Gawas sa coronavirus pandemic, ang atong mga igsoon sa pipila ka bahin sa Democratic Republic of the Congo ug sa Republic of the Congo nag-atubang sab sa mga epekto sa pagbaha ug sa nagpadayon nga mga kagubot sa ilang lugar. Ang sangang buhatan sa Congo (Kinshasa), nga nagdumala sa buluhatong pagsangyaw niining duha ka nasod, naghimog mga kahikayan aron matagan-an ang materyal ug espirituwal nga panginahanglan sa mga igsoon. Ang sangang buhatan nagporma ug 57 ka Disaster Relief Committee (DRC) aron maatiman ang mga panginahanglan sa mga igsoon. Sa pagkakaron, kapin na sa 90,000 ka igsoon ang nakadawat ug mga suplay sa pagkaon.

Niadtong Abril 16 ug 17, 2020, mibaha sa mga probinsiya sa sidlakang bahin sa Democratic Republic of the Congo tungod sa kusog nga mga pag-ulan. Tungod niini, 139 ka magmamantala ang mibakwet. Gipadayon sila sa balay sa mga igsoon samtang ang DRC niining mga dapita nangita pag temporaryo ug permanenteng kapuy-an niadtong mga namakwet.

Ang mga igsoon mitabang sa mga DRC pinaagi sa ilang mga hinabang. Sa usa ka lugar, ang mga igsoon mihatag ug 700 ka kilong saging, 400 ka kilong mais, ug 220 ka kilong balanghoy ug dahon sa balanghoy.

Dugang pa, ang 60 ka magmamantala sa Some 26 Km Congregation nagpadayon sa 50 sa atong mga igsoon nga namakwet gikan sa gubat. Ila silang gihatagag pagkaon hangtod nga nakadawat silag hinabang gikan sa DRC.

Ang usa ka ulo sa pamilya sa Brazzaville, ang kaulohan sa Republic of the Congo, miingon human makadawat ug hinabang: “Ang kinabuhi puwedeng mausab sa usa lang ka pagpamilok. Naa koy trabaho ug igoigo pod ang suweldo, ug ang akong asawa naa poy lainlaing sideline. Nakasapar ni sa among mga panginahanglan. Pagsugod sa COVID-19, nawad-an ming duha ug trabaho. Pero wala mi mawad-ig pagsalig kang Jehova. Samtang nag-estoryahay mi kon unsay himoon kon mahutdan mig pagkaon, miabot ang tabang gikan kang Jehova.”

Ang biyudang sister nga si Mbuyi Ester nga gikan sa siyudad sa Kinshasa miingon: “Namatay ang akong bana usa pa lang ka bulan ang milabay, ug nanginahanglan gyod kog tabang. Wala koy trabaho, ug kinahanglan nakong pakan-on ang akong tulo ka bata. Kon kamikami ra sa akong pamilya, imposible gyod nga makabaton ug ingon ani ka daghang pagkaon nga among gikinahanglan sa daghang adlaw. Salamat Jehova!”

Giampo nato nga padayong atimanon ni Jehova ang atong mga igsoon ug panalanginan ang mga paningkamot sa paghatag ug hinabang. Nagpaabot pod ta sa panahon dihang ang tanan makapahimulos na sa dagayang abot sa yuta.—Salmo 72:16.