Sa gabii sa Pebrero 10, 2020, si Brader Vadim Kutsenko, usa ka Saksi ni Jehova, gi-torture sa mga polis sa Chita, Russia. Gisigehag kulata ug tuok sa mga polis si Brader Kutsenko ug gipakoryentehan ang iyang tiyan ug batiis. Samtang gihimo nila kini, ilang gipugos si Brader Kutsenko nga mohatag ug impormasyon bahin sa ubang Saksi ni Jehova.

Sa buntag nianang adlawa, gi-raid sa mga polis sa Federal Security Services (FSB) ang halos 40 ka balay sa mga Saksi sa Chita, apil kang Brader Kutsenko. Pagka-alas 11:00 sa gabii, gidakop siya sa special police forces sa Russia didto sa balay sa iyang ugangan. Giposasan siya sa mga polis, gitabonan ang ulo, ug gidala sa duol nga lasang aron i-torture. Bisan pag gi-torture, wala gyod mohatag si Brader Kutsenko ug impormasyon bahin sa ubang Saksi. Kay nakita sa mga polis nga di gyod siya mohatag ug impormasyon, gidala siya sa opisina sa imbestigador para sa dugang interogasyon.

Human niana, gipriso si Brader Kutsenko kauban ang tulo pa ka brader nga gidakop human sa mga raid sa Chita​—si Sergey Kirilyuk, Pavel Mamalimov, ug Vladimir Yermolayev.

Paglabayg duha ka adlaw, ang Ingodinskiy District Court mimando nga prisohon sulod sa 72 ka oras si Brader Kutsenko, Kirilyuk, ug Mamalimov. Gipagawas sa korte si Brader Yermolayev ug gi-house arrest.

Niadtong Pebrero 15, gipagawas sa prisohan si Brader Vadim Kutsenko ug ang duha ka brader kay way igong ebidensiya ang imbestigador aron pasakahan silag kaso. Ang maong mga brader gipagawas sa imbestigador nga wala husaya sa korte ug wala hatagig bisan unsang restriksiyon.

Atong giampo si Brader Kutsenko ug ang ubang mga igsoon sa Russia nga padayon silang ‘magmaisogon ug magmalig-on,’ ug masaligon ta nga tabangan sila ni Jehova nga makalahutay niini nga mga pagsulay.​—Josue 1:7, 9.