Anton Ostapenko

• Natawo: 1991 (Ekibastuz, Kazakhstan)

• Mubong Impormasyon: Nagtrabaho ingong boiler inspector sa usa ka power plant. Siya ug ang iyang igsoong babaye gitudloan sa ilang inahan sa kamatuoran sa Bibliya niadtong tin-edyer pa siya. Nabawtismohan ingong Saksi ni Jehova niadtong 2005

  Naminyo siya kang Natalya niadtong 2015. Ganahan silang mag-snowboard ug mag-ski. Si Anton ganahan sab maggitara, mangisda, ug magdulag tennis

Niadtong Abril 19, 2019, gi-raid sa mga awtoridad sa Sharypovo ang 10 ka balay sa mga Saksi ni Jehova ug gisukitsukit ang mga igsoon didto. Giaresto si Brader Anton Ostapenko ug gibutang sa pretrial detention hangtod siya gibuhian niadtong Disyembre 20, 2019. Gikasohan siya sa pag-organisar ug mga kalihokan sa usa ka “ekstremistang” organisasyon.

Sulod sa unom ka bulan nga pagkapriso ni Anton, dihay mga higayon nga motago siya gikan sa security camera, moadto sa lababo sa iyang selda, ug mohilak pag-ayo.

Nakatabang niya pag-ayo ang pag-ampo. Si Anton miingon: “Mihangyo ko kang Jehova nga tabangan ko nga makalahutay.” Siya midugang: “Niadtong panahona, daghan kog angayng makat-onan. Mihamtong ko ug mas milig-on sa espirituwal. … Gani, kon naa ka sa lisod kaayo nga kahimtang [sama ini], mora kag deretsong nagpadapat sa imong nakat-onan. Gawas pa, dili sa tanang panahon nga naay Bibliya sa imong selda. Busa sa wala pa ko mapriso, nagabasa ko bahin kang Jehova. Pero didto [sa prisohan] bug-os nga gipakita ni Jehova kanako kon unsang matanga siya sa Diyos. Sa pagkatinuod, nalipay ko pag-ayo niini! Gawas nga nahimo siyang Labing Gamhanan para nako, nahimo siyang mahigugmaong Amahan nga nakasabot gyod sa akong kahimtang ug naghatag ug tabang ug suporta sa paagi nga wala nako damha, ug iya kanang gihatag sa hustong panahon.”

Nakadasig sab niya ang mga awit sa Gingharian. “Kanunay ming dungan nga manganta sa akong asawa ug nakatabang ni nga masag-ulo namo ang mga awit. Nakatabang to nako sa detention center. Inigpalong sa suga, mag-ampo ko ug mokanta, ug nakatabang nako na nga mahimong kalmado ug makatulog.”

Samtang naghulat si Anton sa resulta sa iyang kaso, padayon gihapon siyang nakatrabaho. Pero dili siya makabiya sa Sharypovo. Tungod niini nga restriksiyon, dili niya maubanan ang iyang inahan sa pagpa-check up sa doktor.

Atong iampo nga padayong hatagan ni Jehova ug kalinaw ang atong mga igsoon nga gilutos.—Juan 14:27.