Niadtong Dominggo, Oktubre 29, 2023, dihay mga bomba nga mibuto sa usa ka rehiyonal nga kombensiyon sa Kerala, India. Ikasubo nga gawas sa tulo nga namatay, usa ka brader ug duha ka sister sab ang namatay. Apil nila ang inahan ug igsoong lalaki sa 12 anyos nga batang babaye nga namatay. Dugang pa, 11 ka igsoon ang nagpabilin pa gihapon sa ospital.

Giaprobahan ang sangang buhatan sa India nga maghikay ug usa ka espesyal nga miting aron hupayon ug dasigon kadtong mga naapektohan sa maong trahedya. Kini nga miting gipahigayon niadtong Nobyembre 4, 2023. Giimbitar nga motambong ang mga igsoon gikan sa 21 ka kongregasyon nga naasayn sa kombensiyon diin nahitabo ang pagpamomba. Ang programa gihimo sa usa ka lokal nga Kingdom Hall ug halos 200 ang nanambong didto. Dihay laing 1,300 nga mi-connect sa programa pinaagig videoconference, ug ang programa girekord pod para niadtong mga tua pa sa ospital. Gihisgotan sa usa ka ansiyano gikan sa sangang buhatan ang Salmo 23:1 ug iyang gipasiugda nga gimahal ni Jehova ang matag usa sa iyang mga alagad. Siya miingon: “Niining tekstoha, ang salmista wala mag-ingon nga si Jehova usa ka magbalantay o usa ka maayo kaayong magbalantay. Gitawag sa salmista si Jehova ingong ‘akong magbalantay.’ Makapahupay gyod ang pagkahibalo nga gimahal ni Jehova ang matag usa kanato!”

Usa ka brader nga presente dihang nahitabo ang pagpamomba ang miingon nga nalisdan gihapon siya sa pagkatulog. Bisan pa niana, miboluntaryo siya sa pagtabang niadtong mga tua pa sa ospital. Siya miingon: “Nakita nako ang ilang pagtuo ug ang ilang pagkapositibo. Kini nakatabang nako nga malimtan ang akong mga gikabalak-an. Bisan pag nangaangol sila ug nakasinatig kasakit, daghan nila ang malipayong nanganta ug mga awit sa Gingharian.” Ang laing brader miingon: “Dangtan pa tingalig taas nga panahon aron ang pipila nila makabalik sa ilang naandang mga kalihokan. Bisan pa niana, nahibalo ko nga padayon silang pakitaag gugma sa atong mga igsoon. Ug segurado ko nga dili sila pasagdan sa atong mahigugmaong Diyos, kinsa nagkupot sa matag usa kanila pinaagi sa iyang gamhanang kamot. Nadasig kaayo ko ini!”

Ingong nagkahiusang pamilya sa tibuok kalibotan, nahupay ta sa pagkahibalo nga si Jehova padayong ‘nag-ayo sa mga dugmok ug kasingkasing ug gibugkosan niya ang mga samad’ sa atong minahal nga mga igsoon sa India.—Salmo 147:3.