Sukad niadtong Enero 18, 2020, ang Espírito Santo ug Minas Gerais nga mga estado sa Brazil kusog nga giulan, ug miresulta kinig grabeng pagbaha. Tungod sa baha nga kusog nga miagos sa kadalanan, naguba ang mga balay, naanod ang mga sakyanan, ug naluka ang mga kahoy. Sumala sa mga awtoridad, linibo ang napugos sa pagbakwet ug kapin sa 60 ka tawo ang namatay.

Sa mga lungsod sa Iconha ug Alfredo Chaves, siyam ka balay sa mga Saksi ni Jehova ang naguba sa baha, nga gipuy-an sa atong 27 ka igsoon. Maayo na lang kay walay naangol o namatay nga igsoon.

Mga 100 ka Saksi gikan niining mga lugara ang miboluntaryo aron tabangan ang mga igsoon nga naapektohan sa baha. Ang mga ansiyano ang nagdumala sa pag-apod-apod sa pagkaon, tubig, ug sinina nga gi-donate sa mga igsoon. Mitabang sab sila sa paghinlo ug pagtangtang sa lapok nga misulod sa balay sa mga igsoon ug sa ilang dili-Saksing mga silingan.

Walay mga igsoon nga naangol o namatay. Pero lima ka Kingdom Hall ang nadaot ug mga 50 ka pamilyang Saksi ang namakwet. Ang ubang igsoon na-trap sa ikaduhang andana sa ilang balay tungod sa pagtaas sa tubig, ug giluwas sila pinaagig baroto. Ang tanang igsoon nga namakwet midayon sa balay sa ubang Saksi ni Jehova.

Dunay giasayn nga mga Disaster Relief Committee sa Espírito Santo ug Minas Gerais aron maorganisar ang relief work. Nagtinabangay ang mga Disaster Relief Committee, mga tigdumala sa sirkito, ug ang mga ansiyano sa pag-atiman sa pisikal ug espirituwal nga panginahanglan sa mga igsoon.

Padayon natong iampo ang atong mga igsoon nga naapektohan sa baha. Nagpasalamat ta kang Jehova kay gihatagan niya silag kusog, paghupay, ug praktikal nga tabang pinaagi sa atong Kristohanong panag-igsoonay.​—Salmo 28:7.