Niadtong Abril 2, 2018, ang presidente sa Kazakhstan nga si Nursultan Nazarbayev naghatag ug presidential pardon kang Teymur Akhmedov, 61 anyos, kinsa kapin sa tuig nang napriso tungod sa hinimohimo nga mga akusasyon. Tungod sa pardon, giwagtang ang tanan niyang kriminal nga rekord. Nasayran ni Mr. Akhmedov ang maong desisyon adtong Abril 4 samtang naa siya sa ospital ug nagpaayo sa iyang operasyon. Kauban na niya karon ang iyang pamilya ug mas sayon na ang pagpatambal sa iyang kanser.

Si Mr. Akhmedov, nga Saksi ni Jehova, gidakop niadtong Enero 18, 2017 tungod sa iyang pagsulti sa iyang tinuohan ngadto sa uban. Pila ka bulan ayha siya gidakop, diha siyay gikaestoryang mga lalaki nga interesado kunohay sa Bibliya ug sa tinuohan sa mga Saksi ni Jehova. Ang maong mga tawo nagtrabaho para sa Kazakhstan secret police, ang National Security Committee (KNB). Sekreto nilang girekord ang ilang giestoryahan. Base niini nga rekording, si Mr. Akhmedov gidakop sa KNB ug giakusahan nga nagpasiugdag “pagkabahinbahin sa relihiyon” ug “pagkalabaw . . . sa [iyang] relihiyon,” nga maoy paglapas sa Article 174(2) sa Criminal Code sa Kazakhstan.

Human dakpa, si Mr. Akhmedov gisukitsukit sa mga polis ug giprisog tulo ka bulan ayha siya gihusay. Niadtong Mayo 2, 2017, ang korte nagsentensiya niya ug lima ka tuig nga pagkapriso ug tulo ka tuig sab siyang gidid-an nga moapil sa mga kalihokan sa iyang relihiyon.

Ang mga abogado ni Mr. Akhmedov kadaghan miapelar nga buhian siya, pero gibasura ni sa korte. Human mahimo ang tanang legal nga paagi didto sa Kazakhstan, nangayo siyag tabang sa internasyonal nga mga korte. Iyang gisang-at ang reklamo ngadto sa UN Working Group on Arbitrary Detention (WGAD) ug sa UN Human Rights Committee.

Niadtong Oktubre 2017, gisaway sa WGAD ang Kazakhstan tungod sa ilang pagpriso kang Mr. Akhmedov. Giingnan sab niini ang gobyerno sa Kazakhstan nga pagawson dayon siya, tungod kay ang iyang gihimo “malinawon ra ug walay balaod nga nalapas.” Niadtong Enero 2018, gidawat sa Human Rights Committee ang aplikasyon ni Mr. Akhmedov ug nagpagawas ug temporaryong desisyon, nga kinahanglang dunay himoon ang Kazakhstan aron makapatambal dayon siya. Ang Human Rights Committee nag-awhag sab sa Kazakhstan nga konsiderahon ang permanenteng pagpagawas kang Mr. Akhmedov, bisag wala pa ang kataposang desisyon sa iyang gisang-at nga reklamo.

Samtang napriso, nagkagrabe ang sakit ni Mr. Akhmedov. Sayosayo pa niining tuiga, giingnan siya sa doktor nga naa siyay kanser sa colon ug nagkagrabe ang iyang kondisyon. Tungod sa desisyon sa Human Rights Committee ug sa ubang mga hangyo sa internasyonal nga mga korte, giingnan sa mga opisyal sa Kazakhstan si Mr. Akhmedov nga mosulat kang President Nazarbayev nga hatagan siyag presidential pardon.

Misulat siya niadtong Marso 5, 2018, ug mihangyo nga konsiderahon dayon kini kay kinahanglan na siyang ipaospital aron dili mograbe ang iyang kanser. Niadtong higayona, ang mga opisyal sa prisohan nagbalhin kang Mr. Akhmedov didto sa Almaty, Kazakhstan. Didto siya gioperahan niadtong Marso 27, 2018.

Si Mr. Akhmedov, si Mafiza nga iyang asawa, ug ang ilang mga anak nalipay nga nakagawas na siya. Mapasalamaton sab sila nga giwagtang ni President Nazarbayev ang tanan niyang kriminal nga rekord. Adtong napriso siya, giembargo sa gobyerno ang iyang account sa bangko, maong nagkalisod pag-ayo ang iyang asawa.

Naglaom ang mga Saksi ni Jehova sa tibuok kalibotan nga ang pag-pardon kang Mr. Akhmedov nagkahulogan nga hatagan na sa Kazakhstan ang mga Saksi ug dugang kagawasan sa pagpahigayon sa ilang malinawong pagsimba.