Niadtong Hulyo 23 hangtod 28, 2024, ang ika-39 nga Luanda International Fair gihimo sa Luanda, Angola. Ang tinuig nga fair nag-feature ug mga display gikan sa halos 1,800 ka exhibitor ug halos 100,000 ang mibisita. Ang mga Saksi ni Jehova nag-set up ug booth nga naay binase sa Bibliya nga mga publikasyon sa siyam ka pinulongan. Ang booth naa poy dapit nga kalingkoran diin ang mga bisita puwedeng mahibalog dugang bahin sa atong interactive nga pagtuon sa Bibliya. Panahon sa fair, 227 ka beses gipakita kon sa unsang paagi ginahimo ang pagtuon, ug kapig 100 ka tawo ang gustong magpaduaw sa ilang balay.

Dihang ang usa ka babaye miduol sa booth ug miingon nga interesado siyang makakat-on ug dugang bahin sa Bibliya, gitanyagan siya sa sister ug Bible study. Samtang nag-estorya sila, daghan kaayog pangutana ang babaye ug interesado kaayo siya sa mga saad sa Bibliya bahin sa umaabot. Karon, regular na siyang nagtuon sa Bibliya uban sa sister.

Naay babaye nga nakurat pagkahibalo niya nga walay bayad ang atong pagtudlo sa Bibliya. Giingnan siya sa sister nga gihimo nato ni kay gusto natong isangyaw ang maayong balita bahin sa Gingharian sa Diyos sa mas daghan pang tawo. Pagkahibalo sa sister nga ang babaye nagtuon diay ug Bibliya uban sa mga Saksi kaniadto, gipakita niya sa babaye ang video nga Unsay Ginahimo Diha sa Kingdom Hall? Nalipay ang babaye kay nakita niya nga ang tanan puwedeng makatambong sa atong mga tigom, ug gusto siyang mokat-on pag dugang.

Naay babaye nga taga-Portugal nga nalipay pag-ayo pagkakita niya nga naa ang mga Saksi ni Jehova sa fair. Miingon siya nga pirme siyang makig-estorya sa iyang silingan nga Saksi. “Bilib kaayo ko sa inyong organisasyon, ug gusto kong makakat-on pag dugang bahin ninyo!” matod niya. Misaad ang babaye nga magpa-Bible study siya sa iyang silingan pag-uli niya.

Nalipay ta nga daghan ang nagpakitag interes sa Angola nga mokat-on ug dugang bahin sa Bibliya ug mahinamong modawat sa imbitasyon ni Jehova nga ‘moinom nga walay bayad sa tubig sa kinabuhi.’—Pinadayag 22:17.