MANILA, Pilipinas—Ang mga Saksi ni Jehova sa Pilipinas mihimog dakong kahikayan sa pag-ayo ug pagtukod pag-usab sa mga balay nga nadaot sa Super Typhoon Nock-Ten (ginganlag “Nina”).

Niadtong Disyembre 25, 2016, ang Category 4 nga bagyong Nock-Ten miigo sa Bicol region, nga nagdaot sa mga lugar nga naagian niini. Sumala sa mga report, ang bagyo nakapatay ug 10 ka tawo ug nakadaot ug kapig 390,000 ka bilding. Bisag walay Saksi ni Jehova nga namatay ug naangol didto, kapig 300 ka balay sa mga Saksi ug 24 nila ka tigomanan (gitawag ug Kingdom Hall) ang nadaot. Ang branch office sa mga Saksi ni Jehova sa Pilipinas nagpormag disaster relief committee didto sa Naga City aron sa pagtabang sa naapektohang mga pamilyang Saksi.

“Hangtod karon, gitabangan sa among mga boluntaryo ang pag-ayo sa 271 ka balay sa among mga isigkamagsisimba ug ang 22 ka Kingdom Hall. Ang among relief construction teams magpadayon sa pagtabang sa pag-ayo sa 38 pa ka balay ug 2 ka Kingdom Hall, ug plano nilang humanon kini sa kataposan sa Abril 2017,” matod ni Dean Jacek, tigpamaba sa mga Saksi ni Jehova sa Pilipinas.

Ang kalihokan sa mga Saksi ni Jehova sa tibuok kalibotan, apil ang disaster relief, gidumala sa ilang Governing Body ug gisuportahan sa boluntaryong mga donasyon. Sa kapig 8 ka milyong Saksi ni Jehova sa tibuok kalibotan, kapin sa 209,000 ka membro ang anaa sa Pilipinas.

Media Contacts:

International: David A. Semonian, Office of Public Information, +1-845-524-3000

Philippines: Dean Jacek, +63-2-224-4444