Niadtong Septiyembre 25, 2024, ang Pederal nga Korte Suprema sa Brazil nagpakanaog ug importanteng desisyon nga nagsuportar sa katungod sa adulto nga mga pasyente nga modumili sa pag-abonog dugo ug mopilig medikal nga pagtambal nga wala maglangkit ug dugo. Midesisyon sab ang Korte nga kinahanglang seguroon sa Ministry of Health nga ang mga pasyente nga modumili sa pag-abonog dugo tungod sa personal o relihiyosong mga rason makadawat ug medikal nga pag-atiman nga dili maglangkit ug dugo.

Kini nga desisyon maoy bahin sa kaso sa duha ka Saksi ni Jehova sa Brazil. Niadtong 2018, gikanselar sa ospital ang nakaeskedyul nga operasyon sa kasingkasing ni Sister Malvina Silva human siya modumili sa pagpirma sa consent form nga mag-awtorisar sa iyang mga doktor sa pag-abonog dugo. Gidangtan pag halos duha ka tuig ayha nadawat ni Malvina ang pagtambal nga nagtahod sa iyang lig-ong personal nga baroganan.

Niadtong 2014, si Brader Heli de Souza nakaeskedyul nga operahan. Pero ang ospital sa iyang lugar walay equipment nga gikinahanglan sa operasyon nga dili mag-abonog dugo. Wala aprobahi sa gobyerno ang hangyo ni Heli nga mobalhin sa laing ospital nga naay mga equipment ug andam mohimo sa operasyon sa paagi nga nahiuyon sa iyang tinuohan ug baroganan. Hangtod karon wala pa maoperahi si Heli. Daghang Saksi ni Jehova sa Brazil ang nag-atubang ug samang problema, apil na ang pag-abonog dugo kanila bisag supak ni sa ilang gusto.

Sa pagpakanaog sa desisyon, ang presidente sa Korte, si Justice Luís Roberto Barroso, miingon: “Ang katungod sa pagdumili ug pag-abonog dugo tungod sa relihiyon maoy base sa konstitusyonal nga mga prinsipyo sa dignidad sa tawo ug kagawasan sa relihiyon. Busa, kon bahin sa katungod maylabot sa kinabuhi ug panglawas, ang mga Saksi ni Jehova naay katungod nga makadawat ug alternatibo nga mga pagtambal ug naay katungod nga modumili ug medikal nga pagtambal nga naglangkit ug pag-abonog dugo base sa ilang katungod sa paghimog personal nga desisyon.”

Kining kinabag-ohang desisyon mag-obligar sa mga korte sa tibuok Brazil nga tahoron ang mga desisyon sa pasyente bahin sa medikal nga pagtambal. Parehas ni sa mga desisyon sa Korte Suprema sa ubang nasod, apil ang Australia, Canada, Japan, South Africa, ug United States. Parehas pod ni sa Septiyembre 17, 2024 nga desisyon sa Grand Chamber sa European Court of Human Rights, nga nag-obligar sa 46 ka nasod sa Europe nga tahoron ang personal nga desisyon sa pasyente.

Mapasalamaton ta nga ang Pederal nga Korte Suprema sa Brazil midesisyon pabor sa pagtahod sa personal nga tinuohan sa tanang residente niini ug sa ilang katungod sa paghimog desisyon bahin sa medikal nga pagtambal.