Niadtong Pebrero 25, 2019, mihangyog dinaliang tabang sa European Court of Human Rights (ECHR) ang mga abogado ni Brader Sergey Loginov, usa sa pito ka brader nga gi-torture o gipaantos sa mga opisyal sa siyudad sa Surgut sa kasadpang Siberia. Ang unom ka igsoon nga gi-torture sab, gibuhian na, pero si Brader Loginov wala pa buhii sukad nga siya gipriso samtang naghulat ug husay ug wala sab siya mahatagig saktong medikal nga tabang sa iyang mga bun-og.

Niadtong Pebrero 26, usa lang ka adlaw human sa pagpadalag hangyo, miaksiyon dayon ang ECHR pabor sa maong hangyo. Gisugo sa Korte ang Russia nga ipasusi “dayon” sa pribadong mga doktor si Brader Loginov aron masayran kon unsa ka dakong kadaot sa “pisikal ug mental” ang iyang naagoman ug kon kaya ba niyang magpabilin sa prisohan samtang naghulat sa desisyon. Ang gobyerno sa Russia gitagalan hangtod sa Marso 11, 2019 sa pagsunod sa maong sugo.

Ihatag lang sa ECHR ang ingon niini nga mga hangyo dihang ang usa nameligrong makaagom ug permanenteng kadaot. Makapalipay kaayo ang paspas nga gihimong aksiyon sa ECHR​—usa lang ka adlaw gikan sa pagpasa sa hangyo. Gipasalig sa ECHR nga ilang i-monitor o bantayan pag-ayo ang mga pag-abuso nga giantos sa atong mga igsoon.

Sa pagkakaron, 19 ka mga Saksi ang gipasakaag kasong kriminal sa Surgut, diin 3 kanila ang gipriso samtang naghulat sa husay.

Samtang padayon tang mag-ampo para sa atong mga igsoon, hinaot nga hinumdoman nato kanunay ang makapadasig nga mga pulong ni Jeremias: “Bulahan ang tawo nga nagasalig kang Jehova, kansang paglaom anaa kang Jehova.”—Jeremias 17:7.