Niadtong Disyembre 4, 2017, gibasura sa Korte Suprema sa Kazakhstan ang apelasyon ni Teymur Akhmedov kay siya gisentensiyahan tungod sa ilegal kuno nga relihiyosong kalihokan. Ang tinuod, nagpaambit lang siya sa iyang tinuohan ngadto sa uban. Si Mr. Akhmedov gipriso sukad sa pagdakop kaniya niadtong Enero 18, 2017, dihang gilaang siya sa polis. Pagka-Mayo, gihukman siyang sad-an sa district court ug gisentensiyahan ug lima ka tuig nga pagkapriso, nga giuyonan sa korte sa apelasyon niadtong Hunyo 20, 2017.

Sa pagkonsiderar sa iyang apelasyon, gibalewala sa Korte Suprema ang bag-o pang desisyon sa UN Working Group on Arbitrary Detention, nga nag-ingong sad-an ang Kazakhstan sa dili makataronganong pagpriso kang Mr. Akhmedov ug sa paglapas sa iyang kagawasan sa relihiyon. Bisag dili maayo ang panglawas ni Mr. Akhmedov, siya duna gihapoy lig-ong pagtuo ug bug-os nga pagsalig sa Diyos. Mapasalamaton si Mr. Akhmedov sa mga paningkamot aron makagawas siya dayon, bisag hangtod karon wala pa kini mahitabo, ug mapasalamaton siya nga ang iyang mga isigkamagtutuo sa tibuok kalibotan padayong nag-ampo alang sa iyang kagawasan.