Sumala sa usa ka kinabag-ohang balita nga gireport sa jw.org, dihay mga pagbuto sa usa ka rehiyonal nga kombensiyon didto sa Kerala, India, niadtong Dominggo, Oktubre 29, 2023. Ikasubo nga gawas sa duha ka sister nga namatay, usa ka 12 anyos nga batang babaye sab ang namatay tungod sa iyang grabeng mga injury. Laing 55 ka igsoon ang naangol, nga ang uban dunay grabeng mga paso.

Sa pagkakaron, tulo ka sister ug duha ka brader ang naa pa gihapon sa ospital ug kritikal ang ilang kahimtang. Gikompirmar sa mga awtoridad nga labing menos tulo ka bomba ang gipabuto panahon sa pangbukas nga pag-ampo sa mga 9:40 sa buntag. Ang suspek niini nga krimen naa na karon sa kustodiya sa mga polis, ug nagpadayon ang imbestigasyon.

Mapasalamaton kaayo ta sa emergency personnel nga miadto dayon sa kombensiyonanan aron motabang ug sa hospital staff nga nag-atiman sa mga naangol.

Kadtong mga nanambong natandog pag-ayo ug nadasig sa gugma ug tabang nga gipakita sa mga isigkamagtutuo. Usa ka sister nga tua sa awditoryum dihang mibuto ang mga bomba ang miingon: “Miampo ko dayon kang Jehova. Giatiman mi pag-ayo sa mga attendant ug sa ubang brader, ug milihok dayon sila aron mapaneguro nga luwas mi. Kini nagpakita sa gugma ug pagtagad ni Jehova sa matag usa kanato.”

Ang mga representante sa sangang buhatan sa India, mga tigdumala sa sirkito, ug lokal nga mga ansiyano padayong nagtaganag espirituwal ug praktikal nga tabang niadtong mga naapektohan. Usa ka ansiyano nga gikan sa sangang buhatan nga miadto sa Kerala aron hupayon ang mga igsoon nga naapektohan ang miingon: “Bisan pa sa grabeng kalisang, kasakit, ug trauma, nadasig ko sa positibong tinamdan sa mga igsoon nga naapektohan. Daghan nila ang akong naestorya. Nakapalig-on sa akong pagtuo ang pagkakita kon sa unsang paagi sila misalig kang Jehova.”

Ingong bahin sa tibuok kalibotang panag-igsoonay, atong iampo ang mga pamilya sa mga biktima ug ang tanang naapektohan niini nga trahedya sa India. Makabaton tag kahupayan ug kalinaw sa saad sa Bibliya nga sa umaabot wala nay kapintasan, pag-antos, ug kamatayon. Determinado ta nga magpadayon sa pagpakitag bug-os nga pagsalig kang Jehova.—Salmo 56:3.