Sa milabayng 30 ka tuig, giantos sa mga Saksi ni Jehova sa Eritrea ang grabeng paglutos. Sukad niadtong 1994, kapig 270 ka igsoon ang dili makataronganong gipriso ug gi-torture pa gani tungod sa ilang pagtuo. Sa pagkakaron, 64 ang napriso, ug walay usa kanila ang gikasohan o nahukmang sad-an sa usa ka krimen.

Niadtong Oktubre 25, 1994, ang presidente sa Eritrea, si Isaias Afwerki, nagpagawas ug sugo nga tangtangon ang citizenship sa tanang Saksi ni Jehova nga natawo sa nasod. Tungod ni kay ang mga igsoon midumili sa pag-apil sa politikal nga mga kalihokan ug sa pagsundalo. Bisag gilutos na ang mga Saksi ni Jehova sa Eritrea sa wala pa ang 1994, misamot ni dihang mipagawas ug sugo ang presidente. Ingong resulta, gatosan ka igsoon ang gidakop, gipriso, ug grabeng gipaantos sa mga tuig human niadto.

Dihang gibuhian ang 32 ka Saksi gikan sa prisohan niadtong Disyembre 2020 hangtod Pebrero 2021, morag miarang-arang ang situwasyon sa Eritrea. Pero ikasubo nga dili kadto ang nahitabo. Kapig 20 ka Saksi ang wala pa makagawas sa prisohan, ug padayon gihapong gidakop ang mga igsoon. Dayon, sa ulahing bahin sa Septiyembre 2024, gi-raid sa mga polis ang usa ka balay ug gidakop ang 25 ka tawo nga malinawong nagtigom aron hisgotan ang Bibliya. Apil sa gidakop ang tulo nga kapig 80 anyos, sister nga mga unom ka bulan nga mabdos, ug duha ka bata. Ang mga bata gibuhian ra sa ulahi, samtang ang mga adulto gibalhin sa Mai Serwa Prison.

Kadtong gipriso sa Eritrea tungod sa ilang pagtuo nakasinatig brutal nga pagtratar ug lisod kaayo nga kahimtang sa prisohan. Si Brader Negede Teklemariam, kinsa napriso sulod sa 26 ka tuig, nag-ingon: “Gigapos mi ug gipaantos pag-ayo sa mga guwardiya. Grabe ming gikulata ug gipugos sa pagpatrabaho. . . . Gusto gyod nila nga . . . mamatay mi.” Ikasubo, upat ka brader ang namatay sa prisohan tungod sa lisod kaayo nga kahimtang nga ilang nasinatian, ug tulo ang namatay wa madugay human sila gibuhian gikan sa prisohan.

Bisan ang mga igsoon nga wala mapriso nakasinati sab ug daghang kalisdanan. Pananglitan, ingong resulta sa pagtangtang sa citizenship, daghan ang nawad-ag trabaho, puy-anan, ug kagawasan sa pagbiyahe. Ang uban nakasinatig pagpanginsulto ug pisikal nga pag-abuso gikan sa ilang mga silingan ug sa mga opisyales sa gobyerno tungod sa ilang neyutralidad. Dugang pa, ang mga batan-ong Saksi dili makahuman sa pag-eskuwela tungod kay ang gobyerno nag-obligar sa tanang estudyante nga gustong mohuman sa ilang pag-eskuwela nga moapil ug military training.

Makapaguol gyod ang nagpadayong paglutos sa Eritrea. Pero masaligon ta nga dili kalimtan ni Jehova ang tanan natong igsoon sa Eritrea kinsa maisogong mibarog nga lig-on bisan pa sa daghang tuig nga pagsupak. Ingong bahin sa nagkahiusang panag-igsoonay, atong giampo nga padayon silang lig-onon ni Jehova samtang ilang gilahutay kining “nagdilaab nga mga pagsulay” sa ilang pagtuo.—1 Pedro 4:12-14.