MANILA, Pilipinas—Tungod sa grabeng kadaot nga gipahinabo sa Super Typhoon Haiyan (Yolanda), ang mga Saksi ni Jehova sa tibuok kalibotan padayong naglihok sa pagtabang sa Pilipinas.

Ang sangang buhatan (branch office) sa mga Saksi ni Jehova sa Manila nagpormag lima ka disaster relief committee aron matabangan dayon ang mga apektado. Kapin sa 190 ka toneladang suplay ang gipadala ngadto sa Kabisay-an. Ang mga Saksi nga miboluntaryo sa pagtabang naggikan sa mga napulo ka nasod. Sila nagtukod ug nag-ayog kapin sa 2,000 ka balay o nagtaganag medikal nga tabang.

Mga 225 ka tawo naa pa sa temporaryong mga puy-anan nga gitukod sa mga Saksi duol sa Calbayog City sa Samar. Gibanabana nga 15 ngadto sa 20 porsiyento kanila dili Saksi ni Jehova.

Sa paglurang sa gikaingong usa sa kinakusgang bagyo nga miigo sa yuta, 6,201 ang nangamatay ug 1,785 ang wala na hikit-i. Mga 28,000 ang nasamdan ug kapin sa 1 ka milyong balay ang nadaot. Matod pa sa sangang buhatan sa Manila, 33 ka Saksi ang kompirmadong namatay ug 10 ang wala hikit-i ug gituohang patay na.

Sugod niadtong Disyembre 7, 2013, sulod sa pito ka adlaw, si Mark Sanderson nga membro sa Nagamandong Lawas (Governing Body) sa mga Saksi ni Jehova miduaw sa lima ka probinsiyang naapektohan. Siya miingon: “Daghan sa Pilipinas apektado gihapon sa Bagyong Haiyan; apan andam mi sa pagtaganag gikinahanglang suplay, mga boluntaryo, ug paghupay aron makarekober ang mga biktima.”

Media Contact(s):

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090