Ang Komite sa Sangang Buhatan sa Brazil nagporma ug 18 ka Disaster Relief Committee (DRC) aron tabangan ang mga igsoon nga naglisod tungod sa coronavirus pandemic. Mga 12,000 ka kongregasyon sa tibuok nasod ang gitabangan sa DRC, apil ang mga igsoon nga nagpuyo sa hilit kaayong dapit sa Amazon River. Sa pagkakaron, 131 na ka pamilya sa Amazon ang natabangan.

Ang DRC sa Manaus, ang kaulohan sa estado sa Amazonas, nag-andam ug mga package nga naundan ug usa ka bulan nga suplay sa mga kinahanglanon sa usa ka pamilya. Ang mga package naay sulod nga mga pagkaon sama sa beans, harina nga gama sa balanghoy, bugas, ug gatas. Naa pod ni sulod nga sabon, tisyu, toothbrush, ug toothpaste. Gipadala sa mga igsoon ang package ngadto sa duol nga pantalan sa Manacapuru ug dayon gikarga ni sa sakayan aron iapod-apod ngadto sa daghang hilit nga mga dapit, apil ang Membeca ug Lago do Castanho.

Human makadawat ug mga suplay sa pagkaon, si Sister Marinelma, nga nagpuyo sa Lago do Castanho, miingon: “Una sa tanan, nagpasalamat ko kang Jehova kay iya ming giatiman. Lisod ang among kahimtang dinhi kay wala mi ikapalit ug pagkaon. Ug gusto pod kong magpasalamat sa mga igsoon tungod sa ilang gugma ug pagkamahinatagon. Naa ang akong sayis anyos nga anak dihang giablihan nako ang package, ug ako siyang giingnan nga gigamit ni Jehova ang mga igsoon aron tabangan mi. Dayon giingnan ko niya, ‘Ma, puwede tang mag-ampo aron pasalamatan si Jehova?’”

Si Brader Jonas Monteiro nagpuyo kauban sa iyang pamilya sa siyudad sa Caapiranga. Siya nagpadala ug sulat sa DRC, nga nag-ingon: “Salamat kaayo sa inyong pagtabang namo. Tungod sa inyong gihimo, among nabati ang gugma ni Jehova. Usa gyod ka dakong pribilehiyo nga mahimong bahin niining tibuok kalibotang pamilya.”

Nadasig pod ang mga igsoon sa DRC. Si Isaac Emannuel Ramalho de Oliveira, usa ka ansiyano nga nag-alagad sa DRC, miingon: “Sa pagtrabaho nako sa Disaster Relief Committee, adlaw-adlaw nga nalig-on ang akong pagtuo. Segurado ko nga niini nga asaynment, mas dako ang tabang nga akong madawat kay sa tabang nga akong mahatag sa mga igsoon.”

Makapalig-on gyod sa pagtuo nga makita ang pag-atiman ni Jehova sa iyang mga alagad niining panahon sa pandemic, bisan asa man sila nagpuyo.—Salmo 94:14.