1, 2. Jehovha a hi thavelela ngu nzila yihi ka sikarato sathu? Ngu txihi txithembiso atxi hi txi manako ka Dipswi dakwe?

MWANATHU mmwane i ku ngadi mfana a lerile 1 Vakorinto 7:28, ayi yi ku khene ava va nga txadha “va na mana sixaniso [nyamani kwawe, Tradução do Novo Mundo]”. Se e khata kualakanyisisa ngu yona. Se e gwita e ya wotisa didhota dimwane di ku ni msikati a txi khene: “Ngu sihi ‘sixaniso’ sa kona ni ku ni nga mahisa ku txani ni txi thuka ni txhadha?” Na a si se mu xamula mwanathu a gete mfana wule ti to e alakanyisisa ngu timwane ati Paulo a nga bhala, i ku ti to: Jehovha “Txizimu txa kotshe kuthavelela, txona txi hi thavelela ka sotshe sixaniso sathu” mwendo sikarato.—2 Vakorinto 1:3, 4.

² Ha ti ziva ti to Jehovha, Tate wathu, wa hi dhunda ni ku ene wa hi thavelela mbimo yi hi ku ni sikarato. U nga khumbula mbimo yimwane yi Jehovha a nga kuseketela ni ku kukongomisa ngu Dipswi dakwe. Hi nga tsaniseka ti to ene a hi  navelela ati i ku ta tinene kufana ni ti a nga mahisa tona ka malanda akwe a kale.—Lera Jeremiya 29:11, 12.

3. Ngu sihi siwotiso asi hi no bhula ngu sona ka msungo wuwa?

³ Mbimo yo tala ta hehuka kutsanisela sikarato ni sixaniso i di ti to ha ti ziva ti to si vangwa ngu txani. Ka msungo wuwa hi na bhula ngu siwotiso siya: Ngu ku txani hi txi thuka hi manana ni sikarato mwayani kwathu? Ngu sihi sikombiso asi si ku mu ka Bhiblia ni sa ngweno asi si nga hi vhunako kumana thavelelo ayi hi yi lavako? He wone ti to hi nga si tsaniselisa ku txani sikarato soneso.

4, 5. Ngu sihi sikarato asi mwamna ni msikati va nga vako naso?

⁴ Mbimo yi Jehovha a nga gwita kuwumba wamsikati, ene a to mu heleketa ka wamwamna kasiku e va msikati wakwe. Se Jehovha e gwita a txi khene: “Wamwamna a na siya tate ni mame e ya tipatanisa ni msikati wakwe, se ngu wumbidi wawe va na va i di nyama yimweyo.” (Genesisi 2:24) Phela hotshethu kha ha hetiseka. (Varoma 3:23) Ngu toneto wamwamna ni wamsikati va txi tekana va ti ziva ti to va na va ni sikarato. Ngu txikombiso, mbimo yi wamsikati a ko mbi se tekwa, a ni fanelo yo engisa vaveleki vakwe. Kambe ngako a di tekilwe, Bhiblia yi womba ti to msungo wakwe i mwamna wakwe. (1 Vakorinto 11:3) Makhatoni mwamna ti nga m’nemelela kukongomisa msikati wakwe. Se msikati nene ti nga mu karatela kuengisa mwamna e leka vaveleki vakwe. I singeto basi, ava va ku ngadi kutekana, va nga va ni milayo ayi va si pfaniko ka yona, se etxo ni txona txi nga va txikarato.

⁵ Alakanya nzila yi mwamna ni msikati va nga tipfako ngu yona va txi ziva ti to msikati a ni txirumbu. Hambiku wumwane mkama va nga tsakako, kambe va nga thuka ve karateka ngu kualakanya ti to ina ti na tsimbila kwati, ni ku va na sikota kukhatalela mwanana kani. Va ti ziva kambe ti to silaveko sa mwaya si na engeteleka. Se ngako mwanana a di velekilwe, ti nga lava ti to vatekani ve txitxanyana to kari. Msikati a nga heta mbimo yo tala a txi khatalela mwanana. Se va na mbi ngadi ve zumba mbimo yo tala va di votshe kufana ni kukhatani. Tate se a ni wutixamuleli wo tala. Ene a na lava kuwona ti to asi msikati ni mwanana va si lavako sa maneka kani.

6-8. Vatekani vamwane va ti tipfisa ku txani ngako va si mu mani mwanana?

⁶ Kambe vatekani vamwane va ni sikarato simwane. Vona va nga navela ku va ni vanana, kambe ti nga maheka a si maneki. Se ngako msikati a si txi mani txirumbu, ene a nga va ni dikhodho. (Mavingwa 13:12) Ka mbimo ya kubhalwa ka Bhiblia, ti ti ni lisima ngutu ti to wamsikati e txhadha ni ku va ni vanana. Ngu toneto ti nga maha ti to Rakeli msikati wa Jakobe, e va ni dikhodho da hombe mbimo yi ene a nga ti si txi mani txirumbu kambe mkoma wakwe e txi mana. (Genesisi 30:1, 2) Ka matiko mamwane vathu vo tala va tumela ti to ti ni lisima ngutu ku va ni vanana vo tala. Phela ka matiko onewo, vathu vamwane va za ve wotisa ni varumiwa ti to ngu ku txani vona va si nga ni wamweyo. Hambi varumiwa va txi zama ku va txhamusela kwati txivangelo txa  kona, vona va khona: “Mi nga karateki hi na mi mahela mkombelo!”

⁷ Wona txikombiso tximwane. Mwanathu mmwane wa ditiko da Inglaterra a si va mani vanana. Mbimo yi a nga ti wona ti to, kha ti na kukoteka ti to ene e mana vanana, a vite ni dikhodho da hombe ngutu. Se ene ni mwamna wakwe va woni i di tshuko kumana m’thu e va ninga mwanana. Kambe mbimo yimwane hambi toneto ti si mu tsakisi. Ene a wombile tiya: “Ni ti ti ziva ti to mwanana wo hiwa a si na kufana ni wu ni ngo veleka nipune.”

⁸ Bhiblia yi womba ti to “wamsikati a na hanyiswa nguko a velekako vanana”. (1 Timoti 2:15) Kambe ina ti womba ti to wamsikati a na mana wutomi wombi guma ngu ku va a di ni vanana? Ahim-him. Se, ngu yihi txhamuselo ya ndimana yiya? Ngako wamsikati a di ni mwanana, a nga heta mbimo yo tala a txi khatalela mwanana. Ngu toneto a nga pwata mbimo yo tibeta ka timhaka ti ti si vhuniko txilo to fana ni tinzava ni kubhula ngu ti ti si mu lumbiko. (1 Timoti 5:13) Hambiketo, a nga simama e va ni sikarato ha mwayani.

9. Ngu txihi txikarato tximwane atxi vatekani va mananako natxo?

⁹ Txikarato tximwane atxi vatekani va mananako natxo ngu felwa ngu mngana wa wukati. Hambi vamwane va txo pimisa ti to toneto ti nge humeleli kwawe, kambe vamwane ti lavile ve tsanisela sikarato soneno. Makristu ma ni themba ya kuwuswa ka vafi, se toneto ti ma tsanisa ngutu. (Johane 5:28, 29) Amu ka Bhiblia, Tate wathu Jehovha a hi ninga sithembiso so tala asi si hi thavelelako ngu mbimo ya sikarato. Konkuwa he woni ti to malanda ya hi nga bhula ngu ona ma thaveletwe ngu nzila yihi, ni ku va vhunisilwe ku txani.

10. Ana a thaveletwe ngu txani? (Wona mfota wu wu ku makhatoni.)

¹⁰ Wona ti ti nga humelela Ana, msikati wa Elkana. Ene a ti ti lava ngutu ku va ni vanana, se ti si koteki kambe mkatikulowe Penina a ti ni vanana va vangi. (Lera 1 Samueli 1:4-7.) Ngu toneto Penina a ti mseka “dilembe ni dilembe” ti to e mu xanisa ngutu mbiluni kwakwe. Ana a pandisekile ngutu, ngu toneto. Nji txani atxi Ana a nga txi maha kasiku e mana thavelelo? A to maha mkombelo ka Jehovha. Ene a tsute aha ku nga ti khozelwa kona Jehovha, e ya khongela ngu mbimo yo lapha. Ana a kombete ti to Jehovha e mu ninga mwanana, e themba ti to Ene a na mu vhuna. Msana ko maha mkombelo, a ti pfite a txi tshukwala ni “khohe yakwe yi si swi yi txi komba kupandiseka”. (1 Samueli 1:12, 17, 18) Ene a ti ti ziva ti to Jehovha a nga mu ninga mwanana mwendo ku mu thavelela ngu nzila yimwane.

11. Mkombelo wu nga hi thavelela ngu nzila yihi?

 ¹¹ Aku hi nga mbi hetiseka ni ku hi ku ngadi hi txi hanya ka mafu a Sathane, hi na va ni sikarato. (1 Johane 5:19) Kambe hi ni wo hi vhuna. Hi nga khongela ka Jehovha “Txizimu txa kotshe kuthavelela”. Ana a mahile toneto. Ene a gete Jehovha totshe ati a nga txi ti lava ni ku mu dilela ti to e mu vhuna. Ngako hi di ni sixaniso, nathu hi nga maha to pala kuwomba basi sikaratato sathu ka Jehovha. Ti lava hi mu kombela ngu ku mu dilela ti to e hi vhuna ni ku mu gela ngu kukongoma ati hi ti pfisako tona.—Vafilipiya 4:6, 7.

12. Nji txani txi nga vhuna Ana ti to e zumba a di tsakile hambiku a nga ti ni sikarato?

¹² Ngako hi si mani vanana na hi txi va lava, mwendo hi txi felwa ngu wu hi mu dhundako, toneto ti nga panda ngutu. Kambe thavelelo hi nga yi mana. Wona txikombiso txa Ana wa mbimo ya Jesu. A fetwe ngu mwamna va di ni m’txhanu wa malembe ni mambidi basi va di tekanile. Ti wonekisa ku nga Ana a si na vanana. A vhunwi ngu txani? Ene “asi lovhi dithepeleni”. Hambiku Ana a nga ti ni 84 wa malembe ene a ti ngadi a txi ya dithepeleni ti to e ya maha mkombelo ni kukhozela Jehovha. (Luka 2:37, NM) Eto ngu tona ti nga vhuna Ana ti to e zumba a di tsakile hambiku a nga ti ni sikarato.

13. Ngako maxaka athu ma txi hi thela dikhodho, vangana va ditshuri va nga hi vhunisa ku txani?

¹³ Hi nga tshumela hi mana thavelelo ka vangana va hi ku navo dimbanzani. (Mavingwa 18:24) Mbimo yi Paula a nga ti ni 5 wa malembe, mame wakwe a lekile kuthumela Jehovha. Toneto ti mu henyisile Paula, ni ku timhaka ti mu nemelete. Kambe, Ann i ku mwanathu mmwane wa txisikati awu i ku nyaphandule a thavelete Paula ni ku a wombawombile nayo ngu nzila ya lirando. Ene a khene: “Hambiku Ann i nga ti singa dixaka dangu, a ni khatalete ngu lirando. Eto ti ni vhuni kusimama ni thumela Jehovha.” Kukhukhela ka yoneyo mbimo, mame wa Paula a wuyete dibanzani, se Paula  a tsakile ngutu. Nene Ann a tsakile nguku a nga vhuna Paula ti to e simama e thumela Jehovha.

14. Hi wuyelwa ngu txani ngako hi txi thavelela vamwane?

¹⁴ Mbimo yi hi ñolekaku ngu kumahela vamwane ta tinene, hi nga divala sikarato sathu. Ngu txikombiso vanathu va txisikati va va nga tekwa ni va va nga mbi tekwa va ti ziva ti to ngako va txi txhumayela mahungu a manene a Mfumo, va thumisana ni Jehovha ni kumaha kudhunda kwakwe. Toneto ti nga va tsakisa. Hotshethu hi nga khatala ngu vamwane ngu ku va gela mahungu a manene. Ni ku ngako hi txi maha ta tinene ka vanathu dibanzani, wuxaka wathu navo wa tsana. (Vafilipiya 2:4) Mpostoli Paulo a mahile toneto. Ene a va khatalete “kufana ni mame wu a mamisako vanana va a nga va valeka”. Ene a tshumete  e thavelela ni kutsanisa vanawe kufana ni ti “Tate a xayisisako tona vanana vakwe”.—Lera 1 Vatesalonika 2:7, 11, 12.

15. Jehovha a ningile mani wutixamuleli wo gondisa vanana?

¹⁵ Hi nga ti thavelelisa ku txani timwaya dibanzani? Mbimo yimwane ava va ku ngadi kugonda ditshuri, va nga hi kombela ti to hi va vhuna kugondisa vanana vawe ngu Jehovha. Mwendo va nga hi kombela ti to hi va tsimbitisela txigondo. Kambe Bhiblia yi womba ti to vaveleki ngu vona va ku ni wutixamuleli wo gondisa vanana vawe. (Mavingwa 23:22; Vaefesu 6:1-4) Hambiku mbimo yimwane vanathu vamwane va nga vhunetako, ti ni lisima ti to vaveleki ve gondisa vanana vawe vapune. Vaveleki va fanete ve bhula ni vanana mbimo yotshe.

16. Mbimo yi hi gondisako vanana hi fanete hi khumbula txani?

¹⁶ Ngako vaveleki va txi hi kombela ti to hi tsimbitisela vanana vawe txigondo, hi fanete hi khumbula ti to athu kha hi nga nawo wulawuli wo fana ni wa vaveleki. Yimwane mbimo hi nga gonda ni vanana ava vaveleki vawe i singako Tifakazi. Ngako hi txi gonda ni vanana ava i singako vathu, ti nga va wutxhari ku ya gonda navo ku di ni vaveleki vawe mwendo hi di ni mwanathu mmwane wu a nga vitwa. Hi gonda navo ha ka wukhalo awu kuwonekako kwati. Hi txi maha toneto, hi na mbi maha ti to vamwane ve hi pimisela to biha. Mbimo yimwane vaveleki vonevo va nga sawula kugondisa vanana vawe mayelano ni Jehovha vapune.

17. Vanana va nga va thavelela ngu nzila yihi vamwane ha mwayani?

¹⁷ Vaphya ava va gondako kuranda Jehovha va nga thavelela ni kutsanisa va mwayani kwawe. Ngu nzila yihi? Ngu kuxonipha vaveleki vawe ni kuzama ku va vhuna ngu simaho. Ngako vanana va txi zumba va di thembekile ka Jehovha, ti nga tsanisa mwaya wotshe. Ka mbimo ya kale, ndambi ya hombe yi si se hoka, Lameki a ti khozela Jehovha. A wombile tiya ngu mwanana wakwe Nowa: “Mwanana wuwa a na hi humuta kukaralani kwathu ni kuxuphekani ka mithumo ya manza athu ya ku dima mafu awa MKOMA a nga ma ruketela.” Wuprofeti wonewo wu hetisekile mbimo yi ndambi yi nga thavisa wotshe wubihi ha mafuni. (Genesisi 5:29; 8:21) Ni nyamsi vanana va va simamako va di thembekile ka Jehovha va nga thavelela timwaya tawe. Va nga vhuna votshe ha mwayani ti to ve tsanisela siduko sa konkuwa ni sa mbimo yi yi tako.

18. Hi nga vhunwa ngu txani ti to hi tsanisela sotshe sikarato asi hi ku naso?

¹⁸ Nyamsi malanda a Jehovha ma mana thavelelo ngu mkombelo, kualakanyisisa ngu sikombiso sa mu ka Bhiblia ni ku va ni wungana ni vanathu. (Lera Masalmu 145:18, 19.) Ha ti ziva ti to mbimo yotshe, Jehova a ti emisete ku hi vhuna, ni ku ene ngu ditshuri a na hi vhuna ti to hi tsanisela sotshe sikarato asi hi nga vako naso!