ABRIL 6, 2020
CANADA
Pagpabiling Kalmado Bisag Natarantar ang mga Tawo
Si Brader Jean-Yves ug ang iyang asawa nga si Vasthie Mudaheranwa maoy mga frontliner panahon sa coronavirus nga pandemic sa Montreal, Canada. Si Brader Mudaheranwa maoy usa ka respiratory therapist sa ospital, ug si Sister Mudaheranwa usa ka nars sa ospital nga para sa mga dunay COVID-19. Samtang daghang tawo ang na-stress ug nabalaka pag-ayo, si Brader ug Sister Mudaheranwa nagsalig kang Jehova alang sa kusog ug nabatonan nila ang gisaad ni Jehova nga “maayong kahimtang sa kasingkasing.”—Isaias 65:14.
“Daghan sa akong mga kauban sa trabaho nahadlok pag-ayo, ug wa pa gyod nako sila makita sukad nga ingon adto,” miingon si Brader Mudaheranwa. “Dakog tabang ang personal nga pagtuon,” miingon si Sister Mudaheranwa. “Among gipamalandong ang ilhanan sa kataposang mga adlaw, ug gipahinumdoman namo ang among kaugalingon nga si Jehova nagauban namo ug dili mi niya pasagdan. Dako sab ug tabang ang pag-ampo. Sa dili pa ko mobiya sa balay aron motrabaho, moampo ko ug mabatonan nako ang kalinaw sa hunahuna.”
Ang magtiayong Mudaheranwa nakigbahin sa tigom sa kongregasyon
“Gikan ko sa Rwanda, ug nasinatian nako ang pagpinatyanay didto tungod sa rasa,” matod ni Brader Mudaheranwa. “Walay ingon adto sa Canada, maong usahay malimtan namo nga nagkinabuhi na ta sa kataposang mga adlaw. Sa tinuod lang, dili sa tanang panahon nga mibati ko nga duol na gyod kaayo ang adlaw ni Jehova. Ang pandemic nakapalig-on sa akong pagtuo nga kita nagkinabuhi sa kataposang mga adlaw, ug kini nakapalig-on sa akong pagtuo sa Bibliya ug sa mga tagna niini.”
Sama kang Brader ug Sister Mudaheranwa, ang katawhan ni Jehova sa tibuok kalibotan nagpakitag lig-ong pagtuo ug nagpabiling kalmado panahon niini nga pandemic.—Isaias 48:18.