GONDO 1
“Ni txa tximwetxo kha txi pwateki ka vale va lavako MKOMA”
NDIMANA YA DILEMBE YA 2022: “Ni txa tximwetxo kha txi pwateki ka vale va lavako MKOMA.”—MAS. 34:10.
NDANDO 4 “Jehovha i Mdyisi wangu”
ATI HI NO TI GONDA *
Dhavhidha a txi wona ‘ni txa tximwetxo txi si pwateki’ hambi ka timbimo to karata (Wona paragrafu 1-3) *
1. Ngu txihi txiemo a txi Dhavhidha a nga ti ka txona?
SAWULE, mkoma wa Isarayeli a ti lava kudaya Dhavhidha, ngu toneto Dhavhidha a to thava. Mbimo yi Dhavhidha a nga txi pfa nzala a emile khe ka didhoropa da Nobhe a mu a nga kombela 5 wa mapawa ka mphaxeli Ayimeleki. (1 Sam. 21:1, 3) Ngu msana ene ni vavamna va a nga ti navo va tutumile ve ya barama diphalani. (1 Sam. 22:1) Nji njani txi nga maha Dhavhidha e ta maneka ka txiemo txiya?
2. Sawule a ti vekile hatxibeheni apune ngu nzila muni? (1 Samuwele 23:16, 17)
2 Sawule a ti ko xanga ngu kunyenya Dhavhidha ngu kona ha ka nduma yi a nga ti nayo ngu ku a nga txi humelela tiyimbini. Sawule a ti ti ziva to kwa mba engisa kwakwe kumahile ti to Jehovha e mu thavisa ka txikhalo txakwe, e vhaletwa ngu Dhavhidha. (Lera 1 Samuwele 23:16, 17.) Kota mkoma wa Isarayeli, Sawule a ti ni dibutho da yimbi ni va seketeli vo tala, se eto ti mahile to Dhavhidha e thava kasi ku a si dawi. Ina Sawule a ti pimisa to a na sikota kuvhinganyisela makungo a Txizimu ngu Dhavhidha? (Isaya 55:11) Bhiblia kha yi womba-wombi ngu tona eto kambe hi nga tsaniseka ngu tiya: Sawule a ti ko ti veka ha phangoni apune ngu kuwukela Jehovha, nguko votshe ava va mahako toneto kha va humeleli!
3. Ngu yahi mawonelo a ya Dhavhidha a nga ti nawo hambi ku a nga ti manana ni sikarato?
3 Dhavhidha i si nga m’thu wa makolo. Ene kha sawula ku va mkoma wa Isarayeli kambe a to sawulwa ngu Jehovha. (1 Sam. 16:1, 12, 13) Sawule a txi wona Dhavhidha kota mlala a wu a nga txi fanelwa ngu kudawa. Kambe Dhavhidha kha ninga mnando Jehovha ka totshe ti nga ti mu humelela, hambi kukhala nguku mbimo yimwani a nga ti pwata sakudya ni ku ti nga txi lava ku e barama maphalani. Kuhambana ni eto ti nga maha i di yona mbimo yi a nga ti ka sikarato siya a nga bhala ndando yo dhumisa Jehovha ayi yi patako mapswi ya ma ku ka Masalmo 34:10 ya ma ku khene: “Ni txa tximwetxo kha txi pwateki ka vale va lavako MKOMA.”
4. Ngu sihi siwotiso asi hi no bhula ngu sona? Ngu kutxani i di ta lisima kubhula ngu sona?
4 Nyamsi vanathu vo tala kha va nga ni sakudya so enela, ni ku va txhotelwa ngu silaveko simwani sa ditshiku ni ditshiku. * A tiya ti tile ti ta engeteleka ngutu ka mbimo ya mtungo. Aku xanisa ya hombe yi ku halikasa hi ngadi hi txi na wonisana ni sikarato sa hombe ngutu. (Mat. 24:21) Ngu toneto he bhuleni ngu siwotiso siya: I ngu nzila muni ni ‘txa tximwetxo txi nga si pwateki’ ka Dhavhidha? Ngu kutxani hi di fanete kugonda kuziva kueneliseka? Ngu kutxani hi nga tsanisekako ti to Jehovha a na hi khatalela? Ni ku hi nga ti lulamiselisa kutxani konkuwa kasi ku ta wonisana ni sikarato sa mbimo yi yi tako?
“NI TXA TXIMWETXO KHA TXI PWATEKI”
5-6. Dibhuku da Masalmo 23:1-6 di hi vhunisa kutxani kupfisisa mapswi ya Dhavhidha o khene “ni txa tximwetxo kha txi pwateki” ka vathu va Txizimu?
5 Dhavhidha a ti la kuwomba txani mbimo yi a nga khene ka vathu va Jehovha “ni txa tximwetxo kha txi pwateki” kwawe? Dibhuku da Masalmo kapitulo 23 di nga hi vhuna kupfisisa mhaka yiya. (Lera Masalmo 23:1-6.) Dhavhidha a khatisa Masalmo yawa ngu ku womba mapswi yawa: “MKOMA i m’dyisi wangu; kha ni na mbi pwata txilo.” Ka Masalmo yawa, Dhavhidha a wombawomba ngu makatekwa o mbi guma i ku makatekwa a didhawa da moya a ya a nga ti ningwa ngu Jehovha kota Mdyisi wakwe. Jehovha atxi mu tsimbitisa “ngu tinzila to lulama” ni ku mbimo yotshe a txi mu vhuneta hambi ka timbimo to karata. Hambiku Jehovha a nga ti humuta Dhavhidha “hagari ka lihunga lo nakana” atiya ti si wombi to ene a si manani ni sikarato. Nguko mbimo yimwani ene a ti guma mtamo a ti ti nga ti fana ni ku va a txo tsimbila “mkovani ka mtsudi wa lifo” ni ku a ti ni valala vo tala. A ku Jehovha i nga ti mdyisi wakwe, Dhavhidha a si “thavi txilo.”
6 Txiwotiso txathu txo khata ngu txiya: I ngu nzila muni ‘ni txa tximwetxo txi nga si pwateki’ ka Dhavhidha? Ene a ti ni sotshe si nga ti laveka ngu didhawa da moya, nguko litsako lakwe li si dhependerwa ngu silo sa nyama. Dhavhidha a ti eneliseka ngu si Jehovha a nga ti mu ninga. A ti i nga ti ta lisima kwakwe i ti makatekwa ni kuwonelelwa ngu Jehovha.
7. Ngu kuya ngu dibhuku da Luka 21:20-24 ngu txihi txikarato a txi Makristu o khata a ya ma nga txi hanya Judheya ma nga ti manana natxo?
7 Mapswi ya Dhavhidha ma hi vhuna kuwona ti to hi fanete kuziva kudinganisela ti txi ta ka timhaka ta silo sa nyama. Hi nga ti dila ngu silo si hi ku naso sa nyama, kambe kha sa fanela ku va sa lisima ngutu ka wutomi wathu. Makristu o khata a ya ma nga ti hanya Judheya ti lavile me di pfisisa ditshuri diya. (Lera Luka 21:20-24.) Jesu a ti ma lemukisile ti to ku ndi na hoka mbimo a yi Jerusalema a no “ranganyetwa ngu sikwata sa tiyimbi.” Se ngako eto ti txi maheka ona ma ti fanete ku ‘thavela mimangoni.’ Ngako va txi maha toneto vona va ndi na huluka kambe ti ndi na lava ve luzekelwa ngu so tala. Direvhista dimwani da Muwoneleli di wombile ti ya: “Vona va lekile miti yawe tithembwe tawe ni ku kha va teka silo tinyumbani kwawe. Vona va txi tsaniseka ti to Jehovha a na va wonelela ni ku va vhunetela. Ngu toneto vona va txi thangetisa wukhozeli wawe ka Jehovha kupinda tximwani ni tximwani a txi txi nga wonekako i di txa lisima.”
8. Hi gonda txani ka ti ti nga humelela Makristu o khata a ya ma nga ti hanya Judheya?
8 Ngu tihi a ti hi ti gondako ka ti ti nga humelela Makristu o khata a ya ma nga txi hanya Judheya? Muwoneleli a wu hi nga womba-womba ngu wona wu womba tiya: “Mbimo yi yi tako ti na lava hi ta wonisana ni siduko a ha ti no lava hi ti veka ha kubasani ti to nji txani i ku txa lisima kwathu. Ina silo sa nyama ngu sona i ku sa lisima kwathu? Mwendo a ti i ku ta lisima kwathu ngu hulukiswa ngu Jehovha. Kambe ka mbimo yoneyo ti na lava hi ta wonisana ni sikarato so tala a hawa ti no lava hi ta pwata so kari. Ngu toneto ti na lava hi ta ti emisela ka totshe a ti hi no manana nato nga ha Makristu a ya ma nga ti Judheya ma nga maha ngu kona.” *
9. Txialakanyiso a txi mpostoli Paulo a nga bhalela Vahebheru txi kuvhunisa kutxani?
9 Makristu a ya ma nga tumela kukhukha Judheya kha ta ma hehukela ku ta khata wutomi wa wuphya. Nguko ti lavile ve luzekelwa ngu silo a si va nga ti naso. Se ti lavile ve va ni likholo ti to Jehovha a na va xayisa. Ku txi ngadi ku txi txhota 5 wa malembe kasi ku Jerusalema e dhumelwa ngu Varoma Paulo a ningile Vahebheru txilemukiso txiya txa lisima: “Mi nga fumweni ngu male kuhanyani kwanu. Tsakani ngu si mi ku naso, nguko Mkoma apune a wombile a txi khene: ‘Kha ni na mbi thuka ni kuleka, kha ni na mbi nga va ni ku kutshotsha.’ Ngu toneto, ha si kota kuwomba ngu kutsana hi txi khathu: ‘Mkoma ngene txivhuno txangu, kha ni nambi thava txilo; m’thu a nga ni maha txani, kani?’” (Vaheb. 13:5, 6) Ti hakubasani ti to a va va nga txi tekela ha khana txialakanyiso a txi Paulo a nga txi ningela ti va hehukete ku ve ya khata mahanyelo a maphya ka wukhalo wa wuphya ni kutshumela ve eneliseka ngu soneso sa sidotho va nga ti naso. Vona va txi tsaniseka ti to Jehovha a na khatalela silaveko sawe. Mapswi a Paulo ma nga hi tsanisekisa nanathu ti to Jehovha a na khatalela silaveko sathu.
“HE TSAKELENI SONESO”
10. Ngu tihi a ti ti nga vhuna Paulo a ti ti nga hi vhunako nanathu?
10 Paulo a ningile txialakanyiso Timoti a txi txi thumako ni kwathu. Ene a bhalete tiya Timoti: “Ngako hi di ni sakudya ni sa kuambala, he tsakeleni soneso.” (1 Tim. 6:8) Ina a tiya ti womba ti to kha ha fanela kutidila ngu sakudya so tshamba hi va ni tinyumba to tshura mwendo kuxava siambalo sa siphya? Ahim him. Paulo a ti lava kuwomba ti to a thu hi fanete kutsaka ngu si hi naso ngu didhawa da nyama. (Vaf. 4:12) Eto ngu ti ti nga vhuna mpostoli Paulo, a txi i ku txa lisima ngutu kwathu wuxaka wathu ni Jehovha i singa silo si hi ku naso.—Hab. 3:17, 18.
‘Ni txa tximwetxo txi si pwateki’ ka Vaisrayeli ka 40 wa malembe ya nga heta va di txiwulani. Hi fanete kueneliseka ngu si hi ku naso konakuwa. (Wona paragrafu 11) *
11. Mapswi a Mosi a ya a nga gela Vaisrayeli ma hi gondisa txani mayelano ni kuziva kueneliseka?
11 Mbimo yimwani mawonelo athu ka silo si hi si lavako ma nga hambana ni ya Jehovha. Wona ti Mosi a nga gela Vaisrayeli msana kova va di hetile 40 wa malembe txiwulani: “Txizimu txako, a kukatekisile ka yotshe mithumo ya manza ako; kambe ene a kupangalatile mu kutsimbilani kwako, ngu mu ka txiwula txa hombe. Mndani ka mune wa magumi a malembe, MKOMA, Txizimu txako, a ti ti ni nawe, ni txa tximwetxo tximaha kha txa pwateka kwako.” (Dhewut. 2:7) Ka 40 wa malembe aya Vaisrayeli va nga heta va di txiwulani, Jehovha a va ningile mana ti to ve dya. Jehovha a mahile ti to siambalo sawe si si sakali se ti kotekile ku ve ambala dwe asi va nga khukha naso Egipta. (Dhewut. 8:3, 4) Hambi ku vamwani va nga wonako nga silo si Jehovha a nga ti va ninga i ti sidotho, Mosi a kombisile to silo soneso ngu si si nga ti laveka kwawe. Jehovha wa tsaka ngutu ngako hi txi gonda kueneliseka. Ni kukombisa kubonga hambi silo sa sidotho a si a hi ningako, hi txi si wona kota makatekwa.
TSANISEKA TI TO JEHOVHA A NA KUKHATALELA
12. Ngu tihi ti kombisako to Dhavhidha ati themba Jehovha i si nga ene apune?
12 Dhavhidha a txi ti ziva ti to Jehovha a thembekile ni ku wa khatalela ni kuxayisa avale va mu randako. Mbimo yi Dhavhidha a nga bhala Masalmo a 34 ene a ti haphangoni, hambi keto a txi kholwa ti to “ngelozi ya mkoma” yi txi “mvhikela.” (Mas. 34:7) Ti nga maha Dhavhidha a txi fananisa ngelozi ya Jehovha ni disotxhwa adi di ku yimbini adi di zumbako di txi wonelela valala. Hambi ku ene i nga ti lwi wa tiyimbi ni ku Jehovha a ti mu thembisile ku mninga wukoma ene asi veki themba yakwe ka wusikoti wakwe wo thumisa ditxhari kasi kuxula valala vakwe. (1 Sam. 16:13; 24:12) Ene a ti themba Jehovha ni kuthemba ti to ngelozi ya Jehovha ya “hulusa ka tiphango” avale va mthembako. Ditshuri ti to hi nge rinzeli ku Jehovha e maha sidiwukiso, kambe ha ti ziva ti to votshe va va thembako Jehovha va na mana wutomi wo mbi guma hambi i di ti to ti na lava ve fa konkuwa.
Ngu mbimo ya xanisa ya hombe, Goge wa ditiko da Magoge ti nga maha ve ta hi dhumela mitini kwathu. Kambe, hi nga themba ti to Jesu kumweko ni tingelozi va ti wona ati ti mahekako ni va na ta hi lwela (Wona paragrafu 13)
13. Mbimo yi Goge wa Magoge a no hi wukela ngu kutxani ti no woneka nga kha ha vhikeleka kambe ngu yihi themba a yi hi no va nayo? (Wona mfota wa kapa.)
13 Mbimo yi yi tako hotshethu ti na lava hi ti veka ha kubasani ti to ina ha themba to Jehovha a na hi vhikela kani. Mbimo Goge wa Magoge i ku msengeletano wa matiko a no wukela vathu va Txizimu, wutomi wathu wu na va ha phangoni. Ti na lava hi tsaniseka ti to Jehovha a na hi hulukisa. Matiko mamwani ma na hi wona nga hi tinvuta to mbi na wathu. (Eze. 38:10-12) Athu kha hi na mba va ni sibhamu ni ku hi na mba va hi di trenarilwe ku ya lwa. Se vona va na pimisa ti to va na hi hiyela ngu txikuluveta. Vona va na mbi ti wona ati hi ti wonako ngu maso athu a likholo. Athu hi na ti wona hi di ranganyetilwe ngu tingelozi ta Txizimu ati ti no hi vhikela. Phela vamatiko va na mba ti wona tingelozi tiya ngu ku kha va nga ni maso a moya. Vona va na xamala ngutu mbimo yi dibutho da nzumani di no ta hi vhuna!—Mtu. 19:11, 14, 15.
TI LULAMISELE KONKUWA PARA MBIMO YI YI TAKO
14. Ngu tihi a ti hi nga ti mahako konkuwa kasi ku ti lulamisela para mbimo yi yi tako?
14 Hi nga maha txani ti to hi ti lulamisela para mbimo yi yi tako? Txo khata kha ha fanela kuteka silo sa nyama i di sa lisima ngutu nguko hi fanete kukhumbula ti to ditshiku dimwani ti na lava hi si vhunga. Ni ku hi fanete kueneliseka ngu si hi ku naso ni ku litsako lathu li fanete kudhependerwa ngu wuxaka wu hi ku nawo ni Jehovha. Ngako u hi txi mziva kwati Jehovha hi nga tsaniseka ti to ene a na ta hi vhikela mbimo yi Goge wa Magoge a no hi wukela.
15. Ngu tihi ti nga humelela Dhavhidha i di ngadi mfana ati ti nga mvhuna kuwona to Jehovha mbimo yotshe a na mvhuna?
15 Wona timwani ati ti nga humelela Dhavhidha a ti ti nga hi vhunako nanathu nyamsi kasi ku ti lulamisela para ku ta wonisana ni sikarato sa mbimo yi yi tako. Dhavhidha a wombile tiya: “Duketani mipune mi txi ti wona to MKOMA mbwa mnene; a katekile m’thu wule a thembako ene!” (Mas. 34:8) Mapswi yawa ma kombisa ti to Dhavhidha ati ti ziva to Jehovha a ndi na mvhuna. Mbimo yotshe Dhavhidha a txi themba Jehovha, se Jehovha kha thuka e mu tshotsha. Mbimo yi i nga ti ngadi mfana Dhavhidha a wonisana ni Goliya. Ene a gete tiya Goliya: “Kona nyamsi Mkoma a na kuningela manzani kwangu.” (1 Sam. 17:46) Ngu msana Dhavhidha a tiya zumba ka nyumba ya wukoma ya Sawule a wu a nga zama ku mdaya makhambi o tala. Kambe “MKOMA a ti ni nene.” (1 Sam. 18:12) Aku Jehovha a nga ti vhuni Dhavhidha ka sikarato si a nga manana naso, ene ati ti ziva to mbimo yotshe Jehovha a na mvhuna.
16. I ngu nzila yihi hi nga ‘dukako’ hi wona ti to Jehovha mbwa mnene?
16 Ngako hi txi lava mkongomiso wa Jehovha konkuwa hi na kulisa themba yathu ya ti to Jehovha a na ta hi hulukisa mbimo yi yi tako. Ti lava likholo kasi ku va ni txibindi txo hi kombela patrao wathu kasi ku e hi ninga masiku kasi ku ya xalela mitshangano ya hombe, yo fana ni mitshangano yathu ya hombe mwendo kukombela mbimo kasi kukota kuxalela mitshangano ya dibanza divhiki ni divhiki, mwendo kumana mbimo yo txhumayela. Se ngako patrao wathu a si tumeli txikombelo txathu hi nga luzekelwa ngu mthumo. Ina hi na va ni likholo la ti to Jehovha kha na mbi thuka e hi tshotsha? Ni kuthemba to ene a na khatalela silaveko sathu sa ditshiku ni ditshiku? (Vaheb. 13:5) Vo tala a va va ku ka mthumo wa mbimo yotshe va yi woni nzila yi Jehovha a nga va vhuna ngu yona mbimo yi va nga ti ka silaveko sa hombe ngutu. Jehovha a thembekile.
17. Ngu yihi ndimana ya dilembe ya 2022 ni ku ngu kutxani yi di sawutwe yona?
17 Ngako hi txi themba Jehovha hi na mbi thava ti ti no ta maheka mbimo yi yi tako. Jehovha kha na mbi hi leka ngako hi txi thangetisa timhaka ta moya ka wutomi wathu. Kasi ku hi alakanyisa ni ku hi lulamisela kasi kuta wonisana ni sikarato sa mbimo ayi yi tako ni kutshumela hi themba ti to Jehovha kha na mbi hi leka, Mmidi wu wu fumako wu sawute dibhuku da Masalmo 34:10 kota ndimana ya dilembe ya 2022 ayi yi ku: “Ni txa tximwetxo kha txi pwateki ka vale va lavako MKOMA.”
NDANDO 38 Txizimu txi na kutsanisa
^ Ndimana yathu ya dilembe ya 2022 yi tekilwe ka Masalmo 34:10 ayi yi ku khene: “Ni txa tximwetxo kha txi pwateki ka vale va lavako MKOMA.” Kutala ka tifakazi ta Jehovha kha ta ganya. Se ngu kutxani ku txi wombwa ti to “ni txa tximwetxo kha txi pwateki” ka tona? Kupfisisa txhamuselo ya ndimana yiya ti nga hi vhunisa kutxani ti to hi ta wonisana ni sikarato sa mbimo yi yi tako?
^ Wona “Perguntas dos Leitores” ka A Sentinela ya 15 ka Setembro wa 2014.
