ROME—Agig pasalamat sa kaayohan nga gikahatag sa mga Saksi ni Jehova ngadto sa komunidad, ang mga opisyales sa prisohan sa lungsod sa Bollate, nga 15 kilometros norte sa Milan, naghatag ug dakong luna para lang sa mga Saksi nga himoong “Kingdom Hall,” o dapit sa pagsimba.

Ang direktor sa prisohan nga si Dr. Parisi miingon nga ang prisohan sa Bollate gitukod aron mabag-o ang mga piniriso: “Ang usa sa among tumong mao ang pagseguro nga ang mga tawo makabaton pag-usab ug paglaom, ug aron mahimo kini, lainlaing paagi ang among gigamit. Para namo, importante kaayo ang espirituwalidad.” Sa miaging 13 ka tuig, gitugotan namo ang mga Saksi ni Jehova sa pagdumalag libreng mga pagtuon sa Bibliya ngadto sa mga piniriso. Gihubit ni Dr. Parisi ang mga resulta: “Nakigkooperar gyod namo ang mga Saksi sulod sa daghang katuigan ug ang ilang pagpanudlo bahin sa Bibliya nakahimog maayong mga kausaban sa pipila namo ka piniriso. . . . Tungod niini, nagtuo mi nga maayong hatagag luna ang mga Saksi nga ilang magamit aron matabangan pag-ayo ang mga piniriso.” Sa duha ka higayon sa milabayng pipila ka bulan, kapig 100 ka piniriso ang mitambong sa tigom sa mga Saksi.

Si Christian Di Blasio, tigpamaba sa mga Saksi ni Jehova sa Italy, miingon: “Nalipay kaayo mi nga ang mga opisyales sa prisohan sa Bollate naghatag namog luna alang sa pagsimba sulod sa prisohan aron padayon namong matabangan ang mga piniriso. Hinaot magpadayon kini nga kooperasyon aron makabenepisyo ang mga piniriso sa among mga programa sa pagpanudlo bahin sa Bibliya nga espesyal nga gihikay para sa ilang espirituwal nga panginahanglan.”

Media Contacts:

International: David A. Semonian, Office of Public Information, 1-718-560-5000

Italy: Christian Di Blasio, 39-06-872941