1-2. (a) Ngu yihi mbimo ayi hi tolovelako kukhumbula dixaka dathu di di nga fa? (b) Ngu tihi ati Jesu a nga ti maha a di hafuhi ni kufa?

 HAMBI i di ti to kale di di fite dixaka dathu hi nga di hi txi di khumbula. Di txi hoka ditshiku dile a nga fa ngu dona, ha khumbula ati hi nga ti hanyisa tona nayo.

² Dilembe di dilembe timiliyoni ta vathu hamafuni kotshe ta maneka ka Txialakanyiso txa lifo la m’thu wu hi mu dhundako ngutu i ku Jesu Kristu. (1 Pedro 1:8) Hotshethu ha tshangana kasi kukhumbula awu a nga ningela wutomi wakwe kasi kutirula hotshethu ka txionho ni lifo. (Mat. 20:28) Phela Jesu ngene apune a nga gela valondiseli vakwe ti to ve khumbula lifo lakwe. A di hafuhi ni kufa, Jesu a khatisile Txilalelo txiya txa lisima a ha a nga womba tiya: “Mahani tiya kasi ku ni alakanya ngu tona.”—Luka 22:19.

3. Hi na bhula ngu txani ka gondo yiya?

³ Mba dotho ava va ku ni themba yo ya nzumani va manekako ka Txilavelo txa Mkoma. Kambe timiliyoni ta vathu ava va ku ni themba yo ta hanya ha mafuni hawa ni vona va maneka. Ka gondo yiya hi na wona sivangelo sa ti to ngu kutxani vasawuleki ni va va ku ni themba yo ta hanya hamafuni va txiya ka Txilalelo. Hi na tshumela hi wona ti to hi wuyelwa ngu txani ngu kumaha toneto. Kukhata he woni sivangelo si si mahako to vasawuleki ve maneka ka Txialakanyiso.

4. Ngu kutxani vasawuleki va txi dya dipawa ni kusela vhinya ka Txialakanyiso?

⁴ Dilembe ni dilembe vasawuleki va tiemete ngu litsako ku maneka ka Txialakanyiso ni ku ya dya dipawa ni kusela vhinya. Ngu kutxani vona va txidya dipawa ni kusela vhinya? Ti to hi xamula txiwotiso txiya he wone ti Jesu a nga maha ka wusiku wakwe wo gwita ha mafuni. Msana ka Pasika, Jesu a khati sile Txilalelo txa Mkoma. Ene a ningete dipawa ni vhinya ka vapostoli wakwe va 11 e tshumela eva gela ti to ve dya dipawa ni kusela vhinya. Jesu a va gete ngu situmelelano simbidi i ku txitumelelano txa txiphya ni txitumelelano txa Mfumo. * (Luka 22:19, 20, 28-30) Situmelelano siya si txi tulela mkhanjo wa ti to vapostoli valeya ni mtxawa wumwani wa wudotho ve ya va vakoma ni vaphaxeli khe nzumani. (Mtu. 5:10; 14:1) Se masalelwa * basi i ku va va lumbako situmelelano siya sa simbidi va fanelako kudya dipawa ni kusela vhinya ka Txialakanyiso txa Jesu.

5. Ngu yihi lungelo va ku nayo ava va ku ni themba yo ya hanya nzumani?

⁵ Nditxe tximwani txivangelo txi mahako ti to masalelwa me maneka ka Txialakanyiso. Tximahakalo txiya txi va ninga mkhanjo wo alakanyisisa ngu themba yawe. Jehovha ava ningile themba yo tsakisa ngutu i ku ya ku ya tidila ngu wukwambi sina ni wukwambi fa. Ni kutshumela ve fuma ni Jesu Makristu ni va ni vona va lumbako mtxawa wa 144.000. I si nga eto dwe, vona va ni mkhanjo wo ve ya wona Jehovha khohe ngu khohe. (1 Vak. 15:51-53; 1 Joh. 3:2) Wona va tiziva ti to va to rambwa ti to ve ya ti dila ngu malungelo oneyo nzumani. Se ti to ve ma mana va fanete kuzumba va di thembekile hamafuni hawa kala kuza ve fa. (2 Tim. 4:7, 8) Ta va tisela litsako la hombe kualakanyisisa ngu themba yawe yo ya nzumani. (Tit. 2:13) A ni va va “timwani tinvuta” ko? (Joh. 10:16) Ngu sihi sivangelo va ku naso so ve maneka ka Txialakanyiso?

6. Ngu kutxani ava va tinvuta timwani ni tona va txiya ka Txialakanyiso dilembe ni dilembe?

⁶ Ava va tinvuta timwani va ya ka Txialakanyiso kambe i si nga ku ya dya dipawa ni kusela vhinya, kambe kota vaxaleli. Ngu 1938 kukhatile kurambwa ava va nga ti tipfa ti to va lumba timwani tinvuta ava va ku ni themba yo ta hanya hamafuni ti to ni vona ve maneka ka Txialakanyiso. A Sentinela wa 1 ka Março wa 1938 a wombile tiya: “Ti ni fanelo ti to ava ni vona ‘va timwani tinvuta’ ve maneka ka Txialakanyiso ni kuwona ati ti mahwako. . . . Ayiya i mbimo yo tsakisa kwawe ni vona.” Kufana ni ava va rambwako ti to ve ya ka mtxhadho, tinvuta timwani ni tona ta tsaka kumaneka ka Txialakanyiso.

7. Ngu kutxani ava va tinvuta timwani va txi vhuneka ka mwomba-wombo wa Txialakanyiso?

⁷ Ava va tinvuta timwani ni vona va alakanyi sisa ngu themba yawe. Mwomba-wombo wa Txialakanyiso wu wombawomba ngu Makristu ni va va 144.000 va no ti maha ka mbimo ya mfumo wa 1.000 malembe, hambi keto vona va vhuneka ka mwomba-wombo wonewo. Ngu kukongomiswa ngu Mkoma Jesu Makristu vasawuleki ava va no va va txi fuma nzumani va na vhuneta ko hindula mafu me va Paradhise, ni kumaha ti to vathu ve va vo  hetiseka. Timiliyoni ta vathu ava va xalelako Txialakanyiso va tsaka va txi alakanyisa ngu mbimo yi wu no hetiseka wuprofeti awu wu ku ka Bhiblia wo fana ni wu wa Isaya 35:5, 6; 65:21-23; ni Mtuletelo 21:3, 4. Ngu ku ti wona vona ni maxaka awe va di ka mafu a maphya ti tsanisa themba yawe ya mbimo yi yi tako ni ku ti va vhuna ku ti emisela kuthumela Jehovha mbimo yotshe.—Mat. 24:13; Vag. 6:9.

8. Ngu txihi txivangelo tximwani txi mahako ava va tinvuta timwani ve maneka ka Txialakanyiso?

⁸ Wona tximwani txivangelo txi mahako tinvuta timwani ti maneka ka Txialakanyiso. Vona va lava kukombisa lirando ni kuseketela vasawuleki. Dipswi da Txizimu di profetile ti to ku na va ni wumwewo hagari ka vasawuleki ni timwani tinvuta. Hi ti zivisa kutxani? He wone sikombiso so kari.

9. Dibhuku da Zakariya 8:23 di hi vhunisa kutxani kupfisisa nzila yi tinvuta timwani ti ti pfisako ngu yona ngu vasawuleki?

⁹ Lera Zakariya 8:23. Wuprofeti wuwa wombawomba ngu nzila ayi tinvuta timwani ti ti pfako ngu yona ngu vanathu va txiwamna mwendo va txisikati ava va nga sawulwa. Dipswi di di ku “M’judha” ni di di ku “nanu” di womba mtxawa wonewo wa wumwewo i ku masalelwa. (Var. 2:28, 29) Se “digumi da vavamna, va totshe tidimi ta matiko” kuwombwa ava va tinvuta timwani. Vona va na “ñola ha ka mrungo,” ti wombako kunamarela ka va vanga sawulwa i ku ku ve patana ka wukhozeli wa ditshuri.” Se ngu toneto ka wusiku wa Txialakanyiso ava va tinvuta timwani va kombisa ti to va pfana ni va va nga sawulwa ku ya nzumani ngu ku tipata navo ka mtshangano wonewo.

10. Ngu tihi ti Jehovha a nga ti maha kasi kuhetisisa wuprofeti awu wu ku ka Ezekhiyele 37:15-19, 24, 25?

¹⁰ Lera Ezekhiyele 37:15-19, 24, 25. Wuprofeti wuwa wu hetisekile mbimo yi Jehovha a nga pata vasawuleki kumweko ni va va tinvuta timwani ve va ni wumwewo wo tsana. Wuprofeti wuwa wu womba-womba ngu tindonga timbidi. “Ndonga ya Judha” i ku lihunzu li ku nga ti sawulwa kona vakoma va Vaisrayeli. Yi emela ava va ku ni themba yo ya hanya nzumani, ni ku ndonga ya “Efrayime” yi emela ava va ku ni themba yo ta hanya hamafuni. * Jehovha a mahile ti to mitxawa yi ya yimbidi yi pfana kasi ku yi va “ndonga yimweyo.” Atiya ti womba ti to vona va thumela Jehovha ngu wumwewo hahatshi ka Mkoma wawe Jesu Makristu. Dilembe ni dilembe vasawuleki ni ava va tinvuta timwani va maneka ka Txialakanyiso i si nga kota mitxawa yimbidi yo hambana, kambe kota “mtxhambi wumwewo” hahatshi ka “mdyisi mmweyo.”—Joh. 10:16.

11. “Tinvuta” ati ti wombwako ka Matewu 25:31-36, 40 ngu yihi yimweyo ya tinzila ya lisima ayi va kombisako ngu yona to va seketela vasawuleki?

¹¹ Lera Matewu 25:31-36, 40. “Tinvuta” ati ti wombwako ka txidinganiso txiya ti emela ava vo lulama ava va hanyako ka masiku ya a magwito ava va ku ni themba yo to hanya ka mafu a maphya. Vona va seketela ngu kuthembeka vasawuleki ngu ku va vhuna ko hetisisa mthumo wa hombe va nga ningwa i ku wo txhumayela ni kumaha vagondiswa hamafuni kotshe.—Mat. 24:14; 28:19, 20.

12-13. Ngu tihi tinzila timwani ati ava va tinvuta timwani va nga kombisako ngu tona ti to va va seketela vasawuleki?

¹² Ku txi ngadi kutxhota masiku o kari para kuhoka ditshiku da Txialakanyiso ava va tinvuta timwani va seketela vasawuleki ngu kupateka ka ditima do ramba vathu ku veta xalela Txialakanyiso. (Wona dibhokiso di di ku  “ Ti lulamisele ku si sise hoka Txialakanyiso.”) Vona va tshumela ve vhuneta ka malulamiselo aya ma lavekako ati to ku va ni Txialakanyiso ka otshe mabanza hamafuni, hambi ku ka mabanza o tala ku singako ni vasawuleki. Vona va tsaka kuvhunetela vasawuleki ngu tinzila toneto. Vona va tiziva ti to ati va ti mahako va txi vhunetela vasawuleki ti fana ni ku va txo mahela Jesu apune.—Mat. 25:37-40.

¹³ Ngu sihi sivangelo asi hotshethu hi ku naso so hi xalela Txialakanyiso, ti si nga ni mhaka ni ti to hi ya hanya nzumani mwendo hi ta hanya hamafuni?

14. Jehovha ni Jesu va li kombisile kutxani lirando ngu ngathu?

¹⁴ Hi lava kukombisa kubonga lirando li Jehovha ni Jesu va nga hi komba. Jehovha wa hi kombisa lirando lakwe ngu tinzila to hambana-hambana. Kambe ku ni yimweyo yi palako totshe. Ene a kombisile lirando lonelo li palako totshe ngu kurumela mwanana wakwe wo dhundeka kasi ku e ta xaniseka ni ku hi fela. (Joh. 3:16) Athu ha ti ziva ti to nene a kombisile lirando la hombe ngu kutumela ku hi fela ngu kutitsakela i si nga kusinziswa. (Joh. 15:13) Athu kha hi na kusikota kuhakela lirando li Jesu ni Jehovha va nga hi kombisa lona. Kambe hi nga kombisa ti to ha bonga ngu nzila ayi hi hanyako ngu yona ditshiku ni ditshiku. (Vakl. 3:15) Ngako hi txi maneka ka Txialakanyiso hi kombisa ti to ha li khumbula lirando li va nga li kombisa, ni ku nanathu hi lava kukombisa ti to ha va randa.

15. Ngu kutxani vasawuleki ni va va tinvuta timwani votshe va txi ninga lisima ningo ya mtirulo?

¹⁵ Hi lava kukombisa ti to ha ninga lisima ningo ya mterulo. (Mat. 20:28) Vasawuleki va wu ninga ngutu lisima mterulo nguko wu maha ti to themba yawe yi maheka. Ngu kona ha likholo ka digandelo da Makristu, Jehovha a va wona i di wo lulama ni ku ava sawute kota vanana vakwe. (Var. 5:1; 8:15-17, 23) Ava va tinvuta timwani ni vona va bonga mterulo. Ngu kona ha likholo lawe ka digandelo da Jesu, vona va maneka va di basile masoni ka Txizimu ni ku va ni lungelo yo mu thumela, ni kutshumela ve va ni themba yo ta huluka ka “kuxanisekani ka hombe.” (Mtu. 7:13-15) Yimwani ya tinzila ati vasawuleki ni va va tinvuta timwani va kombisako ngu yona ti to va bonga mterulo ngu kumaneka ka Txialakanyiso dilembe ni dilembe.

16. Ngu txihi txivangelo tximwani txi hi mahako hi ya ka Txialakanyiso?

¹⁶ Tximwani txivangelo txi hi mahako hi maneka ka Txialakanyiso hi la va kuengisa Jesu. Ti si nga ni mhaka ni ti to themba yathu njo ya hanya nzumani mwendo njo ta hanya hamafuni, hi lava ku txi tekela ha msungo txirumo txa Jesu a txi a nga txi ningela ka wusiku wu a nga khatisa ngu wona Txialakanyiso. I ku txiya: “Mahani tonatiya, mi na ni alakanya ngu tona.”—1 Vak. 11:23, 24.

17. Ngu kutxani Txialakanyiso txi txi hi maha hi tshuketa hafuhi ka Jehovha?

¹⁷ Ha tshuketa hafuhi ka Jehovha. (Jak. 4:8) Nga ha hi nga ti wona ngu kona Txialakanyiso txi hi ninga mkhanjo wo pimisa ngu themba ayi Jehovha a nga hi ninga ni kualakanyisisa ngu lirando li a nga hi komba. (Jer. 29:11; 1 Joh. 4:8-10) Ngako hi txi alakanyisisa ngu themba yi hi ku nayo mwendo njo ya hanya nzumani mwendo njo ta hanya hamafuni hawa, ni ngu lirando lo mbi guma a li Jehovha a nga hi kombisa lona. Lirando lathu ni nene  li na kula, ni ku wuxaka wathu ni nene ni wona wu na tsana.—Var. 8:38, 39.

18. Mbimo yi hi alakanyisisako ngu txikombiso txa Jesu hi susumeteleka kumaha txani?

¹⁸ Hi susumeteleka kuetetela txikombiso txa Jesu. (1 Pedro 2:21) Ku txi ngadi kutxhota masikunyana ti to ku hoka ditshiku da Txialakanyiso hi veka mapimo ka kulera ngu matimu a Jesu mayelano ni divhiki dakwe do gwita a si se kudawa, lifo lakwe, ni kuwuswa kwakwe. Se ni minova ya ditshiku ya Txialakanyiso, mwomba-wombo wu hi khumbutisa ngu lirando la Jesu ngu ngathu. (Vaef. 5:2; 1 Joh. 3:16) Mbimo yi hi lerako mayelano ni txikombiso txa Jesu ni kualakanyisisa ngu txona hi kuzeteleka ku hi “kutsimbila nga ti ene Jesu a nga tsimbitisa tona.”—1 Joh. 2:6.

19. Hi nga kombisisa kutxani ti to hi simama lirandoni la Txizimu?

¹⁹ Ti hi maha hi lava kutiemisela ngutu kusimama lirandoni la Txizimu. (Judha 20, 21) Hi simama lirandoni ka Txizimu ngu kumaha totshe ti hi ti kotako kasi ku mu engisa, kusawulekisa ditina dakwe ni kutsakisa mbimo yakwe. (Mav. 27:11; Mat. 6:9; 1 Joh. 5:3) Txialakanyiso txi hi susumetela ku hi zumba hi di ti emisete ku ditshiku ni ditshiku hi hanya ngu nzila yi yi no kombisa ti to athu hi lava kusimama lirandoni ka Txizimu ngu ha ku si gumiko!

20. Ngu sihi sivangelo a si hotshethu hi ku naso so hi maneka ka Txialakanyiso?

²⁰ Ti si nga ni mhaka ni ti to themba yathu njo ta hanya hamafuni mwendo njo ya hanya nzumani, hotshethu hi ni sivangelo so pfala so hi maneka ka Txialakanyiso. Dilembe ni dilembe ha tshangana ka ditshiku donedo kasi kukhumbula lifo la m’thu wu hi mu randako ngutu, i ku Jesu Makristu. Kambe txa lisima ngutu hi lava va kukhumbula txikombiso txa hombe ngutu txa lirando a txi Jehovha a nga hi kombisa ngu ku hi ninga mwanana wakwe kota mterulo. Dilembe diya, Txialakanyiso txi na va ngu Wazixanu, 15 ka Abril wa 2022. Athu ha randa Jehovha kumweko ni mwanana wakwe. Se ka ditshiku da Txilalelo txa Mkoma kha ti ngaho ti ti no va ta lisima ngutu kupinda kumaneka ka Txialakanyiso.