona mbimo yi yi nga sala kasi ku “ditshiku” da Jehovha dikhata, ene a emete ti to hi simama hi ñoleka ngu mthumo wo txhumayela. Ti lava hi tsaniseka to hi maha to tala “ka mthumo wa Mkoma.” (1 Vak. 15:58) Jesu  a wombile ati hi ndi no timaha. Mbimo yi a nga womba-womba ngu timhaka ta lisima ati ti ndi no humelela ka masiku a magwito, a ti khene: “Kambe ti fanete ti to Evhangeli yi txhumayelwa kuthanga ka otshe matiko.” (Marku 13:4, 8, 10; Mat. 24:14) Se alakanya ngu tiya: Ditshiku ni ditshiku u yako thembweni, u hetisisa wuprofeti wa mu ka Bhiblia!

8. Ngu yahi makulelo a mthumo wo txhumayela?

⁸ Hi nga khathu txani ngu makulelo a mthumo wo txhumayela Mfumo? Dilembe ni dilembe, wona wa simama wu kula. Ngu txikombiso, alakanya ngu kuengeteleka ka mtengo wa vatxhumayeli va Mfumo ha mafuni kotshe ka masiku awa a magwito. Ngu 1914, ku ti ni 5.155 wa vahuweleli ka 43 wa matiko. Nyamsi ko? Ku ni 8 wa timiliyoni ni hafu ta vahuweleli ka 240 wa matiko! Hambi keto, hi nga ti to se hi to heta mthumo. Hi fanete hi txhumayela Mfumo wa Txizimu ngako i ku wona wu no lulamisa sikarato sa vathu votshe.—Mas. 145:11-13.

9. Ngu kutxani hi di fanete hi simama hi txhumayela mahungu a manene?

⁹ Mthumo wo txhumayela kha wu na mbi ema kala Jehovha a txi khene xega. Ku sate mbimo muni ti to vathu ve ziva Jehovha ni Jesu Kristu? (Joh. 17:3) Ahanti. Ati hi ti zivako ngu ti to kala xanisa ya hombe yi khata, wuhi ni wuhi a ku “ni fanelo ya wutomi wo mbi guma” ti nga koteka ku e tumela mahungu a manene e sawula kuthumela Jehovha. (Mith. 13:48) Hi nga va vhunisa kutxani vathu vonevo na di si se va swela?

10. Ngu txihi txivhuno atxi Jehovha a hi ningako ti to hi kota kutxhumayela vathu?

¹⁰ Jehovha a thumisa sengeletano yakwe kasi ku hi ninga sotshe si si lavekako ti to hi gondisa vathu ditshuri. Ngu txikombiso, divhiki ni divhiki ha gondiswa ka mtshangano wa hagari ka divhiki. Ka wona hi gondiswa kuziva ati hi fanelako ku ti womba hi txi endela m’thu do khata ni ka diendo do wuyela. Hi tshumela hi gondiswa matsimbitiselo a sigondo. Sengeletano ya Jehovha yi tshumela yi hi ninga sithumiswa ka Farameti yo Gondisa. Sithumiswa soneso si hi vhuna . . .

• kukhata ngu sona mabhulo,

• kuwusa kutsakela,

• kumaha m’thu e lava kugonda to tala,

• kugondisa ngu sona ditshuri da Bhiblia,

• ku va kongomisa ka site yathu ni ka Mitshangano.

 Phela kha ta enela ku va ni sithumiswa soneso dwe. Hi fanete hi si thumisa. * Ngu txikombiso, ngako u txi gwita kubhula ni m’thu wu a nga tsakela, u txi mu siyela txiphephana mwendo direvhista, a na tana a txi sala e lera kala u txi wuya kambe. Mmwani ni mmwani a ni wutixamuleli wo simama e ñoleka ngu mthumo wo txhumayela mtxima ni mtxima.

11. Kurso ya Bhiblia ya site yathu yi mahetwe txani?

¹¹ Txikombiso tximwani txa nzila yi Jehovha a vhunako ngu yona vathu ti to ve gonda ditshuri, nja kurso ya gondo ya Bhiblia ka internet ka jw.org^®. (Bela ka ENSINOS BÍBLICOS > LIÇÕES ON-LINE.) Kurso yoneyo yi mahetwe txani? Yi mahetwe kukomba vathu ditshuri da Dipswi da Txizimu. Mtxima ni mtxima, magume a mazana a vathu ha mafuni kotshe va bela ka internet ve wona kurso yoneyo ya Bhiblia. Phela vathu vamwani va nga lamba u txi khawe u la kugonda navo Bhiblia. Ti di ngeto, va kombe site aha ku ku ni kurso yoneyo mwendo ku va rumelela link. *

12. Nji txani atxi m’thu a nga txi gondako ka kurso ya gondo ya Bhiblia ka internet?

¹² Ka kurso yo gonda Bhiblia ka internet ku ni misungu yiya: “A Bíblia e seu Autor,” “Os principais personagens da Bíblia,” ni “A mensagem da Bíblia sobre um futuro melhor.” Ka timhaka toneto, kugondwa tiya:

• Nzila yi Bhiblia yi nga vhunako m’thu ngu yona

• I mani Jehovha, Jesu, ni tingelozi

• Ngu kutxani Txizimu txi di vangile vathu

• Ngu kutxani ku di ni wubihi ni kuxaniseka

Ku tshumelwa ku gondwa ngu ti to Jehovha a na . . . 

• gumisisa kutxani kuxaniseka ni lifo,

• mahisa kutxani ti to vafi ve tshumela ve hanya kambe,

• wu vhaletisa kutxani wukoma wa vathu ngu Mfumo wa Txizimu.

13. Ina kurso ya Bhiblia ya internet yi vhaleta lulamiselo yo tsimbitisa sigondo? Txhamusela.

¹³ Kurso ya Bhiblia ya internet kha yi vhaleti lulamiselo yo tsimbitisa sigondo. Jesu a hi ningile lungelo yo maha vagondiswa. Hi emete ti to ava va tsakelako va na simama ve gonda ka internet, va txi tsakela ti va nga gonda, ve lava kugonda to tala. Toneto ti nga maha ve tumela gondo ya Bhiblia. Magwito ka gondo yimwani ni yimwani ka internet, m’thu a kombelwa kumaha txikombelo txo mana m’thu wo mu gondela Bhiblia. Ha mafuni kotshe, ditshiku ni ditshiku ha amukela sikombelo sa 230 so kombela gondo ya Bhiblia sa vathu va va nga kombela ngu internet! Kugonda Bhiblia ni m’thu, ngu tona i ku ta lisima ngutu!

14. Ngu kuya ngu txirumo txa Jesu txi ku ka Matewu 28:19, 20, hi fanete hi zama kumaha txani? Ngu kutxani?

¹⁴ Lera Matewu 28:19, 20. Mbimo yi hi tsimbitisako sigondo sa Bhiblia, ti lava hi zama ‘kumaha vagondiswa . . . , hi txi va gondisa kuvekisa totshe tiya [Jesu a nga hi] leleta tona.’ Hi lava kuvhuna vathu ve pfisisa ti to ti ni lisima kwawe ku ve sawula kuseketela Jehovha ni Mfumo wakwe. Eto ti womba kuduketa kuva vhuna ve kombisa to va tsakela ditshuri ngu kuthumisa ati va ti gondako ka wutomi wawe, ve ningetela wutomi wawe ka Jehovha ni kubhabhatiswa. Loko va si mahi eto, va nge huluki ka ditshiku da Jehovha.—1 Pedro 3:21.

15. Ngu tihi ati hi no mbi luza mbimo hi txi timaha? Ngu kutxani?

¹⁵ Nga ha ti nga kombiswa ngu kona makhatoni, hi nga mbimo ya boti yi nga sala kasi  kuguma matsimbitiselo awa a sa mafu. Ngu toneto, kha hi lavi kuluza mbimo hi txi gonda ni va va si kombisiko ti to va ti lava ku va vagondiswa va Kristu. (1 Vak. 9:26) Mthumo wathu mbwa txikuluveta! Ku ngadi ni vathu vo tala ava va ku ngadi ve lava kupfa mahungu a Mfumo di si se swa ditambo.

16. Ngu ku ya ngu Mtuletelo 18:2, 4, 5, 8, hotshethu hi fanete hi maha txani? (Wona txhamuselo ya hahatshi.)

¹⁶ Lera Mtuletelo 18:2, 4, 5, 8. Dibhuku diya di kombisa timwani ati Jehovha a tiemelako ka vakhozeli vakwe. Makristu otshe ma fanete me tsaniseka to kha ma pateki ngu txilo ka Bhabhilona wa Hombe. Ku ti lava m’thu a khatile kugonda Bhiblia i di txiro txa wukhongeli wo kari. Ti nga maha a ti sengela ka mithumo ya wona. Mwendo ku a ti humisa ni miningelo ya timale. Ngu toneto, na a si se maha muhuweleli wo mbi bhabhatiswa, a fanete e tsaniseka to kha swi e lumba wukhongeli wa makuhu. Ti nga va tinene kubhala dipasi do zivisa to a humile ka txhetxhe yile a nga ti ka yona ni ku kha swi e lumba Bhabhilona wa Hombe. *

17. Ngu yihi mithumo yo tihanyisa ayi Mkristu a fanelako ku yi vayilela? Ngu kutxani?

¹⁷ Mkristu wa ditshuri a fanete e tsaniseka to mthumo wakwe wo ti hanyisa wu kule ngutu ni Bhabhilona wa Hombe. (2 Vak. 6:14-17) Ngu txikombiso, ene a nge tumeli kutholwa ka txhetxhe yo kari. Hambi keto, Mkristu wu a nga tholwa ka koponi yo kari kha fanela e tumela kutsutiswa e ya thuma ka wukhalo wu wu seketelako wukhozeli wa makuhu. Mwendo ngako a txi ti mahela dibhindo dakwe, kha na mbi thuka e tumela ku katxhwa ka mthumo wuhi ni wuhi wu tsimbitisanako ni Bhabhilona wa Hombe. Ngu kutxani hi txi mahisa eto? Nguko kha hi lavi kuthuka hi pateka ka mithumo ni sionho sa wukhongeli wu Txizimu txi wu wonako wu sa basa.—Isaya 52:11. *

18. Mwanathu mmwani a lambisile kutxani kufunya matshina a milayo ya Bhiblia ka mthumo wakwe wo tihanyisa?

¹⁸ Malembenyana msana, mwanathu wu i ku didhota awu a ko timahela mithumo yakwe ya wuvati, dijaha di di nga ti mkatxhile to e di mahela mthumo di mu kombete ku e maha mthumo ka txhetxhe yo kari ya m’gangani ka mwanathu wule. Mwanathu wule a ti khala ku m’gela to kha tumeli mithumo ya mu titxhetxheni. Kambe dijaha dile di si nga ni nzila yimwani, nguko di si zivi m’thu mmwani wu  a nga yako e ya thuma. Hambi keto, mwanathu wule kha tumela kufunya matshina a milayo ya Bhiblia, a to lamba ku ya thuma. Ku mahekile txani? Divhiki di di nga londisela, ka dijornal da wukhalo wule kukombisilwe dijaha dimwani di txi vekela txihambano ka txhetxhe. I ti ku mwanathu wule a to tumela kuya thuma, nga i di mfota wakwe wu ku hale ka dijornal. U pimisa to vanathu va ndi na mu wonisa kutxani mwanathu wule? Jehovha ko, a di tipfisile kutxani?

19-20. a) U gondile txani ka msungo wuwa? b) Ngu tihi ati hi no gonda ka msungo wu wu londiselako?

¹⁹ Bhiblia yi womba ti to wuprofeti awu wu no londisela, ngu vakoma ve huwelela “kudikha ni kukhaliseka.” Ha bonga aku Jehovha a nga hi gondisa, ha ti ziva to matiko ma nge sikoti kuveka kudikha ko mbi na magwito. Kambe, hi fanete hi maha txani na tximahakalo txonetxo ni dikhombo da txidhukisa si si se humelela? Jehovha a lava to hi txhumayela ngutu mahungu a Mfumo ni kumaha vagondiswa vo tala. Hi si divali ku ti hambanisa ni wukhongeli wa makuhu. Tipatako kwa mbi lumba wona ni kuvayilela mithumo ayi yi nga patana ni Bhabhilona wa Hombe.

²⁰ Ku ngadi ni simahakalo simwani asi si no humelela magwito ka “masiku a kugwitisa.” Kutshumela ku va ni timwani ati Jehovha a ti lavako kwathu. Ngu sihi simahakalo sa kona ni ku ngu tihi ati Jehovha a ti lavako kwathu? Hi nga ti lulamiselisa kutxani ka totshe ati ti no humelela mbimo yi yi tako? Hi na gonda ka msungo wu wu londiselako.