Niadtong Mayo 10 hangtod 26, 2024, ang world championship sa International Ice Hockey Federation gihimo sa Czech Republic. Halos 800,000 ka tawo ang miadto sa tournament nga gihimo sa siyudad sa Ostrava ug Prague. Ang mga Saksi ni Jehova nag-display ug mga cart sa gawas sa mga arena panahon sa tournament. Ang mosunod mao ang pipila sa makapadasig nga mga eksperyensiya.

Duha ka batan-ong lalaki ang miduol sa cart ug nangutana sa mga igsoon kon kinsa sila ug kon nag-unsa sila didto. Giingnan sila sa mga igsoon bahin sa buluhaton sa mga Saksi ni Jehova ug sa atong ginatanyag nga interactive nga pagtuon sa Bibliya. Ang usa sa mga batan-on nangutana kon kanus-a ug kon asa ginahimo ang maong pagtuon. Ang mga igsoon miingon nga puwede ning himoon bisan kanus-a ug bisan asa nga gusto niya. Midawat siya ug pagtuon sa Bibliya.

Sa laing higayon, naay tulo ka lalaki nga miduol sa mga igsoon ug di sila katuo pagkahibalo nila nga walay suweldo ang mga Saksi ni Jehova sa ilang pagsangyaw. Ang usa sa mga lalaki nangutana: “Kon wa moy suweldo, unsa may inyong makuha sa paghimo niini?” Giingnan sila sa mga Saksi nga tungod sa gitudlo sa Bibliya, nabag-o ang ilang kinabuhi ug naa silay paglaom sa umaabot. Nakadayeg ani ang usa sa mga lalaki, maong gusto siyang mokat-og dugang ug nangayo siyag brosyur nga Mabuhi Ka Hangtod sa Hangtod!

Naay usa ka lalaki nga kapila na nakalabay sa mga gi-display nga cart. Usa ka adlaw, mihapit ra gyod siya ug nangutana sa mga Saksi: “Unsa may kalainan sa inyong gituohan ug sa gitudlo sa akong simbahan?” Gigamit sa mga igsoon ang Bibliya aron hisgotan kadali ang gituohan sa mga Saksi ni Jehova. Naminaw pag-ayo ang lalaki ug nagpasalamat siya sa klarong eksplinasyon. Dayon gipakita sa mga Saksi ang pipila ka feature sa jw.org ug kon unsaon paggamit ang website aron makakat-on siyag dugang bahin sa Bibliya ug sa mga gitudlo niini.

Mapasalamaton ta sa mga igsoon sa Czech Republic sa madasigong pagpahayag sa “maayong balita bahin sa maayong mga butang” ngadto sa tanan nga maminaw.—Roma 10:15.