Ang Italy maoy usa sa mga nasod nga kinagrabehang naapektohan sa COVID-19 nga pandemic. Ubos sa pagdumala sa Nagamandong Lawas, ang sangang buhatan sa Italy naghatag ug praktikal ug espirituwal nga tabang sa atong mga igsoon.

Tulo ka Disaster Relief Committee (DRC) ang nag-atiman sa mga panginahanglan sa mga igsoon sa amihanan, sentral, ug habagatan nga bahin sa Italy. Gimonitor sa mga DRC ang mga panginahanglan sa naapektohan nga mga magmamantala pinaagi sa ilang regular nga komunikasyon sa mga tigdumala sa sirkito. Ang mga tigdumala sa sirkito regular usab nga nakadawat ug mga impormasyon sa mga ansiyano.

Dili lang kay praktikal nga tabang ang gihatag sa mga ansiyano. Gitabangan usab nila ang mga magmamantala nga mapadayon ang ilang espirituwal nga mga kalihokan. Si Brader Villiam Boselli, tigdumala sa sirkito nga nag-alagad duol sa Milan, usa sa kinaunhang mga siyudad nga naapektohan sa pandemic, miingon: “Bisag ang tanang igsoon nagpabilin lang sa balay, padayon gihapon silang nakigkomunikar sa usag usa. Ug kay ang tigom gihimo man pinaagig videoconference, makakomento sila sa tigom ug makadasig sa usag usa. Bisan ang edarang mga igsoon nakabenepisyo pag-ayo sa mga tigom pinaagig videoconference. Sa akong tan-aw, mas nagkahiusa karon ang mga kongregasyon!”

Dugang pa, daghang dili Saksi nga mga paryente ang nagtan-aw sa mga tigom uban sa mga Saksi nga membro sa ilang pamilya. Usa ka sister miingon: “Dili gyod gusto sa akong bana nga motambong sa mga tigom, pero karon matan-aw na niya ang mga tigom sa balay . . . ug nahibalo kag unsay nahitabo? Ganahan na siya sa mga tigom!”

Gigamit sa mga igsoon ang tanang kahigayonan aron makasangyaw. Pananglitan, usa ka sister ang nagpaingon sa balay sa usa ka edarang sister aron maghatod ug wheelchair. Samtang nagdrayb padulong didto, gipahunong siya sa tulo ka polis sa checkpoint. Gipatin-aw sa sister nga duna siyay ginatabangan nga edarang babaye ug iyang gipakita nila ang iyang permit sa pagbiyahe. Ug tagsatagsa niyang gitanyagan silag mga tract nga Unsa Kahay Mahitabo sa Umaabot? ug Matapos pa Kaha ang Pag-antos? Gidawat kini sa mga polis. Pagbalik sa sister human mahatod ang wheelchair, gipahunong na pod siya sa mga polis. Gipasalamatan siya sa mga polis ug nangayo silag dugang impormasyon bahin sa paglaom nga gihisgotan sa Bibliya. Gipaapil pa gani nila ang duha pa ka laing polis sa ilang panaghisgot. Gipakita sa atong sister ang jw.org. Giingnan siya sa usa ka polis, “Salamat, Ma’am. Nakahatag gyod ka namog kalipay karong adlawa!”

Si Brader Boselli miingon: “Bisag responsibilidad nako ang pagdasig ug paghupay sa uban, ako man hinuoy nadasig sa mga igsoon sa ilang pagpabiling lig-on sa espirituwal ug determinasyon nga molahutay. Dalayegon ang ilang dakong gugma kang Jehova ug nakatandog ni sa akong kasingkasing. Tinuod gyod nga gikinahanglan nato ang atong mga igsoon. Nindot kaayo sila nga gasa gikan kang Jehova!”

Tin-aw nga bisan sa lisod nga mga kahimtang, ang atong mga igsoon nagpabiling lig-on sa espirituwal ug ‘wala maluya niini nga kasakitan.”—1 Tesalonica 3:2, 3.