MEXICO CITY​—Niadtong Disyembre 4, 2017, sa Tuxpan de Bolaños, gamayng lungsod sa kabukiran sa Jalisco, Mexico, giatake sa usa ka grupo sa mga tawo ang 12 namo ka igsoon nga lumad sa komunidad sa Huichol ug ang 36 pa ka tawo nga kauban nila ug gipahawa sa ilang pinuy-anan. Ang grupo nga miatake nasuko sa mga Saksi kay dili sila moapil sa tradisyonal nga mga relihiyosong seremonyas sa Huichol. Kay biktima sila sa paglutos tungod sa relihiyon, ang among mga igsoon nangayo nag tabang sa mga awtoridad.

Gitahod sa gobyerno sa Mexico ang mga tradisyon ug kultura sa Huichol nga tungod niana kini nga komunidad gihatagag diyutayng katungod nga mahimong independente gikan sa estado. Tungod sa hangyo sa mga lider sa lumad nga Huichol, way kaluoy nga gipahawa sa mga awtoridad ang among mga igsoon gikan sa ilang balay, gipangransak kini, ug gikawatag mga pultahan, bentana, ug mga atop. Ang mga butang nga wala kawata gipanglabog sa kanal. Unya ang among mga igsoon gipangdala sa lasang ug giingnan nga pamatyon kon mamalik.

Usa ka representante sa sangang buhatan sa Mexico ang mibiyahe aron makigkita niadtong mga giabog aron sila palig-onon sa espirituwal ug tagan-ag kapuy-an. Ang mga abogado sa mga Saksi ni Jehova nakigkita sa direktor sa gobyerno sa Jalisco, sa prosecutor of human rights, sa regional prosecutor, ug sa director of attention for crime victims. Giimbestigahan na kini karon niini nga mga awtoridad.

Si Brader Gamaliel Camarillo, tigpamaba sa mga Saksi ni Jehova sa Mexico, miingon: “Nakurat kaayo mi sa nahitabo sa among mga igsoon, nga malinawong nagpuyo sa ilang komunidad ug matinahoron sa lokal nga kostumbre, kay sila giatake tungod lang sa dili pag-apil sa relihiyosong mga seremonyas nga supak sa ilang konsensiya. Masaligon mi nga ang lokal nga awtoridad mohimo dayon ug aksiyon mahitungod niini nga paglutos tungod sa relihiyon.”

Giampo namo ang among mga igsoon nga nawad-ag balay ug kabtangan, ug masaligon mi nga padayong ihatag ni Jehova kanila ang ilang panginahanglan pinaagi sa iyang organisasyon.​—Isaias 32:2.

Media Contacts:

International: David A. Semonian, Office of Public Information, +1-845-524-3000

Mexico: Gamaliel Camarillo, +52-555-133-3048