Giasikaso dayon sa UN Human Rights Committee ang gipasakang reklamo ni Teymur Akhmedov niadtong Enero 3, 2018. Si Mr. Akhmedov gipriso sa halos usa na ka tuig. Siya 61 anyos ug dili maayog kahimtang ang panglawas. Kay gibasura sa mga korte sa Kazakhstan ang iyang mga apelasyon ug giuyonan niini ang hukom kaniya tungod kuno sa ilegal nga relihiyosong kalihokan, si Mr. Akhmedov nangayog tabang sa Committee.

Sa usa ka sulat nga pinetsahag Enero 9, 2018, giawhag sa Committee ang Kazakhstan nga mohimog temporaryong mga lakang alang sa kaayohan ni Mr. Akhmedov, bisag wala pay desisyon ang Committee sa iyang reklamo. Giingnan niini ang mga awtoridad nga “seguradohon nga walay langang makadawat [si Mr. Akhmedov] ug igong medikal nga atensiyon ug nga ang iyang kahimtang sa prisohan nahiuyon gayod [sa International Covenant on Civil and Political Rights] ug sa internasyonal nga mga sukdanan.” Gihangyo sab diha sa sulat nga “konsiderahon [sa mga awtoridad] ang pagpagawas [kaniya] sa prisohan, tungod sa kahimtang sa iyang panglawas, o kaha ipailalom siya sa house arrest samtang pending pa sa Committee ang iyang reklamo.”

Ang hangyo alang sa temporaryong mga lakang nagpakita sa kabalaka alang sa kaayohan ni Mr. Akhmedov sumala sa opinyon sa UN Working Group on Arbitrary Detention. Niadtong Oktubre 2017, gisusi sa Working Group ang reklamo ni Mr. Akhmedov ug nakahinapos nga walay basehanan ang iyang pagkapriso ug nga angay siyang pagawason sa mga awtoridad ug hatagan siyag danyos tungod sa dili makataronganong pagtratar. Hangtod karon, gibalewala sa gobyerno sa Kazakhstan ang giingon sa Working Group bahin sa gipanghimo niini. Naserbisyohan na ni Mr. Akhmedov ang halos usa ka tuig sa iyang lima ka tuig nga sentensiya.