Linibo ka tawo sa New Brunswick, Ontario, ug Quebec, mga probinsiya sa Canada, ang napugos sa pagbiya sa ilang mga balay tungod sa baha. Sa Quebec pa lang, mga 9,000 na ang namakwet.

Ang sangang buhatan sa Canada nagreport nga sa Quebec, dunay 44 ka balay sa atong mga igsoon ang nadaot. Sa New Brunswick ug Ontario, wala pay gireport nga kadaot pero ang pagbaha nagpadayon.

Sa apektadong mga lugar sa Quebec, ang mga tigdumala sa sirkito ug ang lokal nga mga ansiyano nagtinabangay aron duawon ug hupayon ang mga magmamantala. Dugang pa, usa ka representante sa sangang buhatan ang mibisita sa naapektohan pag-ayo nga mga lugar aron dasigon ang mga igsoon. Sa rehiyon sa Beauce, nakuha na sa mga igsoon ang mga lapok gikan sa 20 ka balay sa mga igsoon nga gibahaan. Giporma ang Disaster Relief Committee sa Sainte-Marthe-sur-le-Lac aron tabangan kadtong nagub-ag mga balay.

Atong iampo ang atong mga igsoon nga naapektohan sa mga pagbaha ug hinaot padayon silang mosalig kang Jehova, nga maoy ‘ilang kusog ug gahom.’—Exodo 15:2.