Niadtong Disyembre 31, 2019, giulan pag-ayo ang Jakarta, Indonesia. Mga 100 ka balay sa atong mga igsoon ang nabahaan. Ang ubang balay nabahaan ug mga 1.5 metros nga gitas-on sa tubig.

Wala ray namatay o naangol nga mga igsoon, pero daghang igsoon ang temporaryong namakwet, samtang ang uban nangitag luwas nga lugar sulod sa ilang balay. Ang ubang tigomanan medyo nadaot tungod sa baha. Ang mga ansiyano didto mihimog mga paagi sa pagtabang, sama sa paghatag ug tubig ug pagkaon. Ang mga tigdumala sa sirkito mibisita sab sa mga naapektohan sa baha aron mohatag ug paghupay gikan sa Bibliya. Duha ka Disaster Relief Committee ang giporma aron maseguro nga mahatag ang panginahanglan sa mga igsoon.

Ang baha wala makapugong sa atong mga igsoon sa pagpadayon sa ilang espirituwal nga mga kalihokan, bisan pag ang ubang apektadong pamilya kinahanglang moagi sa nabahaang mga lugar aron makatambong sa midweek nga tigom. Si Brader Daniel Purnomo, membro sa Komite sa Sangang Buhatan sa Indonesia, miingon: “Kini ang kinagrabehang baha nga nahitabo sa Jakarta sa milabayng mga tuig, pero wala ni makapaluya sa atong mga igsoon. Hinuon, napalihok sila sa pagtinabangay ug sa pagpakitag Kristohanong gugma.”

Naghinamhinam ta sa panahon nga wala nay kalamidad nga magpahinabog kadaot kanato.—Marcos 4:39.