Gihikay sa Komite sa Sangang Buhatan sa Malawi nga ang mga programa sa tigom sa kongregasyon ma-broadcast sa mga estasyon sa TV ug radyo. Gawas sa atong mga igsoon, daghan ang nakabenepisyo niini nga mga broadcast. Kapin sa 100,000 ang mga Saksi ni Jehova sa Malawi, pero gibanabana sa mga broadcaster nga kada Sabado ug Dominggo, duha ka milyon ang motan-aw sa TV ug walo ka milyon ang maminaw sa radyo.

Sama sa daghang nasod, ang atong mga igsoon sa Malawi dili makatigom sa Kingdom Hall tungod sa COVID-19. Halos tanang igsoon sa kongregasyon dunay TV ug radyo. Tungod kay ang mga tigom gi-broadcast man, kadtong walay Internet o dili makagamit ug videoconferencing app makatambong gihapon sa tigom.

Ang mga broadcast sa tigom gipresentar sa Chichewa, ang pangunang pinulongan sa nasod. Ang tibuok programa gihubad pod sa Malawi Sign Language. Gawas sa pakigpulong publiko, duna poy gipasalida nga mga video o kaha gidrama nga pagbasa sa Bibliya. Sa kataposan sa programa, ang mga mamiminaw giawhag sa pagbisita sa jw.org aron makadawat ug dugang impormasyon diha sa uban pang pinulongan.

Tungod niini nga mga broadcast, natul-id ang pipila ka sayop nga pagsabot sa mga tawo bahin sa mga Saksi ni Jehova. Dihay tawo nga misulat: “Niining milabay nga mga semana, nakapaminaw ko sa inyong mga sermon sa radyo. Gitul-id niini ang sayop nga mga gipanulti sa mga tawo bahin ninyo. Ang inyong mga sermon lahi kaayo sa mga sermon sa ubang relihiyon kay nakatandog ni sa among kasingkasing!” Ang maong tawo ug ang iyang pamilya nagsugod nag tuon sa Bibliya uban sa mga Saksi ni Jehova.

Si Augustine Semo, nga nagtrabaho sa Public Information Desk sa Malawi, miingon: “Kini nga mga broadcast dako kaayog tabang sa atong mga igsoon aron mapadayon ang ilang espirituwal nga rutina. Pinaagi niini, daghang dili Saksi ang nakadungog sa atong mga pagtulon-an nga gibase sa Bibliya. Kon monormal na ang kahimtang sa Malawi, naglaom ta nga daghang bag-ohan ang motambong sa Kingdom Hall.”

Makapalipay nga ang atong mga igsoon ug ang uban pa sa Malawi makasimba gihapon kang Jehova bisan pa niining lisod nga panahon. Mapasalamaton gyod ta sa ‘matinumanong ulipon’ kay gipaneguro niini nga ang tanan makadawat ug espirituwal nga pagkaon.​—Mateo 24:45.