Niadtong Septiyembre 27, 2024, gi-raid sa mga awtoridad sa Eritrea ang usa ka balay diin malinawong nagtigom ang mga Saksi ni Jehova. Bayente kuwatro tanan ang gidakop sa polis: 6 ka brader, 16 ka sister, ug 2 ka bata. Tulo ka adlaw sa ulahi, namalik ang mga awtoridad ug gidakop ang 85 anyos nga sister nga nagpuyo sa maong balay. Ang 2 ka bata gibuhian ra sa ulahi, samtang ang 23 ka adulto gibalhin sa Mai Serwa Prison.

Duna nay 63 ka Saksi ni Jehova sa Eritrea nga napriso tungod sa ilang pagtuo, apil ang 10 nga kapig 70 anyos na. Walay bisag usa niini nga mga igsoon, apil kadtong gidakop niini nga raid, ang nakasohan o nahukmang sad-an sa usa ka krimen.

Daghang tuig nang gilutos ang mga Saksi ni Jehova sa Eritrea. Halos 30 ka tuig na ang milabay, niadtong Oktubre 25, 1994, gitangtang sa presidente sa Eritrea ang citizenship sa tanang Saksi ni Jehova nga natawo didto. Sukad niadto, ang mga igsoon nakaatubang ug mas grabe pa nga paglutos ug dili makataronganon nga pagkapriso.

Nasakitan ug naguol gyod ta pag-ayo niini nga paglutos. Samtang mainampoon natong ‘hinumdoman silang mga binilanggo’ sa Eritrea, masaligon ta nga padayon silang tabangan ni Jehova aron sila mahupay, makalahutay, ug makabatog kusog.—Hebreohanon 13:3.