Niadtong Marso 2019, ang Supreme Court of Cassation sa Bulgaria, ang kinatas-ang korte nianang lugara, nagpakanaog ug paborableng desisyon sa tulo ka kaso nga naglangkit sa atong mga igsoon. Importante kaayo ni nga mga desisyon kay makatabang ni sa pagprotektar sa katungod sa atong mga igsoon sa pagsimba kang Jehova sa tibuok nasod.

Ang duha sa mga kaso nagsugod dihang gibutangbutangan sa media ang atong mga igsoon. Niadtong 2012, ang mantalaang Vseki Den nagpatik ug artikulo nga nagsultig kabakakan bahin sa atong mga pagtulon-an. Ug niadtong 2014, ang estasyon nga SKAT TV nagpasalidag bakak nga mga report bahin sa atong organisasyon. Sa maong mga kahimtang, ang mga igsoon mihangyo sa media nga angkonon sa publiko nga sayop ang ilang mga report, pero wala mosugot ang media. Human sa sunodsunod nga kaso ug apelasyon, kini nakaabot sa Korte Suprema. Niadtong Marso 18, 2019, ang Korte Suprema nagpakanaog ug hukom nga ang gihimo sa SKAT TV supak sa balaod. Pagka-Marso 26, gihukman sa Korte ang Vseki Den sa parehong mga rason nga gihukman ang SKAT TV, nga nag-ingon nga ang mantalaan namakak ug nagpakitag pagdumot.

Ang ikatulong kaso maoy bahin sa pintas nga pagpanglutos sa politikal nga grupo nga gitawag ug VMRO-Bulgarian National Movement ngadto sa atong mga igsoon. Niadtong Abril 17, 2011, ang atong mga igsoon nagtigom aron handomon ang Memoryal sa kamatayon ni Jesus. Brutal nga giatake sa agresibong grupo sa 60 ka tawo ang atong mga igsoon mao nga nangaangol sila. Kini nga grupo giorganisar sa lider sa politika nga si Georgi Drakaliev sa VMRO. Ang mga igsoon nagpasakag kaso sa mga korte. Sa ngadtongadto, ang kaso gisang-at sa Korte Suprema. Niadtong Marso 20, 2019, gihukman sa Korte si Mr. Drakaliev mao nga kinahanglan niyang bayran ang mga igsoon.

Nalipay gyod ta niining tulo ka desisyon nga pabor kanato. Kini nga mga desisyon puwedeng himoong basehanan sa pagprotektar sa kagawasan sa atong mga igsoon nga ‘padayong magkinabuhi nga malinawon uban ang bug-os nga debosyon sa Diyos.’—1 Timoteo 2:2.