1. Ngu kutxani vathu vo tala nyamsi va txi kanakana?

NYAMSI ku ni mazana-zana a titxhetxhe ati ti ti gelako ti to ti khozela Txizimu ngu nzila yi txi yi tsakelako. Ngu toneto vathu vo tala va kanakana, ve tiwotisa tiya: Ngu yihi txhetxhe ya ditshuri? Ina totshe titxhetxhe ta tsakisa Txizimu? Ina athu ha tsaniseka ti to a ti hi ti gondisako ditshuri, ni ku ina nzila ya wukhozeli ya Tifakazi ta Jehovha ngu yona yi tsakelwako ngu Jehovha nyamsi? Hi nga tsanisekisa kutxani he ti woneni.

2. Ngu kuya ngu 1 Vatesalonika 1:5, ngu kutxani Mpostoli Paulo a nga txi tsaniseka ti to a mani ditshuri?

² Mpostoli Paulo atxi tsaniseka ti to a ti mani ditshuri. (Lera 1 Vatesalonika 1:5.) Kukholwa koneko i si nga nyakholwe ngu ku mpostoli Paulo i ti m’gondi wa dipswi da Txizimu. Ene atxi kholwa ti to “yotshe Mibhalo yi pimisilwe ngu Txizimu.” (2 Tim. 3:16) Ngu tihi ti a nga ti mana mbimo yi a nga txi gonda Bhiblia? Paulo a woni txitsanisekiso txa ti to Jesu i ti Mesiya awu a nga ti thembisilwe, kambe vathangeli va wukhongeli wa txijudha va si tumeli toneto. Vathangeli vonevo va wukhongeli wa makuhu va txi womba ti to va emela Txizimu kambe mithumo yawe yi txi va kaneta. (Tit. 1:16) Kuhambana ni vakhongeli vonevo va makuhu Paulo a si sawuli ti to a na engisa tiya e leka tiya ta mu ka Dipswi da Txizimu. Ene ati ti emisete kugondisa ni kuthumisa “otshe mahungu a Txizimu.”—Mith. 20:27.

3. Ti to hi tsaniseka ku hi mani ditshuri ina ta sunga ku hi ziva tixamulo ta sotshe siwotiso? (Wona dibhokiso di di ku: “ Mipimiso ni mithumo ya Jehovha ‘nja matanda vabali.’”)

³ Vamwani va womba ti to wukhozeli wa ditshuri wu fanete ku xamula txiwotiso tximwani ni tximwani, hambi si si xamulwi  mu ka Bhiblia. Ina ta pfala toneto? A hi woneni txikombiso txa Mpostoli Paulo, ene a kuzetile Makristu kulowe ti to me “wonisisa sotshe” ni ku a tshumete e womba ti to ku ni to tala ati a nga si ti pfisisi. (1 Vat. 5:21) Ene a wombile tiya: “Wuzivi wathu wu komile . . . so maha hi si wonela kule kota nga kule ka kulavetela ngu txibuko.” (1 Vak. 13:9, 12) Paulo hi nga totshe a nga txi ti pfisisa. Nanathu hi nga totshe hi ti pfisisako. Kambe mpostoli Paulo ati ma ziva makungo ni sikongomelo sa Jehovha. Ati a nga txi tiziva ti txi enela kasi kutsaniseka ti to adi mani ditshuri!

4. Hi nga tsanisekisa kutxani ti to hi mani ditshuri, ni ku hi na bhula ngu txani ka gondo yiya mayelano ni Tifakazi ta Jehovha?

⁴ Yimwani ya tinzila yo hi nga tsaniseka ti to hi mani ditshuri ngu fananisa nzila ayi Jesu a nga yi veka ya wukhozeli wa ditshuri, ni ti tifakazi ta Jehovha ti ti mahako nyamsi. Ka gondo yi ya hi na wona nzila yi Makristu ma (1) vayilelako ngu yona kukhozela sifananiso (2) va xoniphako ngu yona ditina da Jehovha (3) va randako ngu yona ditshuri (4) va kombisako ngu yona lirando la ditshuri.

5. Hi gonda txani ka txikombiso txa Jesu txo khozela Jehovha ngu nzila ya yinene?

⁵ Ngu konaha ka lirando lakwe ngu Txizimu, Jesu atxi khozela Jehovha dwe mbimo yi a nga ti nzumani ni hambi mbimo yi a nga ti hamafuni. (Luka 4:8) Ene a gondisile vagondiswa vakwe kumaha toneto. Nem Jesu nem vagondiswa vakwe va si thumisi sifananiso ka wukhozeli. Aku Txizimu i ku moya kha txi nga ho txi m’thu a nga txi mahako atxi txi nga emelako wudhumo wa Jehovha! (Isaya 46:5) Se hani kumaha sifananiso sa vale va wonwako i di wo sawuleka ni kukhongela khawe ko, Bhiblia yi womba txani ngu toneto? Ka mlayo  wo khata ka Milayo ya Digumi Jehovha a wombile tiya: “U nga ti mahele sifananiso so vatwa, hambi txifananiso txa sile si ku txitimwi nzumani, hambi txa sile si ku hahatshi ha mafuni . . . u nga si khizamele.” (Eks. 20:4, 5) Ava va lavako ku tsakisa Txizimu va ti pfisisa ti to kha va fanela kukhozela sithombe.

6. Ngu yihi nzila ya wukhozeli ayi yi londiswako ngu Tifakazi ta Jehovha nyamsi?

⁶ Vaxolisisi va matimu va kholwa ti to Makristu o khata ma txi khozela Jehovha dwe. Ngu txikombiso dibhuku di di ku: História da Igreja Cristã * di womba ti to Makristu o khata “ma da nyenyezeka ngutu ma txi pimisa ngu kuthumisa sithombe ka wukhozeli wawe.” Nyamsi Tifakazi ta Jehovha ti londisa nzila yi yi fanako yi nga vekwa ngu Makristu o khata. Athu kha hi khozeli sithombe sa va va dhanwako ku mbwo sawuleka, mwendo sa tingelozi ni ku kha hi kongomisi mikombelo yathu ka Jesu. I si nga eto dwe kha hi khozeli mabhandera ni simwani so fana ni soneso. Ti singa ni mhaka ni ti ti nga humelelako kwathu, hi ti emisete kuengisa txirumo txa Jesu txi txi ku: “U na khizamela MKOMA [Jehovha] Txizimu txako.”—Mat. 4:10.

7. Ngu kuhi kuhambana ku kuho ka Tifakazi ta Jehovha ni titxhetxhe timwani?

⁷ Nyamsi vathu vo tala va londisela vathangeli va titxhetxhe va tinduma. Vona va londisela ngutu vathangeli vonevo va titxhetxhe va gwitisa ngu ku va khozela. Vathu vo tala va tata titxhetxhe tawe, ve xava mabhuku awe va ningela mali ya yingi kasi ku yi ya thumiswa ngu vathangeli va tona, vona va kholwa totshe ti va gelwako ngu vakhozeli vonevo. Vona va tsakiswa ngutu ngu vafundisi vonevo ha ko nga vo wona Jesu apune. Kuhambana ni eto, vakhozeli va Jehovha kha va nga ni vathangeli ava va va dhanwako ku mba hombe. Hambiku hi xoniphako ava va thangelako ka mabanza a Wukristu athu hi londisa ati Jesu a nga womba to khene: “Anu ngu txanu mi va txikoma ni txinanda.” (Mat. 23:8-10) Athu kha hi khizameli vathangeli va titxhetxhe mwendo vakoma nem kha hi seketeli makungo awe. Hahanzeketo hi simama hi si ti beteli ka ta politika ni ku ti hambanisa ni simaho sa mafu yawa. Ka timhaka tiya hi ti hambanisa ni mitxawa yo tala ayi yi ti gelako ti to Makristu.—Joh. 18:36.

8. Hi ti zivisa kutxani ti to Jehovha a lava to ditina dakwe di dhumiswa ni ku ziwa ngu vamwani?

⁸ Jesu a khongete atxi womba tiya: “Tata dhumisa ditina dako.” Jehovha apune a xamute mkombelo wonewo ngu dipswi do guleka atxi khukhela nzumani, atxi thembisa ti to a na dhumisa ditina dakwe. (Joh. 12:28) Ka mthumo wakwe wo txhumayela, Jesu atxi dhumisa ditina da tate wakwe. (Joh. 17:26) Se ngu toneto ti rinzelwako ka va i ku Makristu a ditshuri, kuthumisa ditina da Txizimu ni ku di zivisa ka vamwani.

9. Makristu o khata ma ti kombisile kutxani ti to ma ti xonipha ditina da Txizimu?

⁹ Ka mbimo ya Makristu o khata msana ko va dibanza da Wukristu di di simekilwe, Jehovha a sawuti ‘hagari ka vamatiko, vathu vava va fanelako kudhumisa ditina dakwe.’ (Mith. 15:14) Makristu onewo ma ti ti matshanza kuthumisa ditina da Txizimu ni ku di zivisa ka vathu vamwani. Vona va txi thumisa ditina da Jehovha va txi txhumayela ni ngu mbimo yi va nga bhala Bhiblia. * Vona va txi ti komba ngu ditshuri ti to va ti emela ditina da Txizimu.​—Mith. 2:​14, 21.

10. Ngu tihi ati ti kombisako ti to Tifakazi ta Jehovha ngu tona ti emelako ditina da Jehovha?

 ¹⁰ Ina ngu ditshuri Tifakazi ta Jehovha ngu tona ti emelako ditina da Jehovha? He woni sikombiso siya. Nyamsi, vathangeli vo tala va wukhongeli va maha totshe ti va nga ti kotako kasi kusisa ditina da Txizimu. Vona va di thavisile amu ka ma Bhiblia o tala, ni ku titxhetxhe to tala ta tsimbiswa ku ditina da Jehovha di thumiswa. * Ti hakubasani ti to Tifakazi ta Jehovha dwe ati ti xoniphako ditina da Jehovha ni ku di ninga wudhumo awu di fanelwako. Athu ngathu hi zivisako ngutu ditina da Jehovha kupinda totshe titxhetxhe. Ngu toneto athu hi maha totshe ti hi nga ti kotako kasi kukombisa to ngu ditshuri hi Tifakazi ta Jehovha! (Isaya 43:10-12) Hi humisile kona mu ka 240 wa timiliyoni ta ma Bhiblia a Tradução do Novo Mundo aya ma wuyisako ditina da Jehovha amu di nga thaviswa ngu va hunduluxeli va ma Bhiblia. I si nga eto dwe ha humisa mabhuku aya ma nga seketelwa mu ka Bhiblia aya ma dhumisako ditina da Jehovha ngu tidimi ati ti pindako 1.000!

11. Makristu o khata ma ti kombisile kutxani ti to ma ti randa ditshuri?

¹¹ Jesu atxi randa ditshuri mayelano ni Jehovha ni sikongomelo sakwe. Jesu atxi hanya  ngu kuyelana ni ti Bhiblia yi ti gondisako ni ku a txi tshumela e gondisa ditshuri donedo ka vamwani. (Joh. 18:37) Valondeteli va Jesu va ditshuri va di dhunda ngutu ditshuri. (Joh. 4:23, 24) Ngu toneto ti nga maha mpostoli Pedro e womba ti to kuva Mkristu ngu va ka “nzila ya ditshuri.” (2 Pedro 2:2) Aku Makristu o khata ma nga ti randa ngutu ditshuri, ona ma txi vayilela wukhongeli wa makuhu sihena simwani ni mawonelo mamwani aya ma nga txi lwisana ni ti Bhiblia yi ti gondisako. (Vakl. 2:8) Ngu ha kufanako Makristu a ditshuri nyamsi ma “hanya mu ka ditshuri.” Tigondo tawe ni mahanyelo awe ma seketelwa mu ka Bhiblia.—3 Joh. 3, 4.

12. Ava va thangelako va maha txani ngako va txi tumbula ti to ku ni mapfisiselo a maphya a tigondo to kari, ngu kutxani va txi maha toneto?

¹² Vathu va Jehovha nyamsi kha va tigeli ti to va ziva totshe. Mbimo yimwani vona va maha tiphazamo ka kutxhamusela tigondo to kari ni ka nzila yi sengeletano yi thumako ngu yona. Eto kha ta fanela ti hi xamalisa, mibhalo yi ti vekile hakubasani ti to wuzivi wu na engetela kudotho-kudotho. (Vakl. 1:9, 10) Ngu toneto hi fanete ku ti emisela kurinzela ku Jehovha e hi maha hi pfisisa kwati ditshuri ngu mbimo ya kona. (Mav. 4:18) Se mbimo yi ava va thangelako va txi wona ti to ku ni mapfisiselo a maphya a gondo yo kari aya ma lavako kutshukwatisa kha va leki ku maha toneto. Se ku hambana ni titxhetxhe ati ti txitxako tigondo kasi kutsakisa vathu mwendo kutsakisa ditiko, kutxitxa ka mapfisiselo a ku kumahwako ngu Tifakazi ta Jehovha txikongomelo njo tshuketisa vathu ka Txizimu ni kulondisa nzila ya wukhozeli ayi yi nga vekwa ngu Jesu. (Jak. 4:4) Kutxitxa kuwa kha kumahwi ngu kona ha ka kutxitxa ka siemo sa mafu mwendo ngu kukombela ka vathu, kambe ngu kona ha ka kupfisisa kwati ati mibhalo yi wombako tona. Phela athu ha di dhunda ditshuri!—1 Vat. 2:3, 4.

13. Ngu yihi fanelo ya lisima ayi Makristu a ditshuri ma ziwako ngu yona, Tifakazi ta Jehovha ti yi kombisisa kutxani fanelo yi ya nyamsi?

¹³ Ka totshe tifanelo ati Makristu o khata ma nga ti ziwa ngu tona ya hombe ngutu i di ya lirando. Jesu a wombile tiya: “Ngu toneto, va no mi zivisa tona ti taku mi vagondiswa vangu: Ngako mi txi randana.” (Joh. 13:34, 35) Nyamsi Tifakazi ta Jehovha ta tidila ngu wumwewo ni lirando la wu mwanathu hamafuni kotshe. Kha yi ngaho sengeletano ayi yi ku ni wumwewo kufana ni sengeletano ya Jehovha. Hambi ku hi tako ngu ka matiko ni midhawuko yo hambana-hambana. Ha txi wona txikombiso txiya txa lirando la ditshuri hi di mitshanganoni ni ka mitshangano ya hombe. Atiya ti hi tsanisekisa to wukhozeli a wuwa hi ku ka wona ngu wona wu amukelwako ngu Jehovha.

14. Ngu kuya ngu dibhuku da Vakolosa 3:12-14, ngu yihi yimweyo ya tinzila ya lisima yo kombisa kurandana?

¹⁴ Mibhalo yi hi kuzeta ku hi ‘khatalela kurandana.’ (1 Pedro 4:8) Yimwani ya tinzila yo kombisa lirando lonelo ngu kudivalela vamwani ni ku timisela tiphazamo tawe. Hi nga tshumela hi la tinzila to kombisa wuha ni wunene ka votshe dibanzani. Hambi vale va thukako ve hi henyisa. (Lera Vakolosa 3:12-14.) Lirando lonelo ngu lona li kombisako ti to athu hi Makristu a ditshuri.

15. Ningela txikombiso tximwani txa nzila yi hi londetako txikombiso txi txi nga vekwa ngu Makristu o khata?

¹⁵ Athu hi londisa txikombiso txa wukhozeli atxi txi nga vekwa ngu Makristu o khata. Ngu txikombiso, ti to sengeletano yi veka vawoneleli  va sigava madhota ni malanda a wuthumeli yi thumisa txikombiso atxi txi nga vekwa ngu vapostoli. (Vaf. 1:1; Tit. 1:5) Mawonelo athu ngu timhaka ta mataho mtxhadho, kuxonipha mnoha, ni malulamiselo o thaviswa dibanzani ka m’thu wu a nga maha txionho a si ti soli, otshe ma seketetwe ka txikombiso atxi txi nga vekwa ngu Makristu o khata.—Mith. 15:28, 29; 1 Vak. 5:11-13; 6:9, 10; Vaheb. 13:4.

16. Hi gonda txani ka mapswi ya ma ku ka va Vaefesu 4:4-6?

¹⁶ Jesu a wombile to vo tala va na womba to vagondiswa vakwe kambe hinga votshe va no tikomba i di va ditshuri. (Mat. 7:21-23) Mibhalo yi wombile ti to ka masiku o gwita vo tala va na “nga vo va ni wukhongeli.” (2 Tim. 3:1, 5) Kambe Bhiblia yi tiveka hakubasani ti to “likholo limwelo” dwe a li li amukelwako ngu Txizimu.—Lera Vaefesu 4:4-6.

17. Mba mani ava nyamsi va londetako txikombiso txa Jesu ni ku va ka wukhozeli wa ditshuri?

¹⁷ Mba mani ava va ku ka wukhozeli wa ditshuri nyamsi? Se hi xolisisile hi mana xamulo ya kona. Hi woni nzila ya wukhozeli wa ditshuri ayi Jesu a nga yi veka ni kuwona nzila yi Makristu o khata ma nga ti khozela ngu yona. Se xamulo yimweyo basi i ku yiya: Ava va ku ka wukhozeli wa ditshuri Tifakazi ta Jehovha. Hi nga wona lungelo yi hi ku nayo yo va vathu va Jehovha ni kuziva ditshuri mayelano ni nene kumweko ni sikongomelo sakwe. He simameni hi va ni kutsaniseka ka hombe ka ti to hi ha ditshurini.