Ang European Court of Human Rights (ECHR) mihatag sa mga Saksi ni Jehova ug duha ka kadaogan sa mga kaso maylabot sa atong kagawasan sa relihiyon sa Azerbaijan. Naglaom ta nga kini nga mga desisyon sa ECHR makatabang sa atong mga igsoon nga makabatog dugang kagawasan sa pagsimba sa tibuok nasod.

Niadtong Pebrero 20, 2020, gidesisyonan sa Korte ang mga kaso nga Nasirov and Others v. Azerbaijan, nga naka-pending sukad pa niadtong 2010, ug Religious Community of Jehovah’s Witnesses v. Azerbaijan, nga naka-pending sukad pa niadtong 2009. Sa kaso nga Nasirov, midesisyon ang korte nga gilapas sa Azerbaijan ang Article 5 ug 9 (Liberty of Person and Freedom of Religion) sa European Convention on Human Rights dihang balikbalik nilang gipriso, gihukmang sad-an, ug gipamulta ang mga Saksi ni Jehova tungod sa pagpakigbahin sa ministeryo niadtong 2010. Ang Korte midesisyon nga bayrag $3,235.80 (EUR 3,000) nga danyos ang matag Saksi nga gihukmang sad-an—nga sa katibuk-an mokabat ug $22,650.60 (EUR 21,000). Sa kasong Religious Community of Jehovah’s Witnesses, midesisyon ang korte nga gilapas sa Azerbaijan ang Article 10 (Freedom of Expression) sa Convention dihang wala nila tugoti ang atong mga igsoon sa pagpasulod ug pagpanagtag sa pipila sa atong mga publikasyon sa Azerbaijan.

Si Jason Wise, nga usa sa mga abogadong mitabang niini nga mga kaso, miingon: “Sa daghang katuigan, ang mga Saksi ni Jehova sa Azerbaijan naglisod sa pagpasulod ug pagpanagtag ug relihiyosong mga basahon niining nasora. Kadaghan tang miatubang sa korte aron tugotan ta sa pagpasulod sa atong mga literatura. Ug kadaghan pod tang miatubang sa korte tungod sa pagpangdakop sa gobyerno sa mga Saksing nakigbahin sa pagsangyaw. Kining duha ka desisyon sa ECHR importante kaayo sa mga Saksi ni Jehova sa Azerbaijan. Sa kasong Religious Community of Jehovah’s Witnesses, ang Korte midesisyon nga ang relihiyosong mga basahon sa mga Saksi ni Jehova wala maghatag ug problema sa ubang relihiyon o magpatunghag ubang kadaot. Sa kasong Nasirov, ang Korte midesisyon nga puwedeng ipanagtag sa mga Saksi ang ilang relihiyosong literatura ngadto sa mga tawo diha sa publikong mga lugar. Nalipay ta nga gidepensahan sa Korte ang katungod sa relihiyon sa Azerbaijan.”

Si Brader Famil Nasirov mipahayag sa iyang gibati: “Sa una, nakaatubang mig daghang pagsupak sa among nasod. Kanunay na lang ming dakpon ug prisohon sa mga polis ug dayon sukitsukiton mi sulod sa 4-5 ka oras. Pero sa tabang ni Jehova ug sa paningkamot sa atong minahal nga mga igsoon, wala na ni mahitabo ug mas may kagawasan na mi ron sa pagsangyaw.”

Bisan sa wala pa ang desisyon sa ECHR, ang atong mga igsoon mas may kagawasan na sa ilang pagsimba sa Azerbaijan. Gitugotan sila sa gobyerno sa pagpasulod ug pagpanagtag sa atong mga literatura sa Azerbaijan. Walay bisan usa sa atong mga igsoon ang gipamulta tungod sa pagtambong ug tigom sukad niadtong Enero 2017. Ginahimo ang mga tigom karon sa tulo ka Kingdom Hall sa Baku ug sa mga balay sa tibuok nasod. Sukad sa 2015, ang State Committee for Work with Religious Associations—ahensiya sa gobyerno nga nagdumala sa pagrehistro ug pag-regulate sa mga relihiyon sa Azerbaijan—nagtugot sa mga Saksi ni Jehova sa pagpahigayon sa Memoryal sa kamatayon sa Kristo, rehiyonal nga mga kombensiyon, ug mga asembliya diha sa inabangang mga pasilidad.

Mapasalamaton ta kang Jehova tungod niining maayong mga desisyon ug mapasalamaton ta kaniya kay padayon niyang gitabangan ang atong mga igsoon sa Azerbaijan.—Salmo 98:1.