INA ta kukaratela kumaha gondo yako upune divhiki ni divhiki? Hotshethu mbimo yimwani ha thuka hi ti pfisa toneto. Kambe pimisa ngu timhaka timwani ati hi mahako yotshe mbimo, to fana ni kusamba. Kukuwula ti teka mbimo ni ku ti lava mtamo, kambe ngu msana ha tipfa kwati! Gondo ya Bhiblia yi nga tshumela yi fananiswa ni ‘kubasiswa ngu dipswi.’ (Vaef. 5:26) Ahi wone mawonelo o kari aya ma nga kuvhunako:

• Sawula mbimo ayi u no gonda ngu yona otshe mavhiki. Gondo ya Bhiblia ya m’thu apune yi ka timhaka ta ‘tinene ngutu’ ati m’kristu a fanelako ku ti tekela hamsungo. (Vaf. 1:10) Kasiku u si divali mbimo ya gondo yako upune, bhala ditshiku ni mbimo ka diphepha u namaketa ka wukhalo wu ti no kuhehukela ku tiwona kasiku u ti khumbula. Mwendo kuveka alarme ka fone yako kasiku yi ku khumbutisa ngako yi di hafuhi mbimo ya gondo yako ya Bhiblia.

• Pimisa ngu ti ti no kuvhuna ku u veka mapimo ka gondo yako. Ngu tihi ati ti ku hehukelako? Ngu txikombiso, ina ta kuhehukela kuveka mapimo ka ti u ti gondako ngu mbimo yo dingana diora, mwendo u sawula kugonda ngu mbimo nyana ya yidotho kambe ngu masiku a mangi? Awe wa txi ziva kwati txiemo txako. Ngako u txi lava kugonda kambe u tipfa u di ni wukara, ti ngo txani ku u gonda ngu 10 wa timeneti dwe? Hambi u txo gonda ngu 10 wa timeneti dwe, awe u nga gonda timhaka ta tingi. Ni ku ti nga maha msana kova u di khatile u kuzeteka kusimama u gonda.—Vaf. 2:13.

• Sawula ngu mbimo ati u lavako ku ti gonda. Ngako u txi emela mbimo yi u lavako kugonda kasi kusawula to u na gonda ngu txani ti nga maha u si ‘londoli kwati mbimo yi u ku nayo.’ (Vaef. 5:16) Zama kumaha lixta ya maponto o kari aya u tsakelako kugonda ngu ona. Ngu txikombiso, ngako u di ni txiwotiso mayelano ni timhaka to kari ati u si ti pfisisiko kwati bhala txiwotiso txonetxo ka lixta yako. Ngu magwito ka gondo yimwani ni yimwani, awe u nga tsakela kuengetela mamwani mawonelo ka lixta yako ya ti u tsakelako kugonda.

• Maha kutxitxa ngako ti txi laveka. Tiemisele kumaha kutxitxa ko kari mayelano ni mbimo ayi u yi hetako u txi gonda mwendo ati u ti sawulako kasi kugonda ngu tona. Txa lisima ngutu ngu u gonda divhiki ni divhiki, ti singa ni mhaka ni ditshiku adi u gondako ngu dona, mbimo yi u yi hetako u txi gonda mwendo ati u ti gondako.

Ha wuyelwa ngutu ngako hi txi maha gondo ya m’thu apune divhiki ni divhiki. Wuxaka wathu ni Jehovha wu naya masoni wu tsana, hi na gonda kumaha sisungo sa sinene ka wutomi wathu ni ku hi na tipfa hi di thaveletwe.—Jox. 1:8.